Mtumwi Petulo oolimbikisa andimuwa afwae ira: “Wetani gulu la khosa da Mulungu.” (1 Pe. 5:1-4) Ngati muli ndimuwa mupingo, ninoiziwa ira munowaomeliwana abali na arongolinyu moi munofuna asamalela. Komave, thawi dimo-i munokoza onanga ira mutanganisiwa kapena mugoma vinjinji moi kamunawande kwakwaneli-eda udindo unola. Vyera eno, kodi munapange avi? Mumuwandelenga Yehova nkhawa dinyu detene. Petulo alembile ira: “Ngati muthu unatumikela, atumikele mororomela kopolo dedo Mulungu unapeleka liye.” (1 Pe. 4:11) Abali na arongolinyu kanokoza gumana na mavuto oyi katinamale vathawiila. Koma muumbuwelenga ira “m’busa mulukulu,” unoyo uli Yesu Kiristu, unokoza akami-a kwaranya uliwetene. Liye unokoza akami-a vathawiila koma teto muilambo isha. Mulungu unakeda funa ira andimuwa kaaomeliwengana abali na arongoliwa, asamalela koma teto kala “visazo wa gulu la khosa.” w23.09 29-30 ¶13-14

Ninafuneya iya indi-eda chito maganizo a athu Akala ninaona vyongo volandela zelu da athu ninokoza iya arela makundo a Yehova. (1 Akor. 3:19) Thawi dinjinji “zelu damuilambwela” dinopangi-a ira athu kativwelenga Mulungu. Akiristu amo-iwa awu Pegamo na Tiyatira koowambeela iwona khani yokuza lambela mafano koma teto chiwelewele ngati mwemo athu anjinji a mu mzindoyo kaiwonelaathu. Yesu oosumulula mwakopolo mipingo dedi chifukwa yolekelela ikalelo ya chiwelewele. (Chiv. 2:14, 20) Malambwano teto ninokanyi-ediwa ira niwonenga vyongo molakweya. Abali-u kapena teto afwi-u kanokoza nikanyi-eda kapena nilimbikisa ira nipange vyongo vyevyo vinapangi-e ira kanimuvwele Yehova. Mofwanafwani-a, aliwa kanokoza niwandela ira kavali vuto panga vyevyo ninafuna iyo koma teto ira makundo a m’Baibulo a makalelo apama mbawale. Thawi dimo-i ninokoza onanga ira malangizo anayo Yehova unaniva-a liye mbo-okami-a. Mwina teto mpakana ninokoza shishiwa ira ‘nipitilile vyongo vyolembiwa.’ — 1 Akor. 4:6. w23.07 16 ¶10-11

Mariya, m’mae wa Yesu, afuneya limbikisiwa. Liye kaali vabanja, koma ngeloyo oomuwandela ira unoza akale na vambani. Liye ali a-analelevo mwana, koma afuneya musamalela mwana unoyo unaze akale Mesiya. Koma teto voi ali a-anagonevo na mulombwana, kodi amufotokozela avi Yosefe unoyo aembekezela kalanae vabanja? (Luka 1:26-33 Kodi Mariya afwanyile avi kopolo? Liye oodalila amo-iwa ira kamukami-e. Mwaisazo, oomuvepa Gabirieli ira amufotokozele vinjinji vyokuza utumiki unola. (Luka 1:34) Vanduliviwa, liye oodowa wa balae, zina lae Elizabeti, unoyo akala “udela lamimwango” la Yuda. Elizabeti oomuyamikela Mariya ndipo mosogoleliwa na Yehova, oomufotokozela ulosi wokuza mwana unoyo unaze abaliweyo. (Luka 1:39-45) Mariya aongile ira Yehova umupangela “vyakopolo na ndanda lae.” (Luka 1:46-51) Yehova oomuva-a kopolo Mariya vo-indi-eda chito Gabirieli na Elizabeti. w23.10 14-15 ¶10-12