Mulangizi Mulukulu Ukala Anifunji-anga wa Moywi-u Wetene

ISAZO YA MAKOLWANGA

Umapeto wa chaka ya 1950, Makolwanga kootama kuma wu Italy dowa wu taoni ya Kindersley muigawo ya Saskatchewan wu Canada. Vaanavire thawi indendai, aluwa koofunjeda choonadi moi yookala yofuneya vinjinji va moywiwa. Ndinoumbuwela ira ndangali mwana, thawi dinjinji ndookala mu utumiki na athu a m’banja langa, eno ndinoomeliwa onga moteya ira ndaambeele upainiya wokami-a ndangan’na chaka 8.

Makolwanga kali osauwa komave koopeleka isazo yapama va khani yoviimana vyongo vimo-i ira katumikelenga Yehova. Mwaisazo mu 1963, aluwa kooguli-a katundwiwa munjinji ira kafwanye ndalama na yolinga yoi kafwanyeye usokhano wa vilambo unoyo waireile wu Pasadena wu California mu ilambo ya America. Mu 1972 nootamela muzinda wa Trail British Columbia mu ilambo ya Canada, wewo wali ulendo wa makilomita 1 000, ira nakami-e gawo loonga italiyana. Ababanga kookoonda udindo wu chito na yolinga yoi ka-elenga maganizwiwa etene votumikela Yehova.

Ndinoyamikela vinjinji isazo ineyo makolwanga kaniva-ileathu. Vyevyo kanifunji-aathu pivyoodiwaleya moi vinondikami-a va utumikanga wetene. Ndoofunjeda ira nda-elanga vyongo vyokuza Umwene va malo owambeela, Yehova unoza andisamalele. — Mat. 6:33.

AMBEELA UTUMIKI WA THAWI DETENE

Mu 1980, ndootela murongola m’mo-iwa woriya zina lae Debbie, unoyo an’na vyolinga vyotumikela Yehova. Noofuna panga utumiki wa thawi detene. Eno Debbie oowambeela upainiya vangakede vira medi taaru kumela vevo natelanile iyo. Vangavirile chaka imo-i nootamela mu pingo umo-iwa ung’onong’ono wewo wafuneya olaleela anjinji, moi miyo teto ndoowambeela panga upainiya.

Vangavirile thawi yolapa nookumudwa moi nooganiza vyoi nivenyeo. Koma yowambeela noongi-ana na oing’anela dela. Liye oonisomeda mwachikondi koma moona murima ira: “M’bali vuto ngu nyo. Munakeda ganizela vyevyo kavinaenda paama. Akala munasaele vyevyo vinaenda pama munokoza vifwanya.” Veva ooniva-a malangizo anayo nafuneya iyo. (Sal. 141:5) Thawi ineyo noowambeela a-arela moi noozindikila ira vookala vyapama vinjinji vyevyo napanga iyo. Athu anjinji mu pingo koowambeela funa panga vinjinji votumikela Yehova, tangani-avo azombwe na athu amo-iwa anayo kali va banja na amo-iwa o-ororomeleya. Veva noofunjedavo vinjinji. Noofunjeda ira niganizelenga vyevyo vinaenda pama umo-iuwau niyembekezelanga ira Yehova asakaede vyevyo vyaanaenda paama. (Mika 7:7) Noowambeela teto sangalala moi vyongo vyoochenja

Alangizi a sukulwi-u ya upainiya kali kangatumikelevo mu vilambo vimo-i. Aluwa koonioni-a vithuzi nitonyi-eda mavuto na madaliso anayo kafwanyile-athu. Vyevi vyoonilimbikisa ira niambeele funa panga umishonale, moi noosimikiza ira niambeele utumiki unola.

Ira nikwakwaneli-ede yolinga inela, mu 1984 nootamela wu gawo loonga Ifulenchi mu ilambo ya Quebec, wewo wali ulendo wokwaranya makilomita 4,000 kumela wu British Columbia. Nafuneya funjeda ikalelo na iwongelo isha. Va thawi imo-iwa nakeda roromela dowa dodela kolowa do-ala m’munda wa muthu m’mo-iwa. Debbie oofwanya ndila do-iyana-iyana dopiyela kolowado. Ngakale ira noogumana na mavuto, noowavilela mosangalala moi noona ira Yehova unonisamalela.— Sal. 64:10.

Dambo limo-i nooimbeliwa foni ineyo kanaiyembekezela. Yali yoniitana ira natumikele wu Beteli ya wu Canada. Kanaiziwa yoira chifukwa nali nangakede wene saina fomu yofukedela Sukulu ya Giliyadi. Komave noosomedela dowa. Ningafiile noofuka M’bali Kenneth Little wa mu Komiti ya thambi ira, “Nanga vya Sukulu ya Giliyadi nafukedile iywele?” Liye oonisomeda ira, “Kamupupulume dedi-ani.”

Vangakede vira mulungu umo-i, noosomeda vyevyo m’balile atapulela liye. Miyo na Debbie nooitaniwa ira navolowe Sukulu ya Giliyadi. Eno nafuneya sakula vyoira. M’bali Little ooniwandela ira: “Iziwani ira kaya munasakula vyoi avi, dambo limo-i munoza muone ira bola mwasakule vimo-i viwavyo. Kavali utumiki wokwaranya umo-i. Yehova unokoza dalisa iliyetene.” Noosomedela dowa wu sukulu ya Giliyadi moi wa chaka dinjinji, niona ira vyevyo M’bali Little aonga liye vyali vyoona. Iyo teto nikala nipelekanga malangizo anala wa athu anayo kanafuna sakula utumiki oyi kapange.

NOOWAMBEELA UMISHONALE

Noosangalala kala mu gulu la ofunjeda 24 anayo kavolowile sukulu nambala 83 ya sukulu ya Giliyadi, ineyo yaireile wu Brooklyn, muzinda wa New York, mu Epulo 1987. Alangizi-u kali M’bali Ulysses Glass na M’bali Jack Redford. Medi 5 doomala mombaraanya moi noomari-a maphunzilwi-u va 6 septembala, 1987. Nootumiziwa wu Haiti, limo-i na banja la John na Marie Goode.

Keda ambeela mu 1962, vevo amishonale katamangi-iweathu, wu Haiti kawali teto amishonale. Vangavirile milungu taaru keda kumela vevo namari-ile iyo maphunzilo a Giliyadi, nootumikela mu pingo umo-i wa ofalisa 35, unoyo wali mudela la mimwango. Nali azombwe moi kanaiziwa vinjinji. Nookala teto eki-u mu nyumba ya amishonale. Athu anjinji awewo kali osauwa moi katawanda welenga. M’malambo owambeela awu mishonali-u wookala vipolowe, ukela boma, tumeya vyongo m’miseu koma teto lipevo na zongwe wakopolo.

Noofunjeda vinjinji wa abali na arongola awu Haiti anayo kakalave osangalala ngakale ira koogumana na mavuto. Athu anjinji koovuteya komave koomuomeluwana Yehova koma teto utumiki. Murongola m’mo-iwa okalamba kaawanda welenga koma oosungela m’muruni mavesi otamangela 150. Vuto lililetene lelo nagumanana iyo loonilimbikisa ira nilaleelenga uthenga wapama unoyo unaza umali-e mavuto aathu. Ninosangalala ona ira athu anjijnji anayo nafunjedana iyo Baibulo kookala apainiya ogarateya, apainiya avadela koma teto andimuwa.

Nangali wu Haiti, Noogumana na Trevor unoyo ali m’mishonale wa ipembezo imo-iwa ya Imomoni moi nookambilana vyokuza Baibulo maulendo angasane. Vangavirile chaka dingasidene noowachela kalatae. Liye oolemba ira: “Ndinobatiziwa va sonkano wadela unazola, ndinofuna ira ndiwelele wu Haiti ira ndakale mpainiya wavadela mudela lelo ndalaleela miyo ngati m’mishonale wa ipembezo ya Imomoni.” Liye oopanga vyevyo limo-i na iyanae wa chaka dinjinji.

NOODOWA WU EUROPE VANDULI VIWA WU AFRICA

Nootumiziwa wu Europe wewo chito yolaleela vya Umwene yali yangaambeele ulukula. Mu 1992 noofiya wu Ljubljana, mu ilambo ya Slovenia, mudela la vakwikwi na wewo makolwanga kaulukuleleathu kaanatamele wu Italy. Kondo yali ipitililangave m’madela amu ilambo ineyo yaromoliwa ira Yugoslavia. Thambi ya Vienna, Austria, koma teto ma ofesi awu Zagreb, Croatia, Belgrade na Serbia, mbanayo kaing’anela chito yolaleela m’madela etene anala. Sopano dela lililetene lelo lawachelile ufulu wokala ilambo vaekiwa wafuneela teto kala Beteli.

Veva teto nafuneela funjeda ikalelo na iwongelo imo-i. Athu amu delali koomeliwa onga ira, “Jezik je težek,” tapulela ira “Iwongelo yi-u chiyorucha.” Moi vyali vyoona iwongelo iwayo yali yorucha vinjinji. Abali na arongola awewo kali ororomeleya moi koo-arela malangizo alietene anayo gulu lapelekaathu. Noopanga chidwi vinjinji naona mwemo Yehova mwaadalisele liye. Noona teto mwemo Yehova mwasakaedile liye vyongo vathawi yofwanelela. Wa chaka dedo nakalile iyo wu Slovenia, noona upama wa vyevyo nafunjedile iyo koma teto noofunjeda vyongo vinjinji visha.

Koma noogumana teto na mavuto amo-i. mu 2000 nootumiziwa wu Côte d’Ivoire, wu West Africa. Ndiye mu Novembala 2002, wowambeeleya kondo moi noowandeliwa ira nitamele wu Sierra Leone. Wewo kondo ineyo yalandile chaka 11 yali yangakede mala wene. Vyali vyorucha tama mwazizizi wu Côte d’Ivoire. Koma makundo anayo naafunjedile iyo koonikami-a ira nikalengave osangalala.

Nooganizela vya athu anjinji anayo kafuna funjeda Baibulo koma teto abali na arongola anjinji anayo kali achikondi anayo kavilelile kondwela wa chaka dinjinji. Aluwa kali osauwa koma kali okozeya gawana na amo-i vyevyo kan’naathu. Murongola m’mo-iwa oomuva-a iyananga vyowara. Iyananga akaikelanga vyoi awachele vyowaravyo murongoloyo oomuwandela ira: “Muthawi ya kondo abali na arongola amuvilambo vimo-i koonikami-a. Sopano ila chi thawi yoi na-iyene niukami-eni.” Nali ofunechecha landela isazo iwa.

Noowelela wu Côte d’Ivoire, koma vyachiwawa vyoowambeeleya nawili. Mu Novembala 2004, nootami-iwa va helikopitala moi uliwetene oololiwa tukula ikwama yonyemela 10-keg ba-i. Ma-iyu anayo nagonile wu kampu ya asilikali awu France moi nagonile vati. Dambo lo-arela noogwela ndege yodowa wu Switzerland. Noofiya wu Beteli vaari va ma-iyu moi abali amu Komiti ya Nthambi koma teto alangizi a Sukulu Yofunji-a Utumiki limo-i na a-iyaniwa kooniwachela pama. Aluwa koonihaga, niva-a yodja yovi-a koma teto machokoleti a muilambweyo. Vyevi vyoonikami-a ona ira kanoniomeliwana vinjinji.

Nootumiziwa wu Ghana wa thawi yoyeva moi vanduli viwa kondo yangayevile noowelela wu Côte d’Ivoire. Oma murima wa abali na arongola oonikami-a va thawi yoruchela ineyo natamatama iyo koma teto vevo utumiki-u wachenjachenjaathu. Ngakale ira abali na arongola kanotonyi-edana chikondi muwari mwa gulu la Yehova, miyo na Debbie noogwilizana ira kanionenga movevuwa vyevi. Vanduli viwa noozindikila ira thawi yoruchela noofunjeda vyongo vinjinji.

NOOTUMIZIWA WU MIDDLE EAST

Mu 2006 noowachela kalata yokumela wu likulu li-u yoniiziwi-a ira nidowe natumikelenga wu Middle East. Veva teto nadedi-edela funjeda viongelo na vikalelo visha koma teto gumana na mavuto asha. Vookala vyongo vinjinji vyoi nifunjede mu delali mwemo mwali mavuto chifukwa ya ndale koma teto vipembezo. Noomeliwa vinjinji viongelo vyevyo vyaongiwa m’mipingo do-iyana-iyana moi noona ira arela malangizo anayo gulu laniva-aathu unopangi-a ira nikale ogwilizana. Nooyamikela vinjinji abali na arongola anayo molimba murima kavilela runi-iwa na abaliwa, afwiwa awu sukulu, awu chito koma teto owandamanana manyumba.

Noofwanyeyana va sonkano wa dela unoyo waireile mu 2012 wu Tel Aviv mu ilambo ya Israel. Kumela va Pentakosite wa mu 33 C.E, unola wali sonkano owambeela unoyo athu a Yehova kasonkanileathu oyinjiva eno. Inela yali thawi yo-odiwaleya.

Noodowa endela abali mu ilambo ineyo chitwi-u yali yoruni-iwa. Moi nootukula mabukwi-u, nolaleela koma teto pangana misonkano vevo vakala athu oyeva. Asilikali otukula vida koma teto malodibuloko vyali valivetene. Komave noovivwa kala otetezeya naendanga mosamala naabali oyeva.

WELELA WU AFRICA

Mu 2013 utumiki-u woochenja, moi nootumuziwa dowa tumikela wu thambi ya Kinshasa mu ilambo ya Congo. Ilambwela chiilukulu koma teto yoriya, koma chiyosauwa vinjinji moi unoireecha kondo wiliwili. Vowambeela nooviwandela ira, “Wu Africa ninoiziwao moi nili okozeya dowa.” Koma vookala vinjinji vyoi nifunjede simbwasimbwa va khani yoenda m’madela anayo kawali vyongo vinjinji kapena teto misewu. Nooganizela vyongo vinjinji vyapama vyevyo vyaireya. Mwaisazo, abali na arongola koovilela koma teto kalangave osangalala ngakale ira koogumana na mavuto avyachuma. Aluwa koomeliwa chito yolaleela koma teto koopanga tindi fwanyeya va misonkano dilukuludilukulu koma teto da pingo. Noona mwemo chito ya Umwene yadowelaathu vasogolo chifukwa yoi Yehova oonidalisa koma teto nikami-a. Noofunjeda vinjinji va utumiki-u wu Congo moi noofwanya afwi-u anjinji.

Umapeto wa 2017, noovepiwa ira nidowe wu South Africa. Nali naanatumikelevo va thambi ilukulu ngati inela, moi mautumiki anayo nawachelile iyo kali teto asha. Vookala teto vyongo vinjinji vyoi nifunjede koma vyevyo nafunjedile iyo mundulimu vyoonikami-a. Ninoyamikela vinjinji abali na arongola anayo kakalile katumikelanga Yehova mororomeleya wa chaka dinjinji. Moi pivyopangi-a chidwi ona athu a m’banja la Beteli kapanganga vyongo mogwilizana vinjinji ngakale ira mbo-iyana mitundu koma teto vikalelo. Pivyovaela oneya ira Yehova unowadalisa athu anayo vowava-a murendele chifukwa yoi kanoesaesa wara umuthu usha koma teto arela makundo a m’Baibulo.

Va chaka dedi, miyo na iyananga Debbie nikala niwachelanga mautumiki osangalasa koma teto funjeda viongelo na vikalelo visha. Kai thawi detene vevo vyaliathu vyokweya koma Yehova ukala anitonyi-edanga chikondae yororomeleya zela mwa abali na arongola koma teto gulu lae. (Sal. 144:2) Niona ira vyevyo nifunjedile iyo va utumiki wa thawi detene vinikami-a ira nikale atumiki apama a Yehova.

Ndinoyamikela vinjinji makolwanga chifukwa ya vyevyo kandifunji-ileathu. Ndinomuyamikela teto iyananga Debbie unoyo ukalile andikami-anga koma teto ndinoyamikela isazo ya abali na arongola va ilambo yetene. Miyo na iyananga Debbie ninoganizela vya moywi-u wau sogolo moi, nili osimikiza ira ninopitiliza funji-iwa na mulangizi-u mulukulu Yehova.