Kwe Bisi-Galate
3 Ô Bisi-Galate, beno bizoba biena! Nani waluneti mu nzila yo ya mbi, beno ba batomo zonzela Yezu Kristo wu bakoma ha poto? 2 Tiyuvu timosi kwa nita zolo lu yula:* Ngano mpeve lwabakiri mu bungu ti nsalulu za musiku lwalungisi, peleko mu bungu ti timinu lwasariri mu mio mi lwawîri? 3 Ngano beno nkatika bizoba biena? Bu lwamana bîka timpeve tialutwarisa,* ngano ku nsuka mbo lutambula ti tinsuni tialutwarisa?* 4 Ngano mpasi zazingi zi lwamona za mpamba kwa zeri? Mbenzi ti ka zeri’â za mpamba ko. 5 Buna, muntu wo wuluhanaka mpeve mpe wuyirikaka misamu mia nzitukulu ha kati dieno, ngano mbo kasilaka bo mu bungu dia nsalulu za musiku zi lulungisaka, peleko mu bungu dia timinu mu misamu mi lwawâ? 6 Ntiana kwa Abrahame “watûla timinu tiandi mu Yehova,* mpe musamu wo wasa ti bamutâ muntu wa sungama.”
7 Wa matieleka luzebi ti ni bantu bê ba kangama mu timinu bê bala ba Abrahame. 8 Nzambi watâ mu matsonoko ti mbo kaketi tâ bantu ba makanda ba sungama mu bungu dia timinu tiawu. Yandi watitêla nsangu zo za mbote kwe Abrahame bu katâ: “Makanda mamansoni mu nzila’aku mabakila tusakumunu.” 9 Bô bê ba kangama mu timinu, tusakumunu bata baka tintwari na Abrahame weri na timinu.
10 Bô babansoni basikamanaka mu nsalulu za musiku ba loko bena, mu bungu ti ntiana bu watsonama: “Muntu ni muntu wulembo landa misamu miamiansoni mi batsoneka mu rulo ya Musiku mpe wulembo mia sarila, kabâ wa loko.” 11 Musamu wakaka ni wena’eti wutomono moneka ti ka kwena muntu ko wu balendi tâ wa sungama ha meso ma Nzambi mu nzila ya musiku, mu bungu ti “muntu wa sungama mbo wuzinga mu bungu dia timinu.” 12 Musiku ka wusikamanaka mu timinu ko. Kâ, “muntu wusarilaka misamu mio mbo wuzinga mu nzila ya misamu mio.” 13 Kristo watukûla bu katukatula mu ndoko ya Musiku, bu katambula ndoko ha tibuka tieto, mu bungu ti watsonama: “Muntu wu bakomene ha poto wa loko wena.” 14 Musamu wo wayilama ngatu lusakumunu lwa Abrahame lwizi kwe makanda mu nzila ya Kristo Yezu, mpe mu nzila ya timinu tieto tabaka mpeve yi bakanisina.
15 Bampangi, tifwani tia musamu wumosi wuyilamaka mu luzingu lwa bantu nita sarila mu lu zonzela: Luwawanu bamana lwa tambula, ni bu sa ti kwe muntu wumosi, ka kwena muntu ko lendi lwa honda peleko lendi lwa yika tima. 16 Makani basa kwe Abrahame na kwe mwana’andi.* Ka batâ ko ti “mpe kwe bala baku,”* mu zonzela bantu babingi. Kâ, batâ “mpe kwe mwana’aku,”* mu zonzela muntu wumosi, Kristo. 17 Mvutulu tâ: Musiku wayiza ha manima ma mvula 430, ka wuhondaka luwawanu lwa sa Nzambi ko, mpe ka wuhondaka kani ko. 18 Tala ti fwa mu nzila ya musiku dibawukila, ka divutu’â bawukila mu nzila ya kani ko; kâ ni mu nzila ya kani Nzambi kahanina dio kwe Abrahame mu luzolo lwandi.
19 Kâ mu bungu dia nti bahanina Musiku? Bahana wo mu tomo songela nsalulu zivwezaka Musiku, tii ntangu yaketi tûla mwana wu* basila kani; Musiku bahana wo mu nzila ya bambazi ha moko ma nzonzi yimosi. 20 Nzonzi ka yena salu ko tala ti musamu muntu wumosi kwa wuta tarila, mpe Nzambi yandi kaka kwa wena. 21 Ngano Musiku makani ma Nzambi wutelamanaka? Diangana kâni! Tala ti musiku wu bahana wabâ na lenda dia hana luzingu, mbo baketi tâ muntu wa sungama mu nzila ya musiku. 22 Kâ Matsonoko matûla bima biabiansoni mu lutumu lwa masumu, ngatu bô bê na timinu babaka bima bia mbote bi bakanisina kwe bô bê na timinu mu Yezu Kristo.
23 Kâ ntete timinu tiatûla, musiku beto weri kengerelaka, watukanga mu boloko bu tweri kêlaka ti timinu tiazabakana. 24 Buna, Musiku wayizi bâ ntwarisi’eto yinataka* kwe Kristo, ngatu batutâ ba sungama mu nzila ya timinu. 25 Kâ bwawu bu timinu bu titûriri, ka tusiri’â na nsatu ya ntwarisi* ko.
26 Wa matieleka, beno bansoni bala ba Nzambi lwena mu nzila ya timinu tieno mu Kristo Yezu. 27 Mu bungu ti beno bansoni lwabatusu mu Kristo, lwalweti Kristo. 28 Ka kusiri’â Muyuda ko peleko Greke, ka kusiri’â ngamba ko peleko muntu wa kûluka, ka kusiri’â bakala ko peleko mukento, mu bungu ti beno bansoni muntu wumosi lwena mu bumosi na Kristo Yezu. 29 Musamu wakaka ni wena’eti, tala ti Kristo lu vwiri, wa matieleka beno bala ba* Abrahame lwena, bantu babiarila fwa tintwari na kani.