Mwana wu beri kêlaka wubutukiri!

Abrahame na Sara ba kwelana babâ tûka mvula zazingi. Bawu babika nzo’awu ya mbote ku Ure, mpe mu tivula beri bâka. Kâ Sara keri’â niongaka ko mu bungu ti lukwikulu lwabâ nandi mu Yehova.

Sara nsatu yayingi ya bâ nandi ya buta mwana, ni katâ kwe Abrahame: ‘Nzololo ti tisari tiani Agare kabuta mwana; mwana wo mbo wubâ ntiana kwa wa me beni.’ Ha manima, Agare wabuta mwana. Nkumbu’andi Ismayele.

Mvula zazingi ha manima, Abrahame bu kabâ na mvula 99, mpe Sara mvula 89, bantu batatu bayizi ba tala. Abrahame wabalomba mu huma ku nsia muti wumosi, mpe wabahana bidia. Ngano zebi bantu bango banani babâ? Mbazi zabâ! Bawu batâ kwe Abrahame: ‘Muvu wuta kwiza, mu ntangu ya mpila yi, mukento’aku na nge mbo lubuta mwana.’ Sara mu kati dia tivula kabâ, mpe wawâ misamu mi beri tâka. Yandi waseha ku mutima, mpe wabanza: ‘Ngano meno, ndendi vutu buta mwana, me ndie wa nkatika wa nuna?’

Muvu walanda, Sara wabuta mwana, ntiana bwa kanisina mbazi ya Yehova. Abrahame wamuhana nkumbu ya Izake, yizololo tâ “Tuseho.”

Izake bu kayizi bâ na mvula 5, Sara wamona ti Ismayele weri mu seheselaka. Mu bungu ti mwana’andi keri dingaka mu kengerela, Sara watâ kwe Abrahame mu kuma Agare na Ismayele. Ku mbatukulu, Abrahame ka zolo’â ko. Kâ Yehova mpe wadinga mu kengerela Izake. Buna Yehova watâ kwe Abrahame: ‘Wîla Sara. Mbo nikipa Ismayele. Kâ mu nzila ya Izake nilungisila makani mani.’