Vyo Vingabavwa po Mukumanyila
Mumanyile Ukusungila Pamoyo “Inyimbo Izya Buzimu”
“Isiku lyo nkwiyivwa ukuti te ne wakulondiwa, u Yehova akunkazya ukwendela munyimbo zyo zili pa JW Broadcasting®.”—Lorraine, U.S.A.
Akabalilo kosi Abakilisitu bakwimba “inyimbo izya buzimu” pakumupala u Chala. (Kolo. 3.16) Nanti mukubikapo umoyo pakumanyila inyimbo izi, vikwiza pakubavwa ukuti mwimbaghe na pa kabalilo ko mute ni buku ilya nyimbo pamo mute ni chibombelo chilichosi icha tekinoloje. Yezya ukubombezya ifundo izyakukonkapo izi ukuti zibavwe mo mungabombela ukuti mukumbukilaghe inyimbo.
Mubikaghepo umoyo po mukubelenga amazyu agha nyimbo ukuti mwivwisye vyo ghakung’anamula. Nanti mwivwisya vyo ichintu chimo chikung’anamula, chikuba chipepe ukuchikumbukila. Pa jw.org pakwaghiwa amazyu agha nyimbo zyitu zyosi ukongelezyapo inyimbo izya bana. Pachigaba ichakuti Library, buka po basimbite ukuti Sumu.
Musimbaghe amazyu agha lwimbo pipepala. Nanti mungabomba bunubu vingabavwa ukuti mulukumbukilaghe ulwimbo.—Kumbu. 17.18.
Pa kabalilo ko mukumanyila ulwimbo, mwimbaghe umwakukwezya amazyu. Mubelengaghe pamo ukwimba ulwimbo umwakupyanizya-pyanizya.
Yezya ukukumbukila amazyu agha lwimbo gho mwasungila pamoyo. Yezya ukukumbukila amazyu ukusita ukwennya pipepala sona ennya vyo mwabomba akiza.