MURU 01
N’nga Bayibulo Linaukhami-edeni Avi?
Ethene iyene ninokhaana vyofuka vinjinji vyokhuza ingumi, zuzuma, ukhwa, koma thetho vyevyo vinaireye usogolo. Thetho ninokhumbanyela vyongo vya dambo na dambo, n’nga mwemo ninavisamalele-iyo vaingumi-u koma thetho mwemo ninakhaanelena iyo banja laimwerumweru. Athu anjinji koiziwa ira Bayibulo linosomeda vyofuka vyofuneya vinjinji vyokhuza ingumi. Wenjedela vevo linoniva-a malangizo a mwemo ninakhaanelena iyo ingumi yaimwerumweru. Nyo munona ira Bayibulo linokhoza khami-eda muthu onoyo mumuiziwile nyo?
1. Pivyofuka vyiivi vyevyo Bayibulo linasomedaathu?
Bayibulo linosomeda vyofuka vyofuneya vinjinji. Mofwanafwani-a: N’nga ingumi yambeele avi? N’nga yolinga ya ingumi chin’ni? N’nga mwasiwa ngwan’ni athu kanazuzuma? Chin’ni inaireya muthu akhwa? Mwasiwa ngwan’ni vanaireya khondo dinjinji, voyi athu vailambo yethene kanofuna murendele? Chin’ni inaze iireye na ilambo yavathila? Fuka vyofuka n’nga vyevyi kaichimwa. Athu mamiliyoni anjinji koiziwa ira vyosomeda vya m’Bayibulo pi vyokhami-a.
2. N’nga Bayibulo linanikhami-ede avi ira nikhalenga osangalala va ingumi-u ya dambo na dambo?
Bayibulo linoveleela malangizo aphama. Mofwanafwani-a, linokhami-a mabanja ira kakhaena imwerumweru yaimbarimbari. Linoniwandela vyevyo ninaire iyo nakhumbanyanga koma thetho mwemo ninakhalele iyo osangalala na chitwi-u. Bukhuli linoukhami-ani iziwa vyevyo Bayibulo linafunji-aathu, voonga vya myasa dedi koma thetho dimo-i. Vamo-i nyo munofiya vosomedela ira “malemba ethene [vamo-i nere Bayibulo lethene] . . . mbokhami-a.”—2 Timoteyu 3:16.
Bukhuli kalinavolowa m’malo mwa Bayibulo. Koma linoukhami-ani ira muliiziwe phama Bayibulo. Eeno vilimbi-edeni ira muwelengenga malemba a m’Bayibulo anayo kathonyi-ediwe m’bukhuli, thetho mufwanafwani-enga vyevyo Bayibulo linawongaathu na vyevyo munafunjeda nyo.
FUNJEDANI VYOWENJEDELEYA
Onani mwemo Bayibulo linakhami-edelaathu athu, vyevyo munairenyo ira muwomeliwengana welenga Bayibulo, koma thetho ira mwasiwa ngwan’ni munafuneela khami-ediwa ira mulivwecheche phama.
3. Bayibulo podi nisogolelanga vandili-u
Bayibulo lili n’nga wala wakhopolo wanyale. Eeno podi nikhami-a ira nisakhulenga phama vyongo, thetho linowonga vyevyo vinaze viireye usogolo.
Welengani Salimu 119:105, era eeno tapanyani vyofuka vyo-arelavi:
N’nga malimba lemba salimuli aliona avi Bayibulo?
N’nga nyo munaliona avi Bayibulo?
4. Bayibulo linokhoza someda vyofuka vi-u
Onani mwemo Bayibulo lamukhami-edeleaathu purusori wamu-iyana m’mo-iwa fwanya vyosomeda vya vyofuka vyevyo anʼnaliye wa chaka dinjinji. Onelani VIDIYO, era eeno tapanyani vyofuka vyo-arelavi.
Mu vidiywela pivyofuka vyiivi vyevyo purusori an’naliye?
N’nga funjeda Bayibulo wamukhami-edile avi?
Bayibulo linonilimbi-a ira nisaelenga vyosomeda vya vyofuka vi-u. Welengani Mateyu 7:7, era eeno tapanyani yofuka yo-arelela:
Pivyofuka vyiivi vyevyo munafuna nyo ira Bayibulo lisomede?
5. Nyo podi womeliwangana welenga Bayibulo
Athu anjinji kanoomeliwana welenga Bayibulo, moi vyevyi vinowakhami-a vinjinji. Onelani VIDIYO, era eeno tapanyani vyofukha vyo-arelavi.
Mu vidiywela, mwasiwa ngwan’ni azombwala kataomeliwana welenga?
N’nga mwasiwa ngwan’ni aluwa kanawomeliwana welenga Bayibulo?
Mazu a m’Bayibulo kanonimiyali-a koma thetho kanoniva-a idedi-edo. Welengani Aroma 15:4, era eeno tapanyani yofuka yo-arelela:
Munofuna iziwa vinjinji vyokhuza yolanyeda ya m’Bayibulo eneyo inanimiyali-a koma thetho niva-a idedi-edo?
6. Athu amo-iwa podi nikhami-a livwechecha phama Bayibulo
Wenjedela vofunjeda Bayibulo vaekhinyu, athu anjinji koiziwa ira tapanya vya m’Bayibulo na athu amo-iwa kokhami-a vinjinji. Welengani Vyoira 8:26-31, era eeno tapanyani yofuka yo-arelela:
Ninaire avi ira nilivwechechenga phama Bayibulo?— Onani vesi 30, 31.
M’bukhu la Vyoira, mulombwana m’mo-iwa oofuneela likhami-edo ira avwecheche phama malemba. Athu anjinji malambwano kanaona ira pivyokhami-a tapanya vya m’Bayibulo na athu amo-iwa
ATHU AMO-IWA KANAWONGA IRA: “Funjeda Bayibulo kuthathila thawi.”
Nyo munawumbuwela avi? Mwasiwa ngwan’ni?
MAKHUNDO OGWADELA
Bayibulo linoniva-a malangizo onikhami-a wa dambo na dambo, linosomeda vyofuka vyofuneya vinjinji, thetho linonimiyali-a noniva-a idedi-edo.
Makhundo Oweli-eda
N’nga Bayibulo linava-a malangizo va myasa diivi?
Pivyofuka vyiivi vyevyo Bayibulo linasomedaathu?
Pivyongo vyiivi vyevyo munafuna nyo funjeda m’Bayibulo?