Ukuba Pabumanyani Ubwakughoma na Bakamu na Bayemba Kwiza Sana!

1-2. Nkhimba chinthu buli cho chakulondiwa sana kwa Yehova, sona akulonda ukuti tubombaghe choni?

MO TUKUBOMBELA ivinthu na banthu, chinthu chakulondiwa sana kwa Yehova. U Yesu akanena ukuti tubaghanaghe abapalamani bitu ngati mo tukwighanila swebene. (Mata. 22.37-39) Ivi vikung’anamula ukuti tukulondiwa ukuba bachisa na ku banthu bo batakusubila ivinthu vyo uswe tukusubila. Nanthi tukulangizya ichisa ichi, tukulangizya ukuti tukumweghelela u Yehova u Chala yo ‘akulamizya izuba pa banthu abiza na babibi bulo nu kutuma ivula pa bagholosu na bo te bagholosu.’—Mata. 5.45.

² Napo u Yehova abaghanite abanthu bosi, loli abaghanite nkhani bo bakubomba cho chigholosu. (Yoha. 14.21) Akulonda ukuti nuswe bulo tumweghelelaghe. Akutulimbikisya ukuti ‘tughananaghe nkhani’ na bakamu na bayemba sona tubalangizyanje ukuti ‘tubaghanite nu moyo witu ghosi.’ (1 Pita. 4.8; Loma 12.10) Po tukwinong’ona ivyakulangizya ulughano sona ukughanana nu moyo ghosi, tunginong’onela mo tukwiyivwila nanthi tukumulangizya ulughano umukamu witu yo tumughanite pamo umumanyani witu uwapamoyo.

3. Ka tukulondiwa ukukumbukila choni ivya lughano?

³ Ulughano luli ngati likwi lyo twabyala panyumba lyo likulondiwa ukulipwelelela ukuti libukilile ukukula. Umutumiwa u Pabuli akababuzya Abakilisitu ukuti: “Endelela pakughanana pakuti mwe bakamu.” (Hebe. 13.1) U Yehova akulonda ukuti tubukilile ukughanana. Munkhani iyi, inthi tunenezannye ichifukwa cho tubaghiye ukughanana nkhani na Bakilisitu abamwitu sona mo tungabombela ukuti tubukilile ukughanana.

ICHIFUKWA CHO TUKULONDIWA UKUTI TUGHANANAGHE NKHANI

4. Ngati mo pakunenela pa Salimo 133.1, choni cho chingatwavwa ukuti tubukilile ukukolelana na bakamu na bayemba bitu? (Ennya sona ichithuzi.)

⁴ Belenga Salimo 133.1. Tukukolelana nu wamasalimo yo akasimba ukuti ubumanyani bo buli pakasi pa banthu bo bakumubombela u Yehova ‘bwiza’ sona ‘bwakuhobosya.’ Loli ngati mo umunthu angalekela ukubikako amahala pakwennya ukulondiwa ukwa likwi lyo akulyennya isiku lililyosi, nuswe bulo tunganda ukupotwa ukwennya ubwiza bo bulipo ichifukwa chakukolelana ko kuli pakasi pitu. Tukubennya abakamu na bayemba bitu usabata aliwesi. Ka tungabomba choni ukuti tubukilile ukubennya ukuti bakulondiwa sana? Tunganda ukubaghana nkhani nanthi tungapaghula akabalilo nu kwinong’onelapo mo aliwesi abeleye wakulondiwa muchipanga na kwa uswe.

5. Choni cho chingabombiwa nanthi tukulangizannya ulughano?

⁵ Bamo bo kakuba kabwandilo ukwaghiwapo pa nkhomano zyitu, bakuswigha sana nu lughano lo tukulangizannya. Nanthi babwelako ku nkhomano, bakumanya ukuti babwagha ubwanaloli. U Yesu akati: ‘Nanthi mukughanana, po abanthu bosi bakwiza pakumanya ukuti mwe bamanyili bane.’ (Yoha. 13.35) Ennya vyo vikabombiwa kwa Chaithra, yo akamanyilagha na Bakaboni ba Yehova po akaba ku yunivesite. Akabuka ku lukomano ulwa chigaba. Akati abwelako isiku ilyabwandilo, akamubuzya yo akamumanyisyanga Ibayibolo ukuti: “Abapapi bane batankhukutiyepo lumo. Loli ku lukomano lyinyu, abanthu bankhukutiye amabulendo 52 pisiku lyoka! Nkhwiyivwa ukuti u Yehova anganite ukwendela mu mbumba iyabuzimu iyi. Nkhulonda ukuba weka uwa mu mbumba iyi.” U Chaithra akabukilila ukubuka panthazi sona mu 2024 akoziwa. Naloli, nanthi abanthu bakwennya imbombo zyitu, mo tukulangizizya ulughano, vingabapangisya ukuti bande pakumubombela u Yehova.—Mata. 5.16.

6. Ka ukubaghana abakamu na bayemba kukutufighilila bulibuli?

⁶ Tungaba bakufighililiwa nanthi tukughanana na bakamu na bayemba bitu. U Pabuli akababuzya Abakilisitu abamwabo ukuti: ‘Mukazannyanje isiku ni siku . . . umwakuti nayumo umunthu mumwinyu atakazimbuliwe ni mbibi nu kuba mukafu mumoyo.’ (Hebe. 3.13) Nanthi twawa amaka nu kwanda ukwiyivwa ukuti ichinama chitu chasyala panandi ukutyelemuka ukuti tuleke ukwenda pa zila iyabugholosu, u Yehova angapangisya ukuti Umukilisitu umwamwitu atupe ubutuli bo tukulondiwa. (Sali. 73.2, 17, 23) Ubutuli bo tukupokela bukuba bwiza sana.

7. Ka pali kukolelana buli pakasi pa lughano nu kwivwana? (Aba Kolosi 3.13, 14)

⁷ Tukuhoboka na malusayo aghinji ichifukwa chakuti tuli mwi gulu ilya banthu bo bakubikapo umoyo pakulangizannya ulughano. (1 Yoha. 4.11) Umwakufwanikizya, ulughano lukutupangisya ukuti ‘tubukilile ukwivwana twebenebene,’ sona lukutwavwa ukuti tubanje bakukolelana pakuba Bakilisitu. (Belenga Aba Kolosi 3.13, 14; Efe. 4.2-6) Cho chifukwa nanthi tuli pa nkhomano, tukuhoboka sana ni vinthu ivyinji ivyakuti pachisu pano patalipo sona igulu lyo likubomba bunubu.

MUCHINDIKANAGHE

8. Nkhimba u Yehova abombite choni ukuti atwavwe ukuba bakukolelana?

⁸ Ukukolelana ko tuli nako pa chisu chosi, kwakuswighisya. U Yehova weyo apangisizye ukuti ivi vibombiwe, napo swe bambula ukufikapo. (1 Koli. 12.25) Ibayibolo likunena ukuti ‘pakuti u Chala umwenecho akutumanyisya ukuti tughananaghe.’ (1 Tesa. 4.9) Mu mazyu aghanji tunganena ukuti, ukwendela mu Masimbo, u Yehova akutubuzya vyo tukulondiwa ukubomba ukuti tughananaghe. ‘Tungamanyisiwa nu Chala,’ nanthi tukumanyila ivimanyisyo vyache nu kuvibombezya imbombo. (Hebe. 4.12; Yako. 1.25) Ichakuhobosya chakuti vyovyo Abakaboni ba Yehova bakuyezyayezya ukubomba.

9. Ka tukumanyilapo ichoni pa Aba Loma 12.9-13 pa nkhani iyakubachindika abanji?

⁹ Ka Amazyu gha Chala ghakutumanyisya bulibuli ukuti tube pa bumanyani ubwiza na banji? Ennya vyo u Pabuli akanena pa nkhani iyi pa Aba Loma 12.9-13. (Belenga.) Akanena ukuti, ‘mwande mwemwe pakulangizya umuchizi ku banji.’ Ka akang’anamulagha choni? Tukulondiwa ukuba pa bwandilo pakulangizya ‘ulughano’ ku banji umwakubahobokela, umwakupokelela abalendo sona ukuba nu muzimu uwakupa, ni vinthu ivyamwabo. (Efe. 4.32) Mutakalindililaghe ukuti umukamu pamo umuyemba weyo ande ukupalamila kwa umwe. ‘Mwande mwemwe’ pakubomba bunubu. U Yesu akati: ‘Yo akupa akuhoboka nkhani ukuchila yo akupokela.’—Imbo. 20.35.

10. Ka tungalangizya bulibuli ukuti tukubikapo umoyo ghosi ‘pakulangizannya umuchizi’? (Ennya sona ichithuzi.)

¹⁰ U Pabuli akati atubuzya ukuti tubanje pa bwandilo pakubachindika abanji, akatubuzya sona ukuti ‘tubikaghepo umoyo sona tutakabanje bakata.’ Umunthu yo akulimbikila nu moyo ghosi akuba nu lweke sona akulimbikila sana imbombo. Nanthi bamupa imbombo, akuyibomba mphaka ayimalizye. Pa Isya Mbupingamu 3.27, 28 pakutulimbikisya ukuti: ‘Utakabimaghe ivinthu ivyiza abanthu bo ubaghiye ukubapa, nanthi uli na maka aghakubatulila.’ Chochobene nanthi twennya yumo akulondiwa ubutuli, tukubomba vyo tungakwanisya ukuti tumutule. Tutakuzyelazyela pamo ukulindilila ukuti umunthu yumo weyo inthi abombepo zimo.—1 Yoha. 3.17, 18.

11. Choni cho chingatwavwa ukuti tubanje pa bumanyani na banji?

¹¹ Izila iyamwabo iya mo tungalangizizya ukuti tukubachindika abanji, ko kubahobokela nanthi batunangila. Pa Aba Efeso 4.26 pakuti: “utakakalalaye mupaka izuba lyinjile.” Chifukwa buli? Ivesi 27 likuti ukubomba bunubu, “kungamupa u Satana ulusako.” U Yehova akutubuzya ukuti tuhobokelanaghe. Pa Aba Kolosi 3.13 pakutubuzya ukuti ‘mubukilile . . . ukuhobokelana nu moyo ghosi.’ Nanthi tukusulako bulo vyo abamwitu bapuvya na vyo batunangila, vingatwavwa ukuti tubukilile ukuba nabo pa bumanyani. Nanthi tukubomba bunubu, tukwavwapo “ukusungilila ubupoka bwitu umwakukolelana nu muzimu ukwendela mumutende.” (Efe. 4.3) Ukuhobokelana kukwavwa ukuti tube bakukolelana na bamutende.

12. Ka u Yehova akutwavwa bulibuli ukuti tuhobokelanaghe?

¹² Ubwanaloli bwakuti, chakutamya sana ukubahobokela abanthu bo batukalalizya. Loli umuzimu ubuzelu uwa Chala bungatwavwa ukuti tukwanisye. Pisinda pakutulimbikisya ukuti ‘tughananaghe ukufuma pasi pa moyo’ sona ‘tulimbikilaghe imbombo,’ Amasimbo ghakunena sona ukuti: “Mwake nu muzimu.” Ifundo iyi yikung’anamula ukuti umuzimu wa Chala ghungatwavwa ukuti tube bakwiyipa nu kuba ni chinyonywa. Polelo umuzimu wa Chala, ghungatwavwa ukuti tughananaghe nu moyo ghosi sona tuhobokelanaghe. Cho chifukwa tukumulambilizya u Yehova ukuti atwavwe.—Luka 11.13.

‘PATAKABEPO UKUGABINKHANA PAKASI PINYU’

13. Choni cho chingapangisya ukuti tugabinkhane?

¹³ Ichipanga chipangiwe na ‘banthu bosi,’ bo bakuliye mu malo aghakupambanapambana. (1 Timo. 2.3, 4) Cho chifukwa nanthi tutakucheba tunganda ukupambana inyinong’ono pa vinthu vyo umunthu akusala pa weka ngati akavwalile nu kwiswefya, ubutuli ubwakuchipatala pamo ivyakusangalusya. (Loma 14.4; 1 Koli. 1.10) Ichifukwa chakuti u Chala akutumanyisya ukuti tughananaghe, tubaghiye ukucheba ukwennya ukuti ivyakusala vyitu vyovyo vyiza sana ukuchila ivyabamwitu.—Filipi 2.3.

14. Nkhimba tukulondiwa ukuyezyayezya ukubomba choni sona chifukwa buli?

¹⁴ Tungaleghuka ukugabinkhana muchipanga nanthi akabalilo kosi tukuyezyayezya ukuba basansa nu kunena amazyu aghakughomya ku banji. (1 Tesa. 5.11) Umwalunulu, abanthu abinji bo bakaleka ukwiza pa nkhomano pamo bo bakepusiwa, banyokela sona muchipanga. Tukubapokelela ni nyobe zyosi! (2 Koli. 2.8) Ennya vyo vikabombiwa kwa muyemba yumo yo akanda sona ukwiza ku Nyumba ya Bumwene pakati pendapo imyaka 10. Akati, “Aliwesi akamwemwetelagha nu kundamuka munyobe.” (Imbo. 3.19) Ka ivinthu ivipepe bulo ivi vikamukwafya bulibuli? Akanena ukuti, “Vikamphangisya ukwiyivwa ukuti inyobe ya Yehova yanavwa ukuti nande sona ukuba wakuhoboka.” Nanthi tukunena amazyu amiza, u Kilisitu angatubombezya ukuti tubasangalusye bosi ‘bo balitite sona bang’wamilwa ni nthamyo.’—Mata. 11.28, 29.

15. Nkhimba zila buli iyamwabo yo yingatwavwa ukuti tubanje bakukolelana? (Ennya sona ichithuzi.)

¹⁵ Izila iyamwabo yo yingatwavwa ukuti tube bakukolelana, ko kwendela mu vyo tukunena. Pa Jobu 12.11 pakuti: ‘Ka ikutu litakuyezya amazyu ngati mo ululimi lukughonjela ichakulya?’ Ngati mo uwakupiya akughonjela ichakulya ukuti amanye mo chikunonela po achili atabapiye abanji, nuswe tungabomba akiza ukwinong’onelapo tasi vyo tukulonda ukunena po tuchili pakunena. (Sali. 141.3) Akabalilo kosi amazgu ghitu ghabanje ghakughomya, ghakusangalusya sona ghabanje “ghakubavwa babo bakuteghelezya.”—Efe. 4.29.

16. Ka bo bawenu bo bakulondiwa ukubikapo umoyo pa mo bakunenela?

¹⁶ Abalume na bapapi, bobo babaghiye ukubikapo umoyo pakunena amazyu aghakubaghomya nu kubasangalusya abanji. (Kolo. 3.19, 21; Titi 2.4) Abasongo bachipanga bope, babaghiye ukuba malo aghakughomya na ghakusangalusya pakuba badimi abang’ozi zya Yehova. (Yesa. 32.1, 2; Gala. 6.1) Ichili chimo icha mu Bayibolo chikutukumbusya ukuti: ‘Ilizyu ilyakuneniwa pa kabalilo kache lyiza hee!’—Mbupi. 15.23.

ULUGHANO “MUMBOMBO NA MUBWANALOLI”

17. Ka tungabomba choni ukuti tulangizye ukuti tubaghanite naloli abakamu na bayemba?

¹⁷ Umutumiwa u Yohani akutulimbikisya ukuti, “ulughano lwinyu lutakabanje lwa pamulomo pene awe, loli lubanje lwanaloli lulo lukwilangizya lwene mumbombo.” (1 Yoha. 3.18) Tukulonda ukuti tubaghanaghe abakamu na bayemba bitu ukufuma pasi pa moyo. Ka tungakwanisya bulibuli ukubomba bunubu? Nanthi tukumalila akabalilo akatali pakwangala na bakamu na bayemba bitu, vingatwavwa ukuti tughanane nkhani sona ulughano lwitu lungaghoma sana. Chochobene tukulondiwa ukuti tupaghulaghe akabalilo nu kwangala, nanthi tuli pa nkhomano na mu bulumbilili. Tupaghulaghe akabalilo nu kubendela abanji. Nanthi tukubomba bunubu, tukulangizya ukuti ‘tumanyisiwe nu Chala ukuti tughananaghe.’ (1 Tesa. 4.9) Sona inthi tubukilile ukwennya ukuti ‘chiza sona chakuhobosya naloli ukuti abakamu bakwikala poka umwakukolelana!’—Sali. 133.1.