Like

10 Ha manima ma misamu mio, Mfumu wasôla milongoki 70 miakaka mpe wabatambika bole-bole mu mimvuka miamiansoni na ku mbuka zazansoni zi kaketi kwenda yandi beni. 2 Ha manima wabatêla: “Diangana, tisalu tia tia mbutu tia tinene tiena, kâ bisari ka biena biabingi ko. Buna, sambileno Mfumu ya tisalu tia tia mbutu katambika bisari mu bungu dia tisalu tiandi tia mbutu. 3 Yendeno! Nilutambikiri ntiana bimeme ha kati dia mbulu.* 4 Ka lunatandi bimpokoti,* peleko nkutu za bidia, peleko mapapa, mpe ka luhanandi muntu mbote* mu nzila. 5 Bu lukota mu nzo yimosi, tokoeno tâ: ‘Bîka ti tidzunu tiabâ mu nzo yi.’ 6 Tala ti ndiku ya tidzunu ye mô, tidzunu tieno mbo tibâ na yandi. Kâ tala ti ka yena mô ko, tidzunu tieno mbo tilukârila. 7 Buna bêno mu nzo yo, dieno mpe nweno bima bi baluhana, mu bungu ti tisari tifwanane mu baka mfutulu’andi. Ka lwendandi mu nzo na nzo.

8 “Kwakwansoni ku lukota ku mumvuka mpe ku balubwana, dieno bio bi batûla ha matu meno, 9 wasiseno mbevo zê kô mpe ba têleno: ‘Timfumu tia Nzambi tieka pene-pene na beno.’ 10 Kâ kwakwansoni ku lukota ku mumvuka mpe ku balembo lu bwana, dukeno mu nzila zandi za zinene mpe têno: 11 ‘Banza mfumfuta za mumvuka’eno zinamatane mu malu meto za tulukuburiri. Kâ zabeno ti Timfumu tia Nzambi tieka pene-pene.’ 12 Wa nita lu têla, nsembolo yi baka Sodome mu tilumbu tîna, yiyôkele bubote na ya mumvuka wo.

13 “Tiari kwe nge Korazine! Tiari kwe nge Betisayida, mu bungu ti bimangu biasalamane kwe beno, tala ti ku Tire na ku Sido biasalamana, ngâ ntama bantu bawu basoba mabanza bu baketi lwata ngoto na bu baketi zakalala bombi. 14 Ntiangu, nsembolo yi baka Tire na Sido mu ntangu ya mfundusu, yiyôkele bubote na ya beno. 15 Mpe nge Kafarnawome, benzi ti mbo bakuzangula tii ku zulu? Mbo kôka ku Ndiamu!*

16 “Wô lu wirikila kungwirikiri mpe. Mpe wô lukala kunkariri mpe. Musamu wakaka, wô kunkala kariri mpe wô wakuntambikiri.”

17 Ha manima milongoki 70 miakâla na nsayi, batâ: “Mfumu, banza bademo beto bata tumamana bu tuta sarila nkumbu’aku.” 18 Buna Yezu wabatêla: “Satana nita timwina tûkiri ku zulu mpe ta bwa ntiana mutsamina wa nzazi. 19 Tala! Niluheni lutumu mu diata ku nsi’a malu meno nioka na nkala-nseke, niluheni mpe lenda dia nunga ngolo zazansoni za mbeni, mpe ka kwena tima ko tilusa bubi. 20 Kâ ka lubândi na nsayi mu bungu ti mpeve beno zita tumamana; kâ bêno na nsayi mu bungu ti nkumbu zeno zatsonama zena ku mazulu.” 21 Mu ntangu yîna kwa, mpeve santu yamufulusa mu nsayi mpe watâ: “Nikukembele Tata ha lungiri bantu, nge Mfumu ya zulu na ya mutoto, mu bungu ti watomono sweka misamu mio kwe bantu bê na ndwenga na bê na mayela, mpe wazabikisi mio kwe bala ba fioti. Yee, Tata, mu bungu ti wazololo ti misamu miabêla bo. 22 Tata’ani wakungeni bima biabiansoni, mpe ka kwena muntu ko zebi Mwana tala ti ka Tata ko, mpe, ka kwena muntu ko zebi Tata tala ti ka Mwana ko na muntu wô Mwana wu kazololo mu zabikisa Tata.”

23 Buna wabaluka kwe milongoki mpe wabatêla ha bawu kaka: “Nsayi kwe meso mata mona misamu mi luta mona. 24 Mu bungu ti wa nita lu têla, mbikuri zazingi na mitinu badinga mu mona bima bi luta mona kâ ka bamona bio ko, mpe badinga mu wâ misamu mi luta wâ kâ ka bawâ mio ko.”

25 Mpe tala! Bakala dimosi diatomo zaba Musiku diatelama mu mu tonta, mpe wamuyula: “Mulongi nti mfweti sa mu baka luzingu lwa mankululu?” 26 Yezu wamutêla: “Nti batsoneka mu Musiku? Nti tangaka mô?” 27 Yandi wavutula: “‘Fweti zolo Yehova* Nzambi’aku mu mutima’aku wawansoni, mu tilundi* tiaku tiatiansoni, mu ngolo zaku zazansoni na mu mabanza maku mamansoni’ mpe ‘fweti zolo mpwana’aku ntiana nge beni.’” 28 Yezu wamutêla: “Mvutu ya mbote heni; tatamana mu sila bo mpe mbo baka luzingu.”

29 Kâ mu bungu ti weri nandi kasongela ti wa sungama wena, bakala dio diata kwe Yezu: “Mu matieleka mpwana’ani ni nani?” 30 Yezu wamuvuturila: “Muntu wumosi watûka ku Yerusaleme weri kôkaka ku Yeriko, mivi miamubwila, miamuwuka bima bieri nandi, miamutwa, miamutabula ngambu mpe miayenda. 31 Nganga-nzambi, yimosi yeri yôkelaka mpe mu nzila yo, kâ bu kamumona, sobele lweka. 32 Mpila mosi mpe Levite yimosi yatula ku mbuka yo mpe yamumona, yandi mpe wasoba lweka. 33 Kâ Musi-Samaria wumosi weri yôkelaka mu nzila yo watula pene-pene na yandi, mpe bu kamumona, tiari tiamubaka. 34 Buna wapusana he yandi, watsamuna mafuta na vinu ha mputa zandi mpe wakanga zo. Ha manima wamunakisa ha zulu tibulu tiandi, wamunata mu nzo ya banzenza mpe wamukipa. 35 Tilumbu tialanda wabonga denie* zole, wahana zo kwe bakala dikipaka nzo ya banzenza, mpe wamutêla: ‘Mu kipa, mpe mbongo zakaka zivutu sarila, mbo nikufuta zo bu nikâla.’ 36 Kwe nge, mu ba batatu nani songele ti muntu wu babwiriri kwe mivi mpwana’andi yena?” 37 Watâ: “Ni wô mu songele tiari.” Buna Yezu wamutêla: “Yenda! nge mpe sila bo.”

38 Bu bayenda, wakota ku hata dimosi. Kûna, mukento wumosi wu beri tâka Marte wamubwana ku nzo’andi. 39 Mpangi yabâ nandi yi beri tâka Maria, wazakala ha malu ma Mfumu mpe weri wirikilaka misamu mi keri tâka.* 40 Ku lweka lwakaka Marte watûla mutima mu bisalu biabîngi bi keri salaka. Wapusana kwe Yezu mpe wamutêla: “Mfumu, ngano ka wuta ku sa buma ko, mpangi’ani bu kakunsisiri me kaka mu sala bisalu biabiansoni? Mu têla kiza kakumbakisa.” 41 Mfumu wamuvuturila: “Marte, Marte lwaka lwe naku mpe mpasi ta mona mu bungu dia misamu miamingi. 42 Kâ misamu fioti, peleko wumosi kwa wê mfunu. Maria yandi sôlele tikunku tiyôkele bubote, mpe ka bamukatula tio ko.”