Ka Imbumba Yinu Yingaba Buli-buli Yakuhoboka?

1. Choni cho isendwa iyakwitikizyiwa yingabavwa ukuti mube mwe bakuhoboka?

Amazyu amiza ghakufuma kwa Yehova, u Chala uwakuhoboka, yo akulonda ukuti imbumba zihobokaghe. (1 Timoti 1.11, nwt) Weyo akandisya. Isendwa iyakwitikizyiwa yingabavwa ukuti mube mwe bakuhoboka chifukwa abana bakuleleka akiza. Abakilisitu babaghiye ukuchindika indaghilo nanti bakusendana.—Belenga Luka 2.1, 4, 5.

Ka u Chala akulonda ukuti isendwa yibanje buli-buli? Akulonda ukuti yibanje iya mwanavuli weka nu mukolo weka, sona yitakamalaghe. U Yehova akulonda ukuti umulume nu muchi wache babanje bakusubalilana. (Aba Hebeli 13.4) Abengite ukusoka. (Malaki 2.16) Loli Umukilisitu angamazya isendwa nukusenda pamo ukusendwa pala uwamwabo apanga ubulowe.—Belenga Matayi 19.3-6, 9.

2. Ka umulume nu muchi babombaghe ichoni?

U Chala akapela umwanavuli nu mukolo ukuti bavwanaghe. (Ubwandilo 2.18) Umwanavuli we mutu uwa mbumba. Abaghiye ukulonda ivyakulondiwa pambumba sona nukubamanyisya ivya Chala. Abaghiye ukumughana umuchi wache sona nu kusita ukwiyinong’onela mwene. Abalume na bachi babaghiye ukughanana sona nu kuchindinkana. Pakuti abalume na bachi bosi te bakufikapo, cho chingabavwa chakuti bahobokelanaghe ukuti babe bakuhoboka.—Belenga Aba Efeso 4.31, 32; 5.22-25, 33; 1 Pitala 3.7.

3. Ka chiza ukulekana bulo pala mutakuhoboka mu sendwa?

Pala mwakomana ni ntamyo, mwe bosi mubaghiye ukuyezyayezya nkani ukubombelana umwalughano. (1 Aba Kolinti 13.4, 5) Amazyu agha Chala ghatakwitikizya ukulekana ngati zila yoka iyakumazyizya intamyo mu sendwa.—Belenga 1 Aba Kolinti 7.10-13.

4. Mwe bana, u Chala akulonda ichoni kukwinyu?

U Yehova akulonda ukuti muhobokaye. Akubapa ubulongozyi ubwiza ukuti muhobokaye nu bulumendo bwinu. Akulonda mwivwilaye abapapi binu ukuti mube mwe bamahala nu kumanya ivyinji. (Aba Kolosi 3.20) U Yehova akulonda sona ukuti muhobokaye pakubomba ivintu ivyakumuhobosya Umupeli winu sona nu Mwana wache.—Belenga Undumbilili 11.9–12.1; Matayi 19.13-15; 21.15, 16.

5. Mwe bapapi, choni cho chikulondiwa ukuti abana binu bahobokaye?

Mwe bapapi, mubaghiye ukuyezyayezya ukubalondela abana binu ichakulya, apakughona, sona ni vyakuvwala. (1 Timoti 5.8) Loli ukuti babe bakuhoboka, mubamanyisyaghe ukumughana u Chala sona nu kumanyila kwa yuyo. (Ukukumbusya Indaghilo 6.4-7) Nanti mwe bapapi mumughanite u Chala, abana bope bakwanda ukumughana. Nanti ubulongozyi bwinu bukufuma mu Mazyu agha Chala, bungabavwa abana binu ukuti binong’onaye umwamahala.—Belenga Aba Efeso 6.4; Isya Mbupingamu 22.6.

Nanti mukubalimbikisya nu kubapalizya, abana bangabukilila ukubomba akiza. Abana bakulondiwa ukubagholosya nu kubafunda. Pala mukubomba bunubu, mukubafighilila ku nkalo zyo zingabingizya mu ntamyo. (Isya Mbupingamu 22.15) Polelo, manyi mubakalalizyanje pakubafunda.—Belenga Aba Kolosi 3.21.

Abakaboni ba Yehova bakupanga amabuku gho ghakwavwa abapapi na bana. Amabuku agha ghali ni fundo izya mu Bayibolo.—Belenga Yakobo 1.25.