Kwe Bisi-Galate
4 Nilutêlele ti muntu wubiarila fwa bu katiri kwa mwana fioti, kena wa swaswana ko na ngamba, ni bu sa ti mfumu yena ya bima biabiansoni, 2 kâ yandi mu lutumu lwa minkengi kena na lwa bantu bakipaka nzo’andi tii ntangu ya sôla tata’andi. 3 Mpila mosi mpe, beto mpe bu tweri bala ba fioti, tayizi bâ ngamba za misamu mia fioti-fioti mia nza. 4 Kâ ntangu bu yafwana, Nzambi watambika mwana’andi wabutuka mu nzila ya mukento wumosi, mpe mwana wo mu lutumu lwa musiku wabâ, 5 ngatu kafuta ntalu yifwanane mu kûla bantu bê mu lutumu lwa musiku, mpe Nzambi katutambula ntiana bala bandi.
6 Mu bungu ti bala lwena, Nzambi watambika mpeve ya Mwana’andi mu mitima mieto, mpe mpeve kawula yita kawula: “Abba,* Tata!” 7 Buna kusiri’â ngamba ko, kâ nge mwana wena; mpe tala ti nge mwana wena, buna nge muntu wena wubiarila fwa mu nzila ya Nzambi.
8 Bu lwalembo zaba Nzambi, beno ngamba zeri za nzambi za bungungu. 9 Kâ bwawu bu bu luzebi Nzambi, peleko Nzambi bu kaluzebi, bwe wulendi bêla ti lwavutu kârila misamu mia fioti-fioti, mia mpamba-mpamba mpe milembolo mfunu, mpe lwadinga mu vutu bâ ngamba za misamu mio? 10 Bilumbu, ngonda, ntangu na mivu lutomo zitisaka. 11 Bunkuta bwe nani ti ngolo zazansoni zi nasiri mu bungu dia beno zabâ kwa za mpamba.
12 Bampangi, mulemvo’eno, bêno ntiana meno, mu bungu ti meno mpe ntiana beno nabâ. Ka lwakundirikiri’â musamu wa mbi ko. 13 Kâ luzebi ti ni timbevo tiakungeni bweso bwa lu samunina nsangu za mbote mbala ya ntete. 14 Mpe ni bu sa ti timbevo tiani musamu wa mpasi wabêle kwe beno, ka lwakumbongele’â mu mpila ya mbi ko mpe ka lwakumweni’â ntonto* ko; kâ lwakumbweni ntiana mbazi ya Nzambi, ntiana Kristo Yezu. 15 Ngano nsayi yabêle neno kwe yele? Mu bungu ti ndendi tâ timbangi ti, tala ti lenda diabêle neno, mbo lwaketi katula meso meno mu kungana mo. 16 Buna, ndieka mbeni’eno mu bungu ti matieleka nita lu têla? 17 Miamiansoni bata sa mu lu wisa, kâ ka bena na mabanza ma mbote ko; bazololo mu lu hambasa na meno, ngatu lwabâ na nsatu ya ngolo ya ba landa. 18 Musamu wa mbote wubâka ntangu zazansoni muntu bu wudingaka mu lu wisa tala ti mabanza ma mbote me nandi. Kâ ka wuyilamandi kwa mu ntangu yi nibâka ha kati dieno. 19 Bala bani ba fioti, mpasi nita vutu mona mu bungu dia beno ntiana zo zi monaka mukento wuta buta. Mbo nitatamana mu mona mpasi zo tii ntangu yi moneka* timuntu tia Kristo mu beno. 20 Nzololo nabâ na beno bwawu bu na mu lu zonzela mu mpila yakaka, mu bungu ti ka nita vutu zaba ko nti nibanza mu bungu dia beno.
21 Kuntêleno, beno luzololo mu tumamana musiku, ngano ka luwâka misamu mi tâka Musiku ko? 22 Mu tifwani, watsonama ti Abrahame wabuta bala bole ba babakala, wumosi mu nzila ya mukento weri tisari mpe wakaka mu nzila ya mukento walembo bâ ngamba. 23 Kâ mwana wo wabutuka mu nzila ya mukento wabâ tisari, wabutuka ntiana kwa bu butukilaka bantu babansoni,* mpe wô wabutuka mu mukento walembo bâ ngamba, mu nzila ya kani kabutukila. 24 Misamu mio tifwani tiena tia misamu mikwiza ku matu. Bakento bo tuwawanu twole bata songela. Luwawanu lumosi ni lwa Mongo wa Sinayi luta buta bala ngatu babâ ngamba, mpe lufwanakane na Agare. 25 Agare monekese Mongo wa Sinayi, mongo wumosi wê ku Arabi, mpe yandi fwanane na Yerusaleme ya lumbu ti, mu bungu ti yandi na bala bandi ngamba zena. 26 Kâ Yerusaleme ya ku zulu timpwanza tie nandi, mpe ni yandi nguri’eto.
27 Mu bungu ti watsonama: “Bâ mu nsayi, nge mukento wê tisita, nge lembolo na bala. Kawula mu nsayi, nge mukento wulembolo na mpasi za buta; mu bungu ti mukento wu bayambirika bala babingi bê nandi yôka mukento wê na bakala.” 28 Bwawu bu bampangi, beno lweka bala ba kani mpila mosi na Izake. 29 Ntiana kwa mwana wabutukila mu mpila yi butukilaka bantu babansoni* weri kwamisaka mwana wabutuka mu nzila ya mpeve, ni bo mpe wena bwawu bu. 30 Buna, matsonoko bwe matâka? “Kuma mukento wê tisari na mwana’andi, mu bungu ti na kani fioti mwana’andi ka wubiarila fwa ko na mwana wa mukento wulembolo ngamba.” 31 Dieka bo, bampangi, ka twena bala ba mukento ko wê tisari, kâ bala twena ba mukento wulembolo ngamba.