UMUTU 12
Choni cho Chingabavwa Ukuti Mubukilile Ukumanyila Ibayibolo?
Ukumanyila Ibayibolo kwakupindulisya, loli tubaghiye ukubikapo umoyo. Akabalilo kamo mungakayikila pala inti mubukilile ukumanyila Ibayibolo. Choni cho mubaghiye ukubikapo umoyo? Choni cho chingabavwa ukuti mujimbaghe na po mukukomana ni ntamyo?
1. Choni cho ukumanyila Ibayibolo kwakulondiwa?
‘Amazyu gha Chala ghabumi sona ghamaka.’ (Aba Hebeli 4.12) Ibayibolo lyakulondiwa ichifukwa likuvumbula inyinong’ono zya Chala sona nu bwighane bwache. Lingabavwa ukuti mube na mahala aghenecho sona nu lusubilo. Ichakuhobosya nkani chakuti Ibayibolo lingabavwa ukuti mube pabumanyani nu Yehova. Pala mukumanyila Ibayibolo, ko kuti mukwitikizya ukuti amaka ghache ghabavwe ukuti mube nu bumi ubwiza.
2. Choni cho chiza ukumanya ubwanaloli ubwa mu Bayibolo?
Ubwanaloli ubwa mu Bayibolo buli ngati chuma ichapamwanya. Cho chobene Ibayibolo likutulimbikisya ukuti ‘tughule ubwanaloli sona tutakabughulizye.’ (Isya Mbupingamu 23.23) Pala twamanya ukulondiwa ukwa bwanaloli ubwa mu Bayibolo, inti tubukilile ukumanyila napo tungakomana ni ntamyo—Belenga Isya Mbupingamu 2.4, 5.
3. Ka u Yehova angabavwa buli-buli ukuti mubukilile ukumanyila Ibayibolo?
Pakuti u Yehova mupeli sona mumanyani winyu, akulonda ukuti mumumanye. Angabapa ichinyonywa ichakuti “mulondaye sona nukuti mubombaye ukuyana nu bwighane bwache.” (Belenga Aba Filipi 2.13.) Angabavwa ukuti mubukilile ukumanyila sona nukubombezya vyo mukumanyila. Sona angabapa amaka aghakuti mujimbe ku ntamyo sona pala bamo bakubasusya. Mwiputaghe kwa Yehova akabalilo kosi ukuti abavwe kuti mubukilile ukumanyila Ibayibolo.—1 Aba Tesalonika 5.17.
MANYA IVYINJI
Manya mo mungabombela ukuti mubukilile pakumanyila Ibayibolo napo akabalilo kakuchepa sona na pala bakubasusya. Sona manya mo u Yehova angabavwizya ukuti mubukilile ukumanyila Ibayibolo.
4. Mwennyanje ukuti ukumanyila Ibayibolo kwakulondiwa
Akabalilo kamo tungennya ukuti tute nakabalilo akakumanyilila Ibayibolo. Nkimba choni cho chingabavwa? Belenga Aba Filipi 1.10, nu kwamula amalalusyo agha:
Nkimba mukwinong’ona ukuti choni cho chakulondiwa nkani pa bumi bwinyu?
Ka mungabomba buli-buli ukuti ukumanyila Ibayibolo kube kwakulondiwa pa bumi bwinyu?
Pala mwandila ukubika umusesenga mumboni pisinda amabwe, amabwe ghatangakwana
Pala mwandila ukubika amabwe mumboni inti mwaghe ukuti kwasyala amalo aghinji aghakuti umusesenga ghosi ghukukwana. Umwakuyana bulo, pala mwandila ukubika ‘ivintu ivyakulondiwa’ pamalo aghabwandilo pa bumi bwinyu inti mwaghe ukuti mwasyala na kabalilo akinji akakubombela ivintu ivyinji.
Ukumanyila Ibayibolo kukuzimya izala iyabuzimu iyakulonda ukumumanya akiza u Chala nu kumwiputa. Belenga Matayi 5.3, nu kwamula ilalusyo ili:
Ka tungapindula buli-buli nanti tukubikapo umoyo pakumanyila Ibayibolo?
5. Mungajimba napo bakubasusya
Akabalilo kamo, bangabapangisya ukuti mutakabukilile ukumanyila Ibayibolo. Ennya vyo vikamubonekela u Francesco. Enelezya IVIDIYO, nu kwamula amalalusyo agha:
Ukuyana na vyo mwennya mu vidiyo, ka abamanyani aba Francesco nu mama wache bakabomba choni bo ababuzya ukuti akumanyila Ibayibolo?
Ka u Francesco akasayiwa buli-buli?
Belenga 2 Timoti 2.24, 25, nu kwamula amalalusyo agha:
Ka abakamu binyu sona abamanyani binyu bakwiyivwa buli-buli ichifukwa chakuti mukumanyila Ibayibolo?
Ukuyana na mavesi gho mwabelenga, nkimba mungamula buli-buli nanti yumo akuti atakuhoboka ichifukwa chakuti mukumanyila Ibayibolo? Chifukwa buli?
6. Musubalilaghe u Yehova ukuti abavwe
Pala twapalamila papipi nu Yehova, tunganda ukuba ni chinyonywa ichakulonda ukumuhobosya. Loli chingaba chipala ukuti tusinte ivintu vimo pa bumi bwitu ukuti tumuhobosye u Yehova. Pala numwe vili bunubu mutakanyokelaghe kwisinda chifukwa u Yehova inti abavwe. Enelezya IVIDIYO, nu kwamula amalalusyo agha:
Ukuyana na vyo mwennya mu vidiyo, ka u Jim akabomba choni ukuti amuhobosye. u Yehova?
Nkimba choni cho chabahobosya nkani ukuyana na mo akabombela?
Belenga Aba Hebeli 11.6, nu kwamula amalalusyo agha:
Ka u Yehova akubabombela choni abantu bo “bakumulondelezya,” bo bakuyezya-yezya ukuti bamumanye sona ukumuhobosya?
Ka ivi vikulangizya ukuti u Yehova akwiyivwa buli-buli nanti mukubikapo umoyo pakumanyila Ibayibolo?
BAMO BANGALALUSYA UKUTI: “Choni cho mukumanyila Ibayibolo?”
Umwe mungamula buli-buli?
IFUNDO IZYAKUDUMULA
Napo chitangaba chipepe ukumanyila Ibayibolo akabalilo kosi, loli nanti mukumanyila Ibayibolo mungahoboka nu bumi kwa bwila na bwila. Mubukilile ukusubila u Yehova sona akwiza pakubasaya.
Ukunyokelamo
Choni cho ubwanaloli ubwa mu Bayibolo bwa pamwannya nkani kwa umwe?
Nkimba mungabomba buli-buli ukuti musalaghe akiza ivintu?
Choni cho mubaghiye ukwiputa kwa Yehova ukuti abavwe ukuti mubukilile pakumanyila Ibayibolo?
IFUNDO IZYAKONGELEZYAPO
Manya izila folo zyo zyabavwa abantu abinji ukuti babombezyanje umwamahala akabalilo kabo.
“Kasi Mungachita Wuli Kuti Mugwiliskirenge Makora Ntchito Nyengo Yinu?” (Wukani!, Febuluwale 2014)
Manya mo u Yehova akamwavwizya umukolo yumo yo umulume wache atakivwisyanga ichifukwa cho akabikilaghapo umoyo ukuti amuhobosyanje u Chala.
Ennya mo umwanavuli yumo akapindulila ichifukwa icha kujimba ukwa muchi wache.
Nkalondagha Ukumanya Waghe vyo Bakumanyisya Vyabwanaloli (6:30)
Abantu bakuti Abakaboni ba Yehova bakumazya inyegha zya bantu. Loli ka ubu bwanaloli?
“Ka Abakaboni ba Yehova Bakumazya Inyegha Pamo Ukuzighomya?” (Inkani iya pa intaneti)