UMUTU 18
Ka Mungabamanya Buli-buli Abakilisitu Ababwanaloli?
Abantu amamiliyoni aghinji bakuti Bakilisitu. Loli batakusubila ivintu ivyakuyana pamo ukukonka ifundo izyakuyana. Nkimba tungabamanya buli-buli Abakilisitu ababwanaloli?
1. Ka Umukilisitu we wenu?
Abakilisitu bamanyili pamo bantu bo bakumukonka u Yesu Kilisitu. (Belenga Imbombo 11.26.) Ka bakalangizya buli-buli ukuti bamanyili ba Yesu? U Yesu akanena ukuti: “Mwe bamanyili bane naloli, nanti mukwivwila amazyu ghane.” (Yohani 8.31) Ivi vikung’anamula ukuti Abakilisitu ababwanaloli babaghiye ukwivwila vyo u Yesu akumanyisyanga. Ngati mo u Yesu akabombezyanga Amasimbo pakumanyisya, bope Abakilisitu ababwanaloli vyo bakusubila vikufuma mu Bayibolo.—Belenga Luka 24.27.
2. Ka Abakilisitu ababwanaloli bakulangizya buli-buli ulughano?
U Yesu akababuzya abamanyili bache ukuti: “Mughananaye ukuyana na mumo nane imbaghaniye.” (Yohani 15.12) Ka u Yesu akalangizya buli-buli ukuti akabaghana abamanyili bache? Akangalagha nabo, ukubaghomya sona akabavwanga. Sona akapeleka ubumi bwache ichifukwa cha babo. (1 Yohani 3.16) Umwakuyana bulo, Abakilisitu ababwanaloli batakunena bulo ivya lughano, loli bakulangizya ulughano muvyakunena sona muvyakubomba vyabo.
3. Ka Abakilisitu ababwanaloli bakubomba mbombo buli?
U Yesu akabapa imbombo abamanyili bache. ‘Po akabatuma pakulumbilila izya Bumwene ubwa Chala.’ (Luka 9. 2) Abakilisitu ababwandilo batakalumbililagha bulo kumalo aghakwiputilako, loli bakalumbililagha ko kukwaghiwa abantu abinji sona na kunyumba izya bantu (Belenga Imbombo 5.42; 17.17.) Amasiku ghano ghope Abakilisitu bakulumbilila ubwanaloli bwa Mu Bayibolo kulikosi ko kukwaghiwa abantu. Babaghanite abantu cho chifukwa bakubombezya akabalilo na maka ghabo ukuti bababuzyeko ubutenga ubwa mu Bayibolo bo bukubapa ulusubilo sona bukubasangalusya.— Maliko 12.31
MANYA IVYINJI
Ennya vyo vikupangisya ukuti Abakilisitu ababwanaloli bapambanaghe na bantu bo batakukonka vyo u Yesu akamanyisya sona ni chifwanikizyo chache.
4. Bakufufuza ubwanaloli ubwa mu Bayibolo
Abakilisitu bakalumbililagha sona bakaghananagha
Te bosi bo bakunena ukuti Bakilisitu, bakuchindika ubwanaloli ubwa mu Bayibolo. Enelezya IVIDIYO, nu kwamula ilalusyo.
Ka amachalichi ghamo gho ghakuti gha Chikilisitu ghakupotwa buli-buli ukumanyisya vyo u Yesu akamanyisyanga?
U Yesu akamanyisyanga ubwanaloli ubwa mu Bayibolo. Belenga Yohani 18.37, nu kwamula ilalusyo ili:
Ukuyana nu Yesu, ka tungabamanya buli-buli Abakilisitu bo ‘bali pa bwanaloli’?
5. Bakumanyisya ubwanaloli ubwa mu Bayibolo
Abakilisitu ababwandilo bakalumbililagha ku bamwabo
Bo u Yesu atabukite kumwanya, akabapa imbombo abamanyili bache yo yichili yikubombiwa amasiku ghano. Belenga Matayi 28.19, 20 sona Imbombo 1.8, nu kwamula ilalusyo ili:
Nkimba abamanyili ba Yesu bakulumbilila mpaka kwi?
6. Bakubomba vyo bakulumbilila
Choni cho chikamupangisya u Tom ukumanya ukuti achagha Ichikilisitu ichabwanaloli? Enelezya IVIDIYO, nu kwamula amalalusyo.
Ukuyana ni vidiyo, nkimba choni cho chikapangisya ukuti u Tom aleke ukubuka ku chalichi chilichosi?
Choni cho akikutisiwa ukuti abwagha ubwanaloli?
Vyo abantu bakubomba vikuvumbula ivyinji ukuchila vyo bakunena Belenga Matayi 7.21, nu kwamula ilalusyo ili:
Nkimba ichakulondiwa nkani kwa Yesu cho choni, ukunena bulo ukuti tukusubila mu mwache pamo ivyakubomba?
7. Baghananite
The early Christians loved one another
Ka Abakilisitu bakubika ubumi bwabo pa ngozi ichifukwa cha Bakilisitu abamwabo? Enelezya IVIDIYO, nu kwamula amalalusyo.
Ukuyana ni vidiyo, choni cho chikamupangisya Umukamu Lloyd ukubika ubumi bwache pa ngozi ukuti amupulumusye u Johansson?
Ka mukwennya ukuti akabomba ngati Mukilisitu uwabwanaloli?
Belenga Yohani 13.34, 35, nu kwamula amalalusyo agha:
Ka Abakilisitu ababwanaloli bakubomba buli-buli ivintu na bantu bo te bamutundu wabo pamo ichisu chabo?
Ka bakubomba buli-buli pakabalilo aka nkondo?
VYO BAMO BAKUNENA: “Abakilisitu abinji bakubomba ivintu ivibibi, ka chingabapo ichipanga ichabwanaloli?”
Nkimba lisimbo buli lyo mungamubelengela lyo lingamwavwa ukubamanya Abakilisitu ababwanaloli?
IFUNDO IZYAKUDUMULA
Abakilisitu ababwanaloli bakukonka vyo Ibayibolo likumanyisya, bakuba nu lughano ulwenecho sona bakumanyisya ubwanaloli ubwa mu Bayibolo.
Ukunyokelamo
Ka vyo Abakilisitu ababwanaloli bakusubila vikufuma kwi?
Ka tungabamanya buli-buli Abakilisitu ababwanaloli?
Nkimba mbombo wuli yo Abakilisitu ababwanaloli bakubomba?
IFUNDO IZYAKONGELEZYAPO
Manyila ivyinji ivyakukwafyannya ni gulu ilya bantu bo bakulwisya ukukonka ichifwanikizyo icha Yesu Kilisitu sona na vyo akamanyisyanga.
Ennya vyo vikamupangisya u sisitele yumo ukuti aghe “imbumba iyabwanaloli iyabuzimu.”
“Ŵakanizgora Kufuma mu Baibolo!” (Ichitembe cha mulindilili icha Chitumbuka, Epulelo 1, 2014)
Manyila mo Abakilisitu ababwanaloli bakulangizizya ulughano ku bamwabo pakabalilo ko bakulondiwa ubutuli.
Ennya mo Abakilisitu ababwandilo sona abamasiku ghano bakubombela ivintu vyo vikusimikizya ifundo yo u Yesu akanena mo mungabamanyila abamanyili bache.