UMUTU 17
Nkimba u Yesu Ali na Nkalo Buli?
Pala tukumanyila vyo u Yesu akanena nu kubomba bo ali pachisu, tukumanya inkalo zyo ali nazyo zyo zikutwavwa ukuti tube nawe pabumanyani sona nu Tata wache, u Yehova. Nkimba nkalo buli zimo zyo u Yesu ali nazyo zyo zikubahobosya? Sona ka uswe tungamuyezya buli-buli u Yesu pa bumi bwitu?
1. Ka u Yesu ali ngati we Baba wache mu zila buli?
Bo u Yesu ali kumwanya, akamwennyanga u Tata wache uwalughano, sona akamanyilaghako ukwa myaka amabiliyoni aghinji. Ivi vikapangisya ukuti inong’onaghe, ayivwanje sona abombaghe ivintu ngati we Baba wache. (Belenga Yohani 5.19.) Po tunganena ukuti u Yesu akukonka nkani inkalo izya Baba wache cho chifukwa akanena ukuti: ‘Umuntu wesi yuyo anennya, amwennya nu Tata wepe.’ (Yohani 14.9) Nanti mukubukilila ukumanyila inkalo zya Yesu popo inti mumumanye akiza u Yehova. Umwakufwanikizya, mo u Yesu akabinong’onelagha abantu vikulangizya mo u Yehova akubapasikizizya.
2. Ka u Yesu akalangizya buli-buli ukuti amughanite u Yehova?
U Yesu akati: ‘Loli abantu aba muchisu ichapasi ichi bamanyaghe ukuti une mughanite u Tata. Ichi cho chifukwa nkubomba chosi chicho u Tata akundamula.’ (Yohani 14.31) Bo u Yesu ali pachisu ichapasi akalangizya ulughano ulukulu kwa Taba wache ichifukwa chakuti akamwivwilagha napo ubumi bwache bukaba pa ngozi. Sona ichifukwa ichakuti akamughana nkani u Tata wache akalondagha ukunena ivya yuyo akabalilo kosi sona akabavwanga abantu ukuti bope babe pabumanyani nu Yehova.—Yohani 14.23.
3. Ka u Yesu akalangizya buli-buli ukuti abaghanite abantu?
Ibayibolo likunena ukuti u Yesu ‘akuhoboka nkani na bana ba bantu.’ (Isya Mbupingamu 8.31) Akalangizya ulughano lwache pakubaghomya abantu. Iviswigho vyo akabombagha vitakalangizyanga bulo amaka gho akaba nagho loli vikalangizyanga sona ukuti akabinong’onelagha abantu. (Maliko 1.40-42) Aliwesi akabombagha nawe akiza ivintu sona atakasalagha. Amazyu ghache ghakabasangalusyanga abantu sona ghakapelekagha ulusubilo ku bo bakaba nu moyo uwakulonda ukwivwisya. U Yesu akiyipa pakutamiwa nu kufwa ichifukwa cha lughano lo akaba nalo ku bantu bosi. Loli abaghanite nkani abantu bo bakukonka vyo akumanyisya.—Belenga Yohani 15.13, 14.
MANYA IVYINJI
Manyila ivyinji ivyakukwafyannya ni nkalo izya Yesu. Sona ennya mo mungabombela ukuti mulangizyanje ulughano ni chisa ngati mo akabombelagha.
4. U Yesu amughanite u Baba wache
Ichifwanikizyo cha Yesu chikutumanyisya mo tungalangizizya ulughano kwa Chala. Belenga Luka 6.12; Yohani 15.10; 17.26. Nanti mwabelenga isimbo lililyosi, mwamule ilalusyo ili:
Nkimba tungamukonka buli-buli u Yesu nu kulangizya ukuti tumughanite u Yehova?
U Yesu akamughana u Baba wache uwakumwanya sona akanenagha nawe mu lwiputo akabalilo kosi.
5. U Yesu akubavwanga abantu bo bakulondiwanga ubutuli
U Yesu akapasikizyanga nkani abantu ukuchila mo akipasikizyanga mwene. Napo akabanga wakulita, loli akabombezyanga akabalilo na maka ghache ukuti abavwe abantu. Belenga Maliko 6.30-44, nu kwamula amalalusyo agha:
Ukuyana ni nkani iyi, nkimba choni cho chikulangizya ukuti u Yesu akabinong’onelagha abantu?—Ennya pa vesi 31, 34, 41, nu 42.
Choni cho chikamupangisya u Yesu ukuti abavwange abantu?—Ennya vesi 34.
Ichifukwa chakuti u Yesu akalangizya inkalo zya Yehova, Ka ivi vikubamanyisya choni ivya Yehova?
Nkimba zila buli zyo tungalangizya ukuti tukwinong’onela abamwitu ngati we Yesu?
6. U Yesu wachisa
U Yesu atakaba ni vintu ivyinji loli akagabilaghako abantu vyo akaba navyo. Mo akulondela ukuti nuswe tubombelaghe. Belenga Imbombo 20.35, nu kwamula ilalusyo ili:
Ngati we Yesu, ka tungabomba buli-buli ukuti tube bakuhoboka?
Enelezya IVIDIYO, nu kwamula ilalusyo ili:
Nkimba tungabomba choni ukuti tubapanjeko abamwitu napo tutali ni vintu vyinji?
Ka muzimenye?
Ibayibolo likutumanyisya ukuti twiputaghe kwa Yehova ukwendela mwizina lya Yesu. (Belenga Yohani 16.23, 24.) Nanti tukwiputa muzila iyi, tukulangizya ukuti tukupalizya vyo u Yesu akabomba pakutwavwa ukuti tube pabumanyani nu Yehova.
VYO BAMO BAKUNENA: “U Chala atakutupasikizya nanti uswe tukutamiwa.”
Pakuti u Yesu akalangizya inkalo zya Baba wache, ka ivyakubomba vyache vikulangizya buli-buli ukuti u Yehova akutupasikizya?
IFUNDO IZYAKUDUMULA
U Yesu amughanite u Yehova sona abantu. Pakuti u Yesu ayanite nu Baba wache, nanti mwamumanya u Yesu popo inti mumumanye sona akiza u Yehova.
Ukunyokelamo
Nkimba tungalangizya buli-buli ukuti tumughanite u Yehova ngati mo u Yesu akabombelagha?
Nkimba tungalangizya buli-buli ukuti tubaghanite abantu ngati mo u Yesu akabombelagha?
Ka nkalo buli iya Yesu yo yikubahobosya nkani?
IFUNDO IZYAKONGELEZYAPO
Manya inkalo zimo izya Yesu zyo mungakonka.
“Kuti Muyezge Yesu . . .” (Yesu ni Nthowa, Unenesko, na Umoyo, peji 317)
Manya ichifukwa cho tubaghiye ukwiputa mwizina lya Yesu.
Ka Ibayibolo likunena chilichosi ichakukwafyannya na mo u Yesu akabonekelagha?
“Ka u Yesu Akabonekagha Buli-buli?” (Inkani iya pa intaneti)
Nkimba tukumanyilapo ichoni pa mo u Yesu akabombelagha ivintu na bakolo?