Timinu tikotele mu ntontolo

Abrahame walongesa kwe mwana’andi Izake mu zolo Yehova na mu kwikila mu makani mandi mamansoni. Kâ, Izake bu keri kampe na mvula 25, Yehova walomba kwe Abrahame mu sa tima tia nkatika mpasi. Ngano nti kamulomba?

Nzambi watâ kwe Abrahame: ‘Mulemvo’aku, yenda ku hata dia Moria, mpe kûna, hana mwana’aku wa wumosi mu mukayulu ha mongo.’ Abrahame ka zaba ko mu bungu dia nti Yehova kamulomba musamu wa mpila yo. Kâ yandi watumama kwe Yehova.

Mu nkatika pari tialanda, Abrahame wayenda ku nsi ya Moria na Izake, mboko na bisari biandi bia biole. Ha manima ma nzietolo ya bilumbu bitatu mu malu, bawu bamona mongo wango ku matu mawu. Abrahame watâ kwe bisari biandi mu kêla, yandi na Izake bu bakwe hana mukayulu. Abrahame walomba kwe Izake mu nata nkuni, mpe yandi beni wabonga mbele. Izake wayula kwe tata’andi: ‘Ngano tibulu tia mukayulu kwe tiena?’ Abrahame wamuvuturila: ‘Yehova Yandi beni mbo katuhana tio mwana’ani.’

Bu batûla mu Mongo wûna, bawu batunga ziku. Abrahame wakanga misinga mu moko na mu malu ma Izake, mpe wamutûla ha ziku.

Abrahame wabonga mbele. Hô nkatika bendo, mbazi ya Yehova yamutâ mbila tûka ku mazulu, mpe yamutêla: ‘Abrahame! Kusandi bubi kwe mwana’aku! Bwawu bu, nzebi ti timinu tie naku mu Nzambi, mu bungu ti wa kubama bêle mu hana mwana’aku mu mukayulu.’ Ha manima, Abrahame wamona tindongo tia mbakala tiabâ na mampoka mahatamana mu muti. Yandi wasutula Izake mu ntinu, mpe wahana mukayulu wa tindongo ha tibuka tia Izake.

Tûka tilumbu tîna, Yehova watâ Abrahame ndiku’andi. Ngano zebi mu bungu dia nti? Abrahame misamu mieri mu lombaka Yehova keri yirikaka ntangu zazansoni, ni bu sa ti keri’â bakulaka misamu mi keri mu lombaka.

Yehova wakârila kani diandi kwe Abrahame: ‘Mbo nikusakumuna, mbo nifunisa bala baku na batekolo baku.’ Yehova wakanisina mpe ti mbo kaketi sakumuna bantu babansoni ba mbote mu nzila ya kanda dia Abrahame.