UMUTU 10
Ka Inkomano zya Bakaboni ba Yehova Zingabavwa Buli-Buli?
Ka mubukitepo lumo ku nkomano izya Bakaboni ba Yehova? Pala mutabukitepo lumo, munganda ukupasya mo mungaya mufikile pamalo agha akabwandilo. Lumo mungaswigha ukuti: ‘Choni cho chikubombiwa pa nkomano? Choni cho inkomano zyakulondiwa? Choni cho mbaghiye ukwayiwapo pa nkomano?’ Mu mutu ughu, inti mumanyile mo ukukomana poka na bamwitu kungabavwizya ukuti mube pabumanyani nu Chala sona na mo zingabatulila umwe pa mwebene.
1. Choni cho Abakaboni ba Yehova bakukomana poka?
Umusimbi yumo uwa Bayibolo akanena ubwiza ubwakukomana poka na bamwitu, akanena ukuti: ‘Muchipanga ichikulu, nkwiza pakumupala u Yehova.’ (Salimo 26.12) Umwakuyana bulo, Abakaboni ba Yehova bakwagha ulusekelo ulukulu pala bakomana poka. Pachisu chosi ichapasi bakukomana poka usabata aliwesi ukuti bamupale u Chala ukwendela mu nyimbo sona na munyiputo. Sona umwaka ghulighosi bakukomana poka pa nkomano izikulu ukuti bamwimbile, ukumwiputa sona nukumanyila ivya Yehova.
2. Nkimba mwaya pakumanyila ichoni pa nkomano?
Pa nkomano tukumanyila Amazyu gha Chala, ‘ukughalongosola akiza nu kwivwisya ing’anamulo lyache.’ (Belenga Nehemiya 8.8.) Pa nkomano zyitu mukwiza pakumanyila ivya Yehova ni inkalo zyache izyiza. Po mukubukilila ukumanya ivyinji ivyakukwafyannya nu lughano lwache, inti vibavwe ukuti mupalamile kukwache. Sona inti mumanyile mo angabavwizya ukuti mube nu bumi ubwiza.—Yesaya 48.17, 18.
3. Ka mapindu buli gho mungaghagha pala mukukomana poka pa nkomano?
U Yehova akutubuzya ukuti “twinong’onelanaghe namumo tungakazanizannya, pakughanana sona nukubombelana ubwiza.” (Aba Hebeli 10.24, 25) Pa nkomano zyitu inti mwize mukomane na bantu bo baghananite ukufumila pasi pa moyo. Inti muye mukomane na bantu bo babaghanite sona ukukomana na bantu bo bali ni chinyonywa ichakulonda ukumanyila ivyinji ivyakukwafyannya nu Chala. Mukwiza pakwivwa ifundo izyakughomya izyakufuma mu Bayibolo ukufuma ku bakamu na bayemba (Belenga Aba Loma 1.11, 12.) Sona mukwiza pakumanyana na bantu abanji bo bakuhoboka napo bope bakukomana ni ntamyo izyakupambana-pambana. Ivi vyo vifukwa vimo vyo u Yehova akulonda ukuti tukomanaghe poka akabalilo kosi.
MANYA IVYINJI
Manya vyo vikubombiwa pa nkomana izya Bakaboni ba Yehova sona nubwiza ubwakwaghiwapo.
4. Inkomano izya Bakaboni ba Yehova
Abakilisitu ababwandilo bakakomanagha poka ukuti bamwipute u Yehova. (Aba Loma 16.3-5) Belenga Aba Kolosi 3.16, nu kwamula ilalusyo ili:
Ka Abakilisitu ababwandilo bakamwiputagha buli-buli u Yehova?
Amasiku ghano, Abakaboni ba Yehova bakukomana poka mu Nyumba Izya Bumwene ukuti bipute. Ukuti mwenye mo Abakaboni ba Yehova bakubombela pa nkomano, enelezya IVIDIYO. Ennya ichituzi cho chikulangizya inkomano izya pa chipanga nu kwamula amalalusyo agha.
Ka vyo vikubombiwa pa Nyumba ya Bumwene na vyo vili pa simbo ilya Aba Kolosi 3.16 vikuyana buli-buli?
Ukuyana na vyo mwennya mu vidiyo sona ni chituzi, choni cho chabahobosya nkani pa nkani iya nkomano?
Belenga 2 Aba Kolinti 9.7, nukwamula ilalusyo:
Choni cho inkomano zya Bakaboni ba Yehova zyabulele?
Umwe poka nayo akubamanyisya mwenezye zila vyo inti muye mumanyile pa nkomano izya sabata uyu.
Chigaba buli icha nkomano cho chikubahobosya nkani?
Ka muzimennye?
Pa jw.org, mungagha amalo sona na kabalilo ko inkomano zikubombiwa pachisu chosi.
Pa nkomano pakuba inkani, ivifwanikizyo na mavidiyo. Inkomano zikwanda nu kumala ni lwimbo nu lwiputo
Ivigaba vimo ivya nkomano abantu bakuba nu lusako ulwakwamulapo
Aliwesi wakupokeleliwa, imbumba, abasongo sona na bana bulo
Inkomano zyitu zyabulele. Abakaboni ba Yehova batakwendesya imbale ya dolo
5. Bikapo umoyo ukwaghibapo pa nkomano
Imbumba yo u Yesu akakulilamo chifwanikizyo ichiza pa nkani iyi. Bakendagha ubulendo ubutali sana uwa makilomita 100, uwa mumaghamba ukufuma ku Nazaleti ukubuka ku Yelusalemu ukuti baye baghiwepo pa nkomano zyo zikabombiwanga umwaka ghulighosi. Belenga Luka 2.39-42, nu kwamula amalalusyo agha:
Ka mukwinong’ona ukuti ubulendo ubu bukalondagha ukubikapo umoyo?
Choni cho mubaghiye ukubikapo umoyo ukuti mwaghiwepo pa nkomano?
Ka mukwenya ukuti ukuba nu lweke ukuti mwaghiwepo pa nkomano kwakwavwa? Chifukwa buli?
Ibayibolo likunena ukuti ukwaghiwapo pa nkamano ukuti mumwipute u Yehova kwakulondiwa hee. Belenga Aba Hebeli 10.24, 25, nu kwamula ilalusyo ili:
Choni cho tubaghiye ukwaghiwapo pa nkomano akabalilo kosi?
VYO BAMO BAKUNENA: “Ukukomana poka te kwakulondiwa nkani. Loli ukubelenga Ibayibolo panyumba koko kwakulondiwa.”
Ka lisimbo buli pamo chifwanikizyo buli icha mu Bayibolo cho chikuvumbula vyo u Yehova akulonda?
IFUNDO IZYAKUDUMULA
Ukwaghiwapo pa nkomano kungabavwa ukuti mumanye ivyakukwafyannya nu Yehova, ukuti mughomye ubumanyani bwinu sona mumwiputaghe poka na bamwinyu.
Ukunyokelamo
Choni cho u Yehova akulonda ukuti tukomanaghe poka?
Nkimba mukwiza pakumanyila ichoni pa nkomano izya Bakaboni ba Yehova?
Ka mukwennya ukuti ukwaghiwa pa nkomano kungabavwa buli-buli?
IFUNDO IZYAKONGELEZYAPO
Buli pala muli nilyogha ukwaghiwapo pa nkomano? Ennya mo umwanavuli yumo yo akaghivwanga bunubu mo akandila ukuzighana inkomano.
Ennya mo umulumendo akahobokela ni nkomano sona navyo akabomba ukuti abukilile ukwaghiwa pa nkomano.
Manya mo abantu bamo bakwiyivwila pala babuka ku nkomano.
“Choni cho Mubaghiye Ukubuka ku Nyumba iya Bumwene?” (Inkani iya pa intaneti)
Ennya mo ivyondongo limo likasintila ubumi bwache bo lyabuka ku nkomano izya Bakaboni ba Yehova.
“Palipose Nkhaŵanga na Futi Yane” (Ichitenbe cha Mulindilili icha Chitumbuka, Julayi 1, 2014)