U Hulda Akakwanilisya Vyo Akalondagha
AKASUNGU aka Sangir Besar ko kali ku Indonesia kukwikala abayemba bitu batatu. Kumyaka iyakwisinda uku bakabombelagha poka mulubazu mwa nyanja. Abayemba bitu batatu aba pakasungu aka, bakamanyikwagha ni mbombo iyakulumbilila umwakuti bakabavwanga abantu ukulyivwisya akiza Ibayibolo. Loli munkani iyi bakabombagha imbombo iyakupambanako na yo bakamanyikwagha nayi.
Akasungu aka Sangir Besar kumupoto ukwa chisu icha Indonesia
Ichabwandilo, bakingilagha mumizi nu kusenda amabwe gho ghangw’amite nu kughabika mulubazu mwa nyanja. Amabwe ghamo ghakabanga makulu ngati bola. Pisinda pache, abakolo aba bakikalagha pavitengo nu kwanda ukufwanta amabwe pakubombezya inyondo ukuti ghabe manandi-nandi ukuchila ifumbi ilya nkuku. Nanti babomba bunubu, bakabikagha amabwe gho bafwanta mutwamboni utwa pulasitiki nu kubuka nagho ko bakikalagha. Pabumalilo bakasendagha amabwe agha nu kughabika muvikwama ivikulu, nu kuvipakila mumagalimoto amakulu ukuti baye babombezye imbombo pakupanga umusebo.
U Hulda akubunganika amabwe mulubazu mwa nyanja
Umuyemba u Hulda akaba pigulu ilya bayemba aba. Mo ivintu vikabela pa bumi bwache, vikamwitikizya ukuti amalilagheko akabalilo akatali ukubomba imbombo iyi ukuchila abamwabo. Pabwandilo umuyemba uyu akabombezyanga indalama zyosi zyo azyagha pisiku ilyo ukuti apwelelele imbumba yache. Loli pa kabalilo aka akanda ukusungako zimo indalama ukuti ize abombele imbombo iyamwabo. Umuyemba uyu akalondagha ukuti aghule itabuleti umwakuti abombezyange JW Library®. U Hulda akamanya ukuti amavidiyo ni nkani vyo vikwaghiwa pa JW Library® vingamwavwa mu bulumbilili sona vingamwavwa ukuti ivwisye akiza Ibayibolo.
Ukwa mwezi ghoka nu hafu, u Hulda akabombagha amaawala mabili indabi-ndabi yiliyosi. Akapakilagha amabwe muvikwama umwakuti akizuzya igalimoto iyinandi. Pabumalilo umuyemba uyu akaba ni ndalama izyakukwana izyakughulila itabuleti.
U Hulda anyamuye itabuleti yache
U Hulda akanena ukuti, “Nkalitagha sana sona nkaba ni vilonda ichifukwa cha mbombo yo nkabomba iyakufwanta amabwe, napo vikaba bunubu loli po nkabombezyanga imbombo itabuleti yane iyi mu bulumbilili sona po nkasengannyanga inkomano izya Chikilisitu muzila iyabupepe, nkaluvya ivyakubaba vyosi vyo nkivwanga.” Umuyemba uyu akanena sona ukuti itabuleti yache yikamwavwa sana ukupanga inkomano izya pachipanga sona pakulumbilila pa kabalilo ko imbina iyakwambukila yikandagha. Tukuhobokela poka nu Hulda ichifukwa chakuti akakwanilisya vyo akalondagha ukubomba.