UMUTU 15

Nkimba u Yesu we Wenu?

Viboneke Ngati mo Vibeleye Mubuku

U Yesu muntu yumo uwakumanyikwa hee mu mbili. Abantu abinji balimenye izina lya Yesu loli batakumanya ivyinji ivyakukwafyannya nu Yesu sona bali ni nyinong’ono izyakupambana-pambana pa nkani iyakuti u Yesu we wenu. Nkimba Ibayibolo likuti u Yesu we wenu?

1. Nkimba u Yesu we wenu?

U Yesu wantumi uwamaka yo akwikala kumwanya. U Yesu weyo wabwandilo ukupeliwa nu Yehova u Chala bo ichipeliwa chilichosi chitapeliwe. Cho chifukwa akwitiziwa ukuti “we katote yuyo ali pamwanya pavipeliwa vyosi.” (Aba Kolosi 1.15) Ibayibolo likunena ukuti u Yesu mwana wa Chala “mwene na mwene” ichifukwa chakuti u Yesu mwene weyo akapeliwa nu Yehova. (Yohani 3.16) U Yesu akabombagha papipi nu Tata wache, u Yehova, pakupela ivipeliwa ivyamwabo vyosi. (Belenga Isya Mbupingamu 8.30.) U Yesu akubukilila ukuhoboka ichifukwa chakuba pabumanyani nu Yehova. Ichifukwa chakuti u Yesu “we Mazyu,” akanenagha ubutenga nu bulongozi bo u Yehova amutuma.—Yohani 1.14.

2. Choni cho u Yesu akiza pachisu?

Imyaka 2,000 yo yendapo u Yehova akabombezya umuzimu wache ubuzelu pakusamya umoyo wa Yesu nu kughubika mulwanda ulwa mulindu u Maliya. Muzila iyi, u Yesu akapapiwa ngati muntu. (Belenga Luka 1.34, 35.) U Yesu akiza pa chisu nukuba we Mesiya pamo u Kilisitu yo u Chala akanenela zila ukuti akwiza pakubapoka abantu.a Amabulaghuzi ghosi aghakunena ivya Mesiya ghakakwanilisiwa pa Yesu, vyo vikavwa abantu ukumanya ukuti “we Kilisitu u Mwana uwa Chala umumi.”—Matayi 16.16.

3. Ka u Yesu ali kwi pakabalilo aka?

Bo u Yesu afwa, u Chala akamuzusya nu mubili uwabuzimu nu kupyanila kumwanya. Ko “U Chala akamukwezya pamwanya nkani.” (Aba Filipi 2.9) Pa kabalilo aka u Yesu ali nu budindo ubwa pamwanya nkani sona wabubili kwa Yehova.

MANYA IVYINJI

Manya ivyinji ivyakukwafyannya nu Yesu sona ichifukwa cho ukumanyila ivya Yesu kwakulondiwa.

U Yesu nu Yohani uwa Lozyo bimiliye mu mizi bakwivwisya amazyu gho ghakufuma kumwanya pakabalilo ko u Yesu akoziwa

4. U Yesu te we Chala Uwamakaghosi

Ibayibolo likumanyisya ukuti napo u Yesu wapamwanya nkani pa vipeliwa ivyabuzimu ivyakumwanya loli akumwivwila u Baba wache u Yehova. Choni cho tukunena bunubu? Enelezya IVIDIYO ukuti mwenye vyo Ibayibolo likumanyisya pa nkani iya mpambano yo yilipo pakasi pa Yesu nu Chala.

IVIDIYO: Ka u Yesu Kilisitu we Chala? (3:22)

Amasimbo aghakukonkapo agha inti ghabavwe ukumanya ubukamu bo bulipo pakasi pa Yehova nu Yesu. Belenga isimbo lililyosi nu kwamula amalalusyo.

Belenga Luka 1.30-32.

Nkimba uwantumi akati pali bukamu buli pakasi pa Yesu nu Yehova u Chala ‘Uwapamwanya Nkani’?

Belenga Matayi 3.16, 17.

Pa kabalilo ko u Yesu akoziwanga, nkimba mazyu buli gho ghakivwika ukufuma kumwanya?
Ka mukwinong’ona ukuti amazyu agha ghakaba ghawenu?

Belenga Yohani 14.28.

Ka wenu yo we songo sona ali na maka nkani? U baba pamo umwana?
Ka u Yesu akang’anamula choni po akamwitizya u Yehova ukuti we Baba wache?

Belenga Yohani 12.49.

Nkimba u Yesu akwinong’ona ukuti umwene nu Baba wache muntu weka? Chifukwa wuli?

5. Nkimba choni cho chikulangizya ukuti u Yesu akaba we Mesiya?

Mu Bayibolo muli amabulaghuzi aghinji gho ghakwavwa abantu ukumanya ukuti u Yesu we Mesiya yo u Chala akamusala ukuti abapoke abantu—Enelezya IVIDIYO ukuti mumanye amabulaghuzi ghamo gho ghakakwanilisiwa po u Yesu akaba pachisu.

VIDIYO: U Yesu Akakwanilisya Amabulaghuzi (3:03)

Belenga amabulaghuzi agha mu Bayibolo nu kwamula amalalusyo.

Belenga Mika 5.2 ukuti mumanye ko Umesiya akalondiwanga ukupapiliwa.b

Nkimba ukupapiwa kwa Yesu kukakwanilisya ubulaghuzi ubu?—Matayi 2.1.

Belenga Salimo 34.20; Zekariya 12.10 ukuti mumanye vyo Ibayibolo likanenela zila ivyakukwafyannya ni mfwa ya Mesiya.

Ka amabulaghuzi agha ghakakwanilisiwa naloli?—Yohani 19.33-37.
Nkimba mukwinong’ona ukuti chikaba chipepe ukuti u Yesu akwanilisye amabulaghuzi agha?
Ka ivi vikubamanyisya choni ivya Yesu?

6. Tukupindula pala tukumanyila ivya Yesu

Ibayibolo likutumanyisya ubwiza ubwakumanyila ivya Yesu sona vyo u Chala akulonda ukuti abombe. Belenga Yohani 14.6; 17.3, nu kwamula ilalusyo ili:

Choni cho tubaghiye ukumanyila ivya Yesu?

U Yesu akumanyisya igulu ilya banavuli, abakolo na bana. — U Yesu akighula **izila** ukuti tube pabumanyani nu Chala. Akamanyisya ubwanaloli ubwakukwafyannya nu Yehova sona ukwendela mwa yuyo tukwiza ukwagha **ubumi** bwa bwila na bwila.

VYO BAMO BAKUNENA: “Abakaboni ba Yehova batakusubila mwa Yesu.”

Nkimba mungamula buli-buli?

IFUNDO IZYAKUDUMULA

U Yesu wantumi uwamaka. Mwana wa Chala sona we Mesiya.

Ukunyokelamo

Choni cho u Yesu “we katote yuyo ali pamwanya pavipeliwa vyosi”?
Ka u Yesu akabombagha choni bo atizite pachisu ichapasi?
Nkimba tukumanya buli-buli ukuti u Yesu we Mesiya?

Twamala ukumanyila pa:

Ivyakuti mubombe

Enelezya idilama ilyakuti ‘Chiuta Wakamuzgora Kuŵa Fumu na Khristu’—Chigaŵa 1 pamo belenga Luka chaputala 2 nu 3 ukuti mumanye ubumi bwa Yesu po akaba pachisu ichapasi.

Ivyamwabo:

Your other goal

IFUNDO IZYAKONGELEZYAPO

Manya ivyinji vyo vikutwavwa ukumanya ukuti u Yesu we Mesiya.

“Nkimba Amabulaghuzi Aghakunena Izya Mesiya Ghakulangizya Ukuti u Yesu we Mesiya?” (Inkani iya pa intaneti)

Ennya vyo Ibayibolo likumanyisya ukuti mumanye nanti u Chala akapapa u Yesu ukuba mwana wache ngati mo umuntu akupapila umwana.

“Choni cho u Yesu Akwitiziwa Ukuti Mwana wa Chala?” (Inkani iya pa intaneti)

Manya ichifukwa cho ichimanyisyo ichakuti kuli Abachala Batatu mwa Chala weka te chakufuma mu Bayibolo.

“Kasi Yesu Ni Chiuta?” (Ichitembe cha Mulindilili icha Chitumbuka, Epulelo 1, 2009)

Manya mo ukumanya vyo Ibayibolo likunena pa nkani iya Yesu vikamutulila umukolo yumo.

“Mwanakazi Wachiyuda Wakulongosora za Chipulikano Chake” (Wukani!, Meyi 2013)

a Mu Mutu 26 nu 27 tukwiza pakwennya ichifukwa cho abantu bakalondiwanga ukupokiwa sona na mo u Yesu akatupokela.

b Ennya Ivyakubumalilo 2 ukuti mumanye akabalilo akenecho ko u Yesu akabonekela pachisu.