Mwavwanjepo pa Chipanga Chinyu

Pachisu chosi ichapasi abantu bakumubombela u Yehova muvipanga ivyinji. Bakupalizya ichifukwa cha bulongozi bo bakupokela sona bakwipeleka pakutulapo pa chipanga chabo muzila izyakupambana-pambana. Ka numwe mukubomba bunubu pa chipanga chinyu?

1. Nkimba mungabombezya buli-buli amaka na kabalilo kinyu pakwavwa ichipanga chinyu?

Swebosi tungavwa ichipanga chitu. Umwakufwanikizya, nkimba mu chipanga chinyu muli abagosi sona abantu bo bakubina-bina? Ka mungabavwa ukuti baghiwanjepo pa nkomano? Pamo mungabavwa muzila izinji ngati ukubaghulila ivyakulya pamo ukubayanizya pakaya? (Belenga Yakobo 1.27.) Tungavwako sona umwakuyannya pa Nyumba ya Bumwene. Nayumo-yumo yo akututuma ukuti tubombeko imbombo izi. Loli ‘tukwipeleka nu moyo ghosi’ ichifukwa chakuti tumughanite u Chala na bantu.—Salimo 110.3.

Abakamu na bayemba bo boziwe bangavwapo pa chipanga muzila izinji. Abakamu bo bakubomba vyo Ibayibolo likunena bangaba bavwilizyi sona basongo ba chipanga. Abakamu na bayemba bangaba sona bapayiniya ukuti batulepo pambombo yakulumbilila. Abakaboni bamo bangavwapo pakuzenga inyumba zyakwiputilamo pamo bangasamila kumalo ko kukulondiwa ubutuli.

2. Ka mungabombezya buli-buli ivyabupi vyinyu ukuti mutulepo pa chipanga?

‘Tungamuchindika u Yehova ni vintu vyitu ivyapamwanya.’ (Isya Mbupingamu 3.9) Tukuhoboka sana nanti tukupeleka ivyabupi pamo indalama ukuti zitule pa chipanga pamo pa mbombo iyakulumbilila pachisu chosi. (Belenga 2 Aba Kolinti 9.7.) Ivyabupi vyitu vikutulapo sona nanti kwabombiwa imikosi iyachipeliwa. Abingi bakusala ukuti ‘basabulaghepo indalama zimo’ ukuti bapelekaghe ivyabupi. (Belenga 1 Aba Kolinti 16.2.) Tungapeleka ivyabupi umwakubombezya amabokosi gho ghakwaghiwa mu Nyumba zya Bumwene pamo tungapeleka pa donate.jw.org. U Yehova atupiye ulusako ulwakuti tumulangizye ulughano lwitu ukwendela mu vyabupi vyo tukumupa.

MANYA IVYINJI

3. Mungabombezya ivintu vyo muli navyo

U Yehova nu Yesu bakuhoboka nu muntu yo akupa. Umwakufwanikizya, u Yesu akamupalizya umukolo umupina yo akapeleka utundalama tunandi bulo. Belenga Luka 21.1-4, nu kwamula amalalusyo agha:

• Nkimba tukulondiwa ukumupa indalama izyinji u Yehova?

• Nkimba u Yehova nu Yesu bakwiyivwa buli-buli nanti vyo tukubapa vikufuma pasi pa moyo?

Ukuti mumanye mo ivyabupi vyitu vikubombela imbombo, enelezya IVIDIYO. Nu kwamula ilalusyo ili.

IVIDIYO: ‘Ukumupa Ivyabupi u Yehova’ (4:47)

• Nkimba ivyabupi bakuvibombezya buli-buli ukuti vyavwe ivipanga pachisu chosi ichapasi?

4. Nuswe tungatulapo

Ababombi ba Yehova abakale bakabikaghapo umoyo pakuyannya amalo gho bakiputilaghapo. Loli ukuti bakwanisye imbombo iyi bakalondiwa ukubomba ivinji ukuchila ukupeleka bulo indalama. Belenga 2 Syambukulu 34.9-11, nu kwamula ilalusyo ili:

• Nkimba Umuizilayeli aliwesi akabombagha buli-buli ukuti avwepo pa mbombo iyakuyannya panyumba ya kwiputilapo?

Ukuti mumanye mo Abakaboni ba Yehova bakukonkela ivifwanikizyo vya bantu ba mu Bayibolo, enelezya IVIDIYO. Nu kwamula amalalusyo agha.

IVIDIYO: Ukupwelelela Amalo gho Tukwiputilapo (3:31)

• Choni cho tukulondiwa ukuti tupwelelelaghe Inyumba zya Bumwene ukuti zibonekaghe akiza?

• Nkimba mungatulapo buli-buli?

5. Abakamu bali ni mbombo izyinji pa chipanga

Ibayibolo likubalimbikisya abanavuli mu chipanga ukuti babombaghe chilichosi cho bangakwanisya ukuti bachitule ichipanga. Ukuti mwennye ichifwanikizyo enelezya IVIDIYO. Nu kwamula ilalusyo.

IVIDIYO: Abakamu—Bakwiyula pakubomba imbombo Inyiza (5:19)

• Ukuyana navyo mwennya mu vidiyo, nkimba u Ryan akakwanisya buli-buli ukuti atulaghepo pa chipanga umwakukwana?

Ibayibolo likunena ivintu vyo umuntu akulondiwa ukubomba ukuti abe mwavwilizyi pamo we songo uwa chipanga. Belenga 1 Timoti 3.1-13, nu kwamula amalusyo agha:

• Nkimba ukuti umuntu abe mwavwilizyi pamo usongo wa chipanga akulondiwa ukubomba ichoni?

• Ka aba mumbumba zyabo bakulondiwa ukukwanisya ukubomba choni?—Ennya ivesi 4 nu 11.

• Nanti abakamu bakuyezya-yezya ukukonka ubulongozi ubu, nkimba aliwesi akupindula buli-buli mu chipanga?

IFUNDO IZYAKUDUMULA

U Yehova akupalizya sana pa vyo tukukwanisya ukwavwapo pa chipanga umwakubombezya akabalilo kitu, amaka sona na vyo tuli navyo.

Ukunyokelamo

• Nkimba tungabombezya buli-buli akabalilo na maka ghitu pakwavwapo pa chipanga?

• Nkimba tungabombezya buli-buli ivintu vyo tuli navyo ukuti twavwepo pa chipanga?

• Nkimba mungighana ukuti mubombe choni ukuti mwavwepo pa chipanga chinyu?

IFUNDO IZYAKONGELEZYAPO

Ennya ichifukwa cho u Yehova atakwitikizya ukuti ababombi bache bapelekaghe ichakumi.

“Ka Ibayibolo Likuti Choni pa nkani iya Kupeleka Ichakumi?” (Inkani iya pa intaneti)

Ibayibolo likunena ukuti abanavuli abakoziwa bobo babaghiye ukuba na mabudindo mu chipanga. Loli buli nanti umuyemba uwakoziwa we yo akulonda ukuti abombe pa mabudindo agho?

“Udindo wa Ŵalara mu Mpingo” (Ichitembe cha Mulindilili icha Chitumbuka, Febuluwale, 2021)

Ennya Abakaboni bamo bo bakwiyipa ukuti bapeleke amabuku ku Bakilisitu abamwabo.

Ukupeleka Amabuku mu Chisu cha Congo (4:25)

Manya izila zyo Abakaboni ba Yehova bakubombezya imbombo kuti bazyaghe indalama vyo vipambanite nkani ni vipanga ivyamwabo.

“Nkimba Abakaboni ba Yehova Bakuzyagha kwi Indalama zyo Bakwendesezya Imbombo Zyabo?” (Inkani iya pa intaneti)