Ngano Yobe nani wabâ?

Ku nsi ya Uze, muntu wabâ kô weri sarilaka Yehova. Nkumbu’andi Yobe. Yandi mvwama yabâ, mpe kanda dia dinene diabâ nandi. Muntu wa mbote wabâ, bamputu keri bakisaka, bakento bafwilulu babakala na bala balembo bâ na bibuti. Yandi misamu mia mbote keri yirikaka. Ngano musamu wo wazolo tâka ti ka keti’â bwabana na mpasi ko?

Yobe keri’â zabaka ko ti Satana yandi keri talaka. Yehova watâ kwe Satana: ‘Ngano tisari tiani Yobe yandi mweni? Ka kwena muntu ko ntiana yandi ha zulu mutoto. Me kawirikilaka, mpe misamu mia mbote kayirikaka.’ Satana wavutula kwe Yehova: ‘Diangana, nge katumamanaka. Yandi kengerelaka, mpe yandi sakumunaka. Yandi hanaka misitu na bibulu. Mu katula bio biabiansoni, mpe mbo kabîka mu ku sarila.’ Buna Yehova watâ: ‘Lendi kotesa kwaku Yobe mu ntontolo. Kâ kumuhondandi.’ Mu bungu dia nti Yehova kabîka Satana katonta Yobe? Mu bungu ti lukwikulu lwabâ nandi ti Yobe mbo kaketi tatamana mu bâ wa kwikama.

Buna, Satana wamwisa Yobe mpasi zazingi. Ntete, watambika mivi, Bisi-Sabe, mu laba bibulu biandi na mabuluku mandi. Ha manima, tiya twahonda bindongo biandi. Mivi miakaka, Bisi-Kalde, bayizi bonga shamo zandi. Bisari bia Yobe bieri kêlaka bibulu biandi bahonda bio. Ha manima, musamu wa mpasi wamuturila. Bala babansoni ba Yobe bayizi fwa; nzo yi beri dîlaka yababwila. Yobe watomo bâ mu tiari. Kâ yandi kabika ko mu sarila Yehova.

Satana wazolo ti Yobe katomo mona mpasi. Buna wamutâ timbevo tia ngolo, mbutu-mbutu zeri mu dûkaka mu nitu yayansoni. Yobe nkesi keri monaka mu nitu. Yandi ka zaba ko mu bungu dia nti misamu mio miamiansoni mieri mu tûrilaka. Kâ, yandi watatamana mu sarila Yehova. Misamu mieri yôkaka, Yehova mia keri monaka, mpe nsayi yayingi yabâ nandi mu bungu dia ndiatulu ya Yobe.

Ha manima, Satana watambika bantu batatu mu kotesa Yobe mu ntontolo. Bawu bamutêla: ‘Kampe nge masumu yirikiri, mpe dingiri mu sweka mo. Nzambi ni nge kata semba.’ Yobe wabavuturila: ‘Ka ndirikiri’â musamu wa mbi ko.’ Ka Yobe wabatika mu banza ti misamu mio mia mbi, Yehova weri mia tulumunaka, mpe Yobe watâ ti Nzambi keri’â yirikaka misamu mia sungama ko kwe yandi.

Ntwenia yimosi yi beri tâka nkumbu Elihu yeri wâka bimoko biawu; kâ, ka tâ musamu ko. Ha manima, yandi watâ: ‘Misamu miamiansoni mi lutêle mia bungungu miena. Yehova tomono tu yôka, mpe ka tulendi’â tabakula misamu miamiansoni mu Yandi ko. Yehova ka sarilaka miangu ko. Misamu miamiansoni kamonaka, mpe bantu bê mu mpasi kabakisaka.’

Ha manima, Yehova wazonza kwe Yobe. Yandi watâ: ‘Kwe wabâ bu nasala zulu na mutoto? Mu bungu dia nti ta têla ti meno ka nisarilaka bunsungu ko kwe nge? Zonzele, kâ kuzebi’â ko mu bungu dia nti misamu mio mita ku tûrila.’ Yobe wabakula musamu wa mbi wu kayirika, mpe watâ: ‘Meno ndizi wubakana. Nsangu nakuwîriri; kâ bwawu bu, ntomono ku zaba. Nge, kulembanaka tima ko. Buna nikulombele mulemvo mu mio miamiansoni mi ntêle.’

Yehova wawasisa Yobe, mpe wamuhana bima yôka bio biabâ nandi ku mbatukulu. Yobe wayizi bâ na luzingu lwa nsayi, mpe lwa lula. Yehova wamusakumuna mu bungu ti yandi watumama, ni bu sa ti musamu wa mpasi wabâ. Ngano ntiana Yobe, mbo tatamana mu sarila Yehova mu misamu miamiansoni?