Kodi “mufunjeda Isisi’’ Yoona Vyongo Vyevyo Mun’na Nyo Kala Vyoukwakwanelani?

1. Kodi ona vyongo vyevyo nin’na iyo kala vyonikwakwanela unatapulela n’ni, nanga kunatapulela n’ni?

KODI munoona vyongo vyevyo mun’na nyo kala vyoukwakwanelani? Muthu aonanga vyongo vyevyo un’na liye kala vyomukwakwanela, unokala osangalala koma teto unokaana murendele wa m’murimani, aganizelanga vyongo vyapama vyevyo Yehova umuva-ile liye. Liye kanakumudwa kapena lunduwa chifukwa yoi kan’na vyongo vimo-i viwa vyene. Komave ona vyongo vyevyo nin’na iyo kala vyonikwakwanela kunatapulela ira kanikumbanyelenga vya moywi-u. Mwaisazo, Mkristu unokoza panga pama ganizelanga vya mipata dedo un’na liye, na yolinga yoi apangenga vinjinji vomutumikela Yehova. (Arom. 12:1; 1 Tim. 3:1) Ngakale vili eno, liye kanakumudwa aona ira kanafwanya mombaraanya mwai wa utumiki unoyo unadedi-eda liye.

2. Kodi o-oona vyevyo nin’na iyo kala vyonikwakwanela koopi-a moi avi?

² Akala kaninaona vyongo vyevyo nin’na iyo kala vyonikwakwanela, ninokoza ambeela sakula vyongo moofwanelela. Mwaisazo athu anayo kanaona vyongo vyevyo kan’naathu kala vyo-owakwakwanela, kano-inda chito maola anjinji na yolinga yoi kagule vyongo vyevyo kai vyofuneya kwenikweni. Pivyovwi-a chisoni ira Akristu amo-i kofiya voba ndalama kapena vyongo vimo-i vyevyo kafunaathu. Aluwa kanoganiza ira ndinofuneela vyongo vyevi, ndidedi-eda wa thawi indendai, kapena ndinoza ndiweli-eve ndalamado usogolo. Koma ba wa tundu uliwetene kunamusangalasa Yehova moi unomunyozi-a. (Miya. 30:9) Athu amo-i kanokumudwa chifukwa yoi katinawachela mwai umo-iwene wa utumiki, moi koofiya vo-iya mutumikela Yehova. (Agal. 6:9) Chin’ni inamupangi-e mtumiki wa Yehova fiya vopanga vyevi? Vuto linakala loi muthuyo oo-iya ona vyongo vyevyo un’na liye kala vyomukwakwanela.

3. Kodi ninafwanya likundo lolimbikisa liivi va Afilipi 4:11, 12?

³ Etene iyene ninokoza onanga vyongo vyevyo nin’na iyo kala vyonikwakwanela. Namarumiwa Paulo oolemba ira “oofunjeda ona vyongo vyevyo an’na liye kala vyomukwakwanela, vo-olandela mwemo vyongo vyaliliathu va moywae.” (Welengani Afilipi 4:11, 12.) Liye alembile mawu anala angali mundende. Ngakale vyali eno, liye oosangalala. Liye ali “angafunjedile isisi” yoona vyongo vyevyo an’na liye kala vyomukwakwanela. Akala vinanirucha ona vyongo vyevyo nin’na iyo kala vyonikwakwanela, mawu a Paulwala koma teto vyevyo vyamuireele vinokoza nikami-a ira nionenga vyongo vyevyo nin’na iyo kala vyonikwakwanela, o-olandela mwemo vyongo vililiathu va moywi-u. Kaniganizenga ira ona vyongo vyevyo nin’na iyo kala vyonikwakwanela kokhweya, m’malo mwiwa ninerecha funjeda. Tiyemoni nione makalelo anayo kananikami-e funjeda isisi yoona vyongo vyevyo nin’na iyo kala vyonikwakwanela.

NIKALENGA OYAMIKELA

4. Kodi murima oyamikela unanikami-a avi ira nionenga vyongo vyevyo nin’na iyo kala vyonikwakwanela? (1 Atesalonika 5:18)

⁴ Thawi dinjinji muthu oyamikela unoona vyongo vyevyo un’na liye kala vyomukwakwanela. (Welengani 1 Atesalonika 5:18.) Akala ninayamikela vyongo vyofuneya vyevyo nin’na iyo va moywi-u, kaninadandaule na vyongo vyevyo ninafuna iyo koma vyoi kaninavifwanye. Nayamikelanga mwai wa utumiki unoyo nin’na iyo, ninokoza sangalalanga koma teto panganga tindi va utumiki-u, m’malo mokedanga ganizela vyowachela utumiki umo-iwa usha. Chichifukwa iwa malemba kananilimbikisa ira nimuyamikelenga Yehova m’mapempelwi-u. Murima oyamikela, unonikami-a kala na “murendele wa Mulungu unoyo athu katinawande uvwechecha.” — Afil. 4:6, 7.

5. Kodi pi vyongo viivi vyevyo vyapangi-ile Aisaraeli kala o-oyamikela? (Onani teto ithuzithuzi.)

⁵ Kaganizelani vyevyo vyaaireele Aisaraeli. Thawi dinjinji, aluwa koomudandaulela Yehova ira koofuna yodja ineyo kadjaathu wu Iguputo. (Num. 11:4-6) Pivyoona ira moyo wa muipululu wali orucha. Ndiye kodi chin’ni ineyo yaakami-e ira kaonenga vyongo vyevyo kan’naathu kala vyowakwakwanela? Aluwa kafuneya ganizelanga koma teto yamikelanga vyevyo Yehova aapangele liye wale. Kangali wu Iguputo aluwa koozuzumi-iwa ngati akapolo, moi chifukwa ya vyevi Yehova oowagwi-eda milili 10 Aiguputo. Aisaraelayo kangamasuliwe, aluwa “kootukula vyongo vinjinji vya Aiguputo” monga siliva, golide na vyowara. (Ekis. 12:35, 36) Aisaraelayo kangapanikizeile vaari va asilikali a Farao na Nyanja Yofiila, Yehova oomwalani-a nyanjeyo modabwi-a na yolinga yoi katawele kombela imo-iweyo. Koma teto vevo kaendaathu muipululu, dambo lililetene Yehova oowava-a mana. Ndiye kodi vuto liwa lali vaavi? Ngakale ira Yehova oowava-a yodja yokwakwanela, aluwa katayamikela vyevyo kava-iwaathu.

6. Kodi chin’ni inanikami-e ira nikaena murima oyamikela?

⁶ Ndiye kodi chin’ni inanikami-e ira nikaena murima oyamikela? Yowambeela, dambo lililetene nifwanyenga thawi yoganizela vyongo vyapama vyevyo nin’na iyo. Ninokoza lemba vyongo mbin’li kapena taaru vyevyo ninayamikela iyo. (Malilo. 3:22, 23) Yanambili, nipangenga vyongo vyotonyi-eda ira nili oyamikela. Niesaesenga yamikela vyevyo athu amo-i kananipangelaathu. Koma teto kwaranya vyetene, thawi detene nimuyamikelenga Yehova. (Sal. 75:1) Yanaralu, nikaengana afwi-u anayo mboyamikela. Akala afwi-u mboyamikela na-iyene teto ninokala oyamikela, koma akala kai oyamikela, ninokoza landela ikalelwiweyo. (Doto. 1:26-28; 2 Tim. 3:1, 2, 5) Naesaesanga fwanya mipata doi niamikelenga athu amo-i, kaninaza nikumudwa chifukwa yoi ninogumana na mavuto amo-iwene, kapena chifukwa yoi kanin’na vyongo vimo-i viwa vyene.

7. Kodi chin’ni yamukami-ile Aci ira akaena murima oyamikela, nanga vyo-arelavo viwa vyali vyoi avi?

⁷ Kaganizelani vyevyo vyamuireele Aci unoyo unakala wu Indonesia. Liye aongile ira: “Vathawi ya mulili wa COVID-19, ndooambeela erekezela mwemo vyongo vyaliliathu va moywanga na wa Akristu afwanga. Vyevi vyoondipangi-a ira ndiambeele kala na murima oona vyongo vyevyo ndana miyo kala vyo-ondikwakwanela.” (Agal. 6:4) Ndiye kodi chin’ni yamukami-ile ira achenje maganizwae? Liye aongile ira: “Ndooambeela ganizela madaliso anayo ndafwanya miyo dambo lililetene, koma teto vyapama vyevyo ndafwanya miyo chifukwa yokala mugulu la Yehova. Teto ndooambeela muyamikela chifukwa ya vyevyo. Vanduli viwa ndooambeela ona vyongo vyevyo ndana miyo kala vyondikwakwanela.” Akala nyo teto kamunasangalala chifukwa ya mwemo vyongo vililiathu vamoywinyu, vyevyo Aci apangile liye vinokoza ukami-ani ira muambeele kala na murima oyamikela.

PITILIZANI KALA OGANIZA PAMA KOMA TETO OVIYEVI-A

8. Kodi chin’ni ineyo yamuireele Baruki?

⁸ Vathawi imo-iwa, mulembi wa Yeremiya zina lae Baruki, kaaona vyongo vyevyo an’na liye kala vyomukwakwanela chifukwa ya mwemo vyongo vyaliliathu vamoywae. Liye oova-iwa chito yorucha yomukami-a namaongela Yeremiya awandela Aisaraeli ooyamikela vyevyo vyaaireele chifukwa yoi katamuvwele Yehova. Vira wa thawi, Baruki oo-iya ganiza pama. M’malo moganizela vinjinji vyevyo Yehova afuna liye ira apange, ooambeela ganizela vinjinji vyofuna vyae. Zela mwa Yeremiya, Yehova oomuwandela Baruki ira: “Weyo unasaelasaela vyongo vilukulu. Iya saelasaela vyongo vyevi. (Yer. 45:3-5) Veva vyali ngati Yehova unamuwandela ira, “Uonenga vyongo vyevyo unawe kala vyoukwakwanela va moywawo vathawi ila.” Baruki oo-arela malangizo anala moi oopitiliza mutumikela Yehova mosangalala.

9. Mogwilizana na 1 Akorinto 4:6, 7, kodi viyevi-a unanikami-a zindikila n’ni? (Onani teto ithuzithuzi.)

⁹ Thawi dimo-i, Mkristu unokoza ambeela onanga ira unofwanelela va-iwa mwai umo-iwene wa utumiki. Liye unokoza vionanga eno chifukwa yoi ukaana luso, ngwatindi kapena unoiziwa vinjinji. Koma athu amo-iwa kanokoza va-iwa utumiki unoyo unaulakalaka liye. Ndiye kodi chin’ni inamukami-e ira kakumudwe? Liye unokoza panga pama ganizela vyevyo namarumiwa Paulo alembile liye va 1 Akorinto 4:6, 7. (Welengani.) Utumiki uliwetene unoyo ninava-iwe iyo, koma teto luso lililetene lelo ninakaena iyo vyakumele wa Yehova. Yehova kaniva-ile mphaso dedi chifukwa yoi nili avadela kwaranya athu amo-i. M’malomwiwa liye ooniva-a mphaso dedi chifukwa yooma murima wae ulukulu. — Arom. 12:3, 6; Aife. 2:8, 9.

10. Kodi ninapange avi ira nikale oviyevi-a?

¹⁰ Ninokoza kala oviyevi-a, naganizelanga isazo ineyo Yesu aniva-ile liye. Kaganizelani vyevyo vyaireile ma-iyu va dambo lelo a-ambi-a liye manyalo a ofunjedae. Namarumiwa Yohani oolemba ira: ‘Yesu ooiziwa ira [1] Babae oopeleka vyongo vyetene m’mandani mwae [2] ira ooza kumela wa Mulungu koma teto [3] ira unadowa wa Mulungu. Eno ooambeela ambi-a manyalo a ofunjedae.’ (Yoh 13:3-5) Yesu ookoza onanga ira anamarumiwae mbanayo kafuneya ambi-a manyalwae. Koma liye angali vailambo yavatila kaaganizilevo vyoi afuneya kaana moyo wavadimu, kaana nyumba yapama, kapena ndalama dinjinji. (Luka 9:58) Yesu ali oviyevi-a koma teto oona vyongo vyevyo an’na liye kala vyomukwakwanela, moi ooniva-a isazo yapama vinjinji. — Yoh. 13:15.

11. Kodi viyevi-a wamukami-ile avi Dennis ira aonenga vyongo vyevyo an’na liye kala vyomukwakwanela?

¹¹ M’bali m’mo-i zina lae Dennis, unoyo unakala wu Netherlands, ukala aesaesanga musazi-eda Yesu vokala oviyevi-a, koma kai thawi detene vevo vyaliathu vyokhweya. Liye aongile ira: “Thawi dimo-i ndinoona ira ndinokumudwa kapena teto ambeela tonyi-eda murima oona vyevyo ndin’na miyo kala vyo-ondikwakwanela, simbwasimbwa muthu m’mo-iwa ava-iwa utumiki unoyo ndinaufuna miyo, ndinokumudwa chifukwa ndinoona ira miyo ngunoyo unafuneya va-iwa utumikiyo. Vyoi eni vyaireya ndinofunjeda khani dokuza viyevi-a. Ndinosonkani-a mu fonanga va JW Library^®, malemba amo-i okuza viyevi-a na yolinga yoi ndiafwanyenga mombaraanya nowawelenganga moweli-edaweli-eda. Ndoopanga teto dawunilodi mu fonanga khani dokuza viyevi-a dedo ndinavivuruwanecha miyo vakwikwi vakwikwi.a Ndifunjeda ira chito iliyetene ineyo nina-inda iyo, yolinga iwa chi yoi nipeleke ulemelelo wa Yehova ookala wa iyo. Uliwetene wa iyo unakeda panga mbali yoyeva vomukami-a Yehova kwakwaneli-eda yolingae.” Mwaambeela ona vyongo vyevyo mun’na nyo kala vyo-oukwakwanelani chifukwa ya mwemo vyongo vililiathu va moywinyu, esaesani ira muambeele kala oviyevi-a. Vyevi vinoza viukami-eni ira mukale vausamwali olimba na Yehova koma teto muonenga vyongo vyevyo mun’na nyo kala vyoukwakwanelani. — Yak. 4:6, 8.

MUGANIZELENGA VYEVYO YEHOVA ULONJEZILE LIYE

12. Kodi pi vyongo viivi vyevyo Yehova unilonjezile liye, vyevyo vinanikami-e ira nionenga vyongo vyevyo nin’na iyo kala vyonikwakwanela? (Yesaya 65:21-25)

¹² Ganizela vyevyo Yehova ulonjezile liye usogolou, unonikami-a ira nionenga vyevyo nin’na iyo kala vyonikwakwanela. Mawu a Yehova anayo namaongela Yesaya alembile liye, kanosomedela ira malambwano moyo ngorucha moi kanonisimikizela ira Yehova unoza amali-e mavuto etene anala. (Welengani Yesaya 65:21-25.) Ninoza nikaena nyumba dapama koma teto dotetezeya. Ninoza ni-indenga chito yapama koma teto ninoza nidjenga yodja yooma na yova-a thanzi. Kaninaza niovanga ira vyongo vyotakala vinoniireela iyo kapena a-imi-u. (Yes. 32:17, 18; Ezek. 34:25) Kaninakaikela ngakale vang’ono ira vyevi vinoza viireye.

13. Kodi pi vathawi iivi, vevo ninafuneya iyo ganizela vinjinji vyevyo Yehova unilonjezile liye?

¹³ Kwaranya wale letene, vathawi ila ninafuneya ganizelanga vinjinji vyevyo Yehova unilonjezile liye. Chifukwa n’ni ninaonga eno? Ninaonga eno chifukwa ninakala “m’malambo omari-a” moi ninokoza gumana na vyongo vyorucha vinjinji. (2 Tim. 3:1) Dambo lililetene Yehova unonikami-a vilela voniva-a malangizo, kopolo koma teto likami-edo lililetene lelo ninafuneela iyo. (Sal. 145:14) Enjedela vevo, vyevyo Yehova unilonjezile liye vinonikami-a vilela mavuto anayo ninagumanana iyo va moywi-u. Mwina vathawi ila munovuteya fwanya vyongo vyofuneya va banja linyu. Koma kodi vyevi vinatapulela ira munakedenga vuteya mpakana walewale? Naari. Yehova unolonjeza ira unoza auva-eni vyongo vinjinji vyevyo munafuneela nyo mu paradaizo. (Sal. 9:18; 72:12-14) Mwina munobulela marenda alukulu, munovuteya maganizo kapena teto munovuteya chifukwa yokalamba. Kodi mu pu mwemo moywinyu unafuneyaathu kalelanga mpakana walewale ookaana idedi-edo iliyetene? Naari. Marenda koma teto khwa vinoza vimale muilambo isha. (Chiv. 21:3, 4) Idedi-edo inela inonikami-a ira nionenga vyongo vyevyo nin’na iyo kala vyonikwakwanela, moi kaninakumudwa kapena lunduwa chifukwa ya mwemo vyongo vililiathu vathawi ila. Ninokoza sangalalangave na murendele nagumana na vyongo vyookaana chilungamo, bulela marenda alukulu, nakhweliwa kapena teto nagumana na mayeselo alietene. Chifukwa n’ni ninaonga eno? Ninaonga eno chifukwa yoi kaya vyongo vili avi vamoywi-u vathawi ila, “mavuto anayo ninagumanana iyo mba thawi yoyeva” moi kanoza kamale muilambo isha ineyo iyandamele vinjinji. — 2 Akor. 4:17, 18.

14. Kodi chin’ni ineyo inanikami-e ira niroromelenga vyevyo Yehova unilonjezile liye?

¹⁴ Chifukwa yoi idedi-edo yi-u ya usogolo inonikami-a ira nionenga vyevyo nin’na iyo kala vyonikwakwanela, kodi ninapange avi ira idedi-edo yi-u ikalenga yolimba? Mofwanafwana na muthu unoyo unawara magalasi ira aonenga vyongo vyevyo vili undendai, na-iyene teto ninafuneya panga vyongo vimo-i ira nilimbi-e idedi-edo yi-u nayolinga yoi nionenga pama vyongo vyevyo vinaza usogolo mu Paradaizo. Mwaisazo, nakumbanyanga va khani dokuza ndalama, niganizelenga mwemo moyo unazeathu ukalele vathawi ineyo ndalama, ngongole kapena iyana vakhani dokuza chuma unazeathu ukale wangamalile. Nakumudwanga chifukwa yoi kaniva-iwe utumiki umo-iwene, niganizelenga mwemo nkhawa dedi dinazeathu dikalele do-ofuneya vanduli voi nikala angwilo notumikelanga Yehova wa chaka dinjinji. (1 Tim. 6:19) Pivyoona ira vathawi ila ninokaana nkhawa va vyongo vinjinji, moi vyevi vinonipangi-a ira kaniganizelenga malonjezo a usogolo. Koma naganizelanga vya sogolo lapama vinjinji lelo Yehova unilonjezile liye, pavevo teto vinakalaathu vyo-orucha ela maganizwi-u va vyongo vyevi m’malo mokedanga ganizela vya nkhawa di-u.

15. Kodi ninafunjeda n’ni va vyevyo Christa aongile liye?

¹⁵ Kaganizelani mwemo idedi-edo yamukami-eleathu Christa, unoyo ngu mamunae wa Dennis unoyo nimuromolile iyole. Liye aongile ira: “Ndikaana marenda anayo kanapangi-a ira minoku danga difookenga moi ndino-indi-eda chito njinga da athu orangala koma teto thawi dinjinji ndinakalecha ogonati. Dambo lililetene ndinovwa voreya vinjinji. Vachineneeva dokotalanga undiwandela ira kandidedi-edele ira vyongo vinokala pama. Koma mombaraanya ndooganiza ira, ‘Dokotalola kanaiziwa vya usogolo ngati mwemo miyo ndinaonela miyo.’ Miyo ndikaana idedi-edo ineyo inandiva-a murendele wa m’murimani. Vathawi ila ndinafuneela vilela, koma ndinoza ndisangalale vinjinji muilambo isha.”

“ETENE ANAYO KANAMUOVA KATINAZA KASAUWELA YONGO”

16. Chifukwa n’ni Mwene Davide alembile ira anayo kanamuova Yehova “katinaza kasauwela yongo”?

¹⁶ Mtumiki wa Yehova unoyo unaona vyongo vyevyo un’na liye kala vyomukwakwanela, unogumana na mavuto. Kaganizelani vyevyo vyamuireele Mwene Davide. A-imae aralu kookhwa, oongeliwa vyongo vyotakala, afwae amo-i koomu-iya koma teto wa chaka dinjinji oosaeliwa ira aphiwe. Ngakale ira oogumana na mavuto etene anala, voonga vya Yehova, Davide aongile ira: “Etene anayo kanamuova katinaza kasauwela yongo.” (Sal. 34:9, 10) Chifukwa n’ni aongile vyevi? Chifukwa liye ooiziwa ira monga athu a Yehova, kaninadedi-edela ira kanigumanenga na mavuto, koma ninokala osimikiza ira liye unoza aniva-e vyevyo ninafuneela iyo. (Sal. 145:16) Koma teto naonanga vyongo vyevyo nin’na iyo kala vyonikwakwanela, ninororomela ira unoza anikami-e va mayeselwi-u etene.

17. Chifukwa n’ni munafuna iziwa isisi yoona vyevyo mun’na nyo kala vyoukwakwanelani?

¹⁷ Yehova unofuna ira muonenga vyongo vyevyo mun’na nyo kala vyoukwakwanelani. (Sal. 131:1, 2) Eno munafuneya esaesa ira muiziwe isisi yoona vyongo vyevyo mun’na nyo kala vyoukwakwanelani. Mwapanganga tindi ira mukaena murima oyamikela, kala oganiza pama, oviyevi-a koma teto nororomelanga vinjinji vyevyo Yehova ulonjezile liye, munoza muonge ira: “Ee, miyo ndinoona vyongo vyevyo ndina miyo kala vyondikwakwanela.”— Sal. 16:5, 6.