UMUTU 24

Nkimba Abantumwi bo Bawenu?

Viboneke Ngati mo Vibeleye Mubuku

U Yehova akulonda ukuti tuyimanye akiza imbumba yache yo yili kumwanya. Mu mbumba iyi, muli abantumi bo bakwitiziwa ukuti ‘abana ba Chala.’ (Jobu 38.7) Nkimba Ibayibolo likunena ichoni ivyakukwafyannya na bantumi? Ka bakubabombela ichoni abantu? Sona ka abantumi bosi bali mumbumba ya Chala?

1. Nkimba abantumi bo bawenu?

U Yehova akapela abantumi bo atapelite ichisu. Abantumi bali nu mubili uwa buzimu ngati we Yehova, batakuboneka sona bakwikala kumwanya. (Aba Hebeli 1.14) Abantumi balipo amamiliyoni aghinji sona aliwesi wakulondiwa. (Ubuvumbuli 5.11) Abantumi ‘bakubomba vyo u Yehova ababuzya, nu kwivwila indaghilo zyache.’ (Salimo 103.20) Mu kabalilo akakale, u Yehova akabatumagha abantumi ukuti baye bapeleke ubutenga sona nu kubapoka abantu bache. Amasiku ghano abantumi bakubavwa Abakilisitu ukuti babaghe abantu bo bali nu moyo umwiza uwakulonda ukumanya ivyakukwafyannya nu Chala.

2. Nkimba u Satana ni mizimu iyibibi bo bawenu?

Abantumi bamo bakapotwa ukuba basubaliwa kwa Yehova. Uwantumi uwabwandilo yo akamusambukila u Chala ‘Akwitiziwa ukuti umubibi nu Satana, yuyo akuchizimbula ichisu chosi ichapasi.’ (Ubuvumbuli 12.9) U Satana akalondagha ukuti abalaghilaghe abamwabo, polelo akapangisya abantu ababwandilo u Adamu nu Eva sona abantumi abamwabo ukuti batakamwivwilaghe u Yehova. Abantumi bo bakasambuka aba, bakwitiziwa ukuti imizimu iyibibi. U Yehova akabachimbizya kumwanya nu kubasumbila pachisu ichapasi sona bakwiza pakupyutiwa.—Belenga Ubuvumbuli 12.9, 12.

3. Nkimba u Satana ni mizimu iyibibi yikubomba buli-buli ukuti yituzimbule?

U Satana akubombezya imizimu yache iyibibi pakubasobezya abantu ukuti basubilaghe nkani ivya mizimu. Ichi chintu ichakuselusya nkani cho chikupangisya ukuti abantu banenezannyanje ni mizimu. Umwakufwanikizya, abantu bamo bakubuka ku bantu bo bakulaghula pakubombezya intondwa, bo bakulotela ivyamuntazi, abalaghuzi na baghanga. Abantu bamo nanti babina bakulonda imilembo yo yikukolelana ni vyamizimu. Abantu bamo bakuzimbuliwa nu kusubila ukuti banganenezannya na bantu abakufwa. U Yehova akutusoka ukuti: ‘Mutakabukaghe ku baghanga sona ku bo bakulotela ivyamuntazi.’ (Abanya Levi 19.31) Akutusoka ichifukwa chakuti akulonda ukuti atufighilile kwa Satana ni mizimu iyibibi. Imizimu iyibibi, iyi balwani ba Chala sona bakulonda ukuti batuvulazye.

MANYA IVYINJI

Manya ivintu ivyiza vyo abantumi bakubomba, ububibi ubwa kusubalila imizimu iyibibi, sona na mo tungifighilila kwa Satana ni mizimu iyibibi.

Uwantumi akutangilila Abakaboni ba Yehova babili po bali pakulumbilila inyumba ni nyumba.

4. Abantumi bakubavwa abantu ukuti bamanye ivyakukwafyannya nu Yehova

Abantumi ba Chala batakubuka amaso na maso ukuti baye balumbilile amazyu amiza ku bantu. Mumalo mwache bakutangilila ababombi ba Chala ukuti baye balumbilile abantu bo bakulonda ukumumanya u Yehova. Belenga Ubuvumbuli 14.6, 7, nu kwamula amalalusyo agha:

Choni cho tukulondiwa ubutuli ubwakufuma ku bantumi ukuti tulumbililaghe?
Ka te chakulimbikisya ukumanya ukuti abantumi bangabatangilila ku bantu bo bakulonda ukumanya ivyakukwafyannya ni Bayibolo? Chifukwa choni?

Ivintu ivyakupambana-pambana vyo vikukolelana ni vintu ivyamizimu, Igilasi lyo bakubombezya pakwennya ivyamizimu, ichibola icha vyamizimu, ibuku lyo likulongosola ivizyuka, akakadi akamayele, ividoli ivyamayele, ivyakusukisya ilyosi ubwambo sona na mayele.

5. Mukanaghe ivya mizimu

U Satana ni mizimu iyibibi balwani ba Yehova sona nuswe bulo balwani bitu. Belenga Luka 9.38-42, nu kwamula ilalusyo ili:

Ka imizimu iyibibi yikubabombela choni abantu?

Tutakulonda na panandi ukuti tubombaghe ivintu vyo vikukolelana ni mizimu iyibibi. Belenga Ukukumbusya Indaghilo 18.10-12, nu kwamula amalalusyo agha:

Nkimba zila buli zyo imizimu iyibibi yikubombezya ukuti yinenezannyanje na bantu? Nkimba vintu buli vyo vikubombiwa ko mukwikala?
Ka umwe mukwennya ukuti chakwivwika ukuti u Yehova akanizyanje ivyamizimu? Chifukwa choni?

Enelezya IVIDIYO, nu kwamula amalalusyo agha.

IVIDIYO: “Mumukane u Satana” (5:02)

Ka mukwennya ukuti vyo u Palesa akamuvwalikagha umwana wache vyakuvulazya? Chifukwa choni?
Nkimba u Palesa akalondiwanga ichoni ukuti ifighilile ku mizimu iyibibi?

Abakilisitu ababwanaloli akabalilo kosi bakususya imizimu iyibibi. Belenga Imbombo 19.19 sona 1 Aba Kolinti 10.21, ukwamula ilalusyo ili:

Choni cho chiza ukutaya pamo ukocha chilichosi cho chikukolelana ni mizimu iyibibi?

Umukolo ali pakocha ivintu vyosi vyo vikukolelana ni vyamizimu.

6. Mulwe inkondo iyakulimbana nu Satana sona imizimu yache

U Satana weyo akulaghila imizimu iyibibi. Loli abantumi abasubaliwa bakulaghiliwa nu wantumi usongo u Mikayeli lyo lizina ilyamwabo ilya Yesu. Nkimba maka buli gho u Mikayeli ali nagho? Belenga Ubuvumbuli 12.7-9, nu kwamula amalalusyo agha:

Nkimba wenu yo ali na maka nkani, u Mikayeli na bantumi bache pamo u Satana ni mizimu yache?
Ka mukwinong’ona ukuti bo bakumukonka u Yesu babaghiye ukomoghopa u Satana ni mizimu yache?

Mungapota pa nkondo iyakulimbana nu Satana ni mizimu yache. Belenga Yakobo 4.7, nu kwamula ilalusyo ili:

Nkimba tungifighilila buli-buli kwa Satana sona ni mizimu yache?

VYO BAMO BAKUNENA: “Pate intamyo nayimo waghe tukwangalila sona ukwenelezya amafilimu gho ghakukolelana ni vyamizimu. Ivi vintu vyakuhobosya bulo.