Kodi Muli Okozeya Vipeleka wa Yehova?

1-2. Kodi muthu unafuneya panga n’ni a-anabadiziwe?

CHAKA 5 diviriledi, athu okwaranya 1 miliyoni koobadiziwa nokala a Mboni da Yehova. Mofwanafwana na Timoteyu wamuthawi ya atumwi, anjinji mwa athwala kafunjedile choonadi ambeela kangali ‘ang’onong’ono.’ (2 Tim. 3:14, 15) Athu amo-iwa kafunjedile kangaulukulile koma teto amo-iwa kangakalambile. Chineneveva, muzimai m’mo-iwa unoyo afunjeda Baibulo na a Mboni da Yehova, oobadiziwa angan’na chaka 97.

² Ngati munafunjeda Baibulo kapena makolwinyu mba a Mboni, mwina munoganiza vyobadiziwa. Inela chiyolinga yapama vinjinji. Komave mwa-anabadiziwe, munafuneya vipeleka wa Yehova. Khanila inofotokoza vyevyo vipeleka unatantauzaathu. Inoutandizani teto ona chifukwa iwa kamunafuneya kaana mantha vakhani yovipeleka nobadiziwa ngati munaona ira mukozeya panga eno.

KODI VIPELEKA UNATANTAUZA N’NI?

3. Pelekani visazo vya athu anayo kavipelekile wa Yehova.

³ Baibulo laonganga vyovipeleka, linaongecha vya muthu unoyo usakulile ira apange vyongo vimo-iviwavyene vyopatuleya. Aizaraeli kali tundu ovipeleka wa Yehova. Koma Aizaraeli amo-iwa koovipeleka wa Yehova mwavadela. Mwaisazo, Aroni oowara “izindikilo yopatuleya yovipeleka,” ineyo yali isulo yonyezimela yagolide ineyo yakala va nduwila vae. Isulweyo yatonyi-eda ira liye oopatuliwa ira atumikelenga mwavadela monga ndimuwa wa asembe mu Izaraeli. (Lev. 8:9) Naaliwene teto Anaziri koovipeleka wa Yehova mundila yavadela. Mawu oyi “Mnaziri,” anayo kanakumela wu mawu a Chiheberi oyi nazirʹ kanatantauza “Opatuliwa,” kapena “Ovipeleka.” Anaziri kafuneya arela malamulo amo-iwene avadela anayo kafwanyeya mu Chilamulo ya Mose. — Num. 6:2-8.

4. (a) Kodi muthu unoyo uvipelekile wa Yehova unatonyi-eda avi ira upatuliwa mwavadela? (b) Kodi ‘vikoonda’ unatantauza n’ni? (Onani teto ithuzithuzi.)

⁴ Muthu avipeleka wa Yehova, unosakula kala ofunjeda wa Yesu Kiristu ndipo unoona ira panga chifunilo ya Mulungu kofuneya vinjinji vamoywae. Ndiye kodi vipeleka unatangani-avo panga n’ni? Yesu aongile ira: “Ngati muthu unafuna ndi-arela, avikoonde eka.” (Mat. 16:24) Mawu a Chigiriki anayo kaamasuleleathu ira “vikoonda weka” kanokoza ongiwa teto ira “viruni-a ira kupange yongo imo-iwene.” Monga mtumiki ovipeleka wa Yehova, ninafuneya viruni-a ira kanipange iliyetene ineyo kinamusangalasa Yehova. (2 Akor. 5:14, 15) Vyevi vinotangani-avo koonda “chito da thuthu” monga chiwerewere. (Agal. 5:19-21; 1 Akor. 6:18) Kodi viruni-a va vyongo ngati vyevi unokoza kala worucha? Naari, simbwasimbwa ngati ninamukonda Yehova ndipo kaninakaikela ira vwela malamulwae unonitandiza ira vyongo viniendelenga pama. (Sal. 119:97; Yes. 48:17, 18) M’bali m’mo-iwa zina lae Nicholas aongile ira: “Munokoza sakula ira muonenga malamulo a Yehova ngati visulo vya ndende vyevyo vinaulepeli-ani panga vyongo vyevyo munafuna nyo kapena ngati visulo vyaumalo osungelawo vinyama vyochinga ira aphodogoma katiuporocheni.”

5. (a) Kodi muthu unavipeleka avi wa Yehova? (b) Kodi vipeleka una-iyana avi nobadiziwa? (Onani teto ithuzithuzi.)

⁵ Kodi muthu unavipeleka avi wa Yehova? Unomulonjeza mpempelo ira unamulambelenga liye ekave koma teto ira unerenga ela vyevyo Yehovoyo unafuna liye vamalo owambeela. Veva unakalecha amulonjezanga Yehova ira unoza apitilize mukonda na ‘murimae wetene, moywae wetene, maganizwae etene, na kopolo dae detene.’ (Maliko 12:30) Muthu unavipeleka angali vamalo aekave ndipo inakalecha khani ya vaari va liye na Yehova. Koma badiziwa unaireya vagulu ndipo unosimikizela athu amo-iwa ira muthuyo oovipeleka. Vipeleka ti lonjezo lopatuleya ndipo munafuneya likwakwaneli-edanga. Naliyene teto Yehova unoembekezela ira munerenga likwakwaneli-eda. — Nam. 5:4, 5.

CHIFUKWA N’NI NINAFUNEYA VIPELEKA WA YEHOVA?

6. Kodi chin’ni ineyo inamupangi-a ira muthu avipeleke wa Yehova?

⁶ Chifukwa ilukulu ineyo inanipangi-a ira nivipeleke wa Yehova chi yoi ninomukonda. Chikondila kinakeda landela mwemo ninavwela iyo. M’malomwiwa, inazecha chifukwa ‘yoiziwa vyongo molondola’ koma teto ‘vwechecha vyongo vyauzimu’ vyevyo vipangi-ile ira mumukondenga vinjinji Mulungu. (Akol. 1:9) Funjeda Malemba uutandizani simikizela ira (1) Yehova ngu weniweni, (2) Baibulo Mbamawae owandeliwa, koma teto (3) liye uno-indi-eda chito gulu lae vokwakwaneli-eda yolingae.

7. Kodi muthu unafuneya ira apangenga n’ni a-anavipeleke wa Mulungu?

⁷ Athu anayo kanavipeleka wa Yehova kanoiziwa makundo owambeela ofwanyeya m’Mawu a Mulungu ndipo kanowa-arela vamoywiwa. Kanoesaesa mwemo kanawandeleathu awandela athu amo-iwa vyevyo kanaroromelaathu. (Mat. 28:19, 20) Kanomukonda vinjinji Yehova ndipo kanofunechecha mulambela liye eka. Kodi vyevi pivyevyo nanyen’ne teto munapanga nyo? Mwakala na chikondi ngati inela, kamunaza muona ngati vipeleka koma teto badiziwa winyu pivyongo vyoi munakeda vipanga vofuna musangalasa muthu unoyo unanifunji-a Baibulo, makolwi-u koma teto kamunaza muviona ngati pivyongo vyoi ninakeda vipanga vofuna asazi-eda afwi-u.

8. Kodi yamikela unautandizeni avi ira muvipeleke wa Yehova? (Salimo 116:12-14)

⁸ Vinokala vyo-orucha ira muvipeleke wa Yehova ngati munaganizela vyongo vyetene vyevyo uupangeleni liye. (Welengani Salimo 116:12-14.) Baibulo linaonga ira Yehova ngunoyo unapeleka “mphaso iliyetene yapama na yangwilo.” (Yak. 1:17) Mphaso ilukulu vinjinji ineyo aniva-ile liye chi sembe ya Mwanae, Yesu. Kakedani ganizela, dipo lipangi-a ira vikale vyowandeya ira mukale vausamwali na Yehova. Koma teto litandiza ira mukaena mwai oza kala na moyo mpakana walewale. (1 Yoh. 4:9, 10, 19) Vipeleka chindila yapama yotonyi-eda ira munoyamikela chikondi ilukulu ineyo Yehova uutonyi-edeni liye koma teto madaliso anayo uuva-ileni liye. (Doto. 16:17; 2 Akor. 5:15) Khani yokuza yamikela ifotokoziwa mu phuzilo 46, likundo 4, m’buku la Sangalalani na Moyo Mpakana Walewale, vevo vali vidiyo ya 3 minisi ya muru woi, Peleka Mphaso wa Mulungu.

KODI MULI OKOZEYA VIPELEKA KOMA TETO BADIZIWA?

9. Chifukwa n’ni muthu kanafuneya vikakamiza ira avipeleke wa Yehova?

⁹ Mwina munokoza onanga ira kamunakozeye ira muvipeleke koma teto badiziwa. Mwina teto munafuneya chenja vyongo vimo-i ira mu-arelenga makundo a Yehova. Kapena teto munafuneya thawi yoinjiva ira mulimbi-e iroromelo inyu. (Akol. 2:6, 7) Kai ofunjeda etene anayo kanadowa vasogolo mofwanafwana ndipo a-ima katinakalecha okozeya vipeleka koma teto badiziwa vausinkhu ofwanafwana. Muonenga mwemo munadowela nyo vasogolo mogwilizana na vyevyo munakwakwani-e nyo ndipo kamuvierekezelenga na muthu m’mo-i. — Agal. 6:4, 5.

10. Kodi munafuneya panga n’ni ngati munaona ira kamukozeile ira muvipeleke koma teto badiziwa? (Onani teto bokosi loi “Athu Anayo Kaulukulele M’mabanja a Mboni.”)

¹⁰ Ngakale mungaonile ira kamukozeile ira muvipeleke wa Yehova, mupitilizengave kala na yolinga inela. Mumuvepenga ira autandizeni koza vyevyo munafuneya nyo chenja. (Afil. 2:13; 3:16) Iziwani ira liye unovwa pempelo linyu ndipo unoza autandizeni. — 1 Yoh. 5:14.

CHIFUKWA IWA ATHU AMO-IWA KANAZENGELEZA

11. Kodi Yehova unanitandize avi ira nikaleve ororomeleya wa liye?

¹¹ Athu amo-iwa ngakale ira kanakalecha kangakozeile, kanozengeleza ira kavipeleke koma teto badiziwa. Aliwa kanokoza ganizanga ira, ‘Bwanji ngati vanduliviwa ndinapange chimo lilukulu koma teto chosiwa?’ Ngati mun’na maganizo anala, iziwani ira Yehova unoza auva-eni vyevyo munafuneya nyo ira “mukale na ikalelo yogwilizana na vyevyo unafuna [liye], ira mumusangalasenga va iliyetene.” (Akol. 1:10) Liye unoza auva-eni teto kopolo ira mupangenga vyofwanelela. Yehova utonyi-eda ira unokoza panga vyevi chifukwa utandizavo wale athu anjinji ira kapangenga vyofwanelela. (1 Akor. 10:13) Chichifukwa iwa vanakala athu oyeva vinjinji anayo kanachosiwa mupingo. Yehova unotandiza athwae ira kakaleve ororomeleya.

12. Kodi ninapange avi ira nipewe panga chimo lilukulu?

¹² Muthu uliwetene unoyo kai wangwilo unoesiwa ira apange vyotakala. (Yak. 1:14) Komave, munokoza sakula vyevyo munapange nyo mwagumana na maesero. Likundo ti loi nyo ngunoyo un’na udindo osakula vyevyo munafuna nyo panga vamoywinyu. Ngakale ira athu amo-iwa kanoruni-anga vyevi, nyo munokoza vifunji-a ekinyu ira kamulakalakenga vyongo vyotakala. Eno ngakale mungaambeelile lakalaka vyongo vyotakala, munokoza viruni-a ekinyu ira kamuvipange. Ira vyevi viwandeye, mupempelenga dambo lililetene, mukalenga na chizolowezi yofunjeda Mawu a Mulungu vaekinyu, mufwanyeyenga vamisonkano koma teto muwandelenga athu amo-iwa vyevyo munaroromela nyo. Panga vyevi thawi detene unoutandizani ira mukwakwaneli-edenga lonjezo linyu lovipeleka. Ndipo kamudiwalenga ira Yehova unoza autandizeni. — Agal. 5:16.

13. Kodi Yosefe aniva-ile isazo yoi avi?

¹³ Vinokala vyo-orucha ira mukwakwaneli-edenga vipeleka winyu ngati munasakule panopa vyevyo munaze nyo mupange mwaza mugumana na maesero. Baibulo linofotokoza vya athu angasene anayo kapangile vyevi, ngakale ira naaliwene katali angwilo. Mwaisazo, mu-iyana wa Potifara ooesa moweli-edaweli-eda mukopa Yosefe. Koma liye ooiziwa wale vyofuneya panga. Baibulo linaniwandela ira liye ‘ookoonda,’ ndipo aongile ira: “Ndinapangele n’ni yotakala ilukulu ngati inela nochimwela Mulungu?” (Gen. 39:8-10) Veva pivyovaela oneya ira Yosefe ooiziwa vyevyo unapange liye iyanoyo a-anaambeele mukopa. Vyevi vyoomutandiza ira apange vyofwanelela angagumanile na maeserwayo.

14. Kodi ninapange avi ira niwandenga koonda panga vyotakala?

¹⁴ Kodi munapange avi ira mukaleve ororomeleya ngati Yosefe? Musakulenga panopa vyevyo munapange nyo mwaza mugumana na maesero. Mufunjedenga koonda mombaraanya vyongo vyevyo Yehova unaidanana liye ndipo kamudedi-enga ira muwambeele kaye viganizela pama. (Sal. 97:10; 119:165) Vyevi vinoza viutandizeni ira kamupange chimo chifukwa munaza mukala ira muiziwa wale vyofwanelela panga.

15. Kodi muthu unatonyi-ede avi ira “unomusaelasaela [Yehova] na murima wetene?” (Aheberi 11:6)

¹⁵ Mwina nyo munoiziwa ira moofwanya choonadi ndipo munofuna tumikela Yehova na muriminyu wetene koma munozengeleza ira muvipeleke koma teto badiziwa. Ngati chi eno, munokoza panga vyevyo Mwene Davide apangile liye. Munokoza muvepa Yehova ira: “Ndifufuzeni nyo Mulungu, ndipo muiziwe murimanga. Ndifufuzeni ira muiziwe maganizwanga anayo kanandipangi-a kaana nkhawa. Muone ngati mwa miyo muli iliyetene yotakala, ndipo mundisogolele mundila yamuyaya.” (Sal. 139:23, 24) Yehova unodalisa athu anayo “kanamusaelasaela na murima wetene.” Mwaesaesanga ira mukwakwaneli-edenga yolinga inyu yoi muvipeleke koma teto badiziwa, munotonyi-eda ira munomusaelasaela na murima wetene. — Welengani Aheberi 11:6.

PITILIZANI MUWANDAMELA YEHOVA

16-17. Kodi Yehova unaakoka avi athu anayo kaulukulele m’mabanja a Mboni? (Yohani 6:44)

¹⁶ Yesu aongile ira ofunjedae kanakokiwa na Yehova. (Welengani Yohani 6:44.) Likundoli tilopangi-a chidwi ndipo kaganizelani mwemo linaukuzelaniathu. Yehova unoona imo-iwene yapama mwa muthu unoyo unamukoka liye. Liye unomuonanga muthuyo monga “chumae yavadela.” (Doto. 7:6) Mu pumwemo teto unauonelani liye nyo.

¹⁷ Mwina muli mwana ndipo makolwinyu Mbaamboni. Ndiye mwina munokoza onanga ira munatumikela Yehova chifukwa yoi makolwinyu Mbaamboni o-okala chifukwa yoi liye uukokani. Komave Baibulo linaonga ira: “Andamelani Mulungu ndipo naliyene unoza auwandameleni.” (Yak. 4:8; 1 Lim. 28:9) Eno nyo mwaambeela muwandamela Yehova, naliyene unouwandamelani. Yehova kanakeda uonani monga muthu unoyo uli mugulu lae koma liye unokoka muthu uliwetene vaeka tangani-avo athu anayo kaulukulele m’banja la Mboni. Muthu unola aambeela andamela Yehova, naliyene unomuwandamela monga mwemo nionele iyo va Yakobo 4:8. — Erekezelani na 2 Atesalonika 2:13.

18. Kodi ninaza nikambirana n’ni mukhani yo-arela? (Salimo 40:8)

¹⁸ Mwavipeleka wa Yehova koma teto badiziwa munakalecha mumusazi-edanga Yesu. Liye oovipeleka mofunechecha wa Babae ira apangenga iliyetene ineyo kamuwandelileathu. (Welengani Salimo 40:8; Aheb. 10:7) Mukhani yo-arela, ninoza nikambirane vyevyo vinautandizeni ira mutumikelengave Yehova mwabadiziwa.