INKHANI IYAKUMANYILA 29
ULWIMBO 87 Zani Mukhwimiskike
Mo Tungapelekela Ubulongozi Ubwiza
‘Inthi inkhupe ubulongozi nu kukwenelezya.’—SALI. 32.8.
IFUNDO INKHULU
Inthi tumanyile mo tungapelekela ubulongozi bo bungabavwa abanji.
1. Nkhimba wenu yo abaghiye ukupeleka ubulongozi sona chifukwa buli?
KA MUKWIYIVWA bulibuli nanthi mukupeleka ubulongozi ku banji? Ku bamo chikuba chipepe ukubomba bunubu. Loli bamo bakoghopa sona batakuba bakusatuka pakupeleka ubulongozi. Mulimosi mo vingabela, loli akabalilo kamo twebosi tukulondiwa ukupeleka ubulongozi. Chifukwa buli? Ichifukwa chakuti zila yoka iyakulangizizya ukuti tubaghanite abakamu na bayemba. U Yesu akanena ukuti tukulondiwa ukulangizannya ulughano ukuti tulangizye ukuti twe bamanyili bache. (Yoha. 13.35) Sona Ibayibolo likunena ukuti nanthi tukupeleka ubulongozi umwalughano, vikutwavwa ukuti tube pa bumanyani ubwiza na bakamu na bayemba.—Mbupi. 27.9.
2. Ka abasongo babaghiye ukubomba choni, sona chifukwa buli? (Ennya sona ibokosi ilyakuti, “Ukupeleka Ubulongozi pa Nkhomano Izya Mukasi mwa Sabata.”)
2 Abasongo bakulondiwa ukumanya mo bangapelekela ubulongozi ubwiza ku banji. U Yehova abasalite ukwendela mwa Yesu ukuti bapwelelelaghe ichipanga. (1 Pita. 5.2, 3) Bakutupwelelela nanthi bakunena inkhani kuchipanga zyo zikuba nu bulongozi ubwa mu Bayibolo. Bakulondiwa sona ukupeleka ubulongozi kwa munthu aliwesi pamwene, ukongelezyapo na ku bo bakamuleka u Yehova ukuti banyokele. Loli, ka twebosi tungapeleka bulibuli ubulongozi ubwiza?
3. (a) Ka tungabomba bulibuli ukuti tupelekaghe akiza ubulongozi? (Yesaya 9.6; ennya sona ibokosi ilyakuti, “Mumweghelele u Yesu Nanthi Mukupeleka Ubulongozi.”) (b) Nkhimba inthi tumanyile ichoni?
3 Tungamanyila mo tungapelekela akiza ubulongozi ukufuma ku banthu bo bakutambuliwa mu Bayibolo. Tungamanyilako sona kwa Yesu yo akwitiziwa ukuti ‘Uwakupeleka Ifundo Uwakuswighisya.’ (Belenga Yesaya 9.6.) Munkhani iyi, inthi tunenezannye vyo tungabomba nanthi batulaba ukuti tupeleke ubulongozi sona vyo tungabomba nanthi tukulonda ukupeleka ubulongozi po batatulabite. Inthi twennye sona ukulondiwa ukwakupeleka ubulongozi pa kabalilo akiza na muzila inyiza.
NANTHI BATULABA UKUTI TUPELEKE UBULONGOZI
4-5. Nanthi yumo akulonda ukuti tumupe ubulongozi, ka ichabwandilo tukulondiwa ukwilalusya choni? Nena ichifwanikizyo.
4 Nanthi batulaba ukuti tupeleke ubulongozi, tungahoboka sana nu kulonda ukupeleka umwalubilo. Loli ka tubaghiye ukubomba tasi ichoni? Ichabwandilo tungabomba akiza ukwilalusya ukuti, ‘Nkhimba ne wakwenelela ukupeleka ubulongozi pa nkhani iyi?’ Akabalilo kamo izila inyiza iyakupelekela ubulongozi, ko kulonda umunthu yo ayimennye akiza inkhani iyo ukuti weyo apeleke ubulongozi.
5 Tufwanikizye ukuti umumanyani wako abina sana. Akubuzya ukuti andite ukulonda izila zyo zingamwavwa ukuti apole, loli akulonda ukuti umwavwe ukusala izila yo ukwennya ukuti yingaba nyiza. Vingabombiwa ukuti ungennya ukuti izila yimo yingamwavwa loli ubwanaloli bwakuti, uwe te we dokotala sona utamanyiye ivyakukwafannya ni mbina iyo. Nanthi momo vibeleye, izila inyiza iyakumutulila umumanyani wako, ko kulonda umunthu yo we dokotala pamo yo ayimenye akiza imbina iyo.
6. Choni cho tubaghiye ukulindililapo tasi po tuchili ukupeleka ubulongozi?
6 Napo tungaba ukuti twe bakwenelela ukupeleka ubulongozi pa nkhani yimo, loli tungasala ukuti akabalilo akanandi kendepo tasi, popo twize tumwamule umunthu yo atulaba ukuti tumupe ubulongozi. Chifukwa buli? Pa Isya Mbupingamu 15.28 pakunena ukuti, ‘umugholosu akwinong’onelapo tasi po achili ukwamula.’ Loli buli nanthi tukwennya ukuti tungakwanisya ukupelaka ubulongozi pa kabalilo kanako? Pope bulo tungalondiwa akabalilo akakuti tuye tufufuze, twipute nu kwinong’onelapo. Pisinda pache, popo tungaba nu lusubilo losi ukuti inthi tupeleke ubulongozi bo bukukolelana na vyo u Yehova angalonda ukuti tunene. Za twennye ichifwanikizyo icha mulaghuzi u Natani.
7. Ka tukumanyilako ichoni kwa mulaghuzi u Natani?
7 Umwene u Devedi akamubuzya umulaghuzi u Natani ukuti akulonda ukumuzengela u Yehova itempeli. Umwalubilo, u Natani akamubuzya u Devedi ukuti angazenga. Loli u Natani nge akamulalusyanga tasi u Yehova. Chifukwa buli? Ichifukwa chakuti u Yehova atakalondagha ukuti u Devedi weyo azenge itempeli. (1 Syambu. 17.1-4) Inkhani iyi yikulangizya ukuti nanthi batulaba ukuti tupeleke ubulongozi ‘tutakachimbililaghe pakunena.’—Yako. 1.19.
8. Choni cho tubaghiye ukwinong’onelapo tasi po tuchili ukupeleka ubulongozi?
8 Za twennye ichifukwa ichamwabo cho tubaghiye ukwinong’onelapo tasi po tuchili ukupeleka ubulongozi. Nanthi tungapeleka ubulongozi ubwambula ukwenelela, yo twamupa angize atudandaghule nanthi ivinthu vitenda akiza. Chochobene tubaghiye ukwinong’onelapo tasi po tuchili ukupeleka ubulongozi.
UKUPELEKA UBULONGOZI PO BATATULABITE
9. Ka abasongo babaghiye ukusimikizya tasi ichoni po bachili ukupeleka ubulongozi? (Aba Galatiya 6.1)
9 Akabalilo kamo abasongo bachipanga bangamupa ubulongozi umukamu pamo umuyemba yo anda ‘ukupaghuka.’ (Belenga Aba Galatiya 6.1.) Umunthu uyu, angaba ukuti anda ukusala ivinthu vimo vyo vingapangisya ukuti abombe ubutulanongwa ubukulu. Nanthi abasongo bakumupa ubulongozi, bakulonda ukumwavwa ukuti abukilile ukumubombela u Yehova umwakuti ize aghe ubumi ubwa bwila na bwila. (Yako. 5.19, 20) Ukuti ubulongozi bwabo bube bwakwavwa, abasongo bakulondiwa ukusimikizya tasi nanthi umunthu uyu anda naloli ukupaghuka. U Yehova amupiye aliwesi ubwabuke ubwakuti asalaghe weka ivinthu ukuyana nu mabyebye wache. (Loma 14.1-4) Loli nanthi abasongo bamanya ukuti umunthu yumo akubomba ivinthu vyo vingananga ubumanyani bwache nu Yehova, ka bangamupa bulibuli ubulongozi muzila inyiza?
10-12. Ka abasongo babaghiye ukubomba ichoni nanthi bakulonda ukupeleka ubulongozi po batabalabite? Longosola. (Ennya sona ivithuzi.)
10 Te chipepe ukuti abasongo bapeleke ubulongozi nanthi umunthu atabalabite. Chifukwa buli? Ichifukwa chakuti umutumiwa u Pabuli akanena ukuti umunthu angaba ukuti anda ukupaghuka ukusita ukumanya. Polelo, abasongo babaghiye ukubombapo tasi zimo ukuti chibe chipepe kwa munthu ukuti apokele ubulongozi.
11 Inong’onela ukuti, umulimi akulonda ukubyala imbeyu pitope lyo lighomite. Po achili atabyalite, akudibula tasi itope. Ivi vikwavwa ukuti itope litonthe umwakuti imbeyu zyo akulonda ukubyala zimele akiza. Pisinda pache popo akubyala imbeyu. Pabumalilo akwitilila amizi ukuti imbeyu zimele. Umwakuyana bulo, pali ivinthu vimo vyo usongo abaghiye ukubomba tasi ukuti amwavwe umukamu pamo umuyemba ukuti chibe chipepe ukupokela ubulongozi. Umwakufwanikizya, usongo akulondiwa ukusala akabalilo akiza nu kumubuzya umukamu pamo umuyemba ukuti akumwinong’onela sona pali ichinthu chimo cho akulonda ukunenezannya nawe. Nanthi umukamu yo akupeleka ubulongozi ali ni mbili iyakuti walughano sona wachisa, chingaba chipepe ukuti abanji bapokele ubulongozi bwache.
12 Pa kabalilo ko bakunenezannya, usongo angamwavwa umunthu ukuti itike ukupokela ubulongozi umwakumukumbusya ifundo iyakuti, aliwesi akupuvyanga sona akulondiwanga ubulongozi. (Loma 3.23) Nanthi usongo anganena nawe umwabufisalyoyo nu mwamuchizi, vingapangisya ukuti chibe chipepe ukuti amulangizye ifundo zya mu Masimbo zyo zikulangizya ukuti anda ukupaghuka. Nanthi umunthu azyaghannya ukuti apuvizye, usongo ‘angabyala imbeyu,’ umwakumulongosolela vyo abaghiye ukubomba kuti ayannye ivinthu. Pabumalilo, usongo ‘angitilila’ imbeyu umwakumupalizya nu kwiputa nawe.—Yako. 5.15.
Tunenaghe umwalughano nu mwaluso nanthi tukupeleka ubulongozi bo batatulabite (Ennya indime 10-12)
13. Ka abasongo bangamanya bulibuli ukuti umunthu ivwisya ubulongozi?
13 Akabalilo kamo, umunthu atangabwivwisya akiza ubulongozi bo apokela. Ka abasongo bangabomba bulibuli ukuti basimikizye nanthi umunthu ivwisya ubulongozi bo apokela? Bangalalusya amalalusyo umwamuchizi nu mwaluso, vyo vingabavwa ukumanya nanthi umunthu ivwisya ubulongozi sona amanya mo angabubombezezya imbombo.—Ndumbi. 12.11.
UKUPELEKA UBULONGOZI PA KABALILO AKIZA SONA MUZILA INYIZA
14. Choni cho tutabaghiye ukupeleka ubulongozi po tukalalite? Longosola.
14 Ichifukwa chakuti twebosi twe bambula ukufikapo, tungabomba nu kunena ivinthu vyo vingabakalalizya abanji. (Kolo. 3.13) Ibayibolo likunena ukuti, akabalilo kamo abanthu banganena pamo ukubomba ivinthu vyo vingatukalalizya. (Efe. 4.26) Loli tutakapelekaghe ubulongozi pa kabalilo ko tukalalite. Chifukwa buli? Ichifukwa chakuti ‘ubukali butakumwavwa umunthu ukubomba cho chigholosu pamaso pa Chala.’ (Yako. 1.20) Nanthi tungapeleka ubulongozi pa kabalilo ko tukalalite, tungakomannya ivinthu. Ivi vitakung’anamula ukuti tutanganena inyinong’ono zyitu pamo ukumubuzya umunthu yo atukalalizya mo tukwiyivwila. Loli tungabomba akiza ukulindilila ukuti umoyo witu wikale tasi pasi, po tuchili tutanenezanizye nu munthu yo atukalalizya. Za twennye vyo tungamanyilako kwa Elihu yo akamupa u Yobu ubulongozi ubwiza.
15. Ka tukumanyilako ichoni kwa Elihu? (Ennya sona ichithuzi.)
15 Ukwa masiku aghinji, u Elihu akateghelezyanga kwa Yobu yo akifighililagha ku mabumyasi gho abasangalusi ababumyasi, bakamunenagha. U Elihu akamupelela ichisa u Yobu, loli akakalala ichifukwa chakuti u Yobu akiyennyanga ukuti mugholosu sona akanena ivinthu ivyakukwafannya nu Yehova vyo vitakaba vyabwanaloli. Napo akakalala, loli u Elihu akalindilila akabalilo akakuti anenele sona po akapelekagha ubulongozi kwa Yobu, akanena mubololo nu mwamuchizi. (Jobu 32.2; 33.1-7) Vyo u Elihu akabomba vikutumanyisya ifundo iyakulondiwa sana iyakuti, ubulongozi bubaghiye ukupelekiwa pa kabalilo akiza, muzila inyiza, umwalughano nu mwamuchizi.—Ndumbi. 3.1, 7.
Napo u Elihu akakalala na vyo u Yobu akanena, loli akapeleka ubulongozi umwabololo nu mwamuchizi nkhani (Ennya indime 15)
TUBUKILILE UKUPELEKA NU KUPOKELA UBULONGOZI
16. Ka tukumanyilapo ichoni pa Salimo 32.8?
16 Isimbo lyo pafuma inkhani iyi, likunena ukuti, ‘inthi inkhupe ubulongozi nu kukwenelezya.’ (Belenga Salimo 32.8.) Ivi vikulangizya ukuti u Yehova inthi abukilile ukutwavwa. Atulaghizizye ukuti inthi atupange ubulongozi nu kutwavwa ukuti tububombezyange imbombo. Nuswe bulo, nanthi twaba nu lusako ulwakupeleka ubulongozi ku banji, tumweghelelaghe u Yehova umwakubukilila ukubalimbikisya nu kubavwa ukuti basale akiza ivinthu.
17. Ka abasongo bakubafwanikizya ni choni? Longosola. (Yesaya 32.1, 2)
17 Ukuchila kwisinda kosi, pa kabalilo aka popo tukulondiwa ukupeleka nu kupokela ubulongozi ubwiza. (2 Timo. 3.1) Abasongo bali ‘ngati tusoko utwa mizi muchisu ichambula amizi’ ichifukwa chakuti bakupeleka ubulongozi ubwakufuma mu Bayibolo. (Belenga Yesaya 32.1, 2.) Tukubapalizya sana abamanyani bo batakuzyelazyela ukutupa ubulongozi bo tukulondiwa. Abamanyani aba, bali ngati ‘maapozi agha golide mumbale izya siliva.’ (Mbupi. 25.11) Nge twebosi twabukilila ukumanyila mo tungapelekela na mo tungapokelela ubulongozi ubwiza.
ULWIMBO 109 Temwani Ŵanji Kufumira mu Mtima