Choni cho Chikubombiwa pa Nkomano Zyitu?

Abantu abinji batakuyako ku vipanga vyabo chifukwa vitakubavwa ukwagha amaansala. Choni cho mubaghiye ukubuka ku nkomano izya Bakaboni ba Yehova? Ka kuli ichoni nkani-nkani?

Mukuya pakuhoboka na bantu abalughano sona abakupasikizannya. Kale, Abakilisitu bakakomanagha poka mu vipanga. Pa nkomano izi, bakamwiputagha u Chala, bakamanyilagha Amasimbo, sona nu kukazannya. (Aba Hebeli 10.24, 25) Pa nkomano zyabo pakaba ulughano, cho chifukwa bakayivwanga ukuti bali pakasi pa bamanyani ababwanaloli—abakamu na bayemba ababuzimu. (2 Aba Tesalonika 1.3; 3 Yohani 14) Nuswe vyovyo tukubomba sona tukuba bakuhoboka.

Mukuya pakumanyila mo mungabombezezya ifundo izya mu Bayibolo. Kale, abanavuli, abakolo, na bana bakakomanagha poka. Nuswe vyovyo tukubomba. Abamanyisi bakutwavwa mo tungabombezezya ifundo zyo tukumanyila mu Bayibolo. (Ukukumbusya Indaghilo 31.12; Nehemiya 8.8) Aliwesi mwabuke ukunena nu kwimba. Vinivi vikutupa ulusako ukunena vyo tukusubila.—Aba Hebeli 10.23.

Ulwitiko lwinyu mwa Chala lukwiza pakughoma. Umutumiwa u Pabuli akabuzya ichipanga chimo ukuti: ‘Nkulonda nkani pakubennya ukuti twize tukazannye, une nu lwitiko lwinyu, sona umwe nu lwitiko lwane.’ (Aba Loma 1.11, 12) Pa nkomano zyitu, tukukomana na bakamu bo bali nu lwitiko ulwakuyana bulo nuswe. Tukukazannya ukuti tubukilile ukumusubila u Chala nu kwivwila ifundo izya mu Bayibolo.

Mwe babuke ukwiza ku nkomano zyo inti tube nazyo lunulu. Mukwiza ukwiyenezya mwebene. Tutakwendesya imbale pa nkomano zyitu.

• Bo bawenu bo tukubayezya pala twakomana poka?

• Pala tukwaghiwapo pa nkomano, zingatwavwa buli-buli?