Pitilizani Enda Mogwilizana na Iroromelo

1. Chifukwa n’ni Paulo asangalala aganizela vyevyo apangile liye va utumikae?

VATHAWI imo-iwa namarumiwa Paulo ooiziwa ira u-alile vang’ono phiwa. Komave oosangalala chifukwa yoi ooiziwa ira upanga vyetene vyevyo afuneela liye panga vamoywae. Voganizela vyevi liye aongile ira: “Ndiitamanga va mpikisanola mpakana umagomi-edo. Ndiikalave na irorormelo.”(2 Tim. 4:6-8) Paulo oosakula vyoira mwazelu va utumikae moi kaakaikela ira Yehova unosangalala na liye. Na-iyene teto ninafuneya sakulanga vyongo mwazelu ira Yehova asangalalenga na iyo. Koma kodi ninapange avi vyevi?

2. Kodi enda mosogoleliwa na iroromelo unatapulela n’ni?

² Vathawi imo-i Paulo oofotokoza vya liye koma teto Akristu amo-i ororomeleya, moi liye aongile ira: “Ninaenda mosogoleliwa na iroromelo, ookala mosogoleliwa na vyooneya na maso.” (2 Akor. 5:7) Kodi veva Paulo atapulela n’ni? M’Baibulo, thawi dimo-i mawu oyi “enda” kanatapulela vyevyo muthu unasakula liye panga vamoywae. Muthu aendanga mosogoleliwa na vyevyo unaona liye na maso unosakula vyongo volandela vyevyo unaona liye na maswae, vwa na mabarwae koma teto mwemo unavwela liye m’murimani mwae. Koma muthu unoyo unaenda mosogoleliwa na iroromelo unodalila Yehova moi unosakula vyongo vyevyo Yehova unafuna liye. Vyevyo unapanga liye vinotonyi-eda ira kanakaikela ira Mulungu unoza amudalise koma teto ira vyongo vinoza vimuyendele pama a-arelanga malangizo a Yehova ofwanyeya m’Mawae. — Sal. 119:66; Aheb. 11:6.

3. Kodi ninafwanya madaliso oyi avi naendanga mosogoleliwa na iroromelo? (2 Akorinto 4:18)

³ Pivyoona ira thawi dimo-i etene iyene ninosakula vyongo volandela vyevyo ninaona iyo na maso kapena vyevyo ninavwa iyo. Koma nasakulanga vyoira vakhani dilukulu vokedanga landela vyevyo nionile iyo kapena vwa, ninokoza gumana na mavuto alukulu. Ninaonga eno chifukwa yoi maso na murimi-u vinokoza nipusi-a. Ninokoza ambeela nyalanyaza vyevyo Mulungu unafuna liye kapena malangizo anayo unaniva-a liye. (Nam. 11:9; Mat. 24:37-39) Koma naendanga mosogoleliwa na iroromelo ninokoza sakulanga vyongo vyevyo ‘pivyosomedeleya wa Ambwiye.’ (Aife. 5:10) Na-arelanga malangizo a Mulungu ninoza nikaena murendele wa m’murimani koma teto ninoza nikaena moyo wosangalala. (Sal. 16:8, 9; Yes. 48:17, 18) Moi napitiliza enda mosogoleliwa na iroromelo ninoza nifwanye moyo oomala. — Welengani 2 Akorinto 4:18.

4. Kodi ninaiziwe avi akala ninasakula vyongo mosogoleliwa na iroromelo kapena na vyooneya na maso?

⁴ Kodi ninaiziwe avi akala ninaenda mosogoleliwa na iroromelo kapena na vyooneya na maso? Ninafuneya vifuka vyofuka ngati vi: Kodi ndinosakula vyoira volandela n’ni? Kodi ndinosakula vyoira volandela na vyevyo ndinaona miyo na maso ba-i? Kodi ndinororomela Yehova no-arelanga malangizwae vosakula vyoira? Mukhanila ninoona ineyo inanikami-e ira nipitilize enda mosogoleliwa na iroromelo m’mbali taarudi: 1 vosakula chito, 2 nasakulanga muthu woi nitelanena, koma teto 3 gulu la Mulungu laniva-a malangizo. Nakambilananga mbali iliyetene onani vyevyo vinanikami-e ira nisakulenga vyoira mwazelu.

NASAKULANGA CHITO

5. Kodi ninafuneya ganizela n’ni nasakulanga chito?

⁵ Etene iyene ninofuna ira nifwanyenga vyofuneya vamoywi-u koma teto nisamalelenga athu a m’banja li-u. (Nam. 7:12; 1 Tim. 5:8) Chito dimo-i dinakala da malipilo apama. Muthu unokoza fwanyanga vyofuneya vamoyo nosunganga teto ndalama dimo-i doi aze adi-indi-ede chito usogolo. Koma chito dimo-i dinakala da malipilo oyeva moi muthu unakedecha kwakwani-a fwanya yodja vyowara na malo ogona. Chichifukwa iwa nasakulanga chito ninoganizela ndalama dedo ninawachelenga iyo. Koma akala muthu unakedenga ganizela vyevi unokoza kala muthu unoyo unaenda mosogoleliwa na vyevyo unaona liye na maso.

6. Kodi ninatonyi-ede avi ira nikaana iroromelo nasakula chito? (Aheberi 13:5)

⁶ Akala nin’na iroromelo ninoza niganizele mwemo chito ineyo ninasakule iyo inakuzeleathu usamwali-u na Yehova. Ninokoza vifuka ira: ‘Kodi chito inela inopangi-a ira ndipangenga vyevyo Yehova unaidanana liye?’ (Miya. 6:16-19) ‘Kodi inosokoneza pologalamwanga yolambela koma teto inopangi-a ira ndilapelanenga na banja langa wa thawi indendai?’ (Afil. 1:10) Akala vili eno, vinokala pama oosomedela chitweyo, ngakale ira chito dinosauweleya. Chifukwa yoi nikaana iroromelo, vyevyo ninasakula iyo vinafuneya tonyi-eda ira ninororomela ira Yehova unoza anisamalele. — Mat. 6:33; welengani Aheberi 13:5.

7-8. Kodi m’bali m’mo-i wau South America atonyi-edile avi ira ooenda mosogoleliwa na iroromelo? (Onani teto ithuzithuzi.)

⁷ M’bali m’mo-i wau South America zina lae Javier,a oona upama woenda mosogoleliwa na iroromelo. Liye aongile ira: “Ndoofukedela chito imo-iwa yapama. Ndalama dedo ndawachelenga miyo dali doinjiva kwaranya ndalama dedo ndawachela miyo vowambeela moi nderenga sangalala.” Koma Javier oofunechecha angaambeele upainiya, moi liye oofotokoza ira: “Ndangaitaniwe ira ndagumane na bwana wa vakampanivo ndoopempela ndaanadowewo chifukwa ndooiziwa ira Yehova ngunoyo aiziwa vyevyo vyali vyapama wa miyo. Ndoofuna chito yapama koma kandafuna ira chitweyo indilepeli-enga kwakwaneli-eda vyolinga vyanga vyauzimu.”

⁸ Javier aongile ira: “Ndangadowile okambilana na abwanayo, aluwa koondiwandela ira thawi dinjinji ndinerenga inda chito wa maora anjinji. Koma ndoowawandela mwaulemu ira kandinakwakwani-e chifukwa thawi dimo-i ndinodowecha wolaleela koma teto wosonkana.” Vanduli vokambilana na abwanayo Javier ookoonda chitweyo. Vangavirile milungu doyeva liye oowambeela panga upainiya. Vanduli viwa chaka ineyo oofwanya chito ineyo a-inda liye wa malambo oyeva. Liye aongile ira: “Yehova oosomeda mapempelwanga moi oondiva-a chito yogwilizana nopanga upainiya. Ndinosangalala chifukwa yoi ndoofwanya chito ineyo inandiva-a thawi injinji yotumikela Yehova koma teto tumikela abalanga.”

9. Kodi ninafunjeda n’ni vakhani ya vyevyo vyamuireele Trésor?

⁹ Kodi ninapange avi akala chito ineyo nina-inda iyo inanilepeli-a tonyi-eda ira nikaana irororomelo? Vyokala ngati vyevi vyoomuireela m’bali m’mo-iwa wa wu Congo zina lae Trésor. Liye aongile ira: “Chitwanga yali yapama vinjinji. Ndoowachela ndalama dinjinji moi dali doinjiva kwaranya ndalama dedo ndawachela miyo vowambeela. Athu anjinji koondilemekeza.” Koma thawi dinjinji Trésor oo-inda chito wa maora anjinji moi kaafwanyeya vamisonkano. Thawi dimo-i ookanyi-ediwa ira abise vyongo vyachinyengo. Trésor oofuna anga-iile chitweyo koma aova ira a-iya kanafwanye chito imo-i. Kodi chin’ni yamukami-ile ira a-iye chitweyo? Liye aongile ira: “Lemba la Habakuku 3:17-19 loondikami-a iziwa ira Yehova unokoza ndisamalela ngakale chito ingandimalele. Eno ndoo-iya chitweyo.” Liye oofotokoza teto ira: “Mabwana anjinji kanaganiza ira muthu unokoza lolela ira kakaena thawi injinji yowaleda na banja lae koma teto lambela Mulungu chifukwa ya chito ya ndalama dinjinji. Ndinosangalala ira ndooteteza usamwalanga na Yehova koma teto na banja langa. Vangavirile chaka imo-i, Yehova oondikami-a fwanya chito. Chito ineyo ndafwanyile miyo yali ya ndalama doyeva, koma yoondiva-a thawi yolambela Mulungu. Na-elanga vyevyo Yehova unafuna liye vamalo owambeela, ninokoza vuteya wa thawi yoyeva koma liye unoza anisamalele.” Napitiliza roromela malangizo koma teto malonjezo a Yehova, ninoza nipitilize enda mosogoleliwa na iroromelo moi Yehova unoza anidalise.

NASAKULANGA MUTHU WOI NITELANENA

10. Kodi muthu unatonyi-ede avi ira unoenda mosogoleliwa na vyevyo unaona liye na maso vosakula muthu oyi atelanena?

¹⁰ Banja chi mphaso yokumela wa Yehova moi kavali yolakweya akala muthu unafuna kala vabanja. Murongola unokoza muona m’bali unoyo unaganiza liye ira kanokoza telana, moi liye unokoza ganizela vyongo monga ikalelo, maoneelo, mbilae, mwemo unapatela liye ndalama, akala unasamalela abalae koma teto akala m’baliyo unamusangalasa. b Vyongo vyevi pivyofuneya. Koma akala murongoloyo unakedenga ganizela vyongo vyevi ba-i, unokoza endanga mosogoleliwa na vyevyo unaona liye na maso.

11. Kodi ninatonyi-ede avi iroromelo vosakula muthu oyi nitelanena? (1 Akorinto 7:39)

¹¹ Yehova unosangalala aonanga abali na arongola ka-arelanga malangizwae vosakula muthu woi katelanena. Mwaisazo, aluwa kano-arela malangizwae oyi kanafuneya kwaranya “vachimake vaizombwe” kaanaambeele imweendi. (1 Akor. 7:36) Kasakulanga muthu oyi katelanena aluwa kanoganizela makalelo anayo Yehova unaonga liye ira mulombwana kapena iyana wapama unafuneela kaana. (Miya. 31:10-13, 26-28; Aife. 5:33; 1 Tim. 5:8) Akala muthu unoyo kai wa Mboni unawafukeda ira katelane kano-arela malangizo a va 1 Akorinto 7:39, oonga ira kanafuneya tela kapena teliwa “mwa Ambwiye.” (Welengani.) Aluwa kanopitiliza enda mo-arela vyevyo kanaroromelaathu moi katinakaikela ira Yehova eka ngunoyo unawakami-e ira kakalenga osangalala. — Sal. 55:22.

12. Kodi ninafunjeda n’ni vaisazo ya Rosa?

¹² Kaganizelani isazo ya Rosa unoyo ngu mpainiya wau Colombia. Uchito wae oogumana na lombwana m’mo-i unoyo kaali wa Mboni. Lombwanoyo oowambeela tonyi-eda ira oomufuna Rosa, moi Rosa naliyene teto oowambeela kopeya na lombwanola. Rosa aongile ira: “Liye aoneya ira ngu muthu wapama. Liye oo-inda chito dokami-a athu a mudela lae moi ookaana makalelo apama. Liye oopanga vyongo na miyo mooma murima. Liye ookaana makalelo etene anayo ndinafuna miyo wa mulombwana unoyo ndinaze miyo nditelanena, koma vuto liye kaali wa Mboni.” Rosa ooenjedela ira: “Vyali vyorucha mukoonda chifukwa ndali ndangakopeile wale na liye. Vathawi ineyo ndoosauwela muthu owaledana moi ndoofuna ndingateliwe, koma ndali ndaanamufwanye m’bali.” Koma Rosa kaakeda ganizela vyooneya na maso. Liye ooganizela mwemo vyosakula vyae vinakuzeleathu usamwalae na Yehova. Liye oo-iya waleda na lombwanoyo moi oopitiliza mutumikela Yehova mwatindi. Va-anavire thawi indendai Rosa ooitaniwa wu Sukulu ya Akristu Olaleela Vya Umwene moi vathawiila ngu mpainiya wavadela. Rosa oonga teto ira: “Yehova undikami-a ira ndikale wosangalala vinjinji.” Ngakale ira kai vyokweya enda mosogoleliwa na vyevyo ninaroromela iyo vakhani dokala ngati dedi, vyo-arelavo viwa vinakala vyapama.

GULU LA MULUNGU LANIVA-A MALANGIZO

13. Chin’ni inanilepeli-e tonyi-eda iroromelo gulu la Mulungu laniva-a malangizo?

¹³ Thawi dinjinji ninowachela malangizo okuza lambela wi-u okumela wa andimuwa, oing’anela dela, ofesi ya thambi, kapena wu Bungwe Lolamulela. Koma thawi dimo-i kaninavwecheche chifukwa iwa niva-iwe malangizo amo-iwene, vyera eno ninokoza onanga mavuto anayo kanaze chifukwa ya malangizwayo. Teto ninokoza ambeela ganizela vinjinji vyevyo abali anayo kapelekile malangizwayo kanalakwi-aathu.

14. Chin’ni inanikami-e enda mosogoleliwa na iroromelo gulu la Mulungu laniva-a malangizo? (Aheberi 13:17)

¹⁴ Nakaana iroromelo kaninakaikela ira Yehova unosogolela gulu lae moi unoiziwa mwemo vyongo vililiathu. Eno kaninadandaula koma ninokala ovwela. (Welengani Aheberi 13:17.) Ninozindikila ira vwela wi-u unokami-a ira pingo ukale wogwilizana. (Aife. 4:2, 3) Ngakale ira abali anayo kananisogolela kai angwilo, ninororomela ira Yehova unoza anidalise nakala ovwela. (1 Sam. 15:22) Akala vali vuto ninoiziwa ira unoza alisakaede vathawi yofwanelela.— Mika 7:7.

15-16. Kodi chin’ni yamukami-ile m’bali m’mo-iwa ira aendenga mosogoleliwa na iroromelo ngakale ira ookaikela malangizo anayo ava-iwe liye? (Onani teto ithuzithuzi.)

¹⁵ Vyevyo vyaireile wu Peru vinotonyi-eda upama woenda na iroromelo. Ngakale ira Ispanishi chofala muilambweyo, athu anjinji kanoonga viwongelo vimo-i vya wewo monga Ikechuwa. Wa chaka dinjinji, abali na arongola oonga Ikechuwa kookala kasaelanga athu mugawo liwa oonga iwongelo inela. Komave, vofuna arela malangizo a boma, gulu la Mulungu loopeleka malangizo asha olaleelela (Arom. 13:1) Vyo-arelavo viwa abali na arongola anjinji koowambeela dandaula akala ndila ishela yakale yokami-a. Koma abali kanga-arele malangizo ashala Yehova oowadalisa moi koowambeela fwanya athu anjinji oonga Ikechuwa.

¹⁶ Kevin unoyo ngu ndimuwa wa pingo wa iwongelo ya Ikechuwa, naliyene teto ookumbanya. Liye aongile ira: “Ndoovifuka ira, ‘ndinafwanyenga avi athu oonga Ikechuwa?’” Kodi chin’ni yamukami-ile Kevin? Liye aongile ira: “Ndooganizela lemba la Miyambo 3:5 koma teto khani ya Mose. Yehova oomuva-a Mose malangizo anayo kaoneya ngati oovweya. Oomuwandela ira asogolele Aisaraeli kuma wu Iguputo volowela wu Nyanja Yofiila. Moi vevo Aiguputo kawa-arelaathu vyaoneya ira aluwa katina wovolowela. Koma Mose oovwela moi Yehova oowadalisa vopanga vyongo vyodabwi-a vinjinji.” (Ekis. 14:1, 2, 9-11, 21, 22) Kevin ali wokozeya vwela va utumikae. Kodi vyo-arelavo viwa vyali vyoi avi? Liye aongile ira: “Ndoodabwa na mwemo Yehova mwanidalisele liye. Mundulimu vyoowandeya enda ulendo wolapa koma keda fwanya muthu m’mo-i kapena athu ambiili oonga Ikechuwa. Koma vathawiila ninodowa wu magawo wewo uli athu anjinji oonga Ikechuwa. Vyevi vipangi-a ira nikambilanenga na athu anjinji koma teto nikaena maulendo oweli-eda na maphuzilo a Baibulo anjinji. Vamisonkano di-u vanozecha teto athu anjinji.” Onga vyoona Yehova unonidalisa vinjinji naendanga mosogoleliwa na iroromelo.

17. Kodi mufunjedile n’ni mukhanila?

¹⁷ Mukhanila niona mwemo ninatonyi-edele iyo iroromelo mundila taaru. Koma ninafuneya pitiliza enda mosogoleliwa na iroromelo m’mbali detene da moywi-u monga vosakula vyosangalasa, maphuzilo koma teto mwemo ninalelele iyo a-ima. Nafunanga sakula vyoira kanikedenga ganizela vyevyo ninaona iyo na maso koma niganizelenga vyokuza usamwali-u na Yehova, malangizwae koma teto lonjezo lae loi unoza anisamalele. Nera eno ninoza nipitilize ‘enda mu zina la Yehova Mulungwi-u mpakana walewale.’ — Mika 4:5.