Kwe Bisi-Galate

6 Bampangi, tala ti muntu wuyirikiri musamu wa mbi na kondo kwa zaba, beno lwe na lenda dia timpeve, dingeno mu sungika muntu wo na bulembami. Kâ sa keba nge beni, ngatu nge mpe walembo kota mu ntontolo. 2 Tatamaneno mu kwe natasane madema beno na beno, buna mbo lulungisa musiku wa Kristo. 3 Muntu kamana banza ti yandi yôkele, kâ yandi muntu wa mpamba kwa wena, hunakane. 4 Kâ muna muntu kataluzula tisalu tia yandi beni, mpe buna mbo kabaka musamu wu kabêla mu nsayi mu bungu dia yandi beni, kani katifwanakasa na muntu wakaka. 5 Mu bungu ti muna muntu mbo kanata dema dia yandi beni.

6 Musamu wakaka ni wena’eti, muntu wu bata longesa zu dia Nzambi fweti kabana bima biabiansoni bia mbote na muntu wuta dia mu longesa.

7 Ka luwubakanandi: Nzambi ka bamuseheselaka ko, mu bungu ti bio bi kunaka muntu ni bio mpe katiaka; 8 muntu wuta kuna mu bungu dia nitu’andi mbo katia mbi mu bungu dia nsatu zandi za masumu. Kâ muntu wuta kuna mu bungu dia mpeve, mbo kabaka luzingu lwa mankululu lutûkiri mu mpeve ya Nzambi. 9 Buna ka tubîkandi mu yirika misamu mia mbote, mu bungu ti mbo tutia mbutu mu ntangu yifwanane tala ti ka tufwatikiri’â* ko. 10 Ntangu zazansoni zi tubâka na bweso, tayirikaka mbote kwe bantu babansoni, kâ nsungula kwe mpangi zeto zi twe tintwari mu timinu.

11 Taleno bwe bitsono bi nilutsonekene mu koko kwani bie bia binene.

12 Bô babansoni bata dinga mu moneka bantu ba mbote ha meso ma bantu,* ni bawu bata zolo lu tuma mu ngolo mu zengoso masutu. Ni bo bata sarila mu bungu ti ka bazololo’â mu mona mpasi ko za poto dia matimuna* dia Kristo. 13 Mu bungu ti ni bu wubâ bô bazengosoko masutu ka batumamanaka musiku ko, kâ bazololo ti lwatizengoso masutu ngatu batilwona mu bungu dia nitu’eno. 14 Kani kabwe meno ka nitilwona ko, kâ ndendi bwa sa mu bungu dia poto dia matimuna* dia Mfumu’eto Yezu Kristo, mu mabanza ma meno nza ya fwa yena mu nzila ya yandi,* mpe mu mabanza ma nza meno wa fwa ndiena mu nzila ya yandi. 15 Zengoso sutu peleko lembo zengoso sutu ka wena musamu wa mfunu ko, kâ musamu wa mfunu ni wena’eti Nzambi kasa ti lwabâ bantu ba môna. 16 Kwe bô babansoni balandaka ntumunu yo, bîkeno ti tidzunu na tiari tiabâ nawu, yee, kwe Israele ya Nzambi.

17 Tûka lumbu ti, na kani muntu ka wukunkwamisandi, mu bungu ti bidimbu bie nani mu nitu’ani bita songela ti meno ngamba ya Yezu yena.

18 Bampangi, bîka bweso bwa nzitukulu bwa Mfumu’eto Yezu bwabâ na mpeve yi luta songela. Amen.