Vyevyo Yohani Aonile Liye M’masomphenya

Vevo namarumiwa Yohani ali liye mkaidi vailumba ya Patimo, Yesu oomuoni-a masomphenya okwakwana 16. Masomphenyala kootonyi-eda vyevyo vyaze viireye ira zina la Mulungu liweli-iwe, Umwenae uze koma teto ira vyofuna vyae viireye vailambwela ngati udimu.

M’masomphenya amo-iwa, Yohani oomuona Yehova angali udimu vapando waulemelelo. Oorungunuwiwa na andimuwa 24 owara vyowara vyowela koma teto vipewa vya golide. Yohani oovwa teto ula wa mabingu moi vookala teto wala wa vipaliwali. Andimuwa 24 ale kookokora nomulambelanga Yehova. M’masomphenya amo-iwa teto Yohani oona athu anjinji okumela m’mitundu koma teto viongelo vyo-iyana-iyana kamulambelanga Yehova. Mwanawakhosa, unoyo ngu Yesu, oowasogolela wu ma-inje amoyo. Vanduli viwa oona teto masomphenya amo-iwa. Oomuona Yesu angambeele lamulela monga Mwene ya udimu na andimuwa 24 ale. M’masomphenya amo-i Yohani oomuona Yesu awananga na nyowa, unoyo ngu Satana, moi nyoweyo yali na viwanda vyae. Satana na viwanda vyaevyo kootamangi-iwa udimu novokediwa va ilambwela.

Vanduli viwa Yohani oona masomphenya a Mwanawakhosa na athu 144,000 kangaimelile Vamwango wa Ziyoni. Oona teto mgelo apurumuwanga mulengalenga awandelanga athu ira kamuovenga Mulungu koma teto kamuva-enga ulemelelo.

Yohani oona teto masomphenya amo-iwa otonyi-eda kondo ya Arumagedo. Vakondwela, Yesu na gulu lae koomugonji-a Satana na ilambo yotakalela. Vanduli viwa Yohani oona masomphenya omari-a otonyi-eda etene okala udimu koma teto va ilambo yavati kakalanga mogwilizana. Oona Yehova angamuonongile Satana na etene omu-arela moi uliwetene udimu na va ilambwela alambela Mulungu koma teto lemekeza zina lae.