KHANI YOFUNJEDA 47
NYIMBO 38 Adzakulimbitsa
‘Uli Muthu Wamtengo Wavadimu Vinjinji’
‘Uli muthu wamtengo wavadimu vinjinji.’ — DAN. 9:23.
VYEVYO NINAFUNJEDE IYO
Khanila inokami-a athu anayo kanaviona ira mbo-ofuneya, iziwa ira Yehova unowaomeluwana vinjinji.
1-2. Kodi ninapange avi ira kanikaikelenga vyoi nili amtengo wavadimu wa Yehova?
VAARI va atumiki a Yehova amtengo wavadimu, vikala athu amo-iwa anayo kanaviona ira mbo-ofuneya. Mwina muthu m’mo-iwa oowapangelavo vyevyo vyapangi-ile ira kavionenga ngati mbo-okaana chito. Kodi vyevi vyoouireelavoni? Akala chi eno, kodi munapange avi ira muvionenga ira muli wamtengo wavadimu wa Yehova?
2 Munokoza panga pama welenga khani da m’Baibulo dotonyi-eda vyevyo Yehova unafuna liye ira athu kaapangelenga afwiwa, koma teto mwemo munafuneelaathu aonanga. Mwanae Yesu, oolemekeza athu moi oowapangela vyongo mwachifundo. Vopanga vyevi, ootonyi-eda ira liye koma teto Ababae kanoona ira athu anayo kanaviona ira mbo-ofuneya mbamtengo wavadimu vinjinji. (Yoh. 5:19; Aheb. 1:3) Mukhanila ninokambilana: (1) mwemo Yesu akami-ele liye athu ona ira mbofuneya koma teto (2) vyevyo ninapange iyo ira kanikaikelenga vyoi Mulungu unoniona ira nili amtengo wavadimu. — Hag. 2:7.
MWEMO YESU AKAMI-ELA LIYE ATHU IRA KAVIONENGA KALA AMTENGO WAVADIMU
3. Kodi Yesu apangile avi vyongo na athu awu Galileya anayo kafuneya likami-edo?
3 Vathawi ineyo Yesu alaleela liye va ulendo wanaralu wu Galileya, athu anjinji am’madela o-iyana-iyana koodowa wa liye ira kavuruwane vyevyo afunji-a liye koma teto ira aachili-e. Yesu oona ira “kali onyozeya koma teto katan’na owasamalela ngati khosa dedo kadina m’busa.” (Mat. 9:36) Asogoleli aipembezo koona ira athu mbo-ofuneya moi koowaromola ira mba athu ‘otembeleliwa.’ (Yoh. 7:47-49) Yesu ootonyi-eda ira oowalemekeza, vowafunji-a koma teto chili-a marendiwa. (Mat. 9:35) Vofuna kami-a athu anjinji, Yesu oowafunji-a anamarumiwae ira ka-indengana chito yolaleela moi oowava-a kopolo ira kachili-enga obulela. — Mat. 10:5-8.
4. Kodi ninafunjeda n’ni naganizela mwemo Yesu apangela liye vyongo na athu anayo kamuvuruwana?
4 Vopanga vyongo mwaulemu koma teto mwachifundo na athu anayo kamuvuruwana, Yesu ootonyi-eda ira liye koma teto Ababae, koona ira athu anayo kaviona ira mbo-ofuneya mbamtengo wavadimu. Akala munatumikela Yehova koma munoviona ngati muli oofuneya, muganizelenga mwemo Yesu apangela liye vyongo na athu anayo kafuna funjeda vya liye. Vyevi vinoza viukami-eni ira muiziwe ira muli wamtengo wavadimu wa Yehova.
5. Fotokozani mwemo vyongo vyaliliathu va moyo wa muzimai unoyo Yesu agumanilena liye wu Galileya.
5 Yesu kaakeda funji-a athu monga gulu, koma oopanga teto chidwi na muthu uliwetene vaeka. Mwaisazo, vevo Yesu apanga liye utumikae wu Galileya, oogumana na muzimai unoyo abulela marenda otatila magazi wa chaka 12. (Maliko 5:25) Marendala koomupangi-a ira akale otakali-iwa, moi uliwetene omu-inda ookala teto otakali-iwa. Vyevi vyoopangi-a ira kapangenga vyongo na athu amo-iwa. Enjedela veva, kavyali vyowandeya lambela Yehova limo-i na athu amo-i usunagoge koma teto va thawi ya vikondwelelo. (Lev. 15:19, 25) Kaninakaikela ira muzimaila, kaakeda vuteya na marendala koma teto ooviona ira ngu muthu ookaana chito.— Maliko 5:26.
6. Kodi muzimai unoyo abulela marenda otatila magazi achili-iwe avi?
6 Muzimai unoyo abulela marenda alukulula, oofuna ira Yesu amuchili-e. Koma liye kadowile mwachindunji nodowa muvepa ira amuchili-e. Chifukwa n’ni? Mwina oonyaswa chifukwa ya marendala. Mwina teto oowova ira Yesu unomunyanyuwela, chifukwa oodowa vagulu la athu aiziwanga ira ngotakali-iwa. Eno liye akede i-nda malaya aunde a Yesu moi oororomela ira apanga vyevi unochila. (Maliko 5:27, 28) Iroromelo yae yoomukami-a chifukwa oochili-iwa. Vanduli viwa Yesu oofuka ira aiziwe unoyo amu-indile moi muzimaiyo oosomedela ira ngu liye. Ndiye kodi Yesu apangile vyoi avi?
7. Kodi Yesu apangile avi vyongo na muzimai unoyo abulela marenda alukulu? (Maliko 5:34)
7 Yesu oopanga vyongo na muzimaiyo mwaulemu koma teto mooma murima. Liye oozindikila ira muzimaiyo ‘oova koma teto ngurumeda.’ (Maliko 5:33) Angazindikilile mwemo avwela liye, Yesu oonga na liye mooma murima koma teto oomulimbikisa. Moi Yesu oomuromola ira “Mwananga,” mawu anala kanotonyi-eda ulemu koma teto oma murima na chikondi. (Welengani Maliko 5:34.) Ila chi thawi imo-i yoka ineyo Yesu amuromolile liye mwachindunji muzimaila ira “mwananga” mwina chifukwa yoi oona ira muzimaiyo oova koma teto ‘ngurumeda.’ Muzimaila murimae ookala m’malo angavwile vyevyo Yesu aongile liyevi. Aakale ira Yesu kaongile na liye mwachifundo ngakale ira achilile, oodowa angana nkhawa koma teto aviimbanga mulandu. M’malo mwiwa, Yesu oomukami-a ira avionenga ira ngu mwana wamtengo wavadimu wa Babi-u wa udimu unoyo ngwachikondi.
8. Kodi murongola wau Brazil agumanile na mavuto oyi avi?
8 Malambwano teto, atumiki amo-iwa a Mulungu kanovuteya na marenda anayo kanaapangi-a ira kavivwenga ira mbo-okaana chito. Murongola m’mo-iwa wau Brazil unoyo ngu mpainiya zina lae Maria,a abaluwile angali orangala moi kana mendo koma teto muono wau namazele. Liye aongile ira: “Thawi dinjinji ndakala usukulu, afwanga koonditeya chifukwa yoi ndili orangala. Koma teto koondiva-a mazina anjinji aibewe. Ngakale athu am’banja langa koondisala.”
9. Chin’ni ineyo yamukami-ile Maria ira avionenga ira ngwamtengo wavadimu wa Yehova?
9 Kodi Maria akami-iwe avi? Angakalile wa Mboni da Yehova, Akristu afwae koomulimbikisa koma teto mukami-a ira avionenga ngati mwemo Yehova munamuonela liye. Liye aongile ira: “M’buku langa kamuli malo okwakwanela ira ndilembemo zina la muthu uliwetene unoyo andikami-ile. Ndinomuyamikela Yehova na murima wetene vondiva-a banja lapama lauzimu.” Abali na arongola auzimu a Maria, koomukami-a zindikila ira ngwamtengo wavadimu wa Mulungu.
10. Kodi mba mavuto aavi anayo Mariya Magadala agumanilena liye? (Onani teto vithuzithuzi.)
10 Kaganizelani mwemo Yesu amukami-ele liye Mariya unoyo teto unaromoliwa ira Magadala. Liye ali angai-indiwe na viwanda 7. (Luka 8:2) Chifukwa yoi oo-indiwa na viwanda, mwina oopanga vyongo vyailendo vyevyo vyapangi-a ira athu amo-iwa kamupewenga. Vathawi ineyo, mwina oona ira athu kanomusala, katinamuomeluwana koma teto katinamukami-a. Koma Yesu angachosile viwanda vyevyo vyamuzuzumi-avyo, liye ookala ofunjeda wa Yesu ovipeleka. Kodi ti ndila dimo-i diivi dedo Yesu amukami-ele liye Mariya Magadala vwechecha ira ngwamtengo wavadimu wa Yehova?
Kodi Yesu amusimikizele avi Mariya Magadala ira ali ofuneya wa Yehova? (Onani ndima 10-11)
11. Kodi Yesu atonyi-edile avi ira Mariya Magadala ali wamtengo wavadimu wa Mulungu? (Onani teto vithuzithuzi.)
11 Yesu oomuvepa Mariya Magadala ira aendenga limo-i na liye alaleelanga.b Vyevi vyoomukami-a Mariya ira apindulenga amuvuruwananga Yesu alaleelanga. Yesu ooneela teto wa liye vadambo lelo avenyi-iwe liye. Mariya ali m’mo-i mwa ofunjeda owambeela anayo Yesu aongile liye na aluwa vadambo lelo avenyi-iwe liye. Moi Yesu oomuruma Mariya ira adowe aawandele anamarumiwae vyoi liye uvenyi-iwa. Unola wali umboni oyi Mariya ngwamtengo wavadimu wa Yehova. — Yoh. 20:11-18.
12. Fotokozani vyongo vyevyo vyamupangi-a Lidia vivwa ira ngookaana chito.
12 Athu anjinji malambwano, kanovuteya na maganizo oviona ira mbo-okaana chito ngati mwemo vyaliliathu na Mariya Magadala. Murongola m’mo-iwa wau Spain zina lae Lidia, aongile ira am’mae kangali oembekezela, kooganiza vyoitatila ingulwiyo. Liye unoumbuwela ira ngakale angali mwana, am’mae katamusamalela moi koomunyoza. Liye aongile ira: “Ndoofunechecha athu amo-iwa kanditonyi-edanga chikondi. Ndaganiza ira kalivo unoyo unandiomeluwena chifukwa am’manga koondipangi-a ira ndivivwenga ira ndili muthu otakala.”
13. Chin’ni ineyo yamukami-ile Lidia ambeela viona ira ngwamtengo wavadimu wa Yehova?
13 Lidia angaambeele funjeda Baibulo, vyongo vyoochenja vamoywae. Pempelo, welenga Baibulo, vyoonga koma teto vyoira vya abali na arongola, vyoomukami-a iziwa ira ngwamtengo wavadimu wa Yehova. Liye aongile ira: “Thawi dinjinji mamunanga unondiwandela ira unondiomeluwana vinjinji moi unondiwandela vya makalelwanga apama. Afwanga amo-i teto avamurima kanopanga teto chimozimozi.” Kodi vikala muthu m’mo-iwa unoyo unafuneya kami-iwa vwechecha ira ngwamtengo wavadimu wa Yehova?
VYEVYO MUNAPANGE NYO IRA MUVIONENGA NGATI MWEMO YEHOVA MUNAUONELANI LIYE
14. Kodi lemba la 1 Samuweli 16:7, linanikami-a avi iziwa mwemo Yehova munaonela liye anthu? (Onani bokosi loi “Chifukwa n’ni Yehova Unaona Ira Athwae Mbamtengo Wavadimu?”)
14 Muumbuwelenga ira Yehova unouonani mo-iyana na mwemo athu amuilambwela kanauonelaniathu. (Welengani 1 Samuweli 16:7.) Liye kanauonani ira muli ofuneya volandela mwemo munaoneela nyo, ndalama dedo muna nyo kapena teto maphuzilwinyu. (Yes. 55:8, 9) Eno m’malo moviona ngati mwemo athu amuilambwela kanauonelaniathu, muvionenga ira muli ofuneya ngati mwemo Yehova munauonelani liye. Munokoza welenga khani da m’Baibulo dotonyi-eda mwemo Yehova atonyi-edele liye ira unowaomeluwana athu anayo vathawi imo-iwene kavikaikela monga Eliya, Naomi na Hana. Munokoza teto lemba vyevyo vyauireeleni, vyevyo vyausimikizeleni ira Yehova unouomeluwanani koma teto unouonani ira muli wamtengo wavadimu. Enjedela vevo munokoza teto welenga khani da m’mabukwi-u dedo dinaukami-eni ira muvionenga ira muli ofuneya.c
15. Chifukwa n’ni Yehova amuona Danieli ira ‘ngwamtengo wavadimu?’ (Daniyeli 9:23)
15 Muumbuwelenga ira Yehova unouonani ira muli ofuneya chifukwa yororomeleya winyu. Vathawi imo-iwa namaongela Danieli, mwina angana chaka dotamangela 90, oovivwa ira ‘ugoma vinjinji’ koma teto ali okumudwa. (Dan. 9:20, 21) Ndiye kodi Yehova amulimbikisile avi? Liye ootumiza ngelo Gabirieli ira adowe amuwandele Danieli ira ‘uli wamtengo wavadimu vinjinji’ koma teto ira Mulungu uvwa mapempelwae. (Welengani Danieli 9:23.) Kodi chin’ni yamupangi-ile Danieli ira akale wamtengo wavadimu wa Mulungu? Enjedela va makalelwae apama, Danieli oomeluwa chilungamo koma teto ali ororomeleya. (Ezek. 14:14) Yehova oolola ira khani inela ilembiwe m’Baibulo ira inilimbikisenga. (Arom. 15:4) Yehova unovuruwana teto mapempelwinyu moi unouonani ira muli wamtengo wavadimu chifukwa munoomeluwa chilungamo koma teto munomutumikela mororomeleya. — Mika 6:8, onani teto mawu am’pedi avalembali; Aheb. 6:10.
16. Chin’ni ineyo inaukami-eni ira muonenga ira Yehova ngu Baba wachikondi?
16 Muonenga ira Yehova ngu Babinyu unoyo unauomeluwanani. Liye unofuna ukami-ani ookala ufwanyelani vifukwa. (Sal. 130:3; Mat. 7:11; Luka 12:6, 7) Ganizela likundo leli ukami-a athu anjinji anayo kanaviona ira mbo-okaana chito. Mwaisazo, kaganizelani vya murongola m’mo-iwa wau Spain zina lae Michelle, unoyo avivwa ira ngo-okaana chito koma teto ngo-ofuneya chifukwa yoi wa chaka dinjinji, mamunae oomuongela vyaibewe. Liye aongile ira: “Ndavivwanga ira ndili ookaana chito, ndinovierekezela Yehova anganditukulile m’mandani mwae, anditonyi-edanga chikondi koma teto anditetezanga.” (Sal. 28:9) Murongola m’mo-iwa wau South Africa zina lae Lauren aongile ira: “Akala Yehova mooma murima andikokele wa liye na migo-i dachikondi, moi ukala anditonyi-edanga chikondi wa chaka detene dedi moi unondi-indi-eda chito vofunji-a athu amo-iwa, kandinakaikela ira unondiona ira ndili muthu ofuneya koma teto wamtengo wavadimu.” — Hose. 11:4.
17. Chin’ni ineyo inausimikizeleni ira Yehova unosangalala na nyo? (Salimo 5:12) (Onani teto ithuzithuzi.)
17 Kamukaikelenga ira Yehova unosangalala na nyo. (Welengani Salimo 5:12.) Davide ooerekezela likundo loi Yehova unosangalala na iyo na “ishango ilukulu” yoteteza athu olungama. Iziwa ira Yehova unosangalala na iyo koma teto unonikami-a, unokoza niteteza naambeela vikaikela. Kodi munaiziwe avi ira Yehova unosangalala na nyo? Monga mwemo nionele iyo, Yehova unousimikizelani zela m’Mawae. Liye uno-indi-eda chito andimuwa, afwinyu avamurima koma teto athu amo-iwa vofuna usimikizelani ira muli wamtengo wavadimu wa liye. Kodi munapange avi athu amo-iwa kaulimbikisani mwandila inela?
Iziwa ira Yehova unosangalala na iyo unokoza nikami-a ira kanivionenga ira nili oofuneya (Onani ndima 17)
18. Chifukwa n’ni munafuneya somedela muthu m’mo-iwa auyamikelani?
18 Athu anayo kanauomeluwanani koma teto uiziwani kauyamikelani, kamuonenga ngati kanaasingilila. Muumbuwelenga ira Yehova unokoza a-indi-eda chito, ira kaukami-eni iziwa ira Yehova unosangalala nanyo. Michelle unoyo nimuromolile iyole aongile ira: “Mwavang’ono na vang’ono ndinofunjeda ira ndiroromelenga athu amo-iwa kandiyamikela. Ngakale ira pivyorucha, ndinoiziwa ira pivyevyo Yehova unafuna liye ira ndipangenga.” Andimuwa kanomukami-a teto mooma murima iziwa ira Yehova unomuomeluwana. Vathawiila Michelle unapanga upainiya moi unokami-a chito ndimo-i da va Beteli angali wani.
19. Chin’ni ineyo inausimikizelani ira muli ofuneya wa Mulungu?
19 Yesu unoniumbucha ira nili ofuneya vinjinji wa Babi-u waudimu. (Luka 12:24) Eno kaninakaikela ira Yehova unoniona ira nili amtengo wavadimu. Kaninafuneya diwala likundo leli. Moi niesaesenga kami-a athu amo-iwa ira kavionenga ira mbamtengo wavadimu wa Yehova.
NYIMBO 139 Yerekezerani Kuti Muli M’dziko Latsopano
a Mazina amo-iwa kochenjiwa.
b Vinaoneya ira Mariya Magadala ali m’mo-i mwa azimai anayo kaenda na Yesu. Azimayala kookami-a Yesu limo-i na anamarumiwae vo-indi-eda chito chuma iwa. — Mat. 27:55, 56; Luka 8:1-3.
c Mwaisazo, onani muru 24 m’buku loi Yandikirani kwa Yehova moi welengani malemba na khani da m’Baibulo vati va muru oyi “Kuzikayikira,” m’buku loi Malemba Othandiza pa Moyo wa Chikhristu.