Kodi Muli Okozeya ‘Zawachela Ilambo Yavati’?

ETENE iyene ninoyembekezela mwachidwi kwakwaneli-ediwa wa lonjezo la Yesu loi: “Odala mbanayo kali ofaasa, chifukwa kanoza kawachele ilambo yavati.” (Mat. 5:5) Ozoziwa kanoza kawachele ilambo yavati vevo kanazeathu kalamulele limo-i na Yesu udimu. (Chiv. 5:10; 20:6) Akiristu anjinji malambwano, kanoembekezela za kala muilambwela mpakana walewale, mwamurendele, mosangalala koma teto kangali angwilo. Ira vyevyi vize viwandeye aliwa kanoza kakaena chito injinji yoi kaze ka-inde. Kaganizelani chito diraaru di: Ing’anela ilambo yavati, kami-eda ovenyi-iwa fwanya vyofuneya, koma teto afunji-a. Ganizelani vyevyo munairenyo vathawi ila votonyi-eda ira munofunechecha za indanawo chito di.

KODI MULI WOKOZEYA ZA INDANAWO CHITO YOSAMALELA ILAMBWELA?

Vevo Yehova alamulile liye athu ira ‘kazaale ilambo yavati teto kaiing’anele,’ atapulela ira vira wa thawi ilambo yetene yavati inoza ikale malo apama. (Gen. 1:28) Athu anayo kanaze kalamulele ilambwela, kanoza kafuneele vwela lamulo leli. Vofwanya ira munda wa Edeni kuliwo, athu kanoza kafuneele ambeela teto sakaeda ilambwele ira ikale paradaizo. Vanduli va Aramagedo, vanoza vakale chito yosakaeda malo anayo va thawi ila kawonongeye. Enela inoza ikale chito ilukulu vinjinji.

Vyevyi vinoniumbucha chito ilukulu eneyo Aizarayeli kan’naathu vevo kaweleleathu waniwa kumela wu Babulo. Wa chaka 70 muilambo mwiwa kamwakaliwa. Koma Yesaya ali angawongile ira Yehova unoza aakami-ede ira kasakaeyede teto ilambweyo. Ulosiyo waongile ira: “Unoza airie-e chipululwaye kala Edeni na dela laye la chipululu kala n’nga munda wa Yehova.” (Yes. 51:3) Aizarayeli kookwakwani-a inda chito enela. Mofwanafwana na vyevyi, Yehova unoza akami-ede anayo kanaze kawachele ilambwela ira kakwakwani-e isakaeda. Viikala vyevyo munaire nyo va thawi ila votonyi-eda ira munofunechecha za indanawo chitwela.

Ndila imo-i eneyo munatonyi-edele nyo vyevyo kuyesayesa samalela vande vinyu. Munafuneela ira vyevyi masiki owandamanana manyumba katinaira vyevyi. Munokami-eda teto vocheni-a no sakaeda Nyumba ya Umweninyu kapena Malo a Sonkano. Akala vyongo vili pama wa nyo munokoza vipeleka ira mu-indenganawo chito yopeleka tandizo vaireya ngozi. Mwairanga vyevyo, munotonyi-eda ira muli okozeya kami-eda vevo vanafuneela likami-edo. Munokoza vifuka ira, ‘Kodi viikala luso limo-iliwalene lelo ndinafunjede miyo, lelo ndinaze miyo ndili-indi-ede chito ndaza ndiwachela ilambo yavati?’

Abali na arongola kanoocheni-a nosakaeda Nyumba ya Umwene.

KODI MULI OKOZEYA ZA SAMALELA OVENYI-IWA?

Angavenyi-ile mwana wa iyana wa Yairo, Yesu oowonga ira kamuva-e mwanoyo yodja. (Malik. 5:42, 43) Podi ira kavyali vyorucha samalela musikana wa chaka 12 onola. Koma kaganizelani chito eneyo inaze ikalevo vevo Yesu unaze liye akwakwaneli-ede lonjezo laye loi: “Etene anayo kali m’manda a iumbuwelelo kanoza kavwe mawaye teto kanoza kakume.” (Yoh. 5:28, 29) Masiki ira Baibulo kalinawonga vinjinji, vinovaela oneya ira athu ovevyi-iwa kanoza kafuneele kami-ediwa fwanya yodja, vokala, koma teto vyowara. Kodi munotonyi-eda masiki vano ira munofunechecha za kami-a? Viikala vyofuka vingasi vyene vyofuneya viganizela.

Kodi munaire n’ni vano votonyi-eda ira muli okozeya za wachela ilambo yavati?

Abali na arongola kanoosangalala va bwalo la ndege kawachelanga athu oza usonkano wa vilambo wu Paris.

Vapelekiwa chilengezo yoi woing’anela dela unoza awaledele pingwinyu, kodi munomuva-a vyodja? Atumiki a thawi detene anayo utumikiwa wava Beteli uchenjile kaza mumpingo mwinyu, kapena woing’anela dela amari-a utumikaye, kodi munokoza akami-eda fwanya malo okala? Akala sonkano wachigawo kapena wadela unaireele mudela linyu, kodi munovipeleka ira mu-indena chito sonkanoyo wa-anaambeele kapena vanduli viwa, kapena teto munokoza vipeleka za wachela alendo?

KODI MULI OKOZEYA ZA FUNJI-A OVENYI-IWA?

Mogwilizana na vyevyo ninawelenga iyo va Vyoira 24:15, ninoembekezela ira athu mabilioni kanoza kavenyi-iwe. Anjinji mwa athwala kanaza kakale anayo katan’na mwayi oiziwa vinjinji vyokuza Yehova. Aliwa kanoza kafwanye mwayi kaza kavenyi-iwa.a Atumiki ororomeleya a Mulungu, anayo kanaiziwa vinjinji kanoza ka-indenawo chito yofunji-ela. (Yes. 11:9) Charlotte onoyo ukan’le alaleelanga wu Europe, South America, nawu Africa, unoembekezela mwa chidwi thawi enela. Mosangalala liye eere: “Ndinoembekezela mwachidwi za funji-a athu anayo kanaze kavyevyi-iwe. Ndawelenganga vya muthu m’mo-iwene onoyo akan’levo mundulimu, thawi dinjinji ndinoganiza ira, ‘Muthu onola aakale ira oomuiziwa Yehova, moywaye kwaakala eeni.’ Ndinofuna za wandela ovenyi-iwa vyokuza Yehova koma teto ira vyongo vinokoza ayendelanga pama akala kanamutumikelenga.”

Masiki atumiki ororomeleya a Yehova anayo kakan’lewo na moyo Yesu a-anaze vailambwela, kanoza kakaena vinjinji vyoi kafunjede. Kaganizelani mwemo vinakaleleathu vyosangalasa mufotokozela Daniyeli kwakwaneli-ediwa wa maulosi anayo alembile liye koma kaavwechecha. (Dan. 12:8) N’nga bwanji va khani yokami-eda Rute na Naomi iziwa ira banja liwa lali muzela obaliwa wa Mesiya? Vinoza vikale vyosangalasa inda chito vailambo yetene wa-ali mavuto, teto vyosokoneza vyilivyetene.

Murongola unamuva-a mu-iyana m’mo-iwa pepala umalo wochapela vyowara.

Kodi ninatonyi-ede avi ira nili okozeya za indanawo chitwela? Ndila imo-i kuyesayesa wenjedela luso li-u lofunji-a koma teto indanawo thawi detene chito yofunji-a athu eneyo inaireya vailambo yetene. (Mat. 24:14) Masiki ira kamunawande ira vinjinji va thawi ila chifukwa ya usinkwinyu kapena vyongo vimo-i, tindi linyu linokoza tonyi-eda ira munofunechecha za funji-a ovenyi-iwa.

Eeno yofuka yofuneya vinjinji choi, kodi nyo munofunechecha za wachelanawo ilambo yavati? Kodi munosangalala ira munoza mu-indenawo chito yosamalela ilambwela koma teto kami-a no funji-a ovenyi-iwa? Munokoza tonyi-eda ira muli okozeya mwa-indangana chito dofwanafwana na dedo munazenyo mu-inde mwaza muwachela ilambo yavati.

a Onani khani yoi “Kuthandiza Anthu Ambiri Kuti Akhale Olungama” mu Nsanja ya Olonda ya Septembala 2022.