Ka We Wenu Yo Wambombo Umusubiliwa nu Wamahala?

U Yesu akabasendela palubazu abamanyili bache folo, u Pitala, u Yakobo, u Yohane, nu Andeleya bo ali papipi pakufwa. Po u Yesu akanenela zila izya kubapo kwache mumasiku aghabumalilo, akalalusya ilalusyo ilyakuti: ‘Nkimba we wenu wambombo umusubiliwa nu wamahala yuyo u mwene wache akumubika pakuba we songo uwa vintu vyache vyosi nukubapa abambombo abanji ichakulya pakabalilo akiza?’ (Matayi 24.3, 45; Maliko 13.3, 4) U Yesu akanena umwakusimikizya ukuti pakuba we “mwene” wabo, akwiza pakusala bamo bo bakwiza pakubapa ichakulya bo bakumukonka akabalilo akabumalilo. Bo bawenu bo bakwiza ukuba wambombo uyu?

Kagulu akanandi aka abakupakaziwa bo bakumukonka u Yesu. Uwambombo yunuyu ko Kagulu Akakwenelezya aka Bakaboni ba Yehova. Kakugaba ichakulya ku bamwabo bo bakumwiputa u Yehova. Uwambombo yunuyu, yoyo tukusubalila ukuti inti abukilile ukutupa “ichakulya pakabalilo akiza.”—Luka 12.42.

Weyo akwenelezya inyumba iya Chala. (1 Timoti 3.15) U Yesu akamupa uwambombo umusubiliwa ubudindo ubwakwenelezya imbombo yo yikubombiwa ni chigaba icha gulu lya Yehova icha pachisu ichapasi. Akwenelezya ukatundu wesi, akutangilila imbombo iyabulumbilili, sona nukutumanyisya ukwendela mu vipanga. “Uwambombo umusubiliwa nu wamahala” akutupa ivyakulya vyo tukulondiwa pakabalilo akiza. Akutupa amabuku gho tukubombezya mu bulumbilili, sona akutumanyisya pankomano izya chipanga na pankomano inkulu.

Uwambombo uyu musubiliwa chifukwa akumamatila ku bwanaloli ubwa mu Bayibolo, sona musubiliwa pambombo iyakulumbilila amazyu amiza. Wamahala chifukwa akwenelezya akiza ivintu ivya Kilisitu vyo vili pa chisu ichapasi. (Imbombo 10.42) U Yehova akumusaya uwambombo uyu. Akubaguza abantu abinji ukwiza kukwache sona akumwavwa uwambombo pakubapa ichakulya.—Yesaya 60.22; 65.13.

• We wenu yo akasaliwa nu Yesu ukuti ize abape abamanyili bache ichakulya ichabuzimu?

• Choni cho akwitiziwa ukuti musubiliwa nu wamahala?