UMUTU 54
Ubudindo Ubwa “Wambombo Umusubaliwa nu Wamahala”
U Yesu we Mutu uwachipanga icha Chikilisitu. (Aba Efeso 5.23) Amasiku ghano u Yesu umwakuyana nu budindo bo ali nabo, akubatangilila Abakilisitu ukwendela mu “wambombo umusubaliwa nu wamahala.” (Belenga Matayi 24.45.) Napo “uwambombo” uyu apokelite ubudindo ukufuma kwa Yesu Kilisitu ukuti asalaghe ivyakubomba, loli akubukilila ukumwivwila u Kilisitu nu kubabombela akiza Abakilisitu. Ka uwambombo uyu wewenu? Ka akutupwelelela buli-buli?
1. Ka “uwambombo umusubaliwa nu wamahala” wewenu?
Akabalilo kosi u Yehova akubombezya umuntu yumo pamo akagulu ka bantu ukuti babapanje abantu bache ubulongozi. (Malaki 2.7; Aba Hebeli 1.1) Bo u Yesu afwa, abatumiwa na basongo ba chipanga bobo bakatangililagha ku Yelusalemu. (Imbombo 15.2) Umwakuyana bulo, amasiku ghano abakamu bo bali mu “Kagulu Akakwenelezya” bakutupa ichakulya ichabuzimu sona bakutangilila pa mbombo iya kulumbilila. Akagulu aka koko “wambombo umusubaliwa nu wamahala” ko u Yesu asalite. (Matayi 24.45a) Bosi bo bali mu Kagulu Akakwenelezya bapakaziwe nu muzimu ubuzelu sona bakuya pakulaghila poka nu Yesu kumwanya.
2. Nkimba chakulya buli ichabuzimu cho uwambombo umusubaliwa akutupa?
U Yesu akanena ukuti uwambombo umusubaliwa akwiza ‘pakubapa abambombo abanji ichakulya pa kabalilo akiza.’ (Matayi 24.45b) Ichakulya chikutwavwa ukuti imibili yitu yibanje akiza sona yamaka. Umwakuyana bulo, ichakulya ichabuzimu bo bulongozi ubwakufuma mu Mazyu gha Chala, chikutupa amaka aghakuti tubukilile ukuba swe basubaliwa kwa Yehova nu kubomba imbombo yo u Yesu atupiye. (1 Timoti 4.6) Tukupokela ichakulya ichabuzimu ichi ukwendela pa nkomano izya chipanga, izya dela, izya chigaba, mu mabuku gho ghakulongosola Ibayibolo sona amavidiyo gho ghakutwavwa ukwivwisya ubwighane bwa Chala nu kughomya ubumanyani bwitu.
MANYA IVYINJI
Ennya ichifukwa cho tukulondiwa ukuba nu “wambombo umusubaliwa,” bo abakamu bo bali mu Kagulu Akakwenelezya.
Akagulu Akakwenelezya kakutupa ichakulya ichabuzimu sona ubulongozi swe Bakaboni ba Yehova pachisu chosi ichapasi
3. Abantu ba Yehova bakulondiwa ukulongoziwa
Ukwendela mu bulongozi bwa Yesu, Akagulu Akakwenelezya kakutangilila imbombo izya Bakaboni ba Yehova. Indondomeko iyi yikabako na mu kabalilo ka Bakilisitu ababwandilo. Enelezya IVIDIYO.
Belenga 1 Aba Kolinti 14.33, 40, nu kwamula ilalusyo ili:
Ka amasimbo agha ghakulangizya buli-buli ukuti u Yehova akulonda ukuti Abakaboni bache bakolelanaghe?
4. Uwambombo umusubaliwa akututangilila pa mbombo iyakulumbilila
Ukulumbilila yikaba mbombo iyakulondiwa sana ku Bakilisitu ababwandilo. Belenga Imbombo 8.14, 25, nu kwamula amalalusyo agha:
Ka wewenu yo akatangililagha imbombo yabulumbilili mu kabalilo ka Bakilisitu ababwandilo?
Nkimba u Pitala nu Yohani bakakonkagha buli-buli ubulongozi ubwa batumiwa abamwabo?
Akagulu akakwenelezya kakutangilila imbombo iyakulondiwa nkani iyabulumbilili. Enelezya IVIDIYO.
U Yesu akanena ukulondiwa ukwa mbombo yabulumbilili. Belenga Maliko 13.10, nu kwamula amalalusyo agha:
Choni cho Akagulu Akakwenelezya kakwennya imbombo iyakulumbilila ukuti yakulondiwa sana?
Choni cho tukulondiwa “uwambombo umusubaliwa nu wamahala” ukuti atangililaghe imbombo iyi yo yikubombiwa pachisu chosi?
5. Uwambombo umusubaliwa akutupa ubulongozi
Akagulu Akakwenelezya kakupeleka ubulongozi ku Bakilisitu bosi pachisu chosi. Nkimba akagulu aka, kakusala buli-buli ubulongozi ubwakuti bututule? Ennya mo akagulu akakwenelezya aka mukabalilo ka Bakilisitu aba bwandilo mo bakabombelagha. Belenga Imbombo 15.1, 2, nu kwamula amalalusyo agha:
Nkimba Abakilisitu babwandilo batakakolelanagha pa nkani buli?
Ka u Pabuli nu Balanaba bakabuka kwa wenu ukuti bamazye intamyo yo yikabapo?
Belenga Imbombo 15.12-18, 23-29, nu kwamula ilalusyo ili:
Nkimba akagulu akakwenelezya kakabomba tasi ichoni po kachili ukusala ivyakubomba?—Ennya vesi 12, 15, nu 28.
Belenga Imbombo 15.30, 31 nu 16.4, 5, nu kwamula amalalusyo agha:
Nkimba Abakilisitu ababwandilo bakabomba ichoni bo bapokela ubulongozi ukufuma ku kagulu akakwenelezya?
Nkimba u Yehova akabasaya buli-buli ichifukwa chakwivwila kwabo?
Belenga 2 Timoti 3.16 nu Yakobo 1.5, nu kwamula ilalusyo ili:
Nkimba Akagulu Akakwenelezya kakubwagha kwighi ubulongozi nanti kakupanga ivyakusala?
VYO BAMO BAKUNENA: “Nanti mukwivwila Akagulu Akakwenelezya mukonkagha bulo inyinong’ono izya bantu.”
Nkimba choni cho chikubasimikizya ukuti u Yesu we yo akulongozya Akagulu Akakwenelezya?
IFUNDO IZYAKUDUMULA
Akagulu Akakwenelezya koko “wambombo umusubaliwa nu wamahala” yo imikiwe nu Kilisitu. Akagulu aka kakupeleka ubulongozi ni chakulya ichabuzimu ku Bakilisitu pachisu chosi.
Ukunyokelamo
Nkimba wenu yo akamwimika “uwambombo umusubaliwa nu wamahala”?
Nkimba Akagulu Akakwenelezya kakutufighilila buli-buli?
Ka mukusubila ukuti aba Mukagulu Akakwenelezya bo bo “wambombo umusubaliwa nu wamahala”?
IFUNDO IZYAKONGELEZYAPO
Ennya mo Akagulu Akakwenelezya kakubombela poka imbombo umwakukolelana.
“Nkimba Akagulu Akakwenelezya aka Bakaboni ba Yehova cho Choni?” (Inkani iya pa intaneti)
Ennya mo Akagulu Akakwenelezya kakubombela ukuti katupe ichakulya ichabuzimu icha bwanaloli.
Ka aba mu Kagulu Akakwenelezya bakwiyivwa buli-buli ichifukwa cha mbombo yo u Yesu abapiye?
Nkimba inkomano zya chipanga ni zya dela zikulangizya buli-buli ukuti u Yehova akukatangilila Akagulu Akakwenelezya?