UMUTU 04

Ka u Chala Wewenu?

Viboneke Ngati mo Vibeleye Mubuku

Ukufuma bulo kale abantu bakwiputa abachala abakupambana-pambana. Loli Ibayibolo likunena izya Chala weka ‘weyo mukulu nkani ukuchila abachala bosi.’ (2 Syambukulu 2.5) Ka wewenu? Ka choni cho chikumupangisya ukuba mukulu nkani ukuchila abachala bo abantu bakwiputa? Mumutu uwu, inti mwennye vyo u Chala akubomba ukuti mumumanye.

1. Ka izina lya Chala wewenu, sona ka tukumanya buli-buli ukuti akulonda ukuti tulimanye?

Mu Bayibolo u Chala akwilongosola ukuti uswe tumumanye. Akunena ukuti: ‘Une ne Yehova. Ili lyolyo lizina lyane.’ (Belenga Yesaya 42.5, 8.) Izina lyakuti “Yehova” ling’anamuliwe ukufuma ku Chihebeli lyo likung’anamula ‘Akupangisya Ukubako.’ U Yehova akulonda ukuti tulimanye izina lyache. (Ukusoka 3.15) Ka tukumanya buli-buli ukuti akulonda ukuti tulimanye? Mu Bayibolo izina ili likwayiwa mumalo aghakupululila 7,000.a Izina ilyakuti Yehova libaghiye ukumanyikwa ‘nu Chala uwabwanaloli kumwanya sona na pachisu ichapasi.’—Ukukumbusya Indaghilo 4.39.

2. Nkimba Ibayibolo likuvumbula ichoni ivyakukwafyannya nu Yehova?

Ibayibolo likunena ukuti u Yehova weyo we Chala weka uwabwanaloli ukuchila abachala bosi bo abantu bakwiputa. Chifukwa buli? Pali ivifukwa ivyinji. U Yehova weyo Mulaghili sona ‘weyo Wapamwanya Nkani pachisu chosi ichapasi.’ (Belenga Salimo 83.18.) Weyo ‘Wamaka Ghosi,’ cho chikung’anamula ukuti ali na maka aghakubombela chilichosi cho asala ukuti abombe. Weyo ‘akapela ivintu vyosi,’ ichisu chosi ni vintu vyosi ivyabumi vyo vili muchisu. (Ubuvumbuli 4.8, 11) We Yehova mwene yo alipo ukwanda kale sona alibako kwa bwila na bwila.—Salimo 90.2.

MANYA IVYINJI

Manya impambano yo yilipo pakasi pa mazina aghamuchizi agha Chala ni zina lyache ilyenecho. Sona inti mumanye ichifukwa cho abavumbuliye izina lyache.

Umwanavuli ali pakwennya kumwannya pabusiku. Izina lya Yehova libikiwe mumwanya.

3. U Chala ali na mazina aghinji aghamuchizi, loli ali ni zina lyoka ilyenecho

Ukuti mumanye impambano pakasi pi zina ilya muchizi ni zina ilyenecho, enelezya IVIDIYO, nu kwamula ilalusyo ili.

IVIDIYO: U Chala ali na Mazina Aghinji Aghamuchizi, Loli ali ni Zina Lyoka Ilyenecho (0:41)

Nkimba mpambano buli yo yilipo pakasi pa mazina aghamuchizi ngati ilyakuti “Umwene,” ni zina ilyenecho?

Ibayibolo likunena ukuti abantu bakwiputa abachala na bamwene abakupambana-pambana. Belenga Salimo 136.1-3, nu kwamula ilalusyo ili:

Ka wewenu yo “we Chala uwa bachala” sona “Umwene uwa bamwene”?

4. U Yehova akulonda ukuti mumanye izina lyache, sona mubombezyanje

Ka tukumanya buli-buli ukuti u Yehova akulonda ukuti tulimanye izina lyache? Enelezya IVIDIYO, nu kwamula ilalusyo ili.

IVIDIYO: Ka u Chala ali ni Zina?—Iyifupi (3:11)

Ichituzi icha vidiyo iyakuti ‘Ka u Chala ali ni Zina?—Iyifupi.’ Umwanavuli ali pakwennya izina lya Chala ilyakuti Yehova pa Salimo 83.18 mu Bayibolo ilya ‘King James Version’ pa peji 1611.

Ka mukwinong’ona ukuti u Yehova akulonda mulimanye izina lyache? Chifukwa buli?

U Yehova akulonda ukuti abantu balibombezyange izina lyache. Belenga Aba Loma 10.13, nu kwamula amalalusyo agha:

Choni cho tubaghiye ukubombezya izina lya Chala, ilyakuti Yehova?
Ka mukwiyivwa buli-buli pala umuntu akukumbuka izina lyinyu nu kulitambula?
Ka mukwinong’ona ukuti u Yehova akuyivwa buli-buli pala mukulibombezya izina lyache?

5. U Yehova akulonda ukuti mube mwe bamanyani bache

Umukolo yumo uwa ku Cambodia izina lyache u Soten akanena ukuti ukumanya izina lya Chala “kukanavwa ukuti imbe ne wakuhoboka.” Enelezya IVIDIYO, nu kwamula ilalusyo ili.

IVIDIYO: Nkalondagha Ukumanya u Chala Uwabwanaloli (8:18)

Ivituzi: Ivituzi ivya mu vidiyo ‘Nkalondagha Ukumanya u Chala Uwabwanaloli.’ 1. U Soten ali kunkolongo ikaye mwikwi muntende, akwennya kumwanya nu kwiputa kwa Chala uwabwanaloli. 2. U Herold akumumanyisya u Soten ukuti u Chala izina lyache we Yehova.

Ukuyana ni vidiyo, ka ukumanya izina lya Chala kukamwavwa buli-buli u Soten?

Nanti mukulonda mube pa bumanyani nu muntu, ichabwandilo mukwanda tasi ukumanya izina lyache. Belenga Yakobo 4.8a, nu kwamula amalalusyo agha:

Ka u Yehova akulonda ukuti tubombaghe ichoni?
Ka ukumanya izina lya Chala kungabavwa buli-buli ukuti mube nawe pabumanyani?

VYO BAMO BAKUNENA: “U Chala ali weka, pate intamyo na po tungabombezya izina lililyosi pakumwiputa.”

Ka mukusubila ukuti izina lya Chala we Yehova?
Nkimba mungalongosola buli-buli ukuti u Chala akulonda ukuti tubombezyanje izina lyache?

IFUNDO IZYAKUDUMULA

Izina ilyakuti Yehova lya Chala weka uwabwanaloli. Akulonda ukuti tulimanye sona izina lyache tulibombezyanje imbombo ukuti tube nawe pabumanyani.

Ukunyokelamo

Nkimba u Yehova apambanite buli-buli na bachala bo abantu bakubiputa?
Choni cho tubaghiye ukulibombezya izina lya Chala?
Choni cho chikulangizya ukuti u Chala akulonda ukuti tube nawe pa bumanyani?

Twamala ukumanyila pa:

Ivyakuti mubombe

Mubombezyange izina lya Chala, ilyakuti Yehova pala mukunenezannya ivyakukwafyannya nu Chala.

Ivyamwabo:

Your other goal

IFUNDO IZYAKONGELEZYAPO

Manya ivifukwa 5 vyo vikutwavwa ukusubila ukuti u Chala aliko.

“Ka u Chala Aliko?” (Inkani iya pa intaneti)

Choni cho ifundo iyakuti u Chala aliko yabwanaloli?

“Kasi Ni Njani Wakalenga Ciuta?” (Ichitembe cha Mulindilili icha Chitumbuka, Ogasiti 1, 2014)

Manya ichifukwa cho tubaghiye ukubombezya izina lya Chala napo tutamenye akiza mo bakatambulilagha kale.

“Ka u Yehova wewenu?”(Inkani iya pa intaneti)

Choni cho ukubombezya izina lya Chala kwakulondiwa nkani? Manya ichifukwa cho tukunena ukuti u Chala ali ni zina lyoka ilyenecho.

“Ka u Chala ali na Mazina Ghalinga?” (Inkani iya pa intaneti)

a Ukuti mumanye ivyinji ivyakukwafyannya navyo izina lya Chala likung’anamula, sona ichifukwa cho ama Bayibolo ghamo balifumizyemo, ennya pa Vyakusazgirapo A4 mu Malemba Ghakupatulika mu Mang’anamuliro gha Charu Chiphya.