Ka Tukubomba Buli-buli Pakulumbilila Ubumwene Ubwa Chala?

Bo u Yesu ali papipi ukufwa, akati: “Amazyu amiza agha Bumwene ghakwiza pakulumbililiwa pachisu chosi ichapasi pakubikila ubwakaboni pakasi pa bantu aba inko zyosi, po ubumalilo bukwiza.” (Matayi 24.14) Ka imbombo iyi yikaba ukuti inti yibombiwe buli-buli pa chisu chosi? Izila yache yakukonka vyo u Yesu akabombagha bo ali pa chisu.—Luka 8.1.

Tukuyezyayezya ukuti twaghe abantu pa nyumba zyabo. U Yesu akamanyisya abamanyili bache pakulumbilila amazyu amiza ku nyumba ni nyumba. (Matayi 10.11-13; Imbombo 5.42; 20.20) Abalumbilili aba bakabanga ni chigaba ichakulumbililako. (Matayi 10.5, 6; 2 Aba Kolinti 10.13) Umwakuyana bulo na kabalilo kano, ichipanga chilichosi chili ni chigaba ichakulumbililako. Ivi vikutwavwa ukuti tukwanilisye ilamulo ilya Yesu ilyakuti “tulumbilile amazyu amiza pakasi [pa] bantu nukubasimikizya.”—Imbombo 10.42.

Tukubuka ko kukwaghiwa abantu. Uswe tukukonka vyo u Yesu akabombagha pakulumbilila. Akalumbililagha ko kukwaghiwa abantu, ngati mulubazu mwa nyanja na ko abantu bakasembagha amizi. (Maliko 4.1; Yohani 4.5-15) Nuswe bulo tukunenezannya na bantu izya mu Bayibolo kulikosi ko bakwaghiwa, ngati mu misebo, mu misika, sona na pa foni. Tukulumbilila ku bapalamani, bo tukubomba nabo imbombo, bo tukumanyila nabo isukulu, sona na bakamu bitu. Abantu abinji pa chisu chosi bivwa ‘amazyu amiza aghabupoki’ chifukwa chakuti tukulumbilila muzila zyosi izi.—Salimo 96.2.

Ka pali yumo yo mungalonda ukumubuzyako amazyu amiza agha Bumwene ubwa Chala na vyo bukwiza pakubabombela? Manyi mufisaghe. Babuzyeko abamwinyu amazyu amiza agha mwalubilo!

• Nkimba mazyu buli amiza gho ghakulondiwa ukulumbililiwa?

• Ka Abakaboni ba Yehova bakuyezya buli-buli u Yesu pakulumbilila?