Ka Indalama Izyakubombela Imbombo Yitu Tukuzyagha Buli-buli?

Umwaka ghulighosi, igulu lyitu likupanga nu kugaba amabuku na Mabayibolo amamiliyoni aminji ukusita ukulipisya. Tukuzenga nu kuyannya Inyumba izya Bumwene na maofesi. Tukwavwa abamishonale nabo bakubomba pa Beteli sona tukwavwa nako kwabombiwa umukosi. Lumo mungaswigha ukuti, ‘Ka indalama zikufuma kwiyi?’

Tutakulaba indalama pamo ukwendesya imbale. Napo imbombo iyakulumbilila yikulonda indalama izyinji, loli tutakulaba indalama. Amaka aghakupululila 100 kwisinda, Gongwe la Mulinda ilyabubili likati tukusubila ukuti u Yehova weyo akutwavwa sona “tutakwiza ukulabapo nalumo ukuti abantu batwavwe.” Ivi vyovyo vikubombiwa naloli!—Matayi 10.8.

Imbombo yitu yikwenda ni vyabupi. Abantu abinji bakuhoboka ni mbombo iyakumanyisya Ibayibolo sona bakwavwapo. Abakaboni ba Yehova abenecho bakwiyipa na kabalilo kabo, amaka, indalama, sona ni vintu ivinji ukuti ubwighane ubwa Chala bubombiwe pa chisu chosi. (1 Inongwa sya Mbukulu 29.9) Pa Nyumba iya Bumwene na pa nkomano inkulu, pakuba amabokosi aghakusumbilamo ivyabupi. Bo bakulonda bangasumbilamo. Bamo bakupeleka ivyabupi vyabo pa webusayiti yitu iya jw.org. Abinji bo bakwiyipa ni vyabupi vyabo te bakabi. Bakuyana bulo nu mukolo umufwilwe yo u Yesu akamupala chifukwa akasumbilamo utusalabazya tubili mu chakusumbilamo. (Luka 21.1-4) Cho chifukwa aliwesi ‘angasabulapo indalama zimo’ ukuti ayipe ukuyana na “mumo adumulila mumoyo wache.”—1 Aba Kolinti 16.2; 2 Aba Kolinti 9.7.

Tukusubalila ukuti u Yehova inti abukilile ukubakazya bo bakulonda ukumuchindika ni vyuma vyabo pa mbombo iya Bumwene ukuti ubwighane bwache bukwanilisiwe.—Isya Mbupingamu 3.9.

• Nkimba igulu lyitu lipambanite buli-buli ni vipanga ivinji?

• Ka ivyabupi vikubomba mbombo buli?