Mungaba Pabumanyani nu Yehova

U Yehova akulonda ukuti umwe mumumanye akiza. Chifukwa buli? Nanti mwamanya inkalo zyache, izila zyache sona nu bwighane bwache ku bantu, inti vibavwe ukuti mube nawe pabumanyani. Nkimba mukusubila ukuti mungaba pabumanyani nu Chala? (Belenga Salimo 25.14.) Ka mungabomba choni ukuti mube pabumanyani nu Chala? Ibayibolo likwamula amalalusyo agha sona likunena ichifukwa cho ukuba pabumanyani nu Yehova kwakulondiwa.

1. Nkimba u Yehova akulonda ukuti mubombe ichoni?

“Palamila kwa Chala po wepe akwiza pakupalamila kukwinyu.” (Yakobo 4.8) Ka ivi vikung’anamula choni? U Yehova akulonda ukuti mube nawe pabumanyani. Bamo bagha ukuti chipala ukusubila ukuti bangaba pabumanyani nu Chala yo batakumwennya. U Yehova akuvumbula mu Mazyu ghache, Ibayibolo, chilichosi cho tukulondiwa ukumanya ichakukwafyannya nu buntu bwache ukuti tungaba nawe pabumanyani. Nanti tukubelenga amazyu gha Chala mu Bayibolo, ubumanyani bwitu nu Yehova bukukula napo tutamwenyizyepo.

2. Choni cho u Yehova mumanyani umwiza ukuchila aliwesi?

Ichifukwa chakuti u Yehova abaghanite ukuchila umuntu aliwesi, akulonda ukuti muhobokaghe sona mungamulaba akabalilo kalikosi ko mukulonda ubutuli. Akulonda ukuti ‘mumutulile ukupasya kwinu kosi pakuti umwene akubapasikizya umwe.’ (1 Pitala 5.7) Akabalilo kosi, u Yehova wakwipeleka pakubavwa, ukubaghomya nu kubivwisya abamanyani bache.—Belenga Salimo 94.18, 19.

3. Ka u Yehova akulonda ukuti abamanyani bache babombaghe choni?

U Yehova abaghanite abantu bosi, ‘loli akuba pabumanyani na bagholosu.’ (Isya Mbupingamu 3.32) U Yehova akulonda ukuti abamanyani bache babombaghe ivintu vyo vikumuhobosya nu kubenga ivintu vyo avibengite. Abantu bamo bakwennya ukuti batangakwanisya ukubomba vyosi vyo u Yehova akulonda pamo ukuleka ukubomba ichibibi chilichosi. U Yehova wachisa nkani. Akuhoboka na aliwesi yo amughanite nu moyo wosi sona na yo akuyezya-yezya ukubomba chilichosi cho angakwanisya ukuti amuhobosye.—Salimo 147.11; Imbombo 10.34, 35.

MANYA IVYINJI

4. U Abulahamu akaba mumanyani wa Yehova

Inkani iya mu Bayibolo yo yikutwavwa ukwivwisya ing’anamulo ilyakuba pabumanyani nu Chala. Belenga inkani iya Abulahamu pa Ubwandilo 12.1-4. Nu kwamula amalalusyo agha:

• Nkimba u Yehova akalondagha ukuti u Abulahamu abombe choni?

• Ka u Yehova akamulayizya choni?

• Ka u Abulahamu akabomba choni?

5. Vyo u Yehova akulonda ukuti abamanyani bache babombaghe

Akabalilo akinji tukulindililagha ukuti abamanyani bitu batumbombelaghe ivintu ivyiza.

• Nkimba vintu buli vyo mukulonda ukuti abamanyani binyu bababombelaghe?

Belenga 1 Yohani 5.3, nu kwamula ilalusyo ili:

• Ka u Yehova akulonda ukuti abamanyani bache babombaghe choni?

Ukuti tubombaghe vyo u Yehova akulonda, tubaghiye ukusinta inkalo zyitu. Belenga Yesaya 48.17, 18, nu kwamula ilalusyo ili:

• Choni cho u Yehova akulonda ukuti abamanyani bache basintaghe inkalo zyabo?

6. Vyo u Yehova akubomba ukuti abavwe abamanyani bache

IVIDIYO: U Yehova Ambombela Ivikulu Nkani (3:20)

• Ka u Yehova akamwavwa buli-buli umukolo uwa mu vidiyo ukuti amalane ni nyinong’ono izibibi zyo akaba nazyo?

Belenga Yesaya 41.10, 13, nu kwamula amalalusyo agha:

• Ka u Yehova alayizizye ukuti inti ababombele ichoni abamanyani bache?

• Ka mukwinong’ona ukuti u Yehova angaba mumanyani umwiza?

7. Ukuti tube pabumanyani nu Yehova tubaghiye ukunenenzyannya nawe

Ubumanyani bukuba bwakughoma nanti mukunenezannya. Belenga Salimo 86.6, 11, nu kwamula amalalusyo agha:

• Nkimba tunganenezyannya buli-buli nu Yehova?

• Ka u Yehova akunena buli-buli nuswe?

IFUNDO IZYAKUDUMULA

U Yehova akulonda ukuti mube nawe pabumanyani, sona inti abavwe ukuti mupalamile papipi nawe.

Ukunyokelamo

• Nkimba u Yehova akubavwa buli-buli abamanyani bache?

• Choni cho u Yehova akulonda ukuti abamanyani bache basintaghe?

• Ka mukwinong’ona ukuti chipala ukuba pabumanyani nu Yehova? Chifukwa buli?

IFUNDO IZYAKONGELEZYAPO

Ka ukuba pabumanyani nu Yehova kungabavwa buli-buli?

“Yehova Ndiyo Ni Chiuta Uyo Tikwenera Kumumanya” (Ichitembe cha Mulindilili icha Chitumbuka, Febuluwale 15, 2003)

Manya mo mungabombela ukuti mube pabumanyani nu Yehova.

“Kasi Ningachita Wuli Kuti Niŵe Paubwezi na Chiuta?” (Mazgoro gha Ivyo Ŵachinyamata Ŵakufumba, Buku Lachiŵiri, mutu 35)

Ennya mo umukolo yumo akasintila ubumi bwache ichifukwa chakuba pabumanyani nu Yehova.

“Nkhawopanga Chomene Nyifwa!” (Ichitembe cha Mulindilili icha Chitumbuka Na. 1 2017)

Ennya vyo abachinyamata bakunena ivyakukwafyannya nu Yehova.

Ka Ukuba Pabumanyani nu Yehova Kukung’anamula Choni? (1:46)