Nkimba Amazyu Amiza Ghakulumbililiwa Buli-Buli?

Lunulu u Yehova inti abombezye Ubumwene bwache ukuti amazye intamyo zyo tukukomana nazyo. Inkani iyi nyiza sana umwakuti aliwesi akulondiwa ukuti ayimanye. U Yesu akalondagha ukuti bo bakumukonka balumbililaghe ubutenga ubu kwa aliwesi! (Matayi 28.19, 20) Ka Abakaboni ba Yehova bakubomba buli-buli pa vyo u Yesu akabalamula?

1. Ka isimbo ilya Matayi 24.14 likukwanilisiwa buli-buli amasiku ghano?

U Yesu akanenela zila ukuti: “Amazyu amiza agha Bumwene ghakwiza pakulumbiliwa pachisu chosi ichapasi.” (Matayi 24.14) Abakaboni ba Yehova bakuhoboka pakubomba imbombo iyakulondiwa iyi. Tukulumbilila amazyu amiza pachisu chosi, muvinenelo ivyakupululila 1,000! Imbombo inkulu iyi yikulondiwa ukubikapo umoyo sona ukukolelana. Yitangabombiwa ukusita ubutuli ubwa Yehova.

2. Nkimba tukubomba buli-buli ukuti tulumbilile ku bantu?

Tukulumbilila kulikosi ko twabagha abantu. Ngati Bakilisitu aba bwandilo tukulumbilila “munyumba zya bantu.” (Imbombo 5.42) Ni zila yiniyi tukulumbilila ku bantu amamiliyoni aghinji umwaka ghuli ghosi. Pakuti te kabalilo kosi kako abantu bakwaghiwa munyumba zyabo, cho chifukwa tukulumbilila sona kumalo gho kukwaghiwa abantu abinji. Akabalilo kosi tukulondelezya ulusako ulwakuti tubabuzyeko abamwitu ivyakukwafyannya nu Yehova sona nubwighane bwache.

3. Ka bo bawenu bo bali nu budindo ubwakulumbilila amazyu amiza agha?

Umukilisitu uwabwanaloli aliwesi ali nu budindo ubwakulumbilila amazyu amiza agha kubamwabo. Tukubikapo umoyo pa mbombo iyi. Tukubomba chilichosi cho tungakwanisya ichifukwa chakuti tukumanya ukuti zila yimo yo yikwavwa abantu ukuti bize baghe ubumi bwa bwila na bwila. (Belenga 1 Timoti 4.16) Pa mbombo iyi tutakulipiliwa, ichifukwa chakuti Ibayibolo likunena ukuti: “Mwapokela ukusita ukulipila po namwe mupe ukusita ukulipiliwa.” (Matayi 10.7, 8) Te aliwesi yo akwitika ubutenga bwitu. Loli tukubukilila pakulumbilila ichifukwa chakuti tukumwivwila u Yehova sona tukumuhobosya.

MANYA IVYINJI

4. Tukubikapo umoyo ukuti tulumbilile ku bantu abinji

IVIDIYO: Ukulumbilila “Mpaka na Kumphaka iya Chisu Ichapasi” (7:33)

• Choni cho chikubahobosya nkani na mo Abakaboni ba Yehova bakubikilapo umoyo pakulumbilila?

Belenga Matayi 22.39 nu Aba Loma 10.13-15, nu kwamula amalalusyo agha:

• Ka pala tukulumbilila tukulangizya buli-buli ukuti tubaghanite abapalamani bitu?

• Ka u Yehova akubennya buli-buli bo bakulumbilila amazyu amiza?—Ennya ivesi 15.

5. Swe babombi abamwabo nu Chala

Ivyakubombiwa ivyinji vikulangizya ukuti u Yehova akutangilila imbombo yitu. Umwakufwanikizya ku New Zealand umukamu yumo izina lyache u Pabuli akakomana nu mukolo yumo po akalumbililagha kunyumba ni nyumba pa chamabwila. Isiku linilyo pa ndabi-ndabi umukolo uyu akaba ukuti iputa kwa Chala pakubombezya izina lyakuti Yehova nu kumulaba ukuti umuntu yumo amwendele. U Pabuli akanena ukuti “bo penda bulo amaawazi ghatatu, nkakong’osya panyumba yache.”

Belenga 1 Aba Kolinti 3.9, nu kwamula ilalusyo ili:

• Ka vyo vikabombiwa ku New Zealand vikulangizya buli-buli ukuti u Yehova we yo akutangilila pa mbombo yitu?

Belenga Imbombo 1.8, nu kwamula ilalusyo ili:

• Choni cho tukulondiwa ubutuli bwa Yehova ukuti tukwanisye imbombo yitu iya bulumbilili?

Ka muzimenye?

Ulukomano lulilosi ulwa mukasi mwa sabata tukupokela ubulongozi ubwa mo tungalumbililila. Pala mubukitepo ku lukomano ulu, nkimba mukwinong’ona choni ivya bulongozi bo bukapelekiwa?

6. Tukwivwila ululaghilo lwa Chala pala tukulumbilila

Mu kabalilo aka Bakilisitu ababwandilo, abakususya bakayezya-yezya ukuti babalesye abamanyili ba Yesu pakulumbilila. Abakilisitu ababwandilo bakafighilila ubwabuke bwabo ubwakulumbilila, “pakufighilila amazyu amiza umwakukolelana ni ndaghilo.” (Aba Filipi 1.7) Amasiku ghano Abakaboni ba Yehova bope bakubomba bunubu.a

IVIDIYO: Ukufighilila Amazyu Amiza Umwakukolelana ni Ndaghilo (2:28)

Belenga Imbombo 5.27-42, nu kunenezannya ilalusyo ili:

• Choni cho tutakwiza pakulekapo ukulumbilila?—Ennya amavesi 29, 38, sona 39.

IFUNDO IZYAKUDUMULA

U Yesu akabatuma abamanyili bache ukuti balumbililaghe amazyu amiza ku bantu aba maluko ghosi. U Yehova akubavwa abantu bache ukuti babombe imbombo iyi.

Ukunyokelamo

• Ka amazyu amiza ghakulumbililiwa buli-buli pachisu chosi?

• Ka imbombo yo tukubomba, yikulangizya buli-buli ukuti tubaghanite abapalamani bitu?

• Ka mukwinong’ona ukuti imbombo yakulumbilila yingatupangisya ukuti tubanje swe bakuhoboka? Chifukwa buli?

IFUNDO IZYAKONGELEZYAPO

Ennya mo Abakaboni ba Yehova mo bakulumbililila ku bantu bo bakwikala mumatawuni aghakulu.

Imbombo Iyapadela Iyakulumbilila ko Kukwayiwa Abantu Abinji ku Paris (5:11)

Nkimba Abakaboni ba Yehova bakubomba buli-buli ukuti balumbilile ku abantu bo bachimbila ku kwabo?

Abantu bo Bachimbila ku Kwabo Bakagha Ichakulya Icha Buzimu (5:59)

Teghelezya vyo yumo akulongosola ichifukwa cho chikamupangisya ukuti abe wakughoboka ni mbombo iyabulumbilili ubumi bwache bosi.

Ne Wakuhoboka Ukuti Nkasala Imbombo Iyi (6:29)

Vyo ikoti likadumula vikavwa ukuti imbombo iyakulumbilila amazyu amiza yendeghe akiza.

“Ŵakamangara ku Khoti” (Ufumu wa Chiuta Ukuwusa!, umuntu 13)