MURU 34
Kodi Ninatonyi-ede Avi Ira Ninomuomeliwana Yehova?
Kodi vano muwambeela omeliwana Mulungu vinjinji kwaranya vathawi ineyo mwaambeela nyo funjeda Baibulo? Kodi munofuna dowanave kala vausamwali wolimba na liye? Akala chi eeno, muumbuwelenga ira Yehova auonani ira munodowanave muomeliwana, pavevo naliyene unauomeliwanani liye vinjinji. Ndiye kodi munatonyi-ede avi ira munomuomeliwana?
1. Kodi ninatonyi-ede avi ira ninomuomeliwana Yehova?
Ninotonyi-eda ira ninomuomeliwana Yehova navwelanga malamulwaye. (Welengani 1 Yohani 5:3.) Liye kananikanyi-eda ira nimuvwelenga. Koma unafuna ira uliwetene wa iyo asakulenga eka muvwela kapena oomuvwela. Yehova unaira vyevi chifukwa unafuna ira ‘nimuvwelenga kumela vati vamurima.’ (Aroma 6:17) Vyevi vinatapulela ira, liye unafuna ira mumuvwelenga chifukwa yoi munomuomeliwana, ookala mokanyi-ediwa. Magawo 3 na 4 a bukuli, kanoukami-ani tonyi-eda ira munomuomeliwana Yehova voira vyevyo vinamuomela nopewa vyevyo unaidanana liye.
2. Chifukwa n’ni vinakale vyorucha tonyi-eda ira ninomuomeliwana Yehova?
Baibulo lini: “Masoka a muthu wolungama mboinjiva.” (Salimo 34:19) Etene vinonirucha tonyi-eda ira ninomuomeliwana Mulungu, chifukwa nili ochimwa. Thawi dimo-i ninogumana na mavuto osauweleya wa ndalama, ireliwa vyongo vyo-okaana chilungamo na mavuto amo-i. Nagumananga na mavuto, vinokala vyorucha panga vyevyo Yehova unafuna liye. Koma mwaesaesanga kala wororomeleya noira vyevyo Yehova unafuna liye, pavevo munatonyi-eda nyo ira munomuomeliwana vinjinji kwaranya yongo iliyetene. Mwairanga vyevi munotonyi-eda ira muli ororomeleya wa Yehova. Koma teto, naliyene unoza akale wororomeleya wa nyo. Yehova kanaza au-iyani. — Welengani Salimo 4:3.
FUNJEDANI VYOWENJEDELEYA
Onani chifukwa iwa Yehova unasangalala mwamuvwelanga, koma teto vyevyo vinaukami-eni ira mudowenave kala wororomeleya wa liye.
3. Khani ineyo inaukuzani
Malinga na vyevyo ninawelenga iyo m’Baibulo m’buku la Yobu, Satana awongile ira Yobu atumikela Mulungu chifukwa ya vyevyo an’na liye. Malambwano teto, Satana unawonga ira athu kanatumikela Yehova chifukwa yofuna pindulavo yongo imo-iwene. Welengani Yobu 1:1, 6–2:10, era eeno tapanyani vyofuka vyo-arelavi:
Kodi Satana, awongile ira Yobu avwela Yehova chifukwa n’ni? — Onani Yobu 1:9-11.
Kodi Satana unawonga ira athu etene, tangani-avo nyoovo kanavwela Yehova chifukwa n’ni? — Onani Yobu 2:4.
Welengani Yobu 27:5b, era eeno tapanyani yofuka yo-arelela:
Kodi Yobu atonyi-edile avi ira oomeliwana Yehova na murimae wetene?
Yobu ootonyi-eda ira unoomeliwana Yehova vokalave ororomeleya wa liye
Na-iyene ninotonyi-eda ira ninomuomeliwana Yehova vokalave ororomeleya wa liye
4. Muomeli-enga murima wa Yehova
Welengani Miyambo 27:11, era eeno tapanyani vyofuka vyo-arelavi:
Kodi Yehova unavwa avi mwairanga vyongo mwazelu koma teto mwamuvwelanga? Chifukwa n’ni munaonga eeno?
5. Pivyowandeya kala ororomeleya wa Yehova
Ninoesaesa awandela amo-iwa vyokuza Yehova chifukwa ninomuomeliwana. Teto ninoira vyevi votonyi-eda ira nili ororomeleya wa liye ngakale ira thawi dimo-i vinokala vyorucha. Onelani VIDIYO, era eeno tapanyani vyofuka vyo-arelavi.
Kodi nyo vinouruchani wandela amo-iwa vyokuza Yehova?
Malinga na vyevyo nionile iyo muvidiywela, chin’ni yakami-ile Grayson ira amali-e wova?
Naomeliwanga na vyevyo Yehova unaomeliwana liye noidana na vyevyo unaidanana liye kavinaniruche kala ororomeleya wa liye. Welengani Salimo 97:10, era eeno tapanyani vyofuka vyo-arelavi:
Malinga na vyevyo mufunjedile nyo, kodi vimo-i mwa vyongo vyevyo Yehova unaomeliwana liye piivi? Nanga pivyongo vyiivi vyevyo unaidanana liye?
Kodi munaire avi ira muwambeele omeliwana vyapama noidanana vyotakala?
6. Vyongo vinoniendela pama navwelanga Yehova
Athu anayo kanavwela Yehova, vyongo vinowaendela pama thawi detene. Welengani Yesaya 48:17, 18, era eeno tapanyani vyofuka vyo-arelavi:
Malinga na lembali, kodi pivyovweya roromela ira thawi detene Yehova aniva-anga malangizo unoiziwa ira kanonikami-a? Chifukwa n’ni munaonga eeno?
Vofiya vano, kodi funjeda Baibulo koma teto vyokuza Mulungu waimbarimbari Yehova, uukami-ileni avi?
KODI MUTHU M’MO-IWA ANGAUFUKILENI IRA: “Kodi vyoira vyanga vinaande avi omeli-a Mulungu?”
Munawelenge lemba liivi lelo linamukami-e iziwa ira Yehova unosangalala kapena kumudwa na vyevyo ninaira iyo?
VYEVYO NIFUNJEDILE IYO
Munotonyi-eda ira munoomeliwana Yehova, vomuvwela nodowanave kala ororomeleya wa liye, ngakale vevo munagumanana nyo mavuto.
Vyofuka Vyoweli-eda
Kodi mufunjedile n’ni vyokuza isazo ya Yobu?
Kodi munatonyi-ede avi ira munomuomeliwana Yehova?
Chin’ni inaukami-eni ira mudowenave kala wororomeleya wa Yehova?
ONANI VIMO-I
Onani vyevyo vinaukami-eni kala ororomeleya wa Yehova koma teto mupingo.
“Munthu Wokhulupirika, Mudzamuchitira Mokhulupirika” (16:49)
Onani vyevyo Satana vinaonga liye vyokuza athu.
Onani mwemo a-ima kanatonyi-edeleathu ira kanoomeliwana Yehova.
Kodi muzombwe unoyo afwaye kanamukanyi-eda ira apange vyongo vyotakala unaire avi ira akaleve wororomeleya wa Mulungu?