Kamukaikelenga Ira Yehova Unokululuka

1-2. Kodi athu anayo kalapile kanavwa avi Yehova aakululukela? (Onani teto ithuzithuzi.)

MWENE Davide ooiziwa mwemo muthu munavwela liye aviimbanga mulandu chifukwa ya vyevyo alakwi-ile liye munduli. (Sal. 40:12; 51:3) Liye ooviimba mulandu chifukwa ya vyongo vyotakala vyevyo apangile liye va moywae. Koma angalapile kumela vati va murima, Yehova oomukululukela na murima wetene. (2 Sam. 12:13) Eno Davide oosangalala angaiziwile ira Yehova umukululukela. — Sal. 32:1.

² Mofwanafwana na Davide, na-iyene teto ninosangalala nazindikila ira Yehova unipangela chifundo koma teto nikululukela machimwi-u. Ngakale nangapangile chimo lilukulu, pivyolimbikisa ira Yehova unoza anikululukele akala nilapile kumela vati va murima, pempela wa liye ira anikululukele koma teto onga na andimuwa nopanganga vyevyo ninawande iyo ira kaniwelele panga vyevyo napangile iyovyo. (Miya. 28:13; Vyo. 26:20; 1 Yoh. 1:9) Pivyosangalasa vinjinji iziwa ira Yehova anikululukela machimwi-u kanaza aniimba teto mulandu. — Ezek. 33:16.

3-4. Kodi murongola m’mo-iwa avivwile avi angabatiziwe, nanga ninakambilana n’ni mukhanila?

³ Komave thawi dimo-i, ninokoza kaikelanga akala Yehova unikululukele. Vyevi pi vyevyo vwamuireele Jennifer, unoyo aulukulele m’banja la Mboni. Liye angali sikana oowambeela panga vyongo vyotakala moi oowabisela makolwae vyevyo apanga liyevyo. Koma vangavirile chaka dingasi dene oochenja moywae nowelela wa Yehova moi oobatiziwa. Liye aongile ira: “Vowambeela ndoopanga iwerewere, lezela, lunduwa vinjinji koma teto ndoona ira fwanya ndalama wali ofuneya vinjinji. Ndooiziwa ira akala ndinapempele wa Yehova ira andikululukele nolapa, sembe ya Kristu inoza indikami-e ira ndikale owela. Koma ngakale ira ndoolapa, vyoondirucha simikizela m’murimani mwanga ira Yehova undikululukela.”

⁴ Kodi nanyene teto thawi dimo-i vinouruchani roromela ira Yehova uukululukelani vyevyo mwalakwi-ile nyo? Davide kaakaikela ira Yehova umukululukela na murima wetene. Eno liye unofuna ira na-iyene teto kanikaikelenga ira unikululukela ngati mwemo Davide mwavwele liye angakululukiwe machimwae. Mukhanila ninokambilana chifukwa iwa kaninafuneya kaikelanga ira Yehova unokululuka. Ninoona teto ineyo inanikami-e ira niroromelenga vyevi.

CHIFUKWA N’NI KANINAFUNEYA KAIKELANGA IRA YEHOVA UNOKULULUKA?

5. Kodi Satana unafuna ira niroromelenga n’ni? Pelekani isazo.

⁵ Naroromelanga ira Yehova unokululuka, ninokoza pewa misampha da Satana. Niumbuwelenga ira Satana unoesaesa panga vyetene vyevyo unawande liye ira ni-iye mutumikela Yehova. Ira akwakwaneli-ede yolinga inela, Satana unonipangi-a ira nikaikelenga akala Mulungu unanikululukele machimwi-u. Isazo va khanila, ngu muthu m’mo-iwa wau Korinto unoyo achosiwe mupingo chifukwa ya iwerewere. (1 Akor. 5:1, 5, 13) Muthuyo angalapile Satana oofuna ira abali na arongola katimukululukele teto katimuwachele mupingo. Koma teto Satana oofuna ira muthu olapoyo avivwenga ira kanakululukeliwe. Oofuna teto ira avivwelenga chisoni mopitilila malile mpakana tatila murima no-iya mutumikela Yehova. Eno Satana kachenjile, liye uno-indi-edave chito sampha unola. Koma iyo “ninoiziwa pama viwembu vyae.” — 2 Akor. 2:5-11.

6. Chin’ni inanikami-e ira kaniviimbenga mulandu?

⁶ Naroromelanga ira Yehova unonikululukela, ninopewa viimba mulandu vinjinji. Mwaibadwa, nachimwa ninoviimba mulandu. (Sal. 51:17) Vyevi pivyapama chifukwa ikumbumtimi-u inokoza nilimbikisa ira nichenje nosakaeda vyongo vimo-i. Komave naviimbanga mulandu wa thawi yolapa vanduli voi nilapa, ninokoza tatila murima no-iya mutumikela Yehova. (2 Akor. 7:10, 11) Koma nasomedelanga ira Yehova unikululukela, nino-iya viimba mulandu. Vyera eno ninomutumikela Yehova mosangalala koma teto nangaana ikumbumtima yapama monga mwemo munafunela liye. (Akol. 1:10, 11; 2 Tim. 1:3) Koma kodi ninasimikizele avi m’murimani mwi-u ira Yehova unikululukela?

KODI CHIN’NI INEYO INANIKAMI-E IRA NIROROMELENGA VYOI YEHOVA UNONIKULULUKELA?

7-8. Kodi Yehova avifotokozile avi wa Mose, nanga vyevi vinanisimikizela n’ni? (Ekisodo 34:6, 7)

⁷ Muganizelenga mwemo Yehova mwavifotokozele liye. Mwaisazo, Baibulo linoonga vyevyo Yehova amuwandelile liye Mose va mwango wa Sinai.a (Welengani Ekisodo 34:6, 7.) Yehova oomufotokozela Mose vyokuza makalelwae na ndila dae, liye oovifotokoza ira “ngwachifundo koma teto ooma murima.” Ndiye kodi Mulungu wamakalelo anala unokoza lepela mukululukela mtumikae unoyo ulapile kumela vati va murima? Naari. Akala kanakululukele atumikae ninokoza onanga ira kaana chifundo koma teto ngouma murima, koma iyo ninoiziwa ira Yehova kanapange vyevyo ngakale vang’ono.

⁸ Ninomuroromela Yehova aonganga ira liye ngwachifundo chifukwa kananame. (Sal. 31:5) Moi kaninakaikele ngakale vang’ono vyevyo unaonga liye. Akala munaviimba mulandu chifukwa ya vyevyo mwalakwi-ile nyo mundulimu, munokoza vifuka ira: ‘Kodi ndinomuroromela Yehova ira ngwachifundo, ooma murima koma teto kanalepele kululukela uliwetene unoyo ulapile? Ndiye kodi vikala yondipangi-a ira ndikaikelenga akala undikululukele?’

9. Kodi mawu oyi kululuka kanaonga vya n’ni? (Salimo 32:5)

⁹ Muganizelenga vyevyo Baibulo linaongaathu vyokuza kululuka wa Yehova. Mwaisazo, kaganizelani vyevyo Davide afotokozele liye va khani inela. (Welengani Salimo 32:5.) Liye aongile ira: “Nyo Moondikululukela vyolakwa vyanga na machimwanga.” Mawu a Iheberi anayo kawamasuleleathu ira “kululuka,” kanatapulela “tukula” kapena “chosa.” Vevo Yehova amukululukele liye Davide, vyali ngati utukula machimwae nowachosa. Vanduli viwa Davide oowambeela vivwa pama chifukwa vyali ngati urula katundu onyemela. (Sal. 32:2-4) Na-iyene teto Yehova anikululukela ninokoza ambeela vivwa pama m’murimani mwi-u. Nalapa kumela vati va murima, kanipitilizengave viimba mulandu chifukwa ya machimo anayo Yehova uwatukulile liye nowachosa.

10-11. Kodi mawu oyi “wokozeya kululuka” kananiwandela n’ni vyokuza Yehova? (Salimo 86:5)

¹⁰ Welengani Salimo 86:5. Voonga vya Yehova, valembali Davide aongile ira, ‘Nyo muli wokozeya kululuka.’ Vofotokoza vya mawu anala, buku limo-i laongile ira: “Yehova ‘ngokululuka,’ ila chi imo-i mwa ‘ikalelo yae.’” Chifukwa n’ni Yehova uli okululuka? Mbali yo-arela ya vesili inaonga ira: “Munotonyi-eda chikondi yororomeleya na yoinjiva wa etene anayo kanaitana nyo.” Monga naonele iyo mu khani ivirilele, chikondi yororomeleya chineyo inamupangi-a Yehova ira ka-iyenga atumikae ororomeleya. Chikondi inela chineyo inamupangi-a teto ira ‘akululukelenga na murimae wetene’ athu anayo kalapile. Akala thawi dimo-i vinauruchani roromela ira Yehova uukululukelani, munokoza vifuka ira: ‘Kodi ndinororomela ira Yehova ngu Mulungu okululuka unoyo unakala okozeya kululukela athu etene anayo kalapile kamuvepa ira aapangele chifundo? Ndiye kodi kandinafuneya roromelanga ira unodikululukela miyo ndamuvepa ira andipangele chifundo?’

¹¹ Pivyolimbikisa iziwa ira Yehova unoiziwa mwemo mwanipangele liye, koma teto unoiziwa ira kanili angwilo. (Sal 139:1, 2) Vyevi vifotokoziwa pama mu salimo limo-iliwa la Davide, lelo linanikami-a ira niroromelenga vinjinji vyoi Yehova unokululuka.

KANIDIWALENGA VYEVYO YEHOVA UNAUMBUWELA LIYE

12-13. Mogwilizana na Salimo 103:14, kodi Yehova unaumbuwela n’ni vyokuza iyo, nanga vyevi vinanilimbikisa panga n’ni?

¹² Welengani Salimo 103:14. Davide aongile ira: Yehova “unoumbuwela ira nili thumbulu.” Na mawu anala, Davide oofotokoza chifukwa iwa Yehova unakala wokozeya kululukela atumikae anayo kalapile. Chifukwa imo-iwa ineyo inamupangi-a ira akululukelenga atumikae chi yoi, liye unoiziwa ira nili ochimwa. Ndiye ira nivwecheche mawu anala, tiyemoni nione nawili mawu a Davidala.

¹³ Davide oonga teto ira: Yehova ‘unoiziwa pama mwemo mwanipangele liye.’ Liye oomupanga Adamu “kumela wu theya.” Eno unoiziwa ira ngakale muthu wangwilo unofuneya vyongo vimo-i monga dja, gona koma teto vuma. (Gen. 2:7) Koma vevo Adamu na Hava kachimwileathu, athu kookala thumbulu mundila imo-iwa. Chifukwa yoi iyovano nili m’badwa diwa, nootukulela uchimo unoyo unapangi-a ira nipangenga vyongo vyotakala. Yehova kanakeda iziwa ira iyovano nili ochimwa. Davide aongile ira, liye ‘unoumbuwela’ vyevi. Mawu a Iheberi anayo kawamasuleleathu ira “umbuwela,” kanokoza tapulela panga vyongo mwa chifundo. Ninokoza onga ira mawu a Davidala kanatapulela ira Yehova unovwechecha ira thawi dimo-i ninokoza lakwi-a vyongo. Koma nalakwi-a vyongo vanduli viwa nolapa kumela vati va murima, liye unonitonyi-eda chifundo koma teto unonikululukela. — Sal. 78:38, 39.

14. (a) Kodi Davide afotokozile ira kululuka wa Yehova unafiya mpakana vaavi? (Salimo 103:12) (b) Kodi ninafunjeda n’ni naona mwemo Yehova mwamukululukele liye Davide? (Onani bokosi loi, “Yehova Unokululuka Koma Teto Unodiwala.”)

¹⁴ Kodi Yehova unakululuka fiya vaavi? (Welengani Salimo 103:12.) Davide aongile ira Yehova akululuka, uno-ela machimwi-u “undendai na iyo” ngati “mwemo wokumela zuwa ulapelanileathu na wovolowela zuwa.” Umamawa kolapelana vinjinji na umazulo, moi mbali mbiin’lidi kadinagumane. Ndiye kodi vyevi vinaniwandela n’ni vyokuza machimo anayo Yehova unikululukele liye? Buku limo-i looerekezela vyevi moi eni: “Mulungu achosa machimwi-u nowa-ela undendai na iyo, vinakala ngati uchosa yongo yonuka moi ngakale fungo liwa kalinavweye.” Kaganizelani vi! Fungo limo-iliwa lene linokoza mupangi-a muthu umbuwela vyongo vimo-iviwa vyene. Koma Yehova akululuka, vinakala ngati uchosa fungo lililetene lelo lamupangi-e ira aumbuwele chimo li-u noniimbana mulandu.— Ezek. 18:21, 22; Vyo. 3:19.

15. Kodi ninapange avi akala ninaviimbave mulandu chifukwa ya vyevyo nalakwi-ile iyo munduli?

¹⁵ Kodi mawu a Davide ofwanyeya va Salimo 103 kananikami-e avi ira niroromelenga vyoi Yehova unonikululukela? Akala ninaviimbave mulandu chifukwa ya vyevyo nalakwi-ile iyo mundulimu, ninokoza vifuka ira: ‘Kodi ndinodiwala ira Yehova unoumbuwela vyoi ndili ochimwa koma teto ira unokululukela muthu unoyo ulapile? Kodi ndinoumbuwela vyevyo Yehova usakulile liye vidiwala? Mwaisazo, kodi ndinoumbuwela machimo anayo andikululukele liye mundulimu anayo kanaza andiimbana mulandu?’ Yehova kanakeda ganizela vyevyo nalakwi-ile iyo munduli. Ndiye na-iyene kanipangenga vyevi. (Sal. 130:3) Naroromelanga ira Yehova unonikululukela, na-iyene ninoza ni-iye viimba mulandu moi ninoza nipitilize mutumikela mosangalala.

16. Pelekani isazo yotonyi-eda opi-a oviimbave mulandu chifukwa ya vyevyo nalakwi-ile iyo munduli. (Onani teto ithuzithuzi.)

¹⁶ Kaganizelani isazo ila: Kedanga viimba mulandu chifukwa ya vyongo vyevyo nalakwi-ile iyo munduli, uli ngati endi-anga galimoto koma kedanga ing’ana vagalasi loonela munduli. Pi vyoona ira ing’ana vagalasili vang’ono na vang’ono kwapama. Chifukwa unokoza ukami-ani pewa vyoopi-a vyevyo vinaza munduli mwinyu. Koma ira muende pama munafuneela ing’ananga vinjinji usogolo. Mofwanafwana na vyevi vinokoza kala vyokami-a ing’ananga vyongo vyevyo nalakwi-ile iyo munduli na yolinga yoi nifunjedevo yongo koma teto kanize niwelele vyevyo nalakwi-ile iyovyo. Koma akala ninakedenga ganizela vinjinji vyevyo nalakwi-ile iyo ninokoza viimbanga mulandu moi ninokoza lepelanga panga vinjinji votumikela Yehova. M’malomwiwa ninafuneya ing’ananga vinjinji usogolo wewo ninadowa iyo. Nili vandila yodowa umoyo muilambo isha ya Mulungu mwemo “kaninaza niumbuwelanga vyongo vyotakala.”— Yes. 65:17; Miya. 4:25.

PITILIZANI ROROMELA VYOI YEHOVA UNONIKULULUKELA

17. Chifukwa n’ni ninafuneya pitiliza roromela na murimi-u wetene ira Yehova unoniomeluwana koma teto unonikululukela?

¹⁷ Ninafuneya pitiliza roromela na murimi-u wetene ira Yehova unoniomeluwana koma teto nikululukela. (1 Yoh. 3:19.) Chifukwa n’ni ninaonga eno? Ninaonga eno chifukwa yoi Satana unoza apitilize nipangi-a ira nionenga ira Yehova kananiomeluwana koma teto kananikululukele. Liye unopanga vyevi nayolinga yoi ni-iye mutumikela Yehova. Ninoembekezela ira Satana unoenjedela panga vyevi, chifukwa unoiziwa ira ukede alana thawi yoeva. (Chiv. 12:12) Koma kanilole ira Satana anilepeli-e mutumikela Yehova.

18. Kodi ninapange avi ira nisimikizelenga na murimi-u wetene ira Yehova unoniomeluwana koma teto unonikululukela?

¹⁸ Ira muroromelenga vinjinji vyoi Yehova unouomeluwanani, onani makundo anayo nakambilanile iyo mukhani ivirilele. Ira muroromelenga vinjinji ira Yehova unoukululukelani, muganizelenga vyevyo Yehova afotokozile liye vyokuza liye. Teto muganizelenga vyevyo Baibulo linaongaathu vyokuza kululuka wa Yehova. Kamudiwale ira liye unoiziwa pama ira muli ochimwa, moi unoza apitilize upangelani vyongo mwachifundo. Muumbuwelenga teto ira Yehova unokululuka na murima wetene. Eno mofwanafwana na Davide unoyo kaakaikela ira Yehova oomutonyi-eda chifundo, munoza muonge ira, “Zikomo Yehova chifukwa yondikululukela ‘vyolakwa vyanga na machimwanga.’”— Sal. 32:5.