“Athu a Maganizo Apama” Kanoza Kavuruwane

1. Kodi vyoira vya athu vina-iyana avi kavwa uthenga wapama? (Vyoira 13:47, 48; 16:14, 15)

MUTHAWI ya anamarumiwa, athu anjinji koosangalala kavwa uthenga wapama. (Welengani Vyoira 13:47, 48; 16:14, 15.) Malambwano teto athu amo-i kanosangalala kavwa uthenga wapama va ulendo owambeela. Ndiye vikala amo-iwa anayo katinafuna vuruwana koma vanduli viwa kanochenja noambeela funjeda. Ndiye kodi nipangenga avi naafwanya ‘athu a maganizo apama’?

2. Kodi chitwi-u yofunji-a athu inafwanafwana avi na ya mulimi?

² Ninokoza erekezela chito yofunji-a athu na vyevyo mulimi unapanga liye. Akala mbewu dimo-i diumile, liye unodi-anda ngakale ira unopitiliza lima kapena zala mbewu dimo-idiwa. Na-iyene teto namufwanya muthu unoyo unafuna funjeda Baibulo, nimukami-enga mombaraanya ira akale ofunjeda wa Kristu. Koma athu anayo katitonyi-edile chidwi, ninopitilizave akami-a ira kaone funeya wa vyevyo kanafunjedaathu. (Yoh. 4:35, 36) Zindikila unokoza nikami-a ira niwande fwanya ndila yapama yokami-ela muthu uliwetene. Tiyemoni nikambilane vyevyo ninapange iyo nafwanya athu a chidwi koma teto mwemo ninaakami-ele iyo.

NAFWANYA ATHU ANAYO KANAFUNA VURUWANA

3. Kodi nipangenga n’ni nagumana na athu anayo kanafuna vuruwana? (1 Akorinto 9:26)

³ Nafwanya athu achidwi, ninafuneya akami-a thawi ineyo ira kaambeele enda va ndila yodowa umoyo oomala. Niavepenga va ulendo owambeela unoyo ira niambeele funjedana Baibulo koma teto kafwanyeyenga va misonkano. — Welengani 1 Akorinto 9:26.

4. Fotokozani isazo ya muthu unoyo afuna ambeela funjeda Baibulo va ulendo owambeela.

⁴ Niavepenga ira niambeele funjedana Baibulo. Athu amo-iwa anayo ninaalaleela iyo kanokala okozeya ambeela funjeda thawi ineyo. Mwaisazo, murongola m’mo-iwa wa wu Canada alaleelanga va shelefu, sikana m’mo-iwa ooza za tukula borosha loi Sangalalani na Moyo Mpakana Walewale. Murongoloyo angamuwandelile sikanoyo ira kanokoza funjedanga boroshalo, liye oopanga chidwi moi koova-ana manambala a foni. Dambo lelo mutana, sikanoyo oomulembela meseji murongoloyo nomufuka dambo lelo kanaambeeleathu funjeda. Murongoloyo angaongile ira unodowawo Looluka kapena Lamulungu, sikanoyo oonga ira: “Bwanji laakale mechelo? Chifukwa ndikaana mpata.” Dambo lo-arela lelo lali Lachisanu, kooambeela funjeda. Mulungu unoyo sikanoyo oowambeela sonkana moi oopitiliza funjeda.

5. Kodi ninatonyi-ede avi zindikila namuvepa muthu ira nifunjedengana Baibulo? (Onani teto vithuzithuzi.)

⁵ Pivyoona ira kai athu etene anayo ninaalalelela iyo, anayo kanakalecha okozeya funjeda Baibulo ngati sikanole. Amo-i kanofuneya akami-angave ira chidwiwa ienjedeleye. Mwina va ulendo owambeela ninokoza funeya kambilana khani ineyo inaasangalase. Koma napitiliza kaana maganizo apama, koma teto tonyi-eda chidwi, kavinalande thawi indendai ira niambeele funjedana Baibulo. Ndiye kodi ninaonge vyoi avi vomuvepa muthu ira niambeele funjedana Baibulo? Abali na arongola amo-i anayo katinavuteya ambeeli-a maphuzilo a Baibulo koofukiwavo yofuka inela.

6. Kodi ninamuvepe avi muthu ira nipitilize kambilana na liye?

⁶ Ofalisa koma teto apainiya anayo kafukiwe yofuka inela, koofotokoza ira muvilambo vimo-i vinokala pama pewa mawu amo-i monga “funjeda,” “phuzilo la Baibulo,” kapena “ufunji-ani.” Aluwa koonga ira kanakeda i-ndi-eda chito mawu ngati “aleda,” “kambilana” kapena “liiziwa pama Baibulo.” Ira mupitilize kambilana munokoza onga ira: “Pivyopangi-a chidwi ira Baibulo linosomeda vyofuka vyofuneya vinjinji va moywi-u” kapena ira, “Baibulo kalikede kala buku la ipembezo koma linokoza nikami-a va moywi-u.” Mwina teto munokoza enjedela ira, “Kavinafuna thawi injinji. Munokoza funjeda makundo ofuneya vokeda kambilana wa maminisi 10 kapena 15.” Munokoza onga vyevi koma ootonyi-eda ira munerenga za mulungu uliwetene.

7. Kodi pi va thawi iivi vevo athu amo-i kazindikilileathu ira kofwanya choonadi? (1 Akorinto 14:23-25)

⁷ Niaitanelenga wu misonkano. Vinaoneya ira athu amo-iwa mu thawi ya Paulo koozindikila wa thawi yowambeela ira kofwanya choonadi kangafwanyeile vamisonkano. (Welengani 1 Akorinto 14:23-25.) Athu anjinji teto malambwano kanodowa vasogolo kaambeela sonkana. Ndiye kodi pi va thawi iivi vevo ninaaitanele iyo wu misonkano? Muru 10 wa buku la Sangalalani na Moyo Mpakana Walewale unaonga ira niaitanelenga wu misonkano athu anayo ninafunjedana iyo Baibulo. Komave, kanidedi-edenga mpakana nangafiile muru unola. Keda ambeela vevo niambeele iyo funjedana Baibulo, ninokoza aitanela wu misonkano da umapeto wa mulungu. Mwina ninokoza muwandela muru wa khani ya etene kapena likundo limo-i la mu phuzilo la Sanja ya Olonda la mulungu unoyo.

8. Kodi pi vyongo viivi vyevyo ninamufotokozele iyo muthu unoyo nimuitanele iyo umisokano di-u? (Yesaya 54:13)

⁸ Namuitanela muthu wu misonkano, nimufotokozelenga mwemo misonkano di-u dina-iyanelaathu na vyevyo ukalile liye aonanga wu vipembezo vimo-i. Ofunjeda m’mo-iwa angafiile va phuzilo la Sanja ya Olonda ulendo owambeela, oomufuka phuzisae ira, “Kodi opangi-a Sanja ya Olondoyo unoiziwa zina la uliwetene?” Murongoloyo oomusomeda ira, “Etene ninoesaesa iziwana mazina ngati mwemo ninapangela iyo na athu a m’banja li-u.” Ofunjedoyo oona ira vyevi pi vyo-iyana na vyevyo vinaireya wu chalichi uwa. Athu anjinji katinaiziwa teto vyevyo vinaireya wu misonkano di-u. (Welengani Yesaya 54:13.) Ninosonkana ira nilambele Yehova, nifunji-iwe koma teto nilimbikisane. (Aheb. 2:12; 10:24, 25) Eno misonkano di-u dinokala da dongosolo koma teto dokami-a, moi kadinaireya mwamwambo. (1 Akor. 14:40) Mu nyumba ya Umwene munokala mowala chifukwa ninodowawo ira nafunjede. Kaninavolowela ndale moi kaninaona ira chipani imo-i chapama kwaranya chipani imo-i. Kaninapangana vioneselo kapena volowela mikangano. Vinokoza kala pama muoni-a muthu unoyo ninafunjedana iyo Baibulo, vidiyo yoi Inaireya Chin’ni Unyumba ya Umwene? Liye unokoza iziwa vyevyo unaze liye aone afiya va Nyumba ya Umwene moi vinoza vimukami-e iyani-a na vyevyo vinaireya wu ipembezo yae.

9-10. Kodi ninamukami-e avi muthu iziwa ira kaninamukanyi-eda volowa mu ipembezwi-u kapena pangana vyongo vimo-i? (Onani teto ithuzithuzi.)

⁹ Athu amo-iwa kanoova za wu misonkano di-u chifukwa kanoganiza ira ninowakanyi-eda ira ka-iye ipembezo iwa. Eno ninokoza muwandela muthu ira ninosangalala wachela alendo moi kaninaakanyi-eda ira kapangenga vyevyo ninapanga iyo va misonkano di-u. Muthu unokoza za na banja lae ngakale teto unokoza za na a-ima ang’onong’ono. A-ima katinawachela malangizo va ekiwa, m’malo mwiwa kanogarati limo-i na makolwiwa nofunjedelanga limo-i. Eno makolo kanoiziwa ira a-imiwa mbotetezeya moi kanoiziwa vyevyo kanafunjedaathu. (Doto. 31:12) Vamisonkano di-u kavinaendi-iwa mbale da vyopeleka kapena muva-a muthu itelo ira a-elemo ndalama. M’malomwiwa nino-arela lamulo la Yesu loi “Moowachela waulele, mupelekenga waulele.” (Mat. 10:8) Ninokoza muwandela teto muthuyo ira kanafuneya wara vyowara vyavadimu ira afwanyeye va misonkano di-u chifukwa Mulungu unaona vya m’murimani ookala maoneelo aunde. — 1 Sam. 16:7.

¹⁰ Muthu afiya vamisonkano mumuwachelenga pama. Mumukami-enga ira aiziwane na andimuwa koma teto abali na arongola amo-iwa. Aona ira uwacheliwa pama unokoza za wela. Akala ira liye kaana Baibulo, mumuoni-enga malemba kumela mu Baibulo linyu ira a-arelenga vyevyo vinafunjediwa.

VYEVYO NINAPANGE IYO NAAMBEELA FUNJEDA NA MUTHU

11. Kodi ninatonyi-ede avi ira ninoganizela thawi ya muthu?

¹¹ Naambeela funjeda na muthu, niumbuwelenga ira liye unokaana chito dimo-i doi a-inde. Mwaisazo, musungenga thawi ineyo mwagwilizanile nyo ngakale ira athu a mudela linyu katinasunga thawi. Munokoza teto panga pama funjeda na liye thawi yoyeva va ulendo owambeela. Ofalisa amo-i aluso kanoonga ira chipama funjeda vyoyeva ngakale muthuyo angaongile ira unofuna funjeda vinjinji. Mumulolenga fotokoza maganizwae moi kamuongenga vinjinji. — Miya. 10:19.

12. Kodi yolinga yi-u ikalenga yoi avi naambeela funjeda Baibulo na muthu?

¹² Keda kumela vevo niambeele iyo funjeda na muthu, nimukami-enga ira aiziwe koma teto aambeele muomeluwana Yehova na Yesu. Ira vyevi viwandeye, thawi detene nifunji-enga vyokumela m’Baibulo ookala vyokumela m’maganizo mwi-u. (Vyo. 10:25,26) Namarumiwa Paulo oowakami-a athu ira kaganizelenga vinjinji vya Yesu Kristu, unoyo Yehova amurumile liye ira aze akami-e athu muiziwa Yehovoyo koma teto ambeela muomeluwana. (1 Akor. 2:1, 2) Vanduli viwa Paulo oonga movweya pama funeya okami-a ofunjeda asha koma teto funeya okaana makalelo apama anayo aaerekezele liye na golide, siliva koma teto mabwe amtengo wavadimu. (1 Akor. 3:11-15) Makalelwala kanotangani-avo iroromelo, zelu, zindikila, koma teto muova Yehova. (Sal. 19:9, 10; Miya. 3:13-15; 1 Pe. 1:7) Eno nimusazi-edenga Paulo vokami-a athu kaana iroromelo yolimba koma teto akami-a ira kakale va usamwali wapama na Babiwa wa udimu.— 2 Akor. 1:24.

13. Kodi ninatonyi-ede avi leza murima koma teto vwechecha nafunjedanga Baibulo na muthu? (2 Akorinto 10:4, 5) (Onani teto ithuzithuzi.)

¹³ Namufunji-anga muthu nimusazi-edenga Yesu vokala athu oleza murima koma teto ovwechecha. Nipewenga mufuka vyofuka vyevyo vinamunyaswi-e. Thawi dimo-i munokoza iya makundo anayo kanamurucha vwechecha ira muze mukambilane vanduli viwa. M’malo momukanyi-eda somedela likundo limo-i liwa lene lelo kalivwechechile, nimuva-enga thawi yokwakwanela ira aliganizele nolisomedela. (Yoh. 16:12; Akol. 2:6, 7) Baibulo linoerekezela viphuziso vyonama na vyongo vyolimba. (Welengani 2 Akorinto 10:4, 5.) Ira muthu a-iye roromela vyevyo ukalile liye aviroromelanga, yowambeela ninafuneya mukami-a ira amuroromelenga vinjinji Yehova. — Sal. 91:9.

MWEMO NINAAKAMI-ELE IYO ATHU ASHA ANAYO KAZILE UMISONKANO

14. Kodi ninakami-e avi athu asha anayo kazile wu misonkano?

¹⁴ Yehova unafuna ira niwachelenga mookaana sakulo athu asha anayo kazile umisonkano vooganizela ikalelo, tundu kapena vyevyo kanaathu. (Yak. 2:1-4, 9) Ndiye kodi ninatonyi-ede avi ira ninowaomeluwana alendo anayo kazile vamisonkano?

15-16. Kodi ninakami-e avi athu asha ira kamasuwenga va misonkano di-u?

¹⁵ Athu amo-iwa kanoza umisonkano di-u ira kakede ona mwemo vinakalelaathu, koma athu amo-iwa kanakala ira koowandeliwavo na muthu m’mo-i. Eno namuona muthu wailendo nimuongi-enga. Nimuwachelenga pama koma kanikokomezenga vyongo. Ninokoza muvepa ira agarati vakwikwi na iyo. Ninokoza welengelanga Baibulo limo-i kapena mabukwi-u, kapena ninokoza mufwanyela Baibulo na mabuku amo-i. Munokoza teto ganizela vyongo vimo-i vyevyo vinamukami-e ira akale omasuwa. Muthu m’mo-iwa angafiile vamisonkano oomuwandela m’bali unoyo amuwachelile ira owona ira kawarile pama ngati abali na arongola amo-i. M’baliyo oomukami-a ira akale omasuwa. Oomufotokozela ira ngakale a Mboni da Yehova kanowara eno, kai o-iyana na uliwetene. Muthuyo oofunjeda mpakana fiya vobatiziwa moi kadiwalile mwemo m’balila mwamukami-ele liye. Koma naonganga na alendo anayo kazile umisonkano nikalenga osamala. Kaniafukenga vyofuka vyevyo vinaanyaswi-e kapena afukanga ngati ninaasaela. — 1 Pe. 4:15.

¹⁶ Ninokoza akami-a athu anayo kazile wu misokano ira kakale omasuwa naonganga mwaulemu vyongo vyokuza aluwa kapena vyevyo kanaroromelaathu. Ninokoza panga vyevi, vowaleda, vopeleka ndemanga kapena vokamba khani. Nipewenga mawu anayo kanaakumudwi-e kapena anayo kanaoneye ngati ninaanyoza. (Tito 2:8; 3:2) Mwaisazo, kaninafuneya nyoza makundo anayo athu amo-i kanaroromelaathu. (2 Akor. 6:3) Abali anayo kanakamba khani da etene kanafuneya kala osamala vinjinji vakhani inela. Aluwa kanokoza tonyi-eda ira kanoganizela athu anayo kai a Mboni, vofotokoza pama mawu anayo kanakale orucha avwechecha.

17. Kodi yolinga yi-u ikalenga yoi avi nafwanya ‘athu anayo kana maganizo apama’ mu utumiki?

¹⁷ Dambo lililetene laviranga, thawi yoi ni-inde chito yofunji-a athu inakala iyevanga. Eno tiyemoni nipitilize saela “athu anayo kana maganizo apama anayo kanaakami-e za fwanya moyo oomala.” (Vyo. 13:48) Naafwanya, kanidimbeluwe funjeda na aluwa kapena aitanela wu misokhano. Nera eno, ninoza niakami-e ira kaambeele enda va “sewu odowa umoyo.” — Mat. 7:14.