Nkimba Choni cho Chikubombiwa Pala Twafwa?

Nkimba muli nu mukamu winyu yumo yo akafwa? Mu kabalilo akakutamya aka, mungilalusya ukuti: ‘Nkimba choni cho chikubombiwa pala twafwa? Nkimba inti tukabennye sona abakamu bitu bo bakafwa?’ Mumutu ughu nu wakukonkapo, inti twennye amaansala aghakulimbikiska gho Ibayibolo likwamula.

1. Nkimba choni cho chikubombiwa nanti twafwa?

U Yesu akafwanikizya imfwa nu tulo. Umuntu yo ali mutulo atakumanyagha cho chikubombiwa. Ka imfwa yiyanite buli-buli nu tulo? Pala umuntu afwa, atakwivwa ivyakubaba. Atakwiyivwa ukuti alimwene napo aleka abamanyani bache na bamumbumba yache bo akabaghana nkani. Ibayibolo likunena ukuti ‘abafwe batakumanya nachimo.’—Belenga Undumbilili 9.5.

2. Nkimba tukupindula buli-buli ichifukwa chakumanya ubwanaloli ubwakukwafyannya ni fwa?

Abantu abinji bakoghopa imfwa sona umuntu yo afuye. Loli mungalimbikisiwa pakumanya vyo Ibayibolo likunena ivyakukwafyannya nimfwa. U Yesu akanena ukuti: “Ubwanaloli bukwiza pakubasatula.” (Yohani 8.32) Umwakupambana na vyo ivipanga vikumanyisya, Ibayibolo litakunenapo ukuti umuntu ali nu moyo gho ghukubukilila ukuba wabumi nanti umuntu afwa. Cho chobene umuntu atakutamiwa nanti afwa. Sona pakuti abakufwa batakumanya nachimo, batangatuvulazya. Tutakulondiwa ukubiputa sona ukubiputila abafwe.

Abantu bamo bakunena ukuti banganenezannya na bafwe. Loli ivi vitangabombiwa. Ngati mo twamanyilila, abafwe ‘batakumanya nachimo.’ Abantu bo bakunena ukuti bakunenezannya na bakamu babo bo bakafwa, bakunenezannya ni mizimu iyibibi yo yikunena amazyu ngati bakamu babo bo bakafwa. Cho chifukwa ukumanya ubwanaloli pankani iyamfwa kukutufighilila ku mizimu iyibibi. U Yehova akutusoka ukuti manyi tunenezannyanje na bakufwa chifukwa ukunenezannya ni mizimu iyibibi kungatuvulazya.—Belenga Ukukumbusya Indaghilo 18.10-12.

3. Manya vyo vikubombiwa nanti umuntu afwa

Abantu bakusubila ivyakupambana-pambana pa nkani iya vyo vikubombiwa pala twafwa. Loli vimo vyo bakusubila te vyabwanaloli.

• Nkimba kuchigaba chinyu abantu bakusubila ichoni pa nkani iyabakufwa?

IVIDIYO: Choni cho Chikubombiwa Pala Umuntu Afwa?—Iyifupi (1:19)

Belenga Undumbilili 3.20, nu kwamula amalalusyo agha:

• Ukuyana ni vesi ili, nkimba choni cho chikubombiwa pala umuntu afwa?

• Ka pali chimo cho chikubukilila ukuba nu bumi pala umuntu afwa?

Ibayibolo likulingannya izyamfwa ya Lazalo yo akaba mumanyani wa Yesu. Po mukubelenga Yohani 11.11-14, ennya vyo u Yesu akanena ivyakukwafyannya na mo u Lazalo akabela po akafwa. Nu kwamula amalalusyo agha:

• Ka u Yesu akayanisya imfwa ni choni?

• Ka ivi vikulangizya ukuti choni cho chikubombiwa pala umuntu afwa?

• Ka mukwennya ukuti vyo Ibayibolo likunena pa nkani iyabafwe vyakwivwika?

4. Tukupindula ichifukwa chakumanya ubwanaloli ubwakukwafyannya nimfwa

Pala twamanya ubwanaloli ubwakukwafyannya nimfwa tutakoghopa sona abafwe. Belenga Undumbilili 9.10, nu kwamula ilalusyo ili:

• Ka abafwe bangatuvulazya?

Pala tukusubila ubwanaloli ubwa mu Bayibolo, tutakwiza pakusubila ubumyasi ubwakuti tukulondiwa ukubahobosya pamo ukubiputa abafwe. Belenga Yesaya 8.19 sona Ubuvumbuli 4.11, nu kwamula ilalusyo ili:

• Ka mukwinong’ona ukuti u Yehova akumwennya buli-buli umuntu yo akubiputa pamo akulonda ubutuli kubafwe?

5. Tukusangalusiwa waghe twamanya ubwanaloli pa nkani iyamfwa

Abantu abinji bamanyisiwe ukuti bakwiza pakutamiwa waghe bafwa ichifukwa cha vintu ivibibi vyo bakabombagha. Loli tukusangalusiwa pakumanya ukuti nayumo umuntu yo akutamiwa waghe afwa, napo angaba muntu yo akabombagha ivintu ivibibi nkani. Belenga Aba Loma 6.7, nu kwamula ilalusyo ili:

• Ibayibolo likunena ukuti pala umuntu afwa kokuti asatuliwa ku mbibi, ka mukwinong’ona ukuti bo bafuye bakutamiwa ichifukwa cha mbibi zyo bakabombagha?

Pala twamumanya akiza u Yehova, popo tukwiza ukumanya ukuti atangabocha abantu bo bafuye. Belenga Ukukumbusya Indaghilo 32.4 sona 1 Yohani 4.8, nu kwamula amalalusyo agha:

• Ka u Chala yo ali ni nkalo zyo twabelenga mumavesi agha, angitikizya ukuti aboche abantu bo bafuye?

• Ka mukwennya ukuti ubwanaloli ubwakukwafyannya nimfwa bwakusangalusya? Chifukwa choni?

IFUNDO IZYAKUDUMULA

Pala umuntu afwa, ubumi bwache bukumala. Abafwe batakutamiwa sona batangavulazya abantu ababumi.

Ukunyokelamo

• Nkimba choni cho chikubombiwa pala umuntu afwa?

• Ka tukupindula buli-buli pakumanya ubwanaloli ubwakukwafyannya nimfwa?

• Ka tukusangalusiwa buli-buli pakumanya ubwanaloli ubwakukwafyannya nimfwa?

IFUNDO IZYAKONGELEZYAPO

Ennya vyo amazyu aghakuti ‘umoyo’ ghakung’anamula mu Bayibolo.

“Nkimba Umoyo cho Choni?” (Inkani iya pa intaneti)

Manya waghe u Chala akubombezya ihelo pakubanda abantu pala bafwa.

Ka Ihelo Malo Aghenecho gho u Chala Akufundilako Abantu? (3:07)

Ka tubaghiye ukoghopa abafwe?

Mizimu ya Ŵakufwa—Kasi Yingamovwirani Panji Kumupwetekani? Kasi Yiliko Nadi? (Akabuku)

Ennya mo umwanavuli yumo akasangalusiwa bo amanya vyo vikubombiwa pala umuntu afwa.

“Nkhakondwa Chomene na Mazgoro Ghakupulikikwa Makora gha mu Baibolo” (Ichitembe cha Mulindilili icha Chitumbuka, Febuluwale 1, 2015)