Ivintu Ivyakuhobosya na vyo Nkamanyila Pakumubombela u Yehova

Pakabalilo aka nkondo iya Bubili Pachisu Chosi, abapapi bane bakasama ukufuma ku Estonia nu kubuka ku Germany, ko nkapapiliwa. Nati napapiwa bulo, bakanda ukwisenyannya ukuti basamile ku Canada. Akaya kitu akabwandilo, kakaba kupipi nu Ottawa ku Canada, inyumba yo tukikalagha yikaba yidono sona tukikalagha poka ni nkuku. Tukaba bapina, loli tukabanga na mafumbi gho chikabanga chakulya icha pandabi-ndabi.

Isiku limo Abakaboni ba Yehova bakamubelengela umama wane isimbo ilya Ubuvumbuli 21.3, 4. Umama akati ivwa vyo isimbo ili likunena akahoboka sana, sona akanda pakulila. Imbeyu iya bwanaloli yikanda pakukula, umama nu baba bosi bakabukilila ukumanyila Ibayibolo, akabalilo kanandi bulo kakati kendapo bakaba bakwisengannya ukuti boziwe.

Napo abapapi bane batakanenagha akiza Ichizungu, loli bakabikaghapo umoyo pakumubombela u Yehova. Ichibelusi chilichosi, ubaba akasendagha unu nu Sylvia nu kubuka mu bulumbilili napo angaba ukuti abombite imbombo ubusiku bosi, ku kampani yimo iyakusungunula ivijela ku Sudbury, Ontario. Sona usabata aliwesi tukamanyilagha Ichitembe cha Mulindilili ngati mbumba. Umama nu baba bakanavwa ukuti imughanaghe u Chala. Ivi vikanavwa ukuti mu 1956 niyipe ubumi bwane kwa Yehova nu koziwa po nkaba ni myaka 10. Ukwinong’onelapo pa mo abapapi bane bakamughanila u Yehova, vikankazya ukuti nune mbukilile ukumubombela.

Nkati namalizya isukulu, ichinyonywa chane ichakumubombela u Yehova chikachepa. Nkinong’ona ukuti nanti ninganda ubupayiniya, vingapangisya ukuti ntakabe ni ndalama izyinji izyakuti nkwanilisye ichilota chane ichakuti nende nu kwennya ichisu. Nkayagha imbombo iyakujambula inyimbo ku wayilesi yimo, nkayighana sana imbombo iyi. Loli nkabombagha kuchamabwila vyo vikapangisya ukuti nande ukupotwa ukubuka ku nkomano sona nkanda ukuba pabumanyani na bantu bo batakumughana u Chala. Pabumalilo umabyebye wane uwakumanyisiwa Ibayibolo akanavwa ukuti isinte.

Nkasamila ku Oshawa, Ontario. Nkakomana nu Ray Norman, umuyemba wache u Lesli, na bapayiniya abamwabo. Bosi bakabomba ivintu ivyakuti niyivwe ukuti napokeleliwa. Ukuhoboka ko bakaba nako, kukanavwa ukwinong’onelapo ivyakukwafannya na vyo nkalondagha ukubomba pa bumi bwane. Bakankazya ukuti nande ubupayiniya, po mu Seputembala 1966 nkanda ubupayiniya. Nkaba ne wakuhoboka sona nkanda ukuhoboka nu bumi. Loli ivintu vimo vyo vikasinta ubumi bwane umwakuchenusya, vikaba papipi ukuti vibombiwe.

NANTI U YEHOVA AKUBUZYA UKUTI UBOMBE CHIMO, YEZYA PAKUCHIBOMBA

Po nkamanyilagha ku sekondale, nkasimba ifomu ilyakuti inje nande pakubombela ku Beteli iya ku Toronto, Canada. Pisinda pache, po nkabombagha ubupayiniya, nkitiziwa ukuti inje mbombele p Beteli ukwa myaka 4. Loli nkamughana nkani u Lesli, vyo vikapangisya ukuti nande pakoghopa ukuti mbuke ku Beteli, ichifukwa chakuti nkinong’ona ukuti nanti nabuka te nkamwennye sona. Akabalilo kakati kendapo, nkiputa ukufuma pasi pa moyo, ukufuma apo nkasala ukuti imbuke pakubombela ku Beteli loli chikaba chakubaba ukulaghana nu Lesli.

Ku Beteli nkabombagha imbombo iyakuchapa amalaya pakubombezya amachini, ukufuma apo nkaba ne mulembi. Pisinda pache, u Lesli akaba mupayiniya uwa padela ku Gatineau, Quebec. Nkanda pakuswigha na mo akabombela ivintu vyo vikapangisya ukuti nande pakwinong’ona nanti nkasala akiza. Loli pisinda pache pakabombiwa ichintu ichakuhobosya nkani pa bumi bwane. U Ray, umuyemba uwa Lesli, bakamwitizya ukuti ize abombelaghe pa Beteli. Nkanda ukwikalala nawe muchipinda choka! Ivi vikanavwa ukuti nande sona pakunenezannya nu Lesli. Tukasendana pa 27 Febuluwale 1971, pisiku ilya bumalilo ilya myaka 4 yo nkabombela pa Beteli.

Tukati twasendana, une nu Lesli bakatutuma ukuti tuye tubombelaghe ku chipanga icha chinenelo icha chi French ku Quebec. Pakati pendapo imyaka yinandi bulo po nkaba ni myaka 28, nkaswigha ukuti bakanitizya ukuti nande pakwendera idela. Nkinong’ona ukuti ne mwana munandi sona ntamenye ivintu ivyinji ukuti ningaba ne wakwendela idela. Loli amazyu gho ghali pa Yeremiya 1.7, 8 ghakankazya sana. U Lesli akapanga ingozi iya galimoto ivi vikapangisyanga ukuti atamiwange pakughona. Ivi vikati vyabombiwa, tukilalusya ukuti ka inti tukwanisye imbombo iya kwendela idela? U Lesli akanena ukuti, “Nanti u Yehova atubuzya ukuti tubombe chimo, ka tutakulondiwa ukuyezya pakuchibomba?” Ivi vikanavwa ukuti nitikizye imbombo iya kwendela idela yo tukayimbomba kwa myaka 17.

Pakabalilo ko nkendelagha idela nkaba ne wakutangwanika sana umwakuti ntakabanga na kabalilo akakukwana akakwangalila nu Lesli. Nkalondiwanga ukumanyila sona ichintu ichamwabo. Isiku limo pa Mande pandabi-ndabi ubelo uwa pamulyango akalila. Nkati nafuma ntakaghapo umuntu nayumo, loli nkagha ubasiketi yo mukaba kamwenda akapatebulo, ivipaso, chizi, buledi, ibotolo ilya vinyo, amagilasi aghakuvwala na kapepala, ko bakasimbapo ukuti, “Usale amalo aghakuti muye mulyele poka ichakulya ichi nu muchi wako.” Isiku ili likaba lyiza sana lyo kukaba kasannya. Loli nkamubuzya umuchi wane u Lesli ukuti te nkwanisye ukubuka, ichifukwa chakuti nkulonda ukwisengannya inkani yane. Akivwisya loli akadandaula. Po nkikala pamupando, umabyebye wane akanda pakuntamya. Nkinong’onelapo ifundo zyo zili pa Aba Efeso 5.25, 28. Nkinong’onelapo ukuti ka vyo visimbiwe mu mavesi agha vikulangizya ukuti u Yehova akunkumbusya ukuti mbaghiye ukupwelelela mo umuchi wane akwiyivwila? Nkiputa kwa Yehova, ukufuma apo nkamubuzya u Lesli ukuti, “Za tubukaghe,” vyo vikamuhobosya nkani umuchi wane. Tukabuka kumalo aghakuhobosya kupipi nu lusoko, nu kutenga akamwenda akapatebulo sona isiku ili likaba lisiku lyoka lyo tukahoboka nkani. Ukufuma apo nkasengannya inkani yane.

Tukahobokagha nkani ni mbombo iya kwendela idela, tukasama ukufuma ku British Columbia nu kubuka ku Newfoundland. Pakabalilo aka nkenda ubulendo bo nkanyonywanga ukwenda po nkaba ne mwana umunandi. Nkaba ni chinyonywa ichakuti ningabuka ku sukulu iya Giliyadi, loli ntakalondagha ukuti imbuke kuchisu ichamwabo. Nkennyanga ukuti abantu bo bakuba ba mishonale bakuba bantu abapadela, sona nkinong’onagha ukuti une vitangabombiwa ukuti imbe ne mishonale. Nkinong’onagha ukuti nanti ningingila isukulu iya Giliyadi, bangantumizya ku Africa ko kukaba imbina ni nkondo. Nkahobokagha nkani na mo nkikalila Canada.

BAKATWITIZYA UMWAKUCHENUSYA UKUTI TUBUKE KU ESTONIA NA KU BALTICS

Mu 1992, imbombo iyakulumbilila iya Bakaboni ba Yehova yikanda sona muvyisu vimo vyo kale vikaba mubulaghili ubwa Soviet Union. Abakamu bakatulaba nanti tungighana ukubuka ku Estonia nu kuba bamishonale. Tukaswigha hee, loli tukiputa ivyakukwafannya ni nkani iyi. Nkinong’ona sona ukuti, ‘Nanti u Yehova atubuzya ukuti tubombe chimo, ka tutakulondiwa ukuyezya pakuchibomba?’ Tukitikizya imbombo iyi, sona nkahoboka pakumanya ukuti tutakubuka ku Africa.’

Tukanda pakumanyila ichinenelo icha ku Estonia umwambula ukuchedwa. Pakati pendapo imyezi iyinji, bakatulaba ukuti twande pakubomba imbombo iya kwendela idela. Tukalondiwanga ukwendela ivipanga 46 na magulu ghatatu Estonia, Latvia, Lithuania sona ku Kaliningrad, Russia. Pakabalilo aka tukalondiwanga ukumanyila ichinenelo chimo icha Latvian, Lithuanian, na Russian. Loli chitakaba chipepe. Abakamu na bayemba wakahobokagha sana ichifukwa chakuti tukayezyanga ukumanyila ichinenelo chabo sona bakatwavwanga. Mu 1999, ku Estonia kukighuka iofesi sona nune nkasaliwa ukuti mbombaghe mukomiti iya nthambi iyi poka na bakamu aba, u Toomas Edur, u Lembit Reile, nu Tommi Kauko.

Tukamanyana na bakamu na bayemba abinji bo pabwandilo bakikalapo ku Siberia. Napo bakakomanagha ni nkaza izyakupambana-pambana ku jele sona bakaba kubutali ni mbumba zyabo loli batakakalala. Ichakuhobosya chakuti bakabukilila ukuba bakuhoboka nu kutangwanika ni mbombo iya kulumbilila. Ivi vikatwavwa ukuti nuswe twennye ukuti tungaba bakujimba nu kubukilila ukuba bakuhoboka napo tungakomana ni ntamyo inkulu.

Tukabomba umwakulimbikila nkani kwa myaka iyinji sona tutakaba na kabalilo akakukwana akakutuzya, ivi vikapangisya ukuti umuchi wane u Lesli ande pakwiyivwa ukuti wakulita. Tutakamanya mwalubililo ukuti u Lesli ali ni mbina yimo [fibromyalgia] yo yikapangisyanga ukuti iyivwange ukuti wakulita. Pakabalilo aka tukalondagha nkani ukuti tunyokele ku Canada. Pakabalilo ko bakatwitizya ukuti tuye twingile isukulu iya bakamu bo bakubombela pa ofesi ku Patterson, New York, U.S.A., tukakayikila nanti tungabuka. Loli tukati twalaba kwa Yehova ukuti atwavwe ukusala akiza pa nkani iyi, tukitikizya ukubuka. U Yehova akatusaya pa vyo tukasala. Pakabalilo ko tukaba ku sukulu iyi, umuchi wane u Lesli akabwagha ubutuli ubwa chipatala bo akalondiwanga. Ivi vikatwavwa ukuti twande pakubomba sona akiza imbombo yitu.

UKUSWIGHA UKUTI TWAYA KU CHISU ICHAMWABO

Tukati twanyokela ku Estonia, isiku limo pachamabwila mu 2008, nkapokela ifoni ukufuma ku hedikota yitu iyakutulaba nanti tungitikizya ukuti tuye tubombelaghe ku Congo. Nkaswigha sana, ichifukwa chakuti nkalondiwanga ukwamula mwalubilo pisiku ilyakukonkapo. Ntakamubuzya inkani iyi u Lesli, ichifukwa chakuti nkamanya ukuti nanti ningamubuzya atangaghona utulo. Mumalo mwache, une ne nkapotwa ukughona, ichifukwa chakuti nkamulabagha u Yehova ivyakukwafannya na vyo nkapasyanga pakubuka ku Africa.

Kukati kwacha nkati namubuzya u Lesli inkani iyi, tukinong’onelapo ukuti: “U Yehova akutubuzya ukuti tubuke ku Africa. Ka tukumanya buli-buli ukuti tutangakwanisya nu kuhoboka po tuchili tutayezizye?” Tukati twikala imyaka 16 ku Estonia, tukasamila ku Kinshasa, Congo. Iofesi yikaba na malo gho bakabyalako amaluba aghakuyemba sona ghakaba malo agha myee. Ichintu choka ichabwandilo cho u Lesli akabika mu chipinda chitu, likaba likadi lyo akasenda po tukafumagha ku Canada. Pikadi ili pakaba amazyu aghakuti “Muhobokaghe na kulikosi ko muli.” Nanti twamala inkomano, abakamu na bayemba bakamanyilagha Ibayobolo na bantu nu kunena mo bakahobokelagha ni mbombo iya bumishonale, ivi vikatwavwa ukuti ukuhoboka ko tukaba nako pakumubombela u Yehova kukule. Pakabalilo kamo, tukaba nu lusako ulwakwendela amaofesi aghakukwana 13 muvyisu ivinji mu Africa. Ivi vikatwavwa sana kuti tumanye ivyakukwafannya ni vintu ivyakupambana-pambana na bantu abakupambana-pambana. Pakabalilo aka, ntakapasyanga chilichosi ichifukwa chakuti indi ku Africa, sona nkamupalizya nkani u Yehova ichifukwa chakututuma ukuti twize tumubombelaghe ku Africa.

Ku Congo, bakatupanga ivyakulya ivyakupambana-pambana, vimo tukennyanga ukuti tutangakwanisya ukulya. Loli tukati twennya ukuti abakamu na bayemba bakuhoboka ni vyakulya ivi, tukayezya pakulya sona tukavighana sana ivyakulya ivi.

Tukabuka kubufumilo ubwi zuba ubwa chisu ichi ukuti tuye tubaghomye abakamu na bayemba bitu nu kubapa ivintu vyo bakalondiwanga. Kumalo agha, igulu ilya vigabenga vikasambukila utwaya nu kubavulazya abakolo na bana. Ivi vikapangisya ukuti ku malo agha abakamu na bayemba abinji batakabe ni vyakulondiwa pa bumi ivyakukwana. Napo vikaba bunubu, loli bakabukilila ukuba nu lusubilo ulyakuti abafwe bakwiza pakuzyuka, bakamughanagha nkani u Yehova sona bakaba basubaliwa ku gulu ilya Yehova, vyo vikaba vyakutughomya sana. Mo bakabombelagha ivintu, vikatwavwa ukwinong’onelapo ivyakukwafannya ni vifukwa vyo tukumubombela u Yehova nu kubukilila ukughomya ulwitiko lwitu mumwache. Abakamu na bayemba bamo bakaluza inyumba zyabo ni vyakulya vyo bakabyala. Ivi vikankumbusya ukuti akabalilo kosi tungaluza chilichosi cho tuli nacho mukabalilo akadono loli ubumanyani bwitu nu Yehova, bobo bwakulondiwa sana. Napo abakamu aba bakakomanagha ni ntamyo inkulu, loli bakaba bakuhoboka. Mo bakabonekelagha, kukatughomya ukuti nuswe twennyanje ukuti tungakwanisya ukujimba ku ntamyo zyitu.

IMBOMBO IMPYA KU ASIA

Pakabombiwa sona ichintu icha kuswighisya. Bakatubuzya ukuti tusamile ku ofesi iya ku Hong Kong. Tukaba ukuti tutinong’oneyepo ukuti tungize twikale ku Asia! Loli ichifukwa chakwennya ulughano lo u Yehova akatulangizya pa mbombo zyosi zyo twabombapo, tukitikizya ukubuka ku Asia. Mu 2013, tukalila pakulekana na bamanyani witu abaghaniwa ni chisu ichiza icha Africa, ichifukwa chakuti tutakamanyagha vyo twaya pakukomana navyo.

Ichifukwa chakuti itawuni iya Hong Kong yizuye na bantu abakufuma muchisu chosi, kukaba kusinta ukukulu sana ukuti tuye twikaleko. Ichinenelo icha Chinese chikutamya sana ukuchimanyila. Abakamu na bayemba bakatupokelela ni nyobe zibili sona tukahobokagha sana ni chakulya icha kumalo agha. Ku malo agha pa ofesi pakabombiwanga imbombo izyakupambana-pambana. Loli imitengo iya vintu ivyinji yikakwela mwalubilo sana. Akagulu Akakwenelezya kakasala umwamahala ukuti ukatundu yumo uwa ofesi aghulisyiwe. Ivi vikati vyabombiwa, mu 2015, tukasamila ku South Korea, ko tukabukilila ukubombela. Kope ku South Korea tukalondiwanga ukumanyila ichinenelo ichamwabo ichakutamya. Napo tukaba ukuti tutakunena akiza ichinenelo ichi, loli abakamu na bayemba bakatughomya umwakutubuzya ukuti tukuyezya-yezya ukunena akiza ichinenelo ichi.

VYO TUKAMANYILAPO PAKABALILO KO TUKAMUBOMBELAGHA U YEHOVA

Te chipepe ukupanga abamanyani abapya, loli tukazyaghannya ukuti nanti tungayezya-yezya ukubitizya abantu ukuti bize kunyumba yitu, vingatwavwa ukuti tumanyane nabo mwalubilo. Ivi vikatwavwa ukumanya ukuti abakamu na bayemba bitu, bakughanana sana napo bafumite muvyisu ivyakupambana-pambana nu kwennya ukuti u Yehova atupelite muzila iyakuti twighulaghe imyoyo yitu nu kuba na bamanyani abinji.—2 Koli. 6.11.

Tukennya ukulondiwa ukwakuba na bamanyani ngati mo u Yehova akubombela, nu kwennya mo u Yehova atughaniye namo akutulongozezya pa bumi bwitu. Pakabalilo kamo nanti twawa amaka pamo tukupasya nanti abakamu na bayemba batughanite, tukabelengagha sona amakadi na makalata gho abamanyani bitu bakatusimbila. Ukwennnya mo u Yehova akamulilagha inyiputo zyitu, kukatwavwa ukumanya ukuti atughanite sona kukatughomya ukuti tubukilile pakumubombela.

Kwa myaka iyinji une nu Lesli, twennya ukulondiwa ukwakwagha akabalilo akakwangalila poka napo tungaba ukuti tutangwanikite. Twamanya sona ukulondiwa ukwa kuseka nanti twapuvwa ivintu, nkani-nkani nanti tukuyezya-yezya ukumanyila ichinenelo ichipya. Isiku lililyosi ubusiku, tukuyezya-yezya ukwinong’onelapo ivintu vyo twahoboka navyo vyo vingapangisya ukuti tumupalizye u Yehova.

Ukunena ubwanaloli, ntakinong’onelapo ukuti ningize imbe ne mishonale pamo ukwikala ku chisu ichinji. Namanyila ubwiza bo bukubapo nanti ukusubila ukuti ungabomba ichintu chilichosi nu butuli ubwa Yehova. Nkukumbukila amazyu agha mulaghuzi u Yelemiya gho ghakuti: ‘Mwe Yehova, mwaswighisya une.’ (Yere. 20.7) Naloli, u Yehova atubombela ivintu ivyinji ivyakuhobosya sona atusaya muzila izya kumbapana-pambana zyo tutakinong’onelaghako, sona akwanilisizye ichinyonywa chane cho nkaba nacho po nkaba ne mwana umunandi ichakwenda pa ndege. Twenda pa ndege amalo aghakupambana-pambana gho ntakinong’onelapo po nkaba ne mwana umunandi, tukendela amaofesi ghitu muvyisu ivyakupambana-pambana pachisu chosi. Sona nkupalizya sana ukuti u Lesli akaba wakwisennyanga ukunavwa pa mbombo izyakupambana-pambana zyo nabombapo.

Akabalilo kosi nkuyezya ukukumbukila ukuti tukubomba chilichosi cho tungakwanisya, ichifukwa chakuti tumughanite u Yehova. Ivintu ivyiza vyo tukuhoboka navyo pakabalilo aka, vikulangizya bulo ivintu ivyakuhobosya vyo tukwiza pakuboka navyo kwa bwila na bwila nanti u Yehova iza ‘ighula inyobe yache nu kwikutisya ichinyonywa icha chipeliwa chilichosi.’—Sali. 145.16.