Gwilizana na Abali na Arongoli-u Unonikami-a

1-2. Kodi Yehova unakuziwa na n’ni nanga unafuna ira iyo nipangenga n’ni?

YEHOVA unokuziwa namwemo ninapangela iyo vyongo na afwi-u. Yesu oonga ira ninafuneya aomeliwangana afwi-u ngati mwemo ninaviomeliwana iyo eki-u. (Mat. 22:37-39) Vyevi vinatapulela ira ninafuneya omelanga murima ngakale athu anayo kai Akristu afwi-u. Napanganga vyevi ninomusazi-eda Yehova Mulungu unoyo “unapeleka zuwa lae wa athu apama na otakala, teto unorumbwi-a zongwe wa athu olungama na wa athu oolungama.” — Mat. 5:45.

² Ngakale ira Yehova unoomeliwa athu etene, liye unaomeliwana vinjinji athu anayo kanamuvwela. (Yoh. 14:21) Moi unafuna ira nimusazi-edenga. Liye unafuna ira niaomeliwengana vinjinji abali na arongoli-u koma teto niatonyi-edenga chikondi yeniyeni. (1 Pe. 4:8; Aroma 12:10) Chikondi ineyo ifotokoziwe va lembali, inofwanafwana na ineyo ninamutonyi-eda iyo m’bali-u unoyo ninagwilizanana iyo vinjinji kapena fwi-u wa vamurima.

3. Kodi niumbuwelenga n’ni va khani ya chikondi?

³ Chikondi, ili ngati maluwa anayo kanafuneya asamalelanga pama ira kaulukulenga. Namarumiwa Paulo oolangiza Akristu ira: “Pitilizani omeliwa abali.” (Aheb. 13:1) Yehova unafuna ira nipitilize atonyi-eda afwi-u chikondi. Mukhanila ninokambilana chifukwa iwa ninafuneya omeliwanga Akristu afwi-u koma teto mwemo ninapitilizele iyo panga vyevyo.

CHIFUKWA N’NI NINAFUNEYA AOMELIWANGA AKRISTU AFWI-U?

4. Mogwilizana na Salimo 133:1, kodi ninatonyi-ede avi ira ninoyamikela mgwilizanwi-u? (Onani teto vithuzithuzi.)

⁴ Welengani Salimo 133:1. Wolemba masalimo oonga ira gwilizana na athu anayo kanamuomeliwana Yehova ‘kwapama koma teto wosangalasa’ moi vyevi pivyoona. Muthu aonanga tengo ulukulu koma teto woriya dambo lililetene, unokoza iya uganizela. Vyevi vinokoza ireya teto na mgwilizano unoyo iyo Akristu nina iyo. Ninowaona abali na arongoli-u vakwikwi vakwikwi mwina teto ndila dingasi dene va mulungu. Ndiye kodi ninatonyi-ede avi ira ninowayamikela? Naonanga ira abali na arongoli-u mbofuneya mupingo koma teto wa iyo, ninokoza ambeela ayamikelanga vinjinji.

5. Kodi athu amo-i kanakuziwa avi kaona ira ninoomeliwana m’mo-i na fwae?

⁵ Athu amo-i kafiya wathawi yowambeela vamisonkano kanopanga chidwi na mwemo ninatonyi-edela iyo ira ninoomeliwana. Vyevi vinowapangi-a simikizela ira kofwanya choonadi. Yesu aongile ira: “Etene kanoza kaiziwe ira muli ofunjedanga akala munaomeliwana.” (Yoh. 13:35) Isazo va khanila chi ya Chaithra, unoyo apanga maphunzilo awu Yunivesite moi oofunjeda Baibulo limo-i na Mboni da Yehova. Liye oosomedela angawachelile ipepala yomuitanela usonkano wachigawo. Angafwanyeilevo dambo lowambeela, oomuwandela murongola unoyo amufunji-a Baibuloyo ira: “Makolwanga katinandikumbarelevo. Koma va sonkanola, dambo limo-i loka kondikumbarela athu okwakwana 52!. Ndoovivwa ira Yehova unaanditonyi-eda chikondi zela m’banja leli moi namiyene ndoofuna kala m’banja leli.” Chaithra oopitiliza funjeda moi oobatiziwa mu 2024. Athu asha kaona chito di-u dapama koma teto mwemo ninatonyi-edela iyo ira ninoomeliwana, kanowambeela funa mutumikela Yehova. — Mat. 5:16.

6. Kodi gwilizana na abali na arongoli-u unaniteteza avi?

⁶ Gwilizana na abali na arongoli-u unoniteteza. Paulo oowalimbikisa Akristu afwae ira: “Pitilizani limbikisana dambo na dambo . . . Ira chinyengo yakopolo ya uchimo kiumi-e murima wa uliwetene wa nyo.” (Aheb. 3:13) Nakumudwa ninowambeela olowa vandila yachilungamo, koma Yehova unokoza indi-eda chito Mkristu uliwetene ira anikami-e. (Sal. 73:2, 17, 23) Moi nalimbikisiwa, vyongo vinoniendela pama.

7. Kodi chikondi inakami-a avi ira nikale ogwilizana? (Akolose 3:13, 14)

⁷ Ninofwanya madaliso anjinji chifukwa yoi nili mugulu lelo athwiwa kanaesaesa ira katonyi-edanenga chikondi. (1 Yoh. 4:11) Mwaisazo, chikondi inonilimbikisa ira nilolelanenga, nokululukelana na murima wetene’ moi vyevi vinonikami-a ira nigwilizanenga vinjinji. (Welengani Akolose 3:13, 14; Aife. 4:2-6) Eno nakala vamisonkano ninovivwa pama vinjinji iyana na mwemo navwele iyo naakale ira nili mugulu limo-iliwalene vailambo yavatila.

NITONYI-EDANENGA ULEMU

8. Kodi Yehova unanikami-a avi ira nikale ogwilizana?

⁸ M’gwilizanwi-u wa vailambo yetene ngodabwi-a vinjinji. Yehova unonikami-a ira nigwilizanenga ngakale ira kanili angwilo. (1 Akor. 12:25) Baibulo linoniwandela ira “Mulungu unonifunji-a ira niomeliwanenga.” (1 Ates. 4:9) Vyevi vinatapulela ira zela m’Malemba, Yehova unoniwandela vyevyo ninafuneya iyo panga ira nigwilizanenga. Nafunjedanga no-arela malangizo a Mulungu, ninakala nifunji-iwanga na Mulungu. (Aheb. 4:12; Yak. 1:25) Vi pivyevyo a Mboni da Yehova vailambo yetene kanaesaesaathu panga.

9. Kodi ninafunjeda n’ni va Aroma 12:9-13 va khani yotonyi-edana ulemu?

⁹ Kodi mba makundo aavi a m’Mawu a Mulungu anayo kananikami-a ira nigwilizanenga? Kaganizelani vyevyo Paulo aongile liye va Aroma 12:9-13. (Welengani.) Mawu anayo ninafuna iyo kambilana mboi “va khani yotonyi-edana ulemu, muwambeelenga nyo.” Kodi mawu anala kanatapulela n’ni? Iyo ninafuneya kala owambeela atonyi-eda athu amo-iwa chikondi yeniyeni vopanga vyongo monga akululukela, awachela pama munyumba di-u koma teto ava-a vyongo. (Aife. 4:32) Kaninafuneya dedi-a ira m’bali kapena murongola aambeele nitonyi-eda chikondi. Iyo ninafuneya ambeela panga vyevyo. Pivyovweya ira Yesu oonga ira: “Va-a unopangi-a kala osangalala vinjinji kwaranya wachela.” — Vyo. 20:35.

10. Kodi ninapange avi tindi va khani “yotonyi-edana ulemu”? (Onani teto ithuzithuzi.)

¹⁰ Yopangi-a chidwi choi angaongile ira va khani yotonyi-edana ulemu muwambeelenga nyo, Paulo oonilimbikisa teto ira nikale “atindi ookala aulesi.” Muthu watindi unolimbi-eda chito moi unoi-inda na murimae wetene. Lemba la Miyambo 3:27, 28 linonilimbikisa ira: “Kulepele pangela vyapama athu anayo unafuna we apangela vyapamavyo akala unawande akami-a.” Eno naona muthu angali va mavuto ninoesaesa mukami-a. Kaninapanga vyongo mozengeleza kapena ganizanga ira muthu m’mo-iwa unomukami-a. — 1 Yoh. 3:17, 18.

11. Kodi chin’ni inanikami-e ira nigwilizanenga na afwi-u?

¹¹ Ndila imo-i ineyo ninatonyi-edele iyo ira ninowalemekeza afwi-u kuwakululukela mombaraanya kanilakwela. Lemba la Aifeso 4:26 linaonga ira: “Zuwa kalivolowe mwangali olunduwa.” Chifukwa n’ni vesili linaonga eni? Vesi 27 linaonga ira, “kanimuva-e mpata Mdyerekezi.” m’Mawae Baibulo, Yehova unoniwandela moweli-eda weli-eda ira nikululukelanenga. Lemba la Akolose 3:13 linonilimbikisa ‘ira nipitilize kululukelana na murimi-u wetene.’ Kululukela athu anayo kanilakwele unonikami-a vinjinji ira nigwilizanenga. Napanganga vyevi vinonikami-a ira nisunge umo-i unoyo ninaufwanya iyo mokami-iwa na zimu owela vokala mwamurendele unoyo uli ngati ida yomangela ineyo inanigwilizani-a.” (Aife. 4:3) Onga umo-i, kululuka unonikami-a ira nigwilizanenga koma teto nikalenga mwamurendele.

12. Kodi Yehova unanikami-a avi ira nikululukelenga afwi-u?

¹² Pivyoona ira thawi dimo-i ninokoza vuteyanga kululukela athu anayo kanilakwele. Koma ninokoza kwakwani-a mokami-iwa na zimu owela. Vanduli vonilimbikisa kala na chikondi yeniyeni, koma teto atindi, Malemba kanonilimbikisa teto ira: “Karani muzimu.” Muthu unoyo unakara muzimu, unokala watindi vinjinji mokami-iwa na zimu owela. Eno zimu owela unokoza nikami-a ira nitonyi-edanenga chikondi yeniyeni koma teto nikululukenga na murima wetene. Chichifukwa iwa ninamuvepa Yehova ira anikami-enga. — Luka 11:13.

“VAARI VINYU KAVIKALE GAWANEYA”

13. Kodi chin’ni inapangi-e ira kanigwilizanenga?

¹³ Mupingo munokala athu o-iyana mitundu koma teto vikalelo. (1 Tim. 2:3, 4) Akala kaninasamale, iyana wewu unokoza pangi-a ira ni-iyanenga maganizo va khani monga ya vyowara, virii-eda, mirombwe koma teto vyosangalasa. (Arom. 14:4; 1 Akor. 1:10) “Chifukwa yoi Mulungu unonifunji-a ira niomeliwanenga,” ninafuneya kala osamala ira kanionenga ira maganizwi-u mbapama vinjinji kwaranya maganizo aamo-iwa. — Aife. 2:3.

14. Kodi ninafuneya esaesa panga n’ni, nanga chifukwa n’ni?

¹⁴ Ninokoza kami-a teto ira mupingo mukale mgwilizano voesaesa kala olimbikisa thawi detene. (1 Ates. 5:11) Vachineneeva athu anjinji anayo kachosiwe kapena anayo ka-iile sonkana koowelela mupingo. Ndiye naaona athu anala ninafuneya awachela mosangalala (2 Akor. 2:8) Isazo pivyevyo vyamuireele murongola m’mo-iwa unoyo awelele wu Nyumba ya Umwene vangavirile chaka 10. Liye aongile ira: “Uliwetene oonditeelela koma teto ndiva-a moni.” (Vyo. 3:19) Kodi murongolola avwile avi? Liye aongile ira, “Vyoondikami-a iziwa ira Yehova unaandikami-a ira ndiambeele teto kala wosangalala.” Nakalanga olimbikisa wa etene, Kristu unokoza ni-indi-eda chito vosisimula athu anayo ‘kana-inda chito yogomi-a na yonyemela.’ — Mat. 11:28, 29.

15. Kodi tindila dimo-i diivi dedo ninalimbikisele iyo mgwilizano? (Onani teto ithuzithuzi.)

¹⁵ Vyoonga vi-u vinokoza teto kami-a ira nigwilizanenga vinjinji. Lemba la Yobu 12:11 linaonga ira: “Kodi kai vale libaru lino-iyani-a mawu ngati mwemo lumi lina-iyani-elaathu oma wa yodja?” Muthu oiziwa phiya unolawa aanaipeleke yodjeyo wa athu amo-i. Na-iyene teto ninafuneya ganizela vyevyo ninafuna iyo onga naanavionge. (Sal. 141:3) Nionechechenga ira vyevyo ninafuna iyo onga vikalenga vyolimbikisa, vyosisimula koma teto “vyokami-a athu anayo kanavuruwana.” — Aife. 4:29.

16. Kodi ngu mbaani simbwasimbwa anayo kanafuneya esaesa kala olimbikisa?

¹⁶ Alombwana koma teto makolo kanafuneya esaesa ira vyoonga viwa vikalenga vyolimbikisa. (Akol. 3:19, 21; Tito 2:4) Andimuwa anayo teto mba abusa a nkhosa da Yehova kanafuneya teto kala olimbikisa. (Yes. 32:1, 2; Agal. 6:1) Mwambi umo-iwa wa m’Baibulo unaonga ira: “Mawu oongiwa va thawi yofwanelela mbapama vinjinji.” — Miya. 15:23.

NITONYI-EDENGA “CHIKONDI YENIYENI MUVYOIRA VI-U”

17. Kodi ninasimikize avi ira nikaana chikondi yeniyeni wa abali na arongoli-u?

¹⁷ Namarumiwa Yohani oonilimbikisa ira “kaniomeliwanenga na mawu ba-i kapena na vamulomoni ba-i, koma nitonyi-edanenga chikondi yeniyeni mu vyoira vi-u.” (1 Yoh. 3:18) Ninafuneya aomeliwanga abali na arongoli-u kumela vati vamurima. Kodi ninapange avi vyevi? Naaledanga vinjinji na abali na arongoli-u pavevo teto ninaambeela iyo aomeliwana koma teto gwilizananga vinjinji. Eno mufwanyenga mpata owaleda na abali na arongolinyu vamisonkano koma teto muutumiki. Muendenga teto na athu o-iyana-iyana muutumiki. Napanganga vyevi ninotonyi-eda ira Mulungu unonifunji-a ira ‘niomeliwanenga.” (1 Ates. 4:9) Ninoza nisimikizele ira “pivyapama koma teto vyosangalasa vinjinji abali kakala vamo-i mogwilizana!” — Sal. 133:1.