MURU 46
Chifukwa N’ni Munafuneela Vipeleka Koma Teto Badiziwa?
Muthu avipeleka wa Yehova unomulonjeza m’pempelo ira unerenga mulambela liye yeka koma teto ira unerenga ela vyofuna vya Mulungu vamalo owambela vamoywaye. (Salimo 40:8) Era eeno unobadiziwa. Ula nguumboni woi uvipeleka wa Yehova. Eeno vipeleka wa Yehova chiyongo yofuneya vinjinji ineyo muthu unafuneela liye panga vamoywaye. Ndiye voi vipeleka wa Yehova kofuneya vinjinji koma teto unochenja moywinyu, chin’ni inauiri-eni sakula vyevi?
1. Chin’ni inamupangi-a muthu ira avipeleke wa Yehova?
Ninovipeleka wa Yehova chifukwa yoi ninomuomeliwana vinjinji. (1 Yohani 4:10, 19) Baibulo linaniwandela ira: “Uomeliwengana Yehova Mulungwawo na murimawo wetene, moywawo wetene, maganizwawo etene na kopolo dawo detene.” (Maliko 12:30) Ninotonyi-eda ira ninomuomeliwana Mulungu muvyoonga na vyoira vi-u. Vyevi ninokoza vifwanafwani-a na lombwana na iyana anayo kasakulile telana chifukwa yoi kanoomeliwana vinjinji. Pivyofwanafwana na muthu unoyo unaomeliwana Yehova. Chikondi inomupangi-a ira avipeleke wa liye koma teto badiziwa.
2. Kodi Yehova unadalisa avi atumikaye anayo kabadiziwile?
Mwabadiziwa munoza muvolowe mubanja lapama vinjinji la Yehova. Era eeno munoza muone ira Yehova unouomeliwanani vinjinji mundila do-iyana-iyana. Moi munoza mukale vausamwali olimba na liye kwaranya vathwi ila. (Welengani Malaki 3:16-18.) Munoza muwambeele muona Yehova ngati Babinyu teto munoza mukale na abali na arongola vailambo yetene yavati, anayo kanaomeliwana Yehova koma teto anayo kanaomeliwana vinjinji m’mo-i na fwaye. (Welengani Maliko 10:29, 30.) Komave viikala vyongo vimo-i vyevyo munafuneela nyo viira mwa anabadiziwe. Munafuneela funjeda vyokuza Yehova muomeliwana koma teto roromela Mwanaye. Era eeno muvipeleke wa Yehova tapulela ira mumuwandele m’pempelo ira munoza mumutumikele wamoywinyu wetene. Mwaira vyongo vyevi nobadiziwa, munoza mukaena mwai okaana moyo mpakana walewale. Chichifukwa iwa mawu a Mulungu kanaonga ira ubadizo unovulumucha muthu. — 1 Petulo 3:21.
FUNJEDANI VYOWENJEDELEYA
Saelani ira muiziwe funeya ovipeleka wa Yehova koma teto badiziwa.
3. Iyo etene ninafuneela sakula unoyo ninafuna iyo mutumikela
Wan’le wu Izarayeli, athu amo-iwa kaganiza ira kanokoza lambela Yehova koma vathawi imo-ive ineyo kalambelanga mulungu onama, Baala. Koma Yehova ootumiza namaongela Eliya ira akami-e athwayo zindikila ira panga vyevi kai ofwanelela. Welengani 1 Mamwene 18:21, era eeno tapanyani yofuka yo-arelela:
Kodi Aizarayeli kafuneela sakula panga n’ni?
Mofwanafwana na Aizarayeli, na-iyene ninofuneela sakula unoyo ninafuna iyo mutumikela. Welengani Luka 16:13, era eeno tapanyani vyofuka vyo-arelavi:
Chifukwa n’ni kai vyowandeya lambelanga Yehova koma vathawi imo-ive ineyo lambelanga muthu kapena yongo imo-iwene?
Kodi ninamutonyi-ede avi Yehova ira noosakula mutumikela liye yeka?
4. Muganizelenga vyevyo Yehova unaira liye votonyi-eda ira unouomeliwanani
Yehova univa-a mphaso dinjinji damtengo wavadimu. Ndiye iyo ninamuva-e n’ni? Onelani VIDIYO.
Kodi Yehova uutonyi-edileni avi chikondi mundila dinjinji? Welengani Salimo 104:14, 15 na 1 Yohani 4:9, 10, era eeno tapanyani vyofuka vyo-arelavi:
Kodi timphaso diivi dedo Yehova auva-ileni liye dedo munadiyamikela nyo vinjinji?
Kodi mphaso dedo dinauiri-ani ira mumuonenga avi Yehova?
Muthu aniva-a mphaso imo-iwene ineyo inaniomela vinjinji, ninomuyamikela. Welengani Dotoronomo 16:17, era eeno tapanyani yofuka yo-arelela:
Mwaganizela vyetene vyevyo Yehova uuireleni liye, kodi munaona ira munamuva-e n’ni?
5. Ninofwanya madaliso anjinji navipeleka wa Yehova
Athu anjinji kanoganiza ira kanerenga kala osangalala akala kali ochuka, akala kana-inda chito yapama kapena akala kan’na ndalama dinjinji. Kodi vyevi pivyoona? Onelani VIDIYO, era eeno tapanyani vyofuka vyo-arelavi.
Chifukwa n’ni Andrey asakulire iya vocha bola ngakale ira oowuomeliwana vinjinji?
Kodi munaganiza ira oopanga pama iya vocha bola novipeleka wa Yehova? Chifukwa n’ni munaonga eeno?
Namarumiwa Paulo aanakale Mkiristu oo-inda chito yavadimu. Liye ali angapangile mapuzilo okuza malamulo achiyuda, teto oofunji-iwa na anamafunji-a ochuka vinjinji vathawi ineyo. Koma oo-iya vyetene vyevi liye kala Mkiristu. Kodi Paulo oodandaula na vyevyo asakulile liye? Welengani Afilipi 3:8, era eeno tapanyani vyofuka vyo-arelavi:
Chifukwa n’ni Paulo aongile ira vyevyo apanga liye vowambeela aanakale Mkiristu vyali ngati “likusa lavikata”?
Nanga afwanyile madaliso aavi chifukwa ya vyevyo asakulile liye?
Kodi munaganiza ira moywiyu unokoza kala wapama vinjinji akala munasakule tumikela Yehova?
Paulo angakalile Mkiristu oofwanya vyongo vinjinji kwaranya vyevyo a-iile liye
ATHU AMO-IWA KANAONGA IRA: “Muthu kunafuneela vipeleka vinjinji wa Mulungu. Bola akala unapepela ba-i.”
Chifukwa n’ni munaona ira vipeleka wa Yehova kofuneya vinjinji?
VYEVYO NIFUNJEDILE IYO
Ninovipeleka wa Yehova koma teto badiziwa chifukwa yomuomeliwana.
Vyofuka Vyoweli-eda
Chifukwa n’ni Yehova uli ofwaneelela muomeliwana nomulambela na murima wetene?
Kodi Yehova unaadalisa avi atumikaye anayo kabadiziwile?
Kodi nyo munofuna peleka moywinyu wa Yehova?
ONANI VIMO-I
Onani chifukwa iwa malimba imba m’mo-iwa koma teto malimba vocha bola kasakulile vipeleka wa Yehova.
Zimene Achinyamata Amafunsa—Kodi Ndidzachita Zotani Pamoyo Wanga?—Zimene Anasankha (6:54)
Onani vifukwa vimo-iviwa vyevyo vinapangi-e muthu ira avipeleke wa Yehova.
“N’chifukwa Chiyani Muyenera Kudzipereka kwa Yehova?” (Nsanja ya Olonda, January 15, 2010)
Onelani nyimbwela ira muone mwemo athu ovipeleka wa Yehova kanasangalalelaathu.
Mukhani yoi “Kwa Zaka Zambiri Ndinkadzifunsa Kuti, ‘Kodi Mulungu Anatilengeranji Anthufe?’” onani vyevyo vyamuiri-ile muthu m’mo-iwa ganizela nawili vyongo vyevyo aviona liye ira pivyofuneya vamoywaye.
“Baibulo Limasintha Anthu” (Nsanja ya Olonda, November 1, 2012)