Choni cho u Chala Itikizizye Ivibibi nu Kutamiwa?

1. Ka ububibi bukanda buli-buli?

Ububibi bukanda mu chisu ichifukwa cha bumyasi ubwa Satana. Pabwandilo u Satana akaba wantumi uwakufikapo, loli “ate nalumo-lumo kulubazu ulwa ubwanaloli.” (Yohani 8.44) U Satana akanda ukuba nichinyonywa ichakuti bamwiputaghe we yuyo mumalo mwa Chala. U Satana akanena ubumyasi kwa mukolo uwabwandilo, u Eva, ukuti amwivwilaghe mumalo mwa Chala. U Adamu wepe akakolelana nu Eva pakumusambukila u Chala. Vyo u Adamu akasala vikiza ni ntamiyo sona nu bufwe.—Belenga Aba Loma 5.19; 2 Aba Kolinti 11.3.

U Satana akati amupusika u Eva ukuti atakamwivwilaghe u Chala, akanda ukususya ubulaghili ubwapamwanya ubwa Chala. Abantu abinji bakakolelana nu Satana pakukana ubulaghili ubwa Chala. Polelo u Satana weyo “mulaghili wa chisu ichapasi.”—Belenga Yohani 14.30; 1 Yohani 5.19.

2. Ka vyo u Chala akapela vikaba nu bubibi bumo?

Imbombo zyosi izya Chala zyakufikapo. Abantu na bantumi bo u Chala akapela bakaba bakufikapo sona bakaba bakuti bangakwanisya ukumwivwila. (Ukukumbusya Indaghilo 32.4, 5) U Chala akatupa ubwabuke ubwakusala pakubomba ivyiza pamo ivibibi. Ubwabuke ubu bukutupa ulusako ulwakulangizya ukuti tumughanite u Chala.—Belenga Yakobo 1.13-15; 1 Yohani 5.3.

3. Choni cho u Chala itikizizye intamyo mpaka pakabalilo kano?

U Yehova abitikizizye abantu ukuti bilaghile pakabalilo kanandi. Ichifukwa? Akulonda twebantu tuyenezye twebene ukuti ukusita u Chala, tutangilaghila. (Undumbilili 7.29; 8.9) Pa maka 6,000 gho ghendapo, abantu bapotwa ukwilaghila bene. Bapotwa ukumazya inkondo, ubugabenga, ubulili, ni mbina.—Belenga Yeremiya 10.23; Aba Loma 9.17.

Ubulaghili bwa Chala bupambanite nu bwa bantu, ubwene bukwavwa abantu bo bakubwitikizya. (Yesaya 48.17, 18) Lunulu u Yehova akwiza pakupyelapo amaboma ghosi, abantu bene bo bitikizya ukulaghiliwa nu Chala bakwiza pakupyana ichisu ichapasi.—Yesaya 11.9. Belenga Ubuvumbuli 11.15; 1 Aba Kolinti 15.24.

4. Nkimba ubufisalyoyo ubwa Chala bukutwavwa ukuti tubombe ichoni?

U Satana akati nayumo yo angamubombela u Yehova chifukwa cha lughano. Ka mungasusya ubumyasi ubu? Eee, mungasusya! Ubufisalyoyo ubwa Chala bukutwavwa ukuti tulangizye nanti tuli ku Bumwene ubwa Chala pamo ubwa bantu. Tungalangizya ulubazu lo tuli mu vyakubombiwa vyitu.—Belenga Ubuvumbuli 12.10; 2 Pitala 3.9.

5. Tungasala buli-buli u Chala ukuba Mulaghili witu?

Tungasala u Chala ukuba mulaghili witu nanti tukumanyila nu kukonka ubwanaloli bo bukwaghiwa mu Mazyu gha Chala, Ibayibolo. (Yohani 4.23) Tungalangizya ukuti tukumukana u Satana ukuba mulaghili witu nanti tutakwingililapo pa ndyali ni nkondo ngati mo u Yesu akabombela.—Belenga Yohani 17.14.

U Satana ali na maka aghakupangisya abantu ukuti bennyanje ivintu ivibibi ngati vyiza. Abakamu bitu na bamwitu bangatubenga nanti tutakubombako ivintu ivibibi. (1 Pitala 4.3, 4) Aka kabalilo akakuti tusale. Ka mungakolelana na bantu bo bamughanite u Chala? Ka tungivwila amahala ni ndaghilo zyache? Nanti tungabomba bunubu, tungalangizya ukuti vyo u Satana akanena vyabumyasi.—Belenga 1 Aba Kolinti 6.9, 10; 15.33.

U Chala akwiza pakupyelapo intamyo zyosi chifukwa abaghanite abantu. Bosi bo bakusubila bakwiza pakwikala pa chisu bwila na bwila.—Belenga Yohani 3.16.