MURU 11
Kodi Munaire Avi Ira Welenga Baibulo Uukami-engani Vinjinji?
Kodi muwambeela va-iwavo chito ilukulu koma nyo ovanga ambeela i-inda? Mwina chitoyo mwaigawile vang’ono vang’ono ira mukwakwani-e i-inda. Mu pumwemwemo munairele nyo ira mukwakwani-e welenga Baibulo. Mwina munokoza vifuka ira, ‘ndiye ndinaambeele vaavi?’ M’murula, ninokambilana ndila doorucha dedo dinaukami-edeni ira musangalalenga mwaweleganga no funjeda Baibulo.
1. Chifukwa n’ni ninafuneela welenga Baibulo dambo lililetene?
Muthu unoyo unawelenga Baibulo kapena nionge ira “ilamulo ya Yehova” dambo lililetene unokala osangalala koma teto vyongo vinomuwendela pama. (Welengani Salimo 1:1-3.) Ira vyevi viwandeye, munafuneela ambeela nowelenga Baibulo wa maminisi oyeva dambo lililetene. Vyevi vinoukami-ani ira muwaiziwe pama Mawu a Mulungu teto welenga Baibulo unoza uwambeele usangalasani vinjinji.
2. Kodi munaire avi ira welenga Baibulo uukami-engani?
Ira welenga Baibulo unikami-enga vinjinji, niambeelenga imela noganizela vyevyo niwelengile iyovyo. Niwelengenga “nosikhasikha.” (Yoswa 1:8) Eeno, Mwawelenganga Baibulo muvifukenga vyofuka monga vi: ‘Kodi vyevyo ndinawelenga miyovi vinandifunji-a vyoi avi vyokuza Yehova Mulungu? Kodi ndinavi-indi-ede avi chito vamoywanga? Kodi makundo am’mavesala ndinaa-indi-ede avi chito vokami-a athu amo-iwa?’
3. Kodi munapange avi ira mufwanyenga thawi yowelenga Baibulo?
Kodi vinouruchani ira mufwanye thawi yowelenga Baibulo? Anjinji mwa iyo vinonirucha. Muesaesenga “indi-eda chito pama thawinyu.” (Aifeso 5:16) Ira mukwakwani-enga panga vyevi, musakulenga thawi yoi muwelengenga Baibulo dambo lililetene. Athu amo-iwa kanaomeliwa welenga Baibulo mamawa. Amo-iwa kanaomeliwa welenga mutana, kapena vathawi yovuma. Moi amo-iwa kanoomeliwana welenga ma-iyu kaanagone. Nanga nyo munaomeliwe welenga thawi iivi?
FUNJEDANI VYOWENJEDELEYA
Saelani vyevyo munaire nyo ira musangalalenga vinjinji mwawelenganga Baibulo. Funjedani vyevyo munaire nyo ira mukozeelenga pama na yolinga yoi funjeda Baibulowo uukami-engani vinjinji.
JMofwanafwana na mwemo ninairele-iyo ira niambeele omeliwana vyodja vyo-iyana-iyana, pivyowandeya ambeela omeliwana welenga Baibulo
4. Muomeliwengana welenga Baibulo
Vinokoza niruchanga ira niambeele welenga Baibulo. Komave, ninokoza kaana murima ‘olakalaka welenga’ monga mwemo muthu unairela liye ira aambeele omeliwana yodja yoi kanaidjevo. Welengani 1 Petulo 2:2, era eeno tapanyani yofuka yo-arelela:
Kodi munaona ira welenga Baibulo dambo lililetene unokoza ukami-ani ira muambeele liwomeliwana vinjinji lakalakanga welenga vinjinji?
Onelani VIDIYO ira muone mwemo athu amo-iwa mwaambeeleathu omeliwana welenga Baibulo. Era eeno tapanyani vyofuka vyo-arelavi.
Muvidiywela, kodi anyamatala kawandile gonji-a mavuto aavi?
Pivyongo vyiivi vyevyo vyaakami-ile ira kati-iye welenga Baibulo dambo lililetene?
Nanga kapangile n’ni ira welenga Baibulo uwasangalasenga?
Vyevyo vinaukami-eni ira muambeele welenga Baibulo:
Sakulani Baibulo lelo latapuleliwe molondola koma teto lovweya pama. Esedelani welenga Baibulo la Dziko Latsopano akala lilivo mu iwongelo inyu.
Ambeelani nowelenga buku lelo linausangalasani vinjinji. Ira mupange vyevi, onani bokosi loi “Ambeelani welenga Baibulo.”
Muchongenga machaputala anayo muwelengile nyo. Indi-edelani chito bokosi loi “Chongani machaputala anayo muwelengilenyo” lelo lili m’bukuli.
Mu-indi-edelenga chito pologaramu ya JW Library®. Pologaramwila inokoza ukami-ani ira muwelengenga koma teto nolivwechecha Baibulo uliwetene wewo munakale nyo, vo-indi-edela chito foni kapena vipangizo vimo-i viwa.
Mu-indi-edenga chito vyaumapeto vyevyo vili mu Baibulo la Dziko Latsopano. Munofwanyamo mapu , mabokosi, na matapulelo a mawu amo-iwa. Vyevi vinoukami-ani ira musangalalenga vowelenga Baibulo.
5. Mukozeelenga vyevyo munafunjede nyo
Welengani Salimo 119:34, era eeno tapanyani vyofuka vyo-arelavi:
Chifukwa n’ni munafuneela pempela mwa-anaambeele welenga Baibulo kapena mwa-anaambeele kozeela puzilo la Baibulo?
Kodi munaire avi ira mupindulenga na puzilo lililetene? Mwakozeelanga puzilo lililetene, esani panga vi:
Welengani ndima dowambeela.
Welengani malemba anayo ka-eliwevo, teto onani mwemo kanagwilizanelaatu nakhaniyo.
Mulembenga zele vati va yosomeda ya yofuka iliyetene kapena chekenela; panga vyevi unoukami-ani vevo munakambilana nyo murula na malimba ufunji-ani.
Nanga munoiziwa?
A Mboni da Yehova kookala ka-indi-edanga chito Mabaibulo o-iyana-iyana. Komave ninoomeliwa indi-eda chito vinjinji Baibulo la Dziko Latsopano la Malemba Opatulika chifukwa tilolondola, lovweya pama koma teto lino-indi-edela chito zina la Mulungu. — Onani khani yava webusaiti ya muru oyi, “Kodi a Mboni za Yehova ali ndi Baibulo Lawolawo?”
ATHU AMO-IWA KANAONGA IRA: “Welenga Baibulo chichito yogomi-a. Kandinawande chifukwa ndinotanganisiwa vinjinji.”
Nanga nyo munaganiza avi?
VYEVYO NIFUNJEDILE IYO
Ira mupidulenga nowelenga Baibulo, mufwanyenga thawi yoliwelenga, mupempelenga ira mulivwecheche pama koma teto mukozeelenga mwanaambeele funjeda.
Vyofuka Vyoweli-eda
Chin’ni inaukami-eni ira mupindulenga vinjinji vowelenga Baibulo?
Nanga chithawi iivi ineyo munasakule nyo ira muwelengenga koma teto funjeda Baibulo?
Chifukwa n’ni munafuneela kozeela muru uliwetene?
ONANI VIMO-I
Fwanyani makundo amo-i anayo kanaukami-eni ira mupindulenga vinjinji vowelenga Baibulo.
“Kodi Mungatani Kuti Kuwerenga Baibulo Kuzikusangalatsani?” (Nsanja ya Olonda Na. 1 2017)
Onani ndila taaru dokami-a vowelenga Baibulo.
Onani Vyevyo munapange nyo ira welenga Baibulo uusangalasengani.
Athu anayo kakalile kawelenganga Baibulo wathawi indendai kanokoza ukami-ani iziwa ndila ndimo-i dowelengela Baibulo.