UMUTU 37
Nkimba Ibayibolo Likunena Ichoni pa Nkani ya Mbombo ni Ndalama?
Nkimba mutamiwepo lumo inyinong’ono ichifukwa cha mbombo pamo indalama? Chingaba chakutamya ukwagha ivyakulondiwa pa bumi sona pa kabalilo kanako ukumwiputa u Yehova. Loli Ibayibolo lili nu bulongozi ubwa mo tungabombela pa chigaba ichi.
1. Nkimba Ibayibolo likunena ichoni pa nkani ya mbombo?
U Chala akulonda ukuti tuhobokaghe ni mbombo yo tukubomba. Ibayibolo likuti ‘pate nachimo ichintu ichiza ukupota ukuti umuntu . . . ahobokaghe ni mbombo yo akubomba.’ (Undumbilili 2.24) U Yehova akulimbikila imbombo. Waghe nuswe tukulimbikila ukubomba imbombo, tukumuhobosya u Yehova sona nuswe tukuba swe bakuhoboka.
Ukubomba imbombo kwakulondiwa sana. Loli tutakitikizyanje ukuti ukubomba imbombo koko kuwe kwakulondiwa nkani ukuchila ukumwiputa u Yehova. (Yohani 6.27) U Yehova alayizizye ukuti waghe tukumubika pabwandilo akwiza pakutupa vyo tukulondiwa pa bumi.
2. Nkimba tubaghiye ukuzyennya buli-buli indalama?
Ibayibolo likunena ukuti ‘indalama zikufighilila’ loli likutuchevya sona ukuti indalama pazyene zitangatupangisya ukuti tube bakuhoboka. (Undumbilili 2.24) Cho chifukwa tukulimbikisiwa ukuti tutakaghanaghe nkani indalama loli ‘twikutisiwanje na vivyo tuli navyo.’ (Belenga Aba Hebeli 13.5.) Nanti tukwikutisiwa na vyo tuli navyo, vikwiza ukutwavwa ukuti tuleke ukutamiwa inyinong’ono sona nukuleka ukuba ni chinyonywa ichikulu nkani ichakulonda indalama. Sona Vikutwavwa ukuti tuleke ukwingila mu nkongole. (Isya Mbupingamu 22.7) Nanti twaleka ukuba ni chinyonywa ichikulu nkani ichakulonda indalama, vingatwavwa ukuti tuleke ukupanga amabizinesi gho ghangatubika mu ntamyo.
3. Ka tungazibombezya buli-buli indalama?
U Yehova we Chala yo te mwimi, nuswe tungamuyezya waghe swe ‘bakwisengannya pakugabana’ ivintu vyitu na bantu abanji. (1 Timoti 6.18) Tungabombezya akiza indalama zyitu pala tukwavwapo pa vyo vikulondiwa pa chipanga sona napala tukubavwa abakamu bitu nkani-nkani bo tukwiputa nabo. U Yehova atakwennya ubwinji ubwa vintu vyo twapeleka loli, akwennya ichakulinga cho twipelekela. Nanti tukubapako abamwitu vyo tuli navyo ukufumila pasi pa moyo tukuba swe bakuhoboka sona tukumuhobosya u Yehova.—Belenga Imbombo 20.35.
MANYA IVYINJI
Ennya amapindu gho ghakubapo pala tukuyennya akiza imbombo sona tukwikutisiwa na vyo tuli navyo.
4. Tubombaghe ivintu vyo vikumupala u Yehova pala tukubomba imbombo
Ukuba pabumanyani ubwiza nu Yehova kukutwavwa ukuti tuyennyanje akiza imbombo. Enelezya IVIDIYO, nu kwamula amalalusyo agha:
Ukuyana na vyo mwennya mu vidiyo, nkimba choni cho chikubahobosya na mo u Jason akabombelagha ivintu ku mbombo?
Nkimba akabomba choni ukuti ayennyanje akiza imbombo?
Belenga Aba Kolosi 3.23, 24, nu kwamula ilalusyo ili:
Choni cho ukwennya imbombo umwakwenelela kwakulondiwa?
Imbombo yakulondiwa. Loli tutakitikizye ukuti yoyo yibe yakulondiwa nkani ukuchila ukumwiputa u Yehova
5. Tukwagha amapindu ichifukwa chakwikutisiwa na vyo tuli navyo
Abantu abinji bakubomba chilichosi cho bangakwanisya ukuti babanje ni ndalama izyinji. Loli Ibayibolo likupeleka ubulongozi ubwakupambanako pa nkani ya ndalama. Belenga 1 Timoti 6.6-8, nu kwamula ilalusyo ili:
Nkimba Ibayibolo likutulimbikisya ukubomba choni?
Napo tungaba nu tuntu utwakuchepa, tungaba swe bakuhoboka. Enelezya IVIDIYO, nu kwamula ilalusyo.
Napo imbumba izi zikaba ni ndalama zidono, choni cho chikapangisya ukuti zibe zyakuhoboka?
Buli pala tuli ni ndalama izyinji loli tukulonda ukongelezyapo izyamwabo? U Yesu akalongosola ingozi yo yingabapo. Belenga Luka 12.15-21, nu kwamula ilalusyo ili:
Nkimba mwamanyila ichoni pa vyo u Yesu akalongosola?—Ennya ivesi 15.
Belenga nu kuyanisya Isya Mbupingamu 10.22 nu 1 Timoti 6.10. Nu Kwamula amalalusyo agha:
Nkimba mukwennya ukuti choni cho chakulondiwa nkani? Ukuba pabumanyani nu Yehova pamo ukuba ni ndalama izyinji? Chifukwa choni?
Nkimba ntamyo buli zyo zikubapo ichifukwa chakughana nkani indalama?
6. U Yehova akwiza ukutupa vyo tukulondiwa
Ukusoba kwa mbombo sona nintamyo iya vyachuma, vingapanisya ukuti ulusubilo lwitu luyeliwe. Enelezya IVIDIYO ukuti mwennye mo mungabombela ukuti mumalane ni ntamyo izi, nu kwamula amalalusyo.
Ukuyana na vyo mwennya mu vidiyo, nkimba ntamyo buli zyo umukamu akakomana nazyo?
Ka akabomba choni ukuti amalane ni ntamyo izi?
Belenga Matayi 6.25-34, nu kwamula ilalusyo ili:
Ka bo bakubika ukumwiputa u Yehova pamalo ghabwandilo, u Yehova akubalayizya choni?
VYO BAMO BAKUNENA: “Nkulondiwa ukubomba imbombo umwakukwana ukuti impwelelele imbumba yane. Ntangakwanisya ukubuka ku nkomano usabata aliwesi.”
Nkimba lisimbo buli lyo likabavwa ukumanya ukuti ukubika ukwiputa u Yehova pamalo aghabwandilo koko kwakulondiwa nkani?
IFUNDO IZYAKUDUMULA
Imbombo ni ndalama vyakulondiwa, loli vitakatupangisye ukuti tupotwe pakumubombela u Yehova.
Ukunyokelamo
Choni cho chingabavwa ukuti muyennyanje akiza imbombo?
Ka ukwikutisiwa na vyo muli navyo kwabavwa buli-buli?
Nkimba tungalangizya buli-buli ukuti tuli nu lusubilo mu vyo u Yehova alayizizye ukuti inti abavwe abantu bache?
IFUNDO IZYAKONGELEZYAPO
Manya waghe Ibayibolo likunena ukuti indalama zibibi.
“Ka Indalama Mugululuzi wa Vintu Vyosi Ivibibi?” (Inkani iya pa intaneti)
Manya mo mungabombezezya indalama ukuti mumuhobosye u Chala.
“Nkimba Ibayibolo Likuti Choni pa Nkani Iyakupa?” (Inkani iya pa intaneti)
Ennya vyo vikapangisya uwakukoma injuga yumo ukuti asinte ubumi bwache.