INKHANI IYAKUMANYILA 34
ULWIMBO 3 Nkhongono na Chigomezgo Chithu
Musubilaghe Ukuti u Yehova Abahobokeye
“Umwe mukanhobokela vyo nkhupuvya ni mbibi zyane.”—SALI. 32.5
IFUNDO INKHULU
Inthi tumanyile ukuti tukulondiwa ukusimikizya ukuti u Yehova atuhobokeye sona akutuhobokela nanthi twapinduka.
1-2. Ka u Yehova akubomba ichoni nanthi twapinduka kumbibi zyitu? (Ennya sona icha pachifwambo.)
UMWENE u Devedi akamanyagha mo vikubela nanthi umunthu akwiyipa inongwa ichifukwa cha mbibi zyo akabomba kwisinda. (Sali. 40.12; 51.3, akamutu) Akapuvyapo ivinthu vimo ivikulu. Loli akapinduka ukufuma pasi pamoyo sona u Yehova akamuhobokela (2 Samu. 12.13) U Devedi, akahoboka sana akati amanya ukuti u Yehova amuhobokela.—Sali. 32.1.
2 Ngati we Devedi, nuswe bulo tukuhoboka sana nanthi u Yehova atuhobokela. Chakusangalusya sana ukuti u Yehova wakwisengannya ukutuhobokela, napo imbibi zyitu zingaba nkhulu. Angatuhobokela nanthi twapinduka ukufuma pasi pamoyo, twamulaba ukuti atuhobokele, twababuzya abasongo abachipanga ukuti batwavwe sona nanthi tukubomba chilichosi cho tungakwanisya ukuti tutakabombe sona imbibi! (Mbupi. 28.13; Imbo. 26.20; 1 Yoha. 1.9) Sona chakuhobosya sana ukuti nanthi u Yehova atuhobokela, vikuba ngati ukuti tutakabombapo imbibi!—Eze. 33.16.
U Devedi akwata inyimbo zyo zikulongosola mo u Yehova akutuhobokelela (Ennya indime 1-2)
3-4. Ka umuyemba yumo akiyivwa bulibuli ati oziwa bulo, sona munkhani iyi inthi tunenezannye ichoni?
3 Akabalilo kamo, bamo chikubatamya ukwitikizya ukuti u Yehova abahobokela. Inong’onela ichifwanikizyo icha Jennifer, yo akakulila mubwanaloli. Po akaba wachinyamata akanda pakubomba ivinthu ivibibi sona akikalagha ubumi ubwa pabili. Imyaka yikati yendapo, akasintha nu kwiyipa kwa Yehova nu koziwa. Akanena ukuti: “Kwisinda nkhapangagha ubwa malaya, nkhang’welagha nkhani, nkhaba mukali sona ukupanga indalama chocho chikaba chinthu chakulondiwa sana. Nkhamanyagha ukuti Ibayibolo likunena ukuti u Kilisitu akapeleka isembe iyakutusatula, polelo nanthi ningapinduka u Yehova anganhobokela. Napo nkhapinduka nu kumulaba u Yehova ukuti anhobokele, loli nthakasimikizya ukuti u Yehova anhobokeye naloli.”
4 Ka akabalilo kamo mukukayikilagha nanthi u Yehova abahobokeye? U Yehova akulonda ukuti mwiyivwange ukuti akubapelela ichisa ngati mo akabombela nu Devedi. Munkhani iyi, inthi tunenezannye ichifukwa cho chakulondiwa sana ukusubila ukuti u Yehova atuhobokeye, sona vyo tungabomba ukuti tusubilaghe.
CHONI CHO CHAKULONDIWA SANA UKUSUBILA UKUTI U YEHOVA ATUHOBOKEYE?
5. Ka u Satana akulonda ukuti tusubilaghe ichoni? Nena ichifwanikizyo.
5 Nanthi tukusubila ukuti u Yehova atughanite, sona atuhobokeye inthi vitwavwe ukuti tutakasubilaghe amabumyasi gha Satana. Mukumbukilaghe ukuti u Satana akubomba chilichosi cho angakwanisya ukuti atupangisye ukuti tuleke ukumubombela u Yehova. Ukuti akwanisye ukubomba bunubu, angatupangisya ukuti tusubilaghe ukuti u Yehova atangatuhobokela imbibi zyitu. Inong’onela vyo vikabombiwa ku munthu uwa ku Kolinti yo akepusiwa mu chipanga ichifukwa chakuti akabombagha ubwa malaya. (1 Koli. 5.1, 5, 13) Umunthu uyu akati apinduka u Satana akalonda ukuti bo bakaba mu chipanga, batakamuhobokele nu kumupokelela. U Satana akalondagha sona ukuti umunthu uyu iyivwe ukuti atahobokeliwe, vyo nge vikamupangisya ukuti abe ni chitima ichikulu nkhani umwakuti aleke ukumubombela u Yehova. U Satana atasinthite injomba zyache na vyo akulonda ukubomba. Loli “tubumenye ubuchevu bwache.”—2 Koli. 2.5-11.
6. Choni cho chingatwavwa ukuti tutakabe ni chitima pambibi zyo tukabomba kwisinda?
6 Nanthi tukusubila ukuti u Yehova atuhobokeye, vingatwavwa ukuti twande sona ukuba bakuhoboka. U Yehova atupelite muzila iyakuti nanthi twananga tubange ni chitima. (Sali. 51.17) Ukwiyivwa bunubu kwiza bulo. Umabyebye witu angatwavwa ukuti tubombepo zimo ukuti tuyannye vyo twapuvya. (2 Koli. 7.10, 11) Nanthi tungabukilila ukuba ni chitima pisinda apakuti twapinduka, vingapangisya ukuti tuleke ukumubombela u Yehova. Loli nanthi tukusubila ukuti atuhobokeye vingatwavwa ukuti tuleke ukuba ni chitima. Ivi vingapangisya ukuti tumubombelaghe u Yehova nu mabyebye umwiza, sona umwakuhoboka. (Kolo. 1.10, 11; 2 Timo. 1.3) Choni cho chingatwavwa ukusimikizya ukuti u Chala atuhobokeye?
CHONI CHO CHINGATWAVWA UKUSUBILA UKUTI U YEHOVA ATUHOBOKEYE?
7-8. Ka u Yehova akilongosola bulibuli kwa Mozesi, sona ivi vikutupa lusubilo buli? (Ukusoka 34.6, 7)
7 Inong’onela mo u Yehova akilongosolela. Ennya vyo u Yehova akamubuzya u Mozesi pighamba ilya Sinayi.a (Belenga Ukusoka 34.6, 7.) U Yehova nge akamubuzya inkhalo zyache zyosi u Mozesi, loli akasala ukumubuzya ukuti we Chala uwachisa nu wachililizi. Nkhimba u Chala uwa nkhalo izi angapotwa ukubahobokela ababombi bache bo bapinduka naloli? Vitangabombiwa! Nanthi angabomba bunubu vingalangizya ukuti ate ni chisa sona ali numoyo uwakughoma, vyo u Yehova atangabomba.
8 Tukusubila ukuti u Yehova atakatamantha ukunena ukuti we Chala uwachisa. (Sali. 31.5) Cho chifukwa tukusubila vyosi vyo akunena. Nanthi mukutamiwa ukwitikizya ukuti u Yehova abahobokeye, mwilalusye ukuti: ‘Ka nkhusubila ukuti u Yehova, yo wachisa sona wachililizi atangabahobokela abanthu bo bapinduka naloli? Ka nthangasubila ukuti anhobokeye?’
9. Nkhimba ukuhobokeliwa imbibi kukung’anamula ichoni? (Salimo 32.5)
9 Mwinong’onelaghe mo u Yehova akutumanyisizya mu Bayibolo ivyakukwafannya namo akutuhobokelela. Ennya vyo u Devedi akanena ivyakukwafannya nu Yehova pankhani iyakuhobokela. (Belenga Salimo 32.5.) U Devedi akanena ukuti, ‘Umwe mukunhobokela vyo nkhupuvya ni mbibi zyane.’ Amazyu agha Chihebeli aghakuti ukuhobokela gho ghali pivesi ili ghakung’amula ukwefyapo pamo ukunyamula. U Yehova akati amuhobokela u Devedi, akaba ngati anyamula imbibi zyache nu kuzitaghila kubutali. Pisinda pache u Devedi akaba wakuhoboka pakumanya ukuti u Yehova amuhobokela. (Sali. 32.2-4) Nuswe bulo tungiyivwa umwakuyana bulo. Nanthi twapinduka, tutakulondiwa ukubukilila ukuba ni chitima pakumanya ukuti u Yehova akuba ukuti anyamula imbibi zyitu nu kuzitaghila kubutali.
10-11. Ka amazyu aghakuti ‘wakwisengannya ukutuhobokela’ ghakutumanyisya ichoni ivyakukwafannya nu Yehova? (Salimo 86.5)
10 Belenga Salimo 86.5. Apa u Devedi akanena ukuti u Yehova ‘wakwisengannya ukutuhobokela.’ Ibayibolo limo likang’anamulila amazyu agha ukuti, U Yehova wakuhobokela. Choni cho u Yehova wakuhobokela? Ivesi ili likubukilila ukunena ukuti: ‘Mukubalangiza ulughano ulusubaliwa bosi bo bakwitizya kwa umwe.’ Munkhani iya pisinda tukamanyila ukuti u Yehova alayizizye ukubalangizya ulughano ulusubaliwa bosi bo bamughanite sona atakwiza pakubalekapo lumo. Polelo nanthi bananga nu kupinduka u Yehova akubukilila ukubalangizya ulughano lwache ulusubaliwa nu kubahobokela. (Yesa. 55.7) Nanthi vikubatamya ukusubila ukuti u Chala abahokeye, mwilalusye ukuti: ‘Ka nkhusubila ukuti u Yehova waluhobokelo sona wakwisengannya ukubahobokela bosi bo bapinduka nu kubalangizya ichisa? Nanthi nkhusubila ifundo iyi, ka nthangasubila ukuti u Yehova anhobokeye ichifukwa chakuti mulabite ukuti andangizye ichisa?
11 Tukusangalusiwa sana pakumanya ukuti u Yehova akutwivwisya mo tubeleye ukuti twe banthu abambula ukufikapo. (Sali. 139.1, 2) Ivi vikubonekela akiza mu salimo limo lyo u Devedi akasimba lyo likutwavwa ukusubila ukuti u Yehova akutuhobokela.
TUTAKALUVYANGE VYO U YEHOVA AKUKUMBUKILA
12-13. Ka u Yehova akukumbukila ichoni, sona akubomba bulibuli ivinthu nuswe? (Salimo 103.14)
12 Belenga Salimo 103.14. U Devedi akanena ukuti u Yehova ‘akukumbukila ukuti twe lufumbi.’ Amazyu agha, ghakulangizya ukuti u Devedi akalongosola ichifukwa cho u Yehova wakwisengannya ukubahobokela ababombi bache bo bapinduka. Ifundo iyi, yikung’anamula ukuti akabalilo kosi akukumbukila ukuti swe bambula ukufikapo. Ukuti twivwisye akiza, za tunenezannye amazyu gho u Devedi akanena.
13 U Devedi akanena ukuti u Yehova, ‘akumanya akiza mo akatupangila.’ U Yehova akamupela u Adamu ‘ukufuma kulufumbi,’ polelo akumanya ukuti abanthu bakulondiwa ukufuta, ukulya nu kughona. (Ubwa. 2.7) Loli u Adamu nu Eva bakati bananga abanthu bakaba ulufumbi muzila iyamwabo. Tupyanite imbibi zyo zikutupangisya ukuti tubombaghe ivinthu ivibibi ichifukwa chakuti twe bizukulu babo. U Yehova atakumanya bulo ukuti swe ba mbibi, loli ngati mo u Devedi akanenela akukumbukila ukuti swe bambula ukufikapo. Amazyu agha Chihebeli gho babombezizye apa, ghakung’anamula ukuti akabalilo kosi akubomba nuswe ivinthu umwachililizi. Mumazyu aghanji tunganena ukuti amazyu gho u Devedi akanena, ghakang’anamulagha sona ukuti: U Yehova akutwivwisya ukuti akabalilo kamo tungapuvya ivinthu, loli nanthi twapinduka angatulangiza ichisa nu kutuhobokela.—Sali. 78.38, 39.
14. (a) Nkhimba u Devedi akalongosola ukuti u Yehova akubomba bulibuli nanthi atuhobokela? (Salimo 103.12) (b) Ka tungamanyilako ichoni pa mo u Yehova akamuhobokelela u Devedi? (Ennya ibokosi ilyakuti “U Yehova Akuhobokela nu Kuluvya.”)
14 Choni cho chingatwavwa ukusimikizya ukuti u Yehova akutuhobokela? (Belenga Salimo 103.12.) U Devedi akanena ukuti nanthi u Yehova atuhobokela, akubika imbibi zyitu kubutali ngati mo kubeleye ‘kubufumilo bwizuba ukuya kubwingililo bwizuba.’ Ukunena ubwanaloli, ko izuba likufumila na ko likwingilila kutali sana umwakuti te kukakomane lumo. Ka ivi vikutumanyisya ichoni nanthi u Yehova atuhobokela imbibi? Ibuku limo likulongosola ivesi ili ukuti: “U Chala akuzisenda imbibi zyitu nu kuzitaghila kubutali nuswe, umwakuti atakuzikumbukila sona.” Akabalilo kamo ifungo lingatukumbusya ichakulya pamo ivinthu vimo vyo vikabombiwa kwisinda, loli nanthi u Yehova atuhobokela patalipo nachimochimo cho chingamukumbusya sona, vyo tukabomba pamo ukutupa ichilango.—Eze. 18.21, 22; Imbo. 3.19.
15. Choni cho chingatwavwa nanthi tutakusubila ukuti u Yehova atuhobokeye imbibi zyo tukabomba kwisinda?
15 Ka amazyu gho u Devedi akanena gho ghali mu Salimo 103, ghangatwavwa bulibuli ukusubila ukuti u Yehova atuhobokeye? Inong’onela mo u Yehova akwiyivwila. Akukumbukila ukuti swe banthu bambula ukufikapo sona akubahobokela bosi bo bakwipelela ichisa pa vinthu vyo babomba nu kupinduka naloli, ivi vyovyo numwe bulo mubombite. Mukumbukilaghe ukuti nanthi u Yehova abahobokela, akusala ukuti atakakumbukile sona pamo ukubakumbusya imbibi zyo mukabomba. Polelo atangabapa ichilango. U Yehova atakubika amahala pambibi zyo tukabomba, nuswe bulo momo tubaghiye ukubombela. (Sali. 130.3) Nanthi tukusubila ukuti u Yehova atuhobokeye, inthi vitwavwe ukuti twihobokele pa vinthu vyo tukabomba nu kubukilila ukumubombela.
16. Nena ichifwanikizyo cho chikulangizya ukoghofya ko kungabapo nanthi tukwinong’onela bulo ivinthu vyo u Yehova akatuhobokela. (Ennya sona ichithuzi.)
16 Inong’onela ichifwanikizyo ichi. Nanthi umunthu akwendesya igalimoto, angennya pigilasi ukuti ennye vyo vikwiza kwisinda kwache. Angabomba bunubu pipipipi loli chingaba chakoghofya sana nanthi angabukilila ukwennya bulo pigilasi. Loli ukuti ende akiza akulondiwa ukuti ennyange kunthazi ko akubuka. Umwakuyana bulo, chiza bulo ukwinong’onelapo pa vinthu vyo tukapuvyapo umwakuti vitwavwe ukuti tutakapyanizye sona. Loli nanthi tungabukilila ukubika amahala pa vinthu vyo tukapuvya, vingatupangisya ukuti tuleke ukuba bakuhoboka nu kuleka ukubomba chilichosi cho tungakwanisya pakumubombela u Yehova. Mumalo mwache, tukulondiwa ukubikapo amahala pamusebo gho tukwenda, uwakuya ku bumi ubwa bwila na bwila muchisu ichipya cho u Chala atulayizizye mo tutakwiza ‘ukukumbukila sona ivinthu ivyakale.’—Yesa. 65.17; Mbupi. 4.25.
Ngati mo udilayiva abaghiye ukubikila amahala pa musebo ukuchila ukwennya pigilasi, nuswe bulo tukulondiwa ukubikapo amahala pamalusayo gho u Yehova akwiza pakutupa mumalo mwa vinthu vyo tukupuvya (Ennya indime 16)
MUBUKILILE UKUSIMIKIZYA MUMOYO WINYU
17. Choni cho tukulondiwa ukubukilila ukusimikizya ukuti u Yehova atughanite sona akutuhobokela?
17 Tukulondiwa ukubukilila ukusimikizya ukuti u Yehova atughanite sona akutuhobokela. (1 Yoha. 3.19) Chifukwa buli? Ichifukwa chakuti u Satana te alekepo ukubikapo umoyo ukuti atupangisye ukwiyivwa ukuti tutaghaniwe sona tutangahobokeliwa. Ubwighane bwache ubwakuti tuleke ukumubombela u Yehova, butasinthite. Tukumanya ukuti u Satana inthi ayezyeyezye ukubomba bunubu ichifukwa chakuti akumanya ukuti akabalilo kache kapimpha. (Ubuvu. 12.12) Mutakitikizye ukuti u Satana awine!
18. Ka mungasimikizya bulibuli ukuti u Yehova abaghanite sona akubahobokela?
18 Inkhani iya pisinda, yikalangizya vyo mungabomba ukuti musimikizye ukuti u Yehova abaghanite. Mwinong’onelaghe mo u Yehova akilongosolela, ukuti musimikizye ukuti abahobokeye. Mwinong’onelaghe sona vyo bo bakasimba Ibayibolo bakalongosola ivyakukwafannya nu luhobokelo lwa Yehova. Mutakaluvyange ukuti akumanya ukuti mwe bambula ukufikapo sona akubomba ivinthu numwe umwachisa. Sona nanthi abahobokela atakukumbukila vyo mukapuvya. Polelo nanthi mwasimikizya ukuti u Yehova akubapelela ichisa ngati mo akabombela nu Devedi, mungakwanisya ukunena ukuti, “Napalizya sana Yehova ichifukwa ichakunhobokela vyo ‘nkhupuvya ni mbibi zyane’!”—Sali. 32.5.
ULWIMBO 1 Makhaliro gha Yehova
a Ennya inkhani iyakuti “Yandikirani Mulungu—Yehova Anafotokoza Makhalidwe Ake” mu Ichitembe cha Mulindilili icha Chichewa icha Meyi 1, 2009.