UMUTU 47
Nkimba Mwisengannya Ukuti Moziwe?
Po mwamanyilagha Ibayibolo mwamanyila ivintu ivyinji ivyakukwafyannya nu Yehova. Tukumanya ukuti mwasinta ivintu ivyinji ukuti mukonke vyo mwamanyilagha. Loli akabalilo kamo pangaba ivintu vimo vyo vingatupangisya ukuti tupotwe pakwipeleka nu koziwa. Mu mutu ughu inti tumanyile intamyo zimo zyo zingatupangisya ukuti tupotwe pa koziwa sona na mo tungabombela ukuti tuzipote.
1. Nkimba mukulondiwa ukumanya ivintu ivyinji nkani ukuti moziwe?
Ukuti moziwe mukulondiwa “ukubumanya akiza ubwanaloli.” (1 Timoti 2.4) Loli ichi chitakung’anamula ukuti mukulondiwa ukumanya amaansala ghosi aghamalalusyo ghosi agha mu Bayibolo. Sona Abakilisitu bo bakoziwa kale bope bakubukilila ukumanyila Ibayibolo. (Aba Kolosi 1.9, 10) Loli mukulondiwa ukuvivwisya ivimanyilo ivyabwandilo ivya mu Bayibolo. Abasongo bachipanga bakwiza pakubavwa ukuti mumanye waghe mukwivwisya ivimanyilo ivyabwandilo ivya mu Bayibolo.
2. Nkimba mubaghiye ukubomba choni po muchili pakoziwa?
Po muchili mutoziwe mukulondiwa ukuti “muzileke imbibi zyinyu nu kupindukila kwa Chala.” (Belenga Imbombo 3.19.) Ivi vikung’anamula ukuti mubaghiye ukwiputa kwa Chala ukuti abahobokele imbibi zyosi zyo mukabomba kwisinda. Mubaghiye ukubukilila ukubikapo u moyo ukukana ukubomba ivintu ivibibi nu kubomba ivintu vyo vikumuhobosya u Yehova. Umwakongelezyapo mubaghiye ukwayiwa pa nkomano izya pachipanga sona nu kulumbilila poka ni chipanga ngati mulumbilili uwambula koziwa.
3. Choni cho mutabaghiye pakoghopa ukoziwa?
Bamo bakuba ni lyogha ukuti te bakwanilisye vyo bakamulayizya u Yehova. Momumo, ichifukwa chakuti abanavuli na bakolo abasubaliwa bo bakutambuliwa mu Bayibolo bope bakapuvyanga, akabalilo kamo nuswe bulo tungapuvya. Loli u Yehova azimenye ukuti ababombi bache batangabomba ivintu umwakufikapo. (Belenga Salimo 103.13, 14.) U Yehova akuba wakuhoboka sana waghe tukuyezyayezya ukubomba vyo tungakwanisya sona akwiza pakutwavwa. Ubwanaloli bwakuti u Yehova akutusimikizya ukuti ‘nachimo-chimo chicho chingatupaghulannya uswe nu lughano lwache.’—Belenga Aba Loma 8.38, 39.)
MANYA IVYINJI
Ennya vyo mungabomba ukuti mumalane ni ntamyo zyo zingabapangisya ukuti mupotwe ukoziwa umwakumumanya akiza u Yehova nu kupokela ubutuli bwache.
4. Mumumanye akiza u Yehova
Nkimba mubaghiye ukumanya vintu buli ivyakukwafyannya nu Yehova po muchili ukoziwa? Mukulondiwa ukumumanya akiza, ukumughana sona ukubomba vyo vingamuhobosya. Enelezya IVIDIYO ukuti mwennye mo abamanyili aba Bayibolo pachisu chosi bakubombela ukuti babukilile ukumughana u Yehova. Nu kwamula ilalusyo.
Ukuyana na vyo twennya mu vidiyo, choni cho chikabavwa bamo ukuti boziwe?
Belenga Aba Loma 12.2, nu kwamula amalalusyo agha:
Nkimba mukukayikila vyo Ibayibolo likumanyisya pamo vyo Abakaboni ba Yehova bakumanyisya?
Nanti vili bunubu, nkimba mungabomba choni?
5. Mungamalana ni ntamyo zyo zikubapangisya ukuti mutakoziwe
Nanti twasala ukwipeleka kwa Yehova nu koziwa twebosi tukwaghana ni ntamyo. Ukuti mwennye ichifwanikizyo, enelezya IVIDIYO, nu kwamula amalalusyo.
Ukuyana na vyo twennya mu vidiyo, nkimba u Narangerel akapota ntamyo buli ukuti amubombele u Yehova?
Nkimba ukumughana u Yehova kukamwavwa buli-buli ukuti apote intamyo izi?
Belenga Isya Mbupingamu 29.25; nu 2 Timoti 1.7, nu kwamula ilalusyo ili:
Choni cho chikutupa amaka ukuti tupote intamyo?
6. Musubilaghe ubutuli bwa Yehova
U Yehova akwiza ukubavwa ukuti mumuhobosye. Enelezya IVIDIYO, nu kwamula amalalusyo.
Ukuyana na vyo mwennya mu vidiyo, choni cho chikamupangisyanga umumanyili uwa Bayibolo ukuti atakoziwe?
Nkimba choni cho chikamwavwa ukuti aghomye ulusubilo lwache mwa Yehova?
Belenga Yesaya 41.10, 13, nu kwamula ilalusyo ili:
Choni cho mungaba nu lusubilo ukuti mukwiza pakukwanilisya vyo mukalayizya po mukipelekagha kwa Yehova?
7. Mupalizyanje ulughano lwa Yehova
Pala mukwinong’onela nkani ulughano lwa Yehova vikwiza pakubavwa ukuti mumupalizyanje nkani sona vikwiza pakubavwa ukuti mube nu moyo uwa kumubombela ubumi bwinyu bosi. Belenga Salimo 40.5, nu kwamula ilalusyo ili:
Nkimba visayo buli ivyakufuma kwa Yehova vyo umwe mukupalizya nkani?
Umulaghuzi u Yeremiya akamughanagha u Yehova na mazyu ghache, sona akapalizyanga ulusako ulwakumanyisya abantu izina lya Yehova. Akanena ukuti: ‘Amazyu ghinyu ghakuhobosya sona ghakusangalusya umoyo wane ichifukwa nkumanyikwa ni zina lyinyu Yehova Chala.’ (Yeremiya 15.16) Nu kwamula amalalusyo agha:
Choni cho lusako ulukulu sana pakuba twe Bakaboni wa Yehova?
Nkimba mukulonda ukoziwa ukuti mube mwe Bakaboni wa Yehova?
Nkimba chilipo chimo cho chikubalesya ukuti moziwe?
Nkimba mukulondiwa ukubomba choni ukuti moziwe?
VYO BAMO BAKUNENA: “Ntangakwanisya ukubomba vyosi vyo namulayizya u Chala waghe noziwa.”
Nkimba numwe momo mukiyivwila?
IFUNDO IZYAKUDUMULA
Nu butuli bwa Yehova mungapota intamyo yiliyosi ukuti moziwe.
Ukunyokelamo
Nkimba mukulondiwa ukumanya ichoni ukuti moziwe?
Nkimba vintu buli vyo mubaghiye ukusinta po muchili mutoziwe?
Choni cho mutabaghiye ukoghopa ukoziwa?
IFUNDO IZYAKONGELEZYAPO
Inong’onela ichifukwa cho mubaghiye ukoziwa.
“Kasi Ndimwe Ŵakunozgeka Kubatizika?” (Ichitembe cha Mulindilili icha Chitumbuka, Malichi 2020)
Manya mo mungabombela ukuti mupote intamyo zyo zingabapangisya ukuti mutakoziwe.
“Ntchivichi Chikunitondeska Kubatizika?” (Ichitembe cha Mulindilili icha Chitumbuka, Malichi 2019)
Ennya vyo umwanavuli yumo akabomba ukuti amalane ni ntamyo zyo zikamupangisyanga ukuti atakoziwe.
Pa bwandilo umwanavuli yumo u Ataa atakalondagha ukuti oziwe, ennya vyo vikamupangisya ukuti oziwe.