NDONGOSOLO 8
Abrahame na Sara batumama kwe Nzambi
Penepene na hata dia Babele, hata diabâ kô di beri tâka nkumbu Ure. Bantu beri bâka kô, nzambi zazingi beri sambilaka, kâ ka beri’â sambilaka Yehova ko. Ku hata dio, muntu wabâ kô weri sarilaka kwa Yehova. Nkumbu’andi Abrahame.
Yehova watâ kwe Abrahame: ‘Katuka ku nzo’aku na mu kanda diaku, mpe yenda ku nsi yi nikusongela.’ Ha manima, Nzambi wamukanisina: ‘Mbo bâ kanda dia dinene, mpe mbo nisa mbote kwe bantu babingi ha mutoto mu bungu dia nge.’
Abrahame ka zaba ko kwe Yehova keri dingaka kenda, kâ lukwikulu lwabâ nandi mu Yehova. Buna Abrahame, mukento’andi Sara, tata’andi Tera, na mwana wa mpangi’andi, Lote batumama kwe Nzambi. Bawu bakubika bima biawu, mpe basa nzietolo ya yila.
Abrahame mvula 75 za bâ nandi, bu batûla ku tizunga tiaketi ba songela Yehova, yandi na kanda diandi. Tizunga tiango, nsi ya Kana beri tia tâka. Ni kûna Yehova kamusila kani di: ‘Nsi yi yayansoni yita mona yikuzungiriri, mbo nihana yo kwe bala baku.’ Kâ Abrahame na Sara ba nuna babâ, mpe ka babâ na bala ko. Buna, bwe Yehova kaketi lungisila kani diandi?
“Mu timinu Abrahame [. . .] watumama bu katuka ku nsi’andi mu kwenda ku mbuka yi kaketi biarila; yandi wayenda, yandi ka zabi ku keri kwendaka.”—Bahebre 11:8