Kodi Munapange Avi Ira Mapempelwinyu Kakalenga Okumela Vati va Murima?

1-2. (a) Chin’ni ineyo inanilepeli-e muwandela Yehova mwemo ninavwela iyo? (b) Kodi ninaiziwa avi ira Yehova unovuruwana mapempelwi-u mooma murima?

KODI thawi dimo-i munoona ira mapempelwinyu kanakalecha oweli-edaweli-eda, ookumela vati va murima koma teto achizolowezi? Akala chi eno, kamuli ekinyu. Chifukwa yoi ninotanganisiwa, thawi dimo-i ninokoza kedanga pempela mwachidule. Kapena ninokoza vuteyanga muwandela Yehova mwemo ninavwela iyo chifukwa ninoviona ira kanili ofwanelela ongi-ana na liye.

² Baibulo linoonga ira Yehova unoona ira yofuneya vinjinji kai mawu anayo nina-indi-eda iyo chito vopempela, koma ira nipempelenga kumela vati vamurima. Liye unovwa “vepa wa athu ofaasa.” (Sal. 10:17) Moi unovuruwana mooma murima mawu etene anayo ninaonga iyo chifukwa unoniomeluwana vinjinji. — Sal. 139:1-3.

3. Kodi ninakambilana vyofuka viivi?

³ Ninokoza vifuka ira, Chifukwa n’ni ninafuneya pempelanga wa Yehova momasuwa? Kodi ninapange avi ira mapempelwi-u kakalenga okumela vati va murima? Kodi mapempelo a atumiki a Yehova anayo kalembiwe m’Baibulo, kananikami-e avi ira nipempelenga kumela vati va murima? Nanga ninapange avi akala ninakumbanya vinjinji moi ninolepela muwandela Yehova mwemo ninavwela iyo? Mukhanila ninokambilana vyosomeda vya vyofuka vyevi.

MUPEMPELENGA WA YEHOVA MOLIMBA MURIMA

4. Chin’ni inanikami-e ira nipempelenga wa Yehova molimba murima? (Salimo 119:145)

⁴ Navwechecha ira Yehova ngu fwi-u ororomeleya unoyo unafuna ira vyongo viniendelenga pama, ninokoza pempelanga wa liye molimba murima. Isazo ngu muthu unoyo alembile Salimo 119. Liye oona ira Yehova ngu fwae ororomeleya. Liye oogumana na mavuto anjinji vamoywae. Athu amo-i koomuongela vyotakala. (Sal. 119:23, 69, 78) Liye ookumudwa teto chifukwa ya vyongo vyevyo alakwi-a liye. (Sal. 119:5) Koma ngakale vyali eno, liye kaaova muwandela Yehova mwemo avwela liye. — Welengani Salimo 119:145.

5. Chifukwa n’ni kaninafuneya lola ira maganizo ofooki-a kanilepeli-enga pempelanga wa Yehova? Pelekani isazo.

⁵ Yehova unafuna ira ngakale athu anayo kapangile machimo alukulu kapempelenga wa liye. (Yes. 55:6, 7) Eno kanilolenga ira maganizo ofooki-a kanilepeli-enga pempela. Mwaisazo, muthu unoyo u-olowile mukokolani nolepelanga fwanya ndila yoi akumemo, unokoza vepa likami-edo akala vali athu vakwikwi ira kamukami-e. Kodi unafuneya zengeleza vepa likami-edo chifukwa yonyaswa ira oo-olowa kapena chifukwa yoi oolakwi-a? Naari. Mofwanafwana na vyevi, na-iyene teto thawi dimo-i na-olowa kapena napanga chimo, nipempelenga wa Yehova molimba murima. — Sal. 119:25, 176.

KODI NINAPANGE AVI IRA MAPEMPELWI-U KAKALENGA OKUMELA VATI VA MURIMA?

6-7. Kodi ganizela makalelo a Yehova unanikami-e avi ira mapempelwi-u kakalenga okumela vati va murima? Pelekani isazo. (Onani teto mawu a m’pedi.)

⁶ Ira mapempelwi-u kakalenga okumela vati va murima, niongi-anenga na Yehova momasuwa. Nimuwandelenga vyevyo vili m’murimani mwi-u, koma teto mwemo ninavwela iyo. Ndiye kodi ninapange avi ira nipempelenga mwa ndila inela?

⁷ Muganizelenga makalelo a Yehova.a Naganizelanga vinjinji makalelo a Yehova, pavevo teto ninakale iyo omasuwa mufotokozela mwemo ninavwela iyo. (Sal. 145:8, 9, 18) Kaganizelani isazo ya Murongola Kristine, unoyo ababae kali ankhaza. Liye aongile ira: “Kavyali vyokweya ira ndiongi-anenga na Yehova ngati babanga. Ndoona ira Yehova kanandiomeluwana chifukwa ya vyevyo ndalakwi-a miyo.” Kodi chi ikalelo ya Yehova iivi ineyo yamukami-ile? Liye aongile ira: “Chikondi yororomeleya ya Yehova yoondikami-a ona ira ndili otetezeya. Ndinoiziwa ira liye kanaza a-iya ndikami-a. Ngakale ndangalakwi-ile vimo-i viwa vyene, moi unoza apitilize ndiomeluwana koma teto ndikami-a. Vyevi vinondikami-a ira ndimasuwenga muwandela vyevyo vindisangalasile koma teto vyevyo vindikumudwi-ile.”

8-9. Kodi ganizela vyevyo ninafuna iyo onga naanapempele un’na upama oyi avi? Pelekani isazo.

⁸ Muganizelenga vyevyo munafuna nyo onga. Mwaanapempele mwina munokoza vifuka vyofuka ngati vi: ‘Kodi mba mavuto aavi anayo ndinalimbanana miyo vathawi ila? Kodi vikala uliwetene unoyo ndinafuna miyo mukululukela? Kodi vikala iliyetene ineyo ichenjile va moywanga ineyo ndinafuna miyo ira Yehova andikami-e? (2 Mam. 19:15-19) Ninokoza teto arela pempelo la isazo la Yesu, noganizelanga vyevyo ninamuvepe iyo Yehova vyokuza zina lae koma teto vyevyo unafuna liye. — Mat. 6:9, 10.

⁹ Murongola m’mo-iwa zina lae Aliska angaiziwile ira mamunae ukaana khansa ya muugogo moi kanachile, vyoomurucha vinjinji pempela. Liye aongile ira: “Ndookaana nkhawa vinjinji moi vyoondirucha ganizela mawu oyi ndionge vopempela.” Ndiye kodi chi n’ni ineyo yamukami-ile? Liye aongile ira: “Ndaanapempele, ndinoganizela vyevyo ndinafuna miyo muwandela Yehova. Panga vyevi unondikami-a ira kandikedenga onga vya miyo. Vyevi vinopangi-a ira murimanga ukale m’malo koma teto maganizwanga kagarateye ndapempelanga.”

10. Chifukwa n’ni ninafuneya pempelanga wa thawi indendai? (Onani teto ithuzithuzi.)

¹⁰ Mupempelenga wa thawi Indendai. Pivyoona ira ninokoza peleka pempelo lokwiiva, koma napempelanga wa thawi indendai, ninokaana mwai omuwandela Yehova vyevyo ninaganiza iyo koma teto mwemo ninavwela iyo.b Mamunae wa Aliska zina lae Elijah aongile ira: “Ndinopempela maulendo anjinji vadambo moi vi vindikami-a ira ndikale vausamwali olimba na Yehova, chifukwa ndinokaana thawi yokwakwanela yopempela. Yehova kanaona ira ndinodimbeliwa mari-a pempelo langa. Eno ndinopempela wathawi indendai.” Kashishani vi: Mufwanyenga thawi koma teto malo apama anayo munapempelele nyo, mwina teto mogweli-a mawu vo-okala vyosokoneza moi mukaena izolowezi yopeleka mapempelo olapa.

MUGANIZELENGA MAPEMPELO OKUMELA VATI VA MURIMA ANAYO KALEMBIWE M’BAIBULO

11. Kodi ganizela mapempelo okumela vati va murima anayo kalembiwe m’Baibulo unanikami-a avi? (Onani teto bokosi loi “Kodi Moogumanavo na Vyevyo Aluwa Kagumanilenaathu?”)

¹¹ Ganizela mapempelo a atumiki a Yehova oromoliwa m’Baibulo koma teto nyimbo diwa, unokoza ukami-ani vinjinji. Mwaganizelanga vyevyo aluwa kamuwandelileathu Yehova kumela vati va murima, vinokoza ukami-ani ira na nyen’ne teto mupempelenga mwa ndila inela. Mapempelwiwa kanokoza ukami-ani fwanya mawu apama anayo munaonge nyo mu pempelo linyu. Moi munokoza fwanya mapempelo ogwilizana na vyevyo vinaireya vamoywinyu.

12. Kodi ninavifuke vyofuka viivi naganizelanga mapempelo anayo kalembiwe m’Baibulo?

¹² Mwaganizelanga mapempelo anayo kalembiwe m’Malemba muvifukenga ira: ‘Kodi ngu mbaani unoyo alembile mawu anala, nanga agumana na vyoi avi? Kodi vyevyo afotokozile liyevi pi vyevyo teto vinandiireela? Nanga ndinafunjedavo n’ni?’ Mwasaela mokwakwanela vyosomeda vya vyofuka vyevi munopindula vinjinji. Tiyemoni nikambilane visazo vingasi vyene.

13. Kodi ninafunjede n’ni va pempelo la Hana? (1 Samuweli 1:10, 11) (Onani ithuzithuzi .)

¹³ Welengani 1 Samueli 1:10, 11. Vevo Hana apeleka liye pempeloli oogumana na mavuto ambiili alukulualukulu. Liye ali o-obala moi anjilae oomuvuti-a vinjinji. (1 Sam. 1:4-7) Akala mukalile mulimbananga na vuto limo-iliwa lene, kodi munafunjede n’ni va pempelo la Hana? Hana oopempela wa Yehova wa thawi indendai moi oomufotokozela vyetene vyevyo vyamupangi-a ira akumbanyenga moi oovevuwiwa. (1 Sam. 1:12, 18) Na-iyene teto ninokoza vevuwiwa akala ‘ninamurulele Yehova nkhawa di-u’ vomuwandela mwemo ninavwela iyo vya vuto limo-iliwa lene lelo ninagumanana iyo.— Sal. 55:22.

14. (a) Kodi ninafunjede teto n’ni wa Hana? (b) Kodi ganizela modii-a Mawu a Mulungu unanikami-e avi ira nifwanye vyoi nionge mu pempelo li-u? (Onani teto mawu a m’pedi.)

¹⁴ Vangavirile chaka doyeva Samueli angabaluwe, Hana oomudowana wa Eli unoyo ali ndimuwa wa asembe. (1 Sam. 1:24-28) Mu pempelo lae lokumela vati va murima, Hana oomuyamikela Yehova chifukwa unoteteza nosamalela atumikae ororomeleya.c (1 Sam. 2:1, 8, 9) Vinaoneya ira mavutwae a vande katamalile, komave Hana ooganizela vinjinji mwemo Yehova mwamudalisele liye. Kodi ninafunjedavo n’ni? Ninokoza kwakwani-a vilela mavuto anayo ninalimbanana iyo naganizelanga mwemo Yehova ukalile liye anikami-elanga mpakana vathawiila.

15. Kodi ninafunjede n’ni va pempelo la namaongela Yeremiya naireliwa vyongo vyookaana chilungamo? (Yeremiya 12:1)

¹⁵ Welengani Yeremiya 12:1. Va thawi imo-iwa, namaongela Yeremiya ookumudwa angaonile ira athu otakala vyongo vinowaendela pama, koma teto chifukwa ya vyevyo Aisaraeli afwae kamupangelaathu. (Yer. 20:7, 8) Ninokoza vwechecha vyevi naganizela mwemo ninavwela iyo athu otakala vyongo vyaaendelanga pama kapena teto kaninyozanga. Ngakale ira Yeremiya oofotokoza mwemo mwavwela liye, kamuimbile Mulungu mulandu opanga vyongo mookaana chilungamo. Angaonile ilango ineyo Yehova apelekile liye wa athu opanduwayo, ooambeela muroromela vinjinji Yehova unoyo gwachilungamo. (Yer. 32:19) Na-iyene teto namuwandelanga Yehova momasuwa mwemo ninavwela iyo, niroromelenga ira va thawi yofwanelela liye unoza amali-e vyongo vyetene vyookaana chilungamo.

16. Akala ninaona ira kaninakwakwani-e panga vimo-i viwa vyene, kodi ninafunjede n’ni wa Mulevi m’mo-iwa unoyo ali uukapolo? (Salimo 42:1-4) (Onani teto ithuzithuzi.)

¹⁶ Welengani Salimo 42:1-4. Nyimbwela yalembiwe na Mulevi m’mo-iwa, unoyo ali uukapolo moi kaakwakwani-a dowa lambela limo-i na Aisaraeli afwae. Nyimbwela inotonyi-eda mwemo mwavwela liye. Ninokoza vwechecha mwemo Mulevila mwavwela liye akala ninalepela venyavo vande chifukwa ya marenda, kapena akala nili mundende chifukwa ya iroromelo yi-u. Ninokoza chenjachenjanga mwemo ninavwela iyo, koma mulimwetene mwemo vinakaleleathu nimuwandelenga Yehova. Vyevi vinokoza nikami-a ira niambeele ganiza pama koma teto nionenga vyongo mofwanelela. Mwaisazo, Mulevila oozindikila ira unokoza mutamandanga Yehova mundila do-iyana-iyana. (Sal. 42:5) Ooganizela teto mwemo Yehova mwamukami-ela liye. (Sal. 42:8) Pempela wa Yehova kumela vati vamurima unokoza nikami-a ira niiziwe mwemo ninavwela iyo, niambeele ona vyongo mofwanelela koma teto nifwanye kopolo ira nivilelenga mavutwi-u.

17. (a) Kodi ninafunjeda n’ni va pempelo la namaongela Yona? (Yona 2:1, 2) (b) Kodi mawu amo-iwa oromoliwa mu nyimbo da buku la Masalimo, kananikami-e avi nagumana na mavuto? (Onani mawu a m’pedi.)

¹⁷ Welengani Yona 2:1, 2. Namaongela Yona oopeleka pempeloli angali m’mbani mwa somba ilukulu. Ngakale ira vathawi inela kaamuvwele Yehova, liye kaakaikela ira Yehova unovwa pempelo lae. Vopempela, Yona oo-indi-eda chito mawu anjinji anayo kali mu nyimbo da buku la Masalimo.d Kaninakaikela ira liye oodiiziwa pama nyimbo dedi. Eno ganizela nyimbodi oomusimikizela ira Yehova unomukami-a. Na-iyene teto naloweza mavesi amo-iwa a m’Baibulo, ninokoza za aumbuwela moi kanoza kanikami-e napempelanga wa Yehova vevo nigumanile iyo na mavuto.

PEMPELA UNONIKAMI-A IRA NIKALE VA USAMWALI WAPAMA NA YEHOVA

18-19. Akala thawi dimo-i vinanirucha fotokoza mwemo ninavwela iyo napempelanga, kodi lemba la Aroma 8:26, 27 linanikami-e avi? Pelekani isazo.

¹⁸ Welengani Aroma 8:26, 27. Thawi dimo-i ninokaana nkhawa vinjinji moi ninolepela mufotokozela Yehova mwemo ninavwela iyo. Koma va thawi ngati dedi, zimu owela wa Mulungu, “unochondelela” mʼmalo mwa iyo. Kodi unapanga avi vyevi? Vo-indi-eda chito zimu owela, Yehova ookami-a athu anayo kalembile Baibulo ira kalembe mapempelo anjinji. Nalepelanga fotokoza pamapama mwemo ninavwela iyo, Yehova unokoza indi-eda chito vyevyo vyalembiwe m’mapempelwala, ngati ira mba mapempelo anayo iyo nafuna iyo peleka moi unowanda asomeda.

¹⁹ Likundo leli loomukami-a murongola m’mo-iwa wa wu Russia zina lae Yelena. Liye oomangiwa chifukwa yopempela koma teto welenga Baibulo. Yelena ookaana nkhawa vinjinji moi vyoomurucha pempela. Koma liye aongile ira: “Ndooumbuwela ira akala ndin’na nkhawa vinjinji nolepelanga pempela, Yehova unokoza ona mapempelo a atumikae anayo kalembiwe m’Baibulo . . . ngati mapempelo anayo ndapeleke miyo . . . Vyevi vyoondikami-a vinjinji va thawi yoruchela.”

20. Chin’ni inaukami-eni ira mukwakwani-e pempela mwakaana nkhawa?

²⁰ Nakaana nkhawa ninokoza ambeela ganizela vyongo vimo-i vyevyo ninapempelela iyo. Ira maganizwi-u kagarateye, ninokoza welenga kapena vuruwana nyimbo dofwanyeya m’buku la Masalimo. Mofwanafwana na mwene Davide, ninokoza teto lemba mwemo ninavwela iyo. (Sal. 18, 34, 142; mawu avadimu.) Pivyoona ira kavili malamulo anayo ninafuna iyo a-arela nakozeelanga pempela. (Sal. 141:2) Eno mupangenga vyevyo munaona nyo ira pivyokami-a wa nyo.

21. Chifukwa n’ni ninafuneya pempelanga na murima wetene?

²¹ Pivyolimbikisa iziwa ira Yehova unovwechecha mwemo ninavwela iyo ngakale naanamuwandele iliyetene. (Sal. 139:4) Koma liye unosangalala vinjinji namuwandela mawu otonyi-eda ira ninomuroromela. Eno kamuzengelezenga pempela wa Babinyu wa udimu. Ninokoza teto i-ndi-eda chito mawu ofwanyeya m’mapempelo a m’Baibulo. Mupempelenga na muriminyu wetene. Mumuwandelenga vyevyo vinausangalasani koma teto vyevyo vinaupangi-ani ira mukumbanyenga. Chifukwa yoi Yehova ngu fwinyu wavamurima, liye unerenga ukamu-ani thawi detene.